OTUNGI aso akasha anto nɛmɔ lo mbasha woshasha w’oshinga w’olo wa nsɔna kɛnɛ kalangawɔ. Laadiko dia laasɔ, nde tshɔkɔlaka lo yoho y’efula anto wakamba la woshasha awɔ wa nsɔna kɛnɛ kalangawɔ dia ntɔla ɔtɛmwɛlɔ wa mɛtɛ otsha la ntondo aha la lokaki, wasala la wolo dia nkidia lokombo lande l’ekila ndo wasukɛ sangwelo diande dioleki woke. Jehowa halange okitanyiya wa lotshutshuya. Koko nde mbɔsaka la nɛmɔ anto wayakimɔ la lolango watshutshuyama la ngandji ka mɛtɛ ndo wele la lowando l’efula.

Ɛnyɛlɔ, etena kaki ase Isariyɛlɛ l’oswe wa Sinayi, Jehowa akawatɛ dia vɔ mbika dihole di’ɔtɛmwɛlɔ. Nde akawatɛ ate: “Nyela ulambu le [Jehowa] uma lu diango dieli la nyu. Untu tshe leli la utema wa lukahu, ela ulambu wa [Jehowa.]” (Etum. 35:5) Ose Isariyɛlɛ tshɛ akakokaka nkimɔ kɛnɛ kakinde l’akoka ndo wakakambaka la woshasha tshɛ wa la lolango dia nkotsha sangwelo dia Nzambi oyadi woho akɔna waki woshasha akɔ kana nɛmɔ diaki lawɔ. Etombelo akɔna waki la dui sɔ?

‘Onto tshɛ laki l’otema w’ɔlɔlɔ’ ndo ‘lakatshutshuyamaka l’otema ande hita’ akakimɔka woshasha wa la lolango ‘la lolango lande.’ Onto tshɛ akelaka Jehowa ɛngɔ kɛmɔtshi. Ɛnyɛlɔ, vɔ wakakimɔka diangɔ diakawamataka l’ahɔndɔ, azama, mpɛtɛ, paonyi, mfɛsa, nkonga, eshinga wa bule, eshinga w’ebelabela, eshinga wa bela k’efula, linɛnɛ la dimɛna, wɛsa wa mbudi, dikoho di’ɛkɔkɔ diambowodja dangi dia beela, dikoho dia mbudi, abaya w’osongo wa akasia, ave wa pɛsɔpɛsɔ, diangɔ di’opumu ndo esɔ. Lo mɛtɛ, “eshasha wakawelaka, wakakuki dia ntsha elimu tshe, ndu ekina ladiku.”—Etum. 35:21-24, 27-29; 36:7.

Aha weshasha wakakimɔmaka mbakalekaka ngɛnyangɛnya Jehowa koko yimba ya ndjahombia yaki l’anto wakasukɛka ɔtɛmwɛlɔ wa pudipudi. Ndo nto vɔ wakatshutshuyamaka dia nkimɔ wenya awɔ ndo nkamba elimu wa Nzambi. Ɔkɔndɔ mbutaka dia “amantu tshe akanga a tokomba, wakelaka ahondo w’edima.” Lo mɛtɛ, “amantu tshe, akanga a tokomba wane wakalangi, wakela ahondo la eshinga wa diosa dia mbudi.” Laadiko dia laasɔ, Jehowa akasha Bɛzalɛlɛ ‘yimba ndo ewo ka weho tshɛ w’elimu w’etshudi.’ Nzambi akasha Bɛzalɛlɛ la Ɔhɔliyabɛ diewo diakahombamaka dia vɔ nsala elimu tshɛ wakawawasha.—Etum. 35:25, 26, 30-35.

Etena kakalɔmbɛ Jehowa ase Isariyɛlɛ dia vɔ nkimɔ weshasha, nde akalongamɛka dia ‘onto tshɛ lele l’otema w’ɔlɔlɔ’ nsukɛ ɔtɛmwɛlɔ wa mɛtɛ. Lo wedi ande, Jehowa akatshɔkɔla anto waki la yimba ya ndjahombia lo mbalɔmbɔla ndo mbasha ɔngɛnɔngɛnɔ w’aha komɛ. Lo nsala ngasɔ, Jehowa akɛnya dia etena katshɔkɔlande ekambi ande wele la yimba ya ndjahombia, nde ndjashikikɛka dia vɔ wekɔ la kɛnɛ tshɛ kahombama kana akoka dia vɔ nkotsha lolango lande. (Osam. 34:9) Oko wakambɛyɛ Jehowa aha la lokaki, nde ayɔtshɔkɔla yimba yayɛ ya ndjahombia.