1, 2. Lande na kele anto efula wakahokamɛka kɛnɛ kaketshaka Yeso koko koshihodiaka kitshimudi y’ɛtɛkɛta ande?

ONTO koka mboka dui di’onto ɔmɔtshi latɛkɛta la nde ndo nde koka nshihodia wondjo wa dui di’onto akɔ. Ɛtɛkɛta ɛsɔ wayonga la nɛmɔ le nde paka naka nde nshihodia kitshimudi yawɔ. (1 Kɔr. 14:9) Woho akɔ waamɛ mbele, anto nunu wakokaka kɛnɛ kakataka Yeso. Nde akakome polo lo mbatɛ lo ɛtɛkɛta wakawakoke mboka dimɛna. Koko aha vɔ tshɛ mbakashihodia kitshimudi y’ɛtɛkɛta ande. Diakɔ diele Yeso akatɛ ampokami ande ate: “Nyompokame nyu tshɛ ndo nyoshihodia kɛnɛ kanyotɛmi.”—Makɔ 7:14.

² Ko lande na kaki anto efula koshihodia kitshimudi y’ɛtɛkɛta waki Yeso? Amɔtshi wakongaka la tokanyi ta kɔlɔ la ntondo ka vɔ ndjohokamɛ Yeso. Nde akatɛ anto asɔ ɔnɛ: “Nyu tɔnyɔlaka la mayɛlɛ tshɛ ɛlɛmbɛ waki Nzambi dia ndjela mbekelo y’ashidi.” (Makɔ 7:9) Anto asɔ mɛtɛ kombidjaka welo dia nshihodia kitshimudi y’ɛtɛkɛta waki Yeso. Vɔ konanga ntshikitanya nsɛnɔ yawɔ ndo tokanyi tawɔ. Atui awɔ wakokaka koko etema awɔ waki lonyu. (Adia Mateo 13:13-15.) Ko ngande wakokaso ndjashikikɛ dia etema aso wekɔ hwe dia sho nkondja wahɔ oma lo wetshelo waki Yeso?

3. Lande na kakashihodiaka ambeki waki Yeso kitshimudi y’ɛtɛkɛta ande?

³ Sho pombaka ndjela ɛnyɛlɔ k’okitshakitsha k’ambeki waki Yeso. Nde akawatɛ ate: “Diɛsɛ le nyu nɛ dia nyekɔ lo mɛna la washo anyu ndo nyekɔ lo mboka l’atoyi anyu.” (Mat. 13:16) Ko lande na kakawashihodiaka kɛnɛ kakataka Yeso etena kele anto akina koshihodiaka? Ɔkɔkɔ wa ntondo ele, vɔ waki suke dia mboka ambola ndo wakasalaka eyangelo dia ntana kitshimudi y’oshika y’ɛtɛkɛta waki Yeso. (Mat. 13:36; Makɔ 7:17) Ɔkɔkɔ wa hende ele, vɔ waki suke dia nkamba la kɛnɛ kakawetawɔ l’etema awɔ. (Adia Mateo 13:11, 12.) Ɔkɔkɔ wa sato ele, vɔ waki suke dia nkamba la kɛnɛ kakawoke ndo kakawashihodia aha paka lo nsɛnɔ yawɔ tsho koko ndo lo nkimanyiya anto akina.—Mat. 13:51, 52.

4. Naa awui asato wahombaso nsala dia sho nshihodia kitshimudi ya wɛɛla waki Yeso?

⁴ Naka sho nangaka nshihodia kitshimudi ya wɛɛla waki Yeso, kete sho pombaka ndjela ɛnyɛlɔ k’ambeki ande wa kɔlamelo. Kɛsɔ nɔmbaka awui asato. Dui dia ntondo, sho pombaka mbɔsaka etena ka mbeka ndo kanaka yimba la kɛnɛ kaketsha Yeso, nsala eyangelo wahombama ndo mboka ambola wahombama. Kɛsɔ ayotokonya lo ewo. (Tuk. 2:4, 5) Dui dia hende ele, sho pombaka menda woho w’ɔtɔnɛ ewo kakɔ la kɛnɛ kamboteyaka ntondo ndo nsɛdingola dia mbeya wetshelo wakokaso nkondja shoamɛ oma lɔkɔ. Dui sɔ diayotokonya dia sho nshihodia. (Tuk. 2:2, 3) Dui dia sato ele, sho pombaka nkamba la kɛnɛ kekaso lo nsɛnɔ yaso. Kɛsɔ ayɛnya dia tekɔ la lomba.—Tuk. 2:6, 7.

5. Lembetshiya otshikitanu wele lam’asa ewo, oshihodielo ndo lomba.

⁵ Otshikitanu akɔna wele lam’asa ewo, oshihodielo ndo lomba? Otshikitanu ɔsɔ koka nembetshiyama lo yoho nyɛ: Ohɔsa dia wɛ memala l’atei w’otadimbo ko mutuka wekɔ lo ndjaye oya laleyɛ. Ntondotondo, wɛ ayɛna dia mutuka wekɔ lo ndjaye, ɔsɔ ekɔ ewo. Oma laasɔ, wɛ ayɛna dia naka wɛ ntetemala memala lama weyɛ, kete wɛ ayɔtɛtama mutuka akɔ, ɔsɔ ekɔ oshihodielo. L’ekomelo wɛ ayomɔ oma l’atei w’otadimbo, ɔsɔ ekɔ lomba. Diakɔ diele, Bible tɔtɔmiyaka ohomba wa sho nama “yimba,” nɛ dia dui sɔ koka toshimbɛ nsɛnɔ.—Tuk. 3:21, 22; 1 Tim. 4:16.

6. Naa ambola anɛi wayotoyaoka etena kayototasɛdingolaka wɛɛla esambele waki Yