1, 2. Ngande wakakeketsha Yeso ambeki ande lushi lakandolɔ?

LUSHI lakolɔ Yeso, ambeki ande ahende wakatatshɔka otsha lo ngielongelo mɔtshi yanganyi la Jɛrusalɛma kilɔmɛtrɛ oko 11,2. Lam’ele vɔ kombeya dia Yeso akashidi la mbolɔ, vɔ waki la lɔkɔnyɔ l’ɔtɛ w’awui waki oma la mbeta. La shashimoya, Yeso akɛnama lewɔ ndo akatatɛ nsamba lawɔ. L’etena kɛsɔ, Yeso akaakeketsha. Lo ngande? “Nde akaalembetshiya akambo wendana la nde wele lo Afundelo tshɛ, ntatɛ oma le Mɔsɛ la efundelo w’amvutshi tshɛ.” (Luka 24:13-15, 27) Vɔ wakanandema efula nɛ dia Yeso ‘akaalembetshiya Afundelo dimɛna.’—Luka 24:32.

² La dikɔlɔ diakɔ diaamɛ, ambeki ande ahende asɔ wakakalola otsha la Jɛrusalɛma. Etena kakawatane apɔstɔlɔ, vɔ wakatatɛ mbakɔndɔlɛ kɛnɛ kakahomana lawɔ. La ntondo ka vɔ mana ɔtɛkɛta, Yeso akɛnama lewɔ vɔ tshɛ. Apɔstɔlɔ ande wakandama la wɔma. Vɔ wakatatɛ monga la taamu l’etema awɔ. Ko ngande wakaakeketsha Yeso? Bible mbutaka ɔnɛ: “Nde akadihola timba tawɔ dia vɔ nshihodia Afundelo.”—Luka 24:45.

3. Ekakatanu akɔna wakoka mpomana laso ndo kakɔna kakoka tokimanyiya dia sho monga la ɛnɛlɔ k’ɔlɔlɔ l’olimu aso w’esambishelo?

³ L’ɛnyɛlɔ k’ambeki waki Yeso, sho lawɔ koka monga la lɔkɔnyɔ lo tena dimɔtshi. Kaanga mbakokaso ndjasha efula l’olimu wa Nkumadiɔndjɔ, sho mbeyaka nkɔmɔ l’ɔtɛ wahatakondja etombelo w’amɛna. (1 Kɔr. 15:58) Mbeyaka mɛnama dia wanɛ wetshaso  Bible hawohame esadi esadi lo nyuma. Anto akina wakimanyiyaso lo nyuma mbeyaka nkoma lo mboka Jehowa ɔkɔngɔ. Ko ahombaso nsala dia sho monga la ɛnɛlɔ k’ɔlɔlɔ lo kɛnɛ kendana l’olimu aso w’esambishelo? Dui dimɔtshi diakoka tokimanyiya ele, nshihodia dimɛna kitshimudi ya wɛɛla tshɛ waki Yeso wofundami lo Afundelo w’ekila. Nyɛsɔ tɔsɛdingole wɛɛla esato l’atei awɔ ndo tende wetshelo wakokaso nkondja.

4. Naa kitshimudi ya wɛɛla waki Yeso wa omboki a woho walala djɔ?

⁴ Adia Makɔ 4:26-29. Naa kitshimudi ya wɛɛla waki Yeso wa omboki a woho walala djɔ? Onto lɔtɛkɛtami lo wɛɛla ɔnɛ ekɔ didjidji di’apandjudi wa Diolelo. Woho ekɔ didjidji dia losango la Diolelo lasambishama le anto w’etema ɛlɔlɔ. Oko wasalemadiɔ lo lɔsɛnɔ la mɛtɛ mɛtɛ, omboki a woho ‘ndalaka djɔ l’otsho ndo memɔka la pindju.’ Wolelo wa woho salemaka l’edja k’etena kɛmɔtshi, mbuta ate ntatɛ etena konɛwɔ polo l’etena ka dinela. Etena kɛsɔ, “ntɔngɔ totombaka ndo tolaka.” Wolelo ɔsɔ tasalemaka ‘vɔamɛ’ yema yema. Woho akɔ waamɛ mbele, ohamelo wa lo nyuma tasalemaka yema yema. Etena katahame onto lo nyuma polo lo yɛdikɔ ya nde tshutshuyama dia kambɛ Nzambi, nde tɔɔka elowa lo nambola lɔsɛnɔ lande le Jehowa ndo batizama.

