ƆNANGƐSO GUY HOLLIS PIERCE laki ose Olui-walɔmbɔla w’Ɛmɛnyi wa Jehowa akashidiya esakelo kande ka lowango lanɛ la nkɛtɛ Lushi la hende, Ngɔndɔ ka sato 18, 2014. Nde aki la ɛnɔnyi 79 etena kakakotshama elongamelo kande ka monga ɔmɔtshi l’atei w’anango Kristo wakolɔma.—Hɛb. 2:10-12; 1 Pet. 3:18.

Ɔnangɛso Guy Pierce akotɔ la Auburn, la Californie, l’États-Unis lo Ngɔndɔ ka dikumi l’ɔtɔi 6, 1934 ndo nde akabatizama lo 1955. Nde akatshuke wadɛnde la ngandji Penny lo 1977 ndo akakenge nkumbo. Diewo diande dia papa ka nkumbo akokimanyiya dia nkotsha ɛkɛndɛ ande wa lo nkumbo. Lo 1982, ko nde la Penny ka wadɛnde wakamba olimu w’ombatshi mboka ndo lo 1986, nde akatatɛ olimu w’omendji w’otshimbedi l’États-Unis ndo akakambe ɛnɔnyi 11.

Lo 1997, ɔnangɛso Guy Pierce nde la Penny ka wadɛnde wakakome ase nkumbo ka Bɛtɛlɛ ka l’États-Unis. Ɔnangɛso Pierce akakambaka lo departɛma diendana la olimu w’esambishelo ndo lo 1998 nde akasɔnama oko okimanyedi lo kɔmite kɛmɔtshi ka l’Olui-walɔmbɔla ndo tɔ mbenda ase Bɛtɛlɛ. Ɔsɔnwɛlɔ w’ɔnangɛso Pierce oko ose Olui-walɔmbɔla akewoyama lo Ngɔndɔ ka dikumi 2, 1999 lo losanganya la l’ɔnɔnyi la Watch Tower Bible and Tract Society of Pennsylvania. Lo ɛnɔnyi weke kambeta ɛnɛ, nde akakambe lo kɔmite kenda ase Bɛtɛlɛ, lo kɔmite k’ofundelo, kɔmite ka otondjelo w’ekanda ndo lo kɔmite kalɔmbɔla.

Anto w’oma lo ahole wotshikitanyi ndo wele la mbekelo yotshikitanyi wakɔtɔka ɔnangɛso Pierce lo demba nɛ dia nde aki l’ɔmɔnɔmɔnɔ ndo la tɔsɛkɛsɛkɛ. Koko waonga wakalekaka nkotola anto oya le nde aki ngandji, okitshakitsha, woho wakandalɛmiyaka ɛlɛmbɛ wendana la losembwe, atɔndɔ mbidja ndo woho wakinde la mbetawɔ tshɛ le Jehowa. Le ɔnangɛso Guy Pierce, wonya hakoke mpotɔ la ntondo ka alaka waki Jehowa nkotshama ndo nde akakombolaka kahana l’anto wa l’andja w’otondo dui dia mɛtɛ sɔ.

Ɔnangɛso Guy Pierce aki la etete l’olimu wa Jehowa nde aketɔka la yosose ndo mbala efula nde akakambaka olimu polo la dikɔlɔ di’otsho. Nkɛndɔ yakandandaka dia tokeketsha anango l’akadiyɛnde w’Akristo akokonya dia nde mɛngɔla l’andja w’otondo, aketshaka wenya kaamɛ la ose Bɛtɛlɛ tshɛ mbidja ndo Akristo akina wakalangaka monga suke la nde ndo wakayangaka alako ndo ekimanyielo oma le nde. Kaanga mbambeta ɛnɔnyi, anangɛso mbohɔka woho wakandalongolaka anto, lɔngɛnyi laki lande ndo woho wakandashaka anto ekeketshelo kotumbi oma lo Bible.

Ɔnangɛso ndo ɔngɛnyi aso wa ngandji Pierce akatshike wadɛnde ndo anawɔ asamalo mbidja ndo ekana la tokanula. Ndo nto, nde aki l’ana wa lo nyuma heyama mbadia. Sawo di’okundelo di’ɔnangɛso Pierce diakashama lo Bɛtɛlɛ ka la Brooklyn Lushi la samalo, Ngɔndɔ ka sato 22, 2014 oma le Mark Sanderson lele nde lawɔ ose Olui-walɔmbɔla. L’atei w’awui wakate ɔnangɛso Mark, nde akatɛkɛta ndo dia elongamelo k’otsha l’olongo kaki ɔnangɛso Pierce ndo akadia ɛtɛkɛta waki Yeso wata ɔnɛ: “Lo luudu la Papa, ahole wekɔ efula. . . . naka dimi ntshɔ ndo tonyɔlɔngɔsɔlɛ dihole, dimi layokalola ndo layoyonyolongola dia ndo nyu ndjala lɛnɛ ayomoyala. Nyu mbeyaka mboka k’otsha lɛnɛ atamatshu.”—Jni. 14:2-4.

Tayongaka mɛtɛ l’olengolengo w’efula lo dikambo di’ɔnangɛso Pierce. Koko kaanga mbediɔ ngasɔ, tekɔ l’ɔngɛnɔngɛnɔ nɛ dia ‘nde akeyaka mboka’ k’otsha lo ‘edjaselo kande ka pondjo.’