Onde wɛ akadia la yambalo tshɛ numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

Onde tshelo ya tshumba edo mbetawɔmaka le Akristo?

Yɛdikɔ ya ntshumba odo kana bu ekɔ yɛdikɔ y’onto ndamɛ. Kaanga mbele Bible hɛnya shikaa dia sho pombaka ntshumba edo kana bu, tɔ mɛnyaka dia odo waki nkumekanga Saolo ndo wa Jɔnatana y’ɔnande wakatshumbama ndo kundɛma. (1 Sam. 31:2, 8-13)—6/15, lɛkɛ 7.

Ngande wakokaso ndjashikikɛ di’aha Nzambi mbele lo kiɔkɔ y’awui wa kɔlɔ wasalema?

Nzambi ekɔ ɔlɔlɔ lo etsha ande tshɛ. Nde ekɔ la sambo k’ɔlɔlɔ, kɔlamelo ndo la losembwe. Jehowa ekɔ nto la ngandji k’efula ndo la kɛtshi. (Euh. 32:4; Osam. 145:17; Jak. 5:11)—7/1, lɛkɛ 4.

Naa ekakatanu esato wakoka onto mpomana lawɔ etena konɔnde dia tokamba lo wodja okina lɛnɛ ele ohomba efula?

Ekakatanu esato akɔ vɔ ɛnɛ: 1) ndjaekesanyiya la yoho ya lɔsɛnɔ, 2) ndɔshana la olengolengo ndo 3) ntana angɛnyi. Efula ka wanɛ wakahomana la ekakatanu ɛsɔ wakatshɔkwama efula.—7/15, lɛkɛ 4-5.

Lande na kakahetshama Yɔsɛfu oma le anango?

Ɔkɔkɔ ɔmɔtshi wakandahetshama ele, Jakɔbɔ akalangaka Yɔsɛfu efula ndo akawosha okutu wa laande. Anango Yɔsɛfu wakayotatɛ mbooka kandjema ko wakosondja lo lɔhɔmbɔ.—8/1, lɛkɛ 11-13.

Lande na kele traktɛ yaso y’eyoyo yekɔ l’etombelo w’amɛna ndo wɔɔdu kahɛ anto?

Traktɛ yakɔ tshɛ yakakongɛma woho akɔ waamɛ. Yɔ yakakongɛma lo yoho yele paka sho mbadia divɛsa dimɔtshi oma lo Bible ko oma laasɔ ko sho mboka ompokami aso dimbola. Oyadi okadimwelo akɔna wayondosha, tayotshɔ la nde l’etei ka traktɛ ndo mbɛnya kɛnɛ kata Bible. Sho koka mbooka dimbola diakokaso ndjɔkɛtshanya mbala kayaye.—8/15, lɛkɛ 13-14.

Peshitta Syriaque, kɛdikɛdi na?

Syriaque ekɔ ɔtɛkɛta ɔmɔtshi wa tshitshɛ wa lo Arameyɛ wakayotatɛka tɛkɛtama lo ntambe ka hende la ka sato T.D. Mɛnamaka dia Syriaque mbaki ɔtɛkɛta wa ntondo wakakadimɔma ntenyi dimɔtshi di’Afundelo w’Akristo wa lo Grɛkɛ. Bible ka lo ɔtɛkɛta wa Syriaque kakayeyamaka lo lokombo la Peshitta.—9/1, lɛkɛ 13-14.

Kakɔna kahomba ambutshi w’Akristo nsala dia nkokɛ anawɔ?

Ekɔ ohomba mpokamɛ ana dia mbaeya. Nsala la wolo dia mbalesha lo nyuma. Lɔmbɔlawɔ la ngandji, ɛnyɛlɔ naka vɔ waya la taamu lo akambo wa lo nyuma.—9/15, lɛkɛ 18-21.

Awui akɔna wahatoyala lo ɛlɔmbwɛlɔ ka Diolelo diaki Nzambi?

Ekakatanu wendana la yoonge, nyɔi, ohombelo w’elimu, ata, ndjala ya kasha ndo wola hatoyala nto.—10/1, lɛkɛ 6-7.

Naa sheke ya lo Bible yakimanyiya di’anto akina tolɛ kaamɛ la Yeso?

L’ɔkɔngɔ wa nde nsala Dambo dia dikɔlɔ dia nkumadiɔndjɔ, Yeso akadje l’ambeki ande wa kɔlamelo sheke yelamɛ ɔnɛ sheke ya Diolelo. (Luka 22:28-30) Sheke ya Diolelo akaashikikɛka dia vɔ wayotolɛ kaamɛ la Yeso l’olongo.—10/15, lɛkɛ 16-17.

Sha bɛnyɛlɔ pende diɛnya dia Satana ekɔ onto la mɛtɛ mɛtɛ.

Afundelo mɛnyaka dia Satana akasawola la Yeso l’oyango wa mbohemba. Lo nshi ya Jɔbɔ nto, Satana akasawola la Nzambi. Ɛkɔndɔ ɛsɔ mɛnyaka dia Satana ekɔ onto la mɛtɛ mɛtɛ.—11/1, lɛkɛ 4-5.

Waa na waki ‘wodja wakasɔnama dia lokombo laki Jehowa’ wakatɛkɛta Jakɔba, oko wofundamidiɔ lo Etsha 15:14?

Vɔ waki ase Juda ndo ambetawudi waki komonga ase Juda wakasɔnama oma le Nzambi dia monga dioho di’ɛsɔnami l’oyango wa vɔ “mbewoya l’ahole tshɛ waonga w’amɛna efula” wa ɔnɛ lakawaelɛ. (1 Pet. 2:9, 10)—11/15, lɛkɛ 24-25.

Lende akatanemaka Timgad ndo dionga dia ngande diaki l’anto amɔtshi wa lɛkɔ?

Timgad aki osomba ɔmɔtshi wa woke wa la Rɔmɔ lo nɔrdɛ ka Afrique (lɛnɛ atanema Algérie nshi nyɛ). Dia mɛnya kɛnɛ kaketawɔka anto amɔtshi wa lɛkɔ, onyangiyangi ɔmɔtshi wa efundelo akate ɔnɛ: “Vɔ wakadiakanaka, wakɔkaka ashi, wakakɛnyaka, wakɔlaka.” Kɛsɔ mbɔtɔnɛka la ekanelo ka yimba katanema lo 1 Kɔrɛtɔ 15:32.—12/1, lɛkɛ 8-10.