5. Lande na kakakambe Yeso la wɛɛla wa omboki a woho walala djɔ?

⁵ Lande na kakakambe Yeso la wɛɛla ɔnɛ? Lo nkamba la wɛɛla ɔnɛ, Yeso akɛnya dia paka Jehowa mbasala di’akambo wa mɛtɛ mpama l’etema wa ‘wanɛ wele suke.’ (Ets. 13:48; 1 Kɔr. 3:7) Sho monɛka ndo mbutɛka ashi, koko aha sho mboodia. Hatokoke ntshutshuya wolelo ɔsɔ dia vɔ salema esadi esadi. L’ɛnyɛlɔ k’onto la lo wɛɛla waki Yeso, sho hateye woho wasalema ohamelo wa lo nyuma. Mbala efula, ohamelo ɔsɔ salemaka aha la sho mbeya nɛ dia sho ndjashaka lo elimu aso wa lushi la lushi. L’edjedja ka wonya lɔtɔngɔ la Diolelo mbeyaka ndjɔtɔ elowa. Etena kɛsɔ, ombeki wa Bible ɔsɔ ayototshindɛ l’esambishelo ndo sho kondjaka wahɔ oma lo ekimanyielo kande.—Jni. 4:36-38.

6. Ahombaso mbeya lo kɛnɛ kendana la ohamelo wa lo nyuma w’ombeki aso wa Bible?

⁶ Wetshelo akɔna wakokaso nkondja oma lo wɛɛla waki Yeso ɔnɛ? Ntondotondo, sho pombaka mbetawɔ di’aha sho mbasala di’ombeki wa Bible mpama lo nyuma. Naka sho monga la wɛdimo, kete kɛsɔ ayotokimanyiya dia sho mbewɔ ntshutshuya ombeki wa Bible kana mbodja pɛpɔ dia nde batizama. Sho salaka kɛnɛ tshɛ kakokaso nsala dia sukɛ ndo nkimanyiya onto. Koko l’okitshakitsha tshɛ, sho mbeyaka dia l’ekomelo a shimu onto ndamɛ mbahomba mbɔsa yɛdikɔ ya ndjakimɔ le Jehowa. Ngandji k’omakɛse otema kooka onto Nzambi mbahomba mbotshutshuya dia nde ndjakimɔ le nde la lolango lande. Laadiko dia laasɔ, ndooko dui dikina dietawɔma le Jehowa.—Osam. 51:12; 54:6; 110:3.

7, 8. a) Naa wetshelo ekina wakondjaso oma lo wɛɛla waki Yeso wa omboki wa woho walala djɔ? Sha ɛnyɛlɔ. b) Kakɔna katetsha wɛɛla ɔnɛ lo kɛnɛ kendana la Jehowa ndo Yeso?

⁷ Dui dia hende ele, naka sho nshihodia wetshelo watanema lo wɛɛla waki Yeso ɔnɛ kete dui sɔ diayotokimanyiya diaha sho nkɔmɔ, naka l’etatelo hatokondjisha etombelo w’ɛlɔlɔ oma l’esambishelo. Sho pombaka monga la solo dia lotutsha. (Jak. 5:7, 8) Oyadi ntɔngɔ hayɔtwɛ elowa etena kele takasale kɛnɛ tshɛ kakatakoke nsala dia nkimanyiya ombeki wa Bible, sho mbeyaka dia kɛsɔ hɛnya dia sho bu la kɔlamelo. Jehowa mbetawɔka dia lɔtɔngɔ l’akambo wa mɛtɛ ntɔ elowa paka lo otema wa kanga okitshakitsha lele suke dia nsala etshikitanu. (Mat. 13:23) Diakɔ diele, hatohombe mɔnyɔla olimu aso w’esambishelo l’ɔtɛ w’etombelo wakondjaso. Le Jehowa, aha woho  wetawɔ wanɛ wasambishaso losango laso mbɛnya dia tekɔ lo nsambisha dimɛna. Koko nde mbɔsaka la nɛmɔ welo wa la kɔlamelo wadjaso dia nsambisha oyadi etombelo akɔna wakondjaso.—Adia Luka 10:17-20; 1 Kɔrɛtɔ 3:8.

⁸ Dui dia sato ele, aha mbala tshɛ mbatotoshihodiaka etshikitanu wambosala onto ɔmɔtshi. Ɛnyɛlɔ, atshukanyi amɔtshi wakatɛ misiɔnɛrɛ wakawaetshaka Bible dia vɔ wolanga nkoma apandjudi wahatabatizama. Misiɔnɛrɛ ɔsɔ akohola atshukanyi asɔ ɔnɛ dia vɔ nkotsha kɛnɛ kalɔmbama dia nsambisha paka vɔ ntshika ɔnwɛlɔ wa mfɔka. Nde akaambe etena kakawotɛ atshukanyi asɔ ɔnɛ aya ngɔndɔ efula yambowotshikaka ɔnwɛlɔ wa mfɔka. Lande na kakawatshike ɔnwɛlɔ wa mfɔka? Vɔ wakashihodia dia Jehowa akakokaka mbaɛna etena kakawanɔka mfɔka ndo ɔnɛ nde petshaka lɔsɛnɔ la dungi pende. Diakɔ diele, etema awɔ akaatshutshuya dia vɔ mbɔsa yɛdikɔ yaha nnɔ mfɔka lo pondjo oyadi la le misiɔnɛrɛ ɔsɔ. Woho wakawɛnya ngandji kawɔ otsha le Jehowa akaakimanyiya dia vɔ mbɔsa yɛdikɔ ya dimɛna. Vɔ wakahame lo nyuma aha la misiɔnɛrɛ mbeya etshikitanu wakawasale.

9. Naa kitshimudi ya wɛɛla waki Yeso wa ɔtɛyi?

⁹ Adia Mateo 13:47-50. Naa kitshimudi ya wɛɛla waki Yeso wa ɔtɛyi? Yeso akɛdika esambishelo ka losango la Diolelo le anto wa l’andja w’otondo la wookelo w’ɔtɛyi wa woke lo ndjale. Oko wakoka ɔtɛyi ɔsɔ munda “weho tshɛ wa nse” aha la sɔnɔla, mbele ndo esambishelo kaso komaka le weho tshɛ w’anto. (Is. 60:5) Mɛtɛ ka dui sɔ mɛnamaka lo woho w’ɔtɔ anto efula lo nsanganya yaso ya weke ndo lo Eohwelo ɔnɔnyi tshɛ. Amɔtshi l’atei wa nse ya didjidji shɔ wekɔ ‘amɛna’ ndo vɔ tshumanyemaka l’etshumanelo k’Akristo. Akina mɛnamaka dia wekɔ ‘kɔlɔ’ nɛ dia aha wanɛ tshɛ wasangana laso mbetawɔma le Jehowa.

10. Lande na kakakambe Yeso la wɛɛla wa ɔtɛyi?

¹⁰ Lande na kakakambe Yeso la wɛɛla wa ɔtɛyi? Okakitolelo wa nse ya dididji halembetshiya kilombo k’ekomelo ka lo mfɔnu ka woke. Koko dui sɔ nembetshiyaka kɛnɛ kasalema lo nshi nyɛ y’ekomelo ka dikongɛ di’akambo dia kɔlɔ nɛ. Yeso akɛnya dia aha anto tshɛ wasambishama akambo wa mɛtɛ mbayetawɔ kambɛ Jehowa. Efula k’anto sanganaka laso lo nsanganya ya l’etshumanelo. Akina mbetawɔka mbeka laso Bible, koko hawolange mbɔsa yɛdikɔ. (1 Khum. 18:21) Akina ndjotshikaka dia nsangana laso lo nsanganya y’Akristo. Ɛlɔngɔlɔngɔ ɛmɔtshi wakodiama oma le ambutshi awɔ w’Akristo, koko vɔ konanga atɔndɔ waki Jehowa. Oyadi la ntondo ka dui diakɔna, Yeso akatɔtɔmiya dia onto pombaka mbɔsa yɛdikɔ ndamɛ. Wanɛ wɔsa yɛdikɔ ya kambɛ Jehowa mbɔsamaka oko diangɔ ‘di’oshinga w’olo’ kana ‘dia nɛmɔ’ dia “wedja tshe.”—Hang. 2:7.

11, 12. a) Wetshelo akɔna wakokaso nkondja oma lo wɛɛla waki Yeso wa ɔna la lotshito? b) Kakɔna katetsha wɛɛla ɔnɛ lo kɛnɛ kendana la Jehowa ndo Yeso?

¹¹ Wetshelo akɔna wakokaso nkondja oma lo wɛɛla waki Yeso wa ɔtɛyi? Naka sho nshihodia wetshelo wakondjaso oma lo wɛɛla ɔnɛ kete dui sɔ ayotokimanyiya dia sho mbewɔ ndjakiyanya amboleka kana monga la lonyangu l’efula naka ombeki aso wa Bible ɔmɔtshi kana ɔnaso ɔmɔtshi halange mbidja akambo wa mɛtɛ yimba. Dui sɔ koka salema oyadi welo akɔna tshɛ wayotodja. Mbetawɔ dia mbeka Bible kana mbodiama lo akambo wa mɛtɛ hɛnya dia weho akɔ tshɛ onto ayonga la diɔtɔnganelo dia dimɛna lam’asande la Jehowa. Wanɛ watona dia nsukɛ lowandji laki Jehowa wayonyɛma oma l’atei w’ekambi waki Nzambi.

¹² Onde kɛsɔ nangaka mbuta dia wanɛ wakatshanyema hawokokaki pondjo nkalola l’etshumanelo? Naka onto ɔmɔtshi halange mbɔsa yɛdikɔ ya ndjakimɔ le Jehowa,  onde nde ayɔsama pondjo pondjo oko onto la “kɔlɔ”? Ndooko. Anto asɔ wekekɔ la diaaso dia mbɔsa yɛdikɔ la ntondo ka mfɔnu ka woke ndja. Ekɔ oko Jehowa ekɔ lo mbutɛ anto asɔ ɔnɛ: “Nyukaluli uya le mi, ku dimi layukalula uya le nyu.” (Mal. 3:7) Wɛɛla okina waki Yeso wa ɔna la lotshito mbikaka epole ɔsɛkɛ lo dui sɔ.—Adia Luka 15:11-32.

13. Naa kitshimudi ya wɛɛla waki Yeso wa ɔna la lotshito?

¹³ Naa kitshimudi ya wɛɛla waki Yeso wa ɔna la lotshito ? Ombutshi wa ngandji wa lo wɛɛla ɔnɛ ekɔ didjidji dia Jehowa Shɛso ka ngandji lele l’olongo. Ɔna lakalɔmbɛ she sango ndo lakatomana okundji ande ekɔ didjidji dia wanɛ wakatshanyema oma l’etshumanelo. Etena katshanyemawɔ oma l’etshumanelo, ekɔ oko vɔ wekɔ lo ntshɔ otsha lo “wodja w’etale,” mbuta ate lo andja waki Satana wanganyi etale la Jehowa. (Ɛf. 4:18; Kɔl. 1:21) L’ɔkɔngɔ diko, amɔtshi ndjokalolaka koko vɔ ndjohomanaka l’ekakatanu l’okalwelo awɔ oya lo okongamelo waki Jehowa. Anto wele la okitshkitsha asɔ, mbuta ate wanɛ wayatshumoya nongɔmaka la wasaso tshɛ oma le Shɛso ladimanyiyana kɔlɔ.—Is. 44:22; 1 Pet. 2:25.

14. Lande na kakakambe Yeso la wɛɛla wa ɔna la lotshito?

¹⁴ Lande na kakakambe Yeso la wɛɛla wa ɔna la lotshito? Yeso akakambe la wɛɛla ɔnɛ wakotola yambalo y’anto efula dia mɛnya woho walanga Jehowa dia wanɛ wakatakɔ mboka nkalola le nde. Ombutshi wa lo wɛɛla ɔnɛ akatetemala nongamɛ dia ɔnande ayokalola. Etena kakandɛnyi ɔnande ayakalola kaanga mbakinde “lo tshalola,” ombutshi ɔsɔ akalawɔ esadi esadi dia toolongola. Ɔsɔ mɛtɛ ekɔ dui di’ekeketshelo le wanɛ wakatshike akambo wa mɛtɛ dia vɔ nkalola le Jehowa aha la ntshimbatshimba. Vɔ mbeyaka monga l’ɔkɔmwɛlɔ wa lo nyuma ndo okalwelo awɔ otsha l’etshumanelo mbeyaka mɛnama oko wolo ndo okakatanu. Koko etena kakalolawɔ, Jehowa, Yeso ndo andjelo ngɛnangɛnaka.—Luka 15:7.

15, 16. a) Wetshelo akɔna wakondjaso oma lo wɛɛla waki Yeso wa ɔna la lotshito? Sha bɛnyɛlɔ. b) Kakɔna katetsha wɛla ɔnɛ lo kɛnɛ kendana la Jehowa ndo Yeso?

¹⁵ Wetshelo akɔna wakokaso nkondja oma lo wɛɛla waki Yeso wa ɔna la lotshito? Sho pombaka mbokoya ɛnyɛlɔ kaki Jehowa. Hatohombe pondjo nkombola “ndjala ololo efula” polo lo ntona dia nongola atshi wa pɛkato wayatshumoya. Naka sho nsala ngasɔ, kete dui sɔ ‘diayolanya’ diɔtɔnganelo  diasaso la Jehowa. (Und. 7:16) Sho koka nkondja wetshelo okina oma lo wɛɛla ɔnɛ. Onto latomba oma l’etshumanelo pombaka mbɔsama oko “okoko wakashisho” koko hatohombe nshisha elongamelo dikambo diande. (Osam. 119:176) Naka tambohomana l’onto lakatshanyema oma l’etshumanelo, onde tayosala kɛnɛ tshɛ kakokaso nsala dia mbokimanyiya dia nde nkalola l’etshumanelo? Onde tayewoya dikumanyi aha la ntshimbatshimba dia vɔ mbosha ekimanyielo kahombama? Tayosala dui sɔ naka sho nkamba la wetshelo wakondjaso oma lo wɛɛla waki Yeso wa ɔna la lotshito.

¹⁶ Tɔsɛdingole kɛnɛ kakate ana wa lotshito amɔtshi wa lo nshi yaso nyɛ lo woho wakawaoke Jehowa kɛtshi ndo wakaasukɛ ase etshumanelo. Ɔnangɛso ɔmɔtshi akatshanyema l’edja ka ɛnɔnyi 25. Nde mbutaka ate: “Etena kakamakalola l’etshumanelo, ɔngɛnɔngɛnɔ ami wakatetemala mfula etena kakamalongola ‘ekeketshelo’ oma le Jehowa. (Ets. 3:19) Anto tshɛ wakansukɛ ndo wakambokaka ngandji. Nshi nyɛ, ase nkumbo kami woyasha lo awui wa lo nyuma efula.” Kadiyɛso k’osekaseka kakatshanyema oma l’okongamelo wa Jehowa l’edja k’ɛnɔnyi etanu mbutaka lo kɛnɛ kendana la okalwelo ande ate: “Haleye woho wakokami nyolembetshiya woho wakamayaoke lo menda ngandji kakamɛnya Yeso. Monga l’ateyi w’okongamelo waki Jehowa ekɔ dui di’oshinga wolo.”

17, 18. a) Wetshelo akɔna wambotokondja oma lo wɛɛla waki Yeso esato wambotɔsɛdingola? b) Kakɔna kambotoyashikikɛ dia nsala?

¹⁷ Wetshelo akɔna wambotokondja oma lo wɛɛla esato waki Yeso wambotɔsɛdingola? Wetshelo wa ntondo ele, teye diaha sho mbasala dia ombeki aso wa Bible mpama lo nyuma koko Jehowa mbasala dui sɔ. Wetshelo wa hende ele, hatokoke nongamɛ di’anto tshɛ wasangana laso ndo weka laso Bible mbayetawɔ akambo wa mɛtɛ. Wetshelo w’ekomelo ele, sho pombaka mbeya dia kaanga anto amɔtshi kotshikaka akambo wa mɛtɛ ndo mboka Jehowa ɔkɔngɔ, sho pombaka nongamɛ ɔnɛ vɔ wayokalola. Ndo naka wambokalola, nyɛsɔ taalongole lo yoho yangɛnyangɛnya Jehowa.

¹⁸ Nyɛsɔ sho tshɛ totetemale nyanga ntondo ewo, oshihodielo ndo lomba. Etena kadiayɛ wɛɛla waki Yeso, yambola dia mbeya, kitshimudi yawɔ, lande na kakawafundama lo Bible, woho wakokayɛ nkamba la wetshelo w’oma lɔkɔ ndo kɛnɛ kaketshawɔ lo kɛnɛ kendana la Jehowa ndo Yeso. Naka sho nsala ngasɔ, kete tayɛnya mɛtɛ dia tekɔ lo nshihodia kitshimudi y’ɛtɛkɛta waki Yeso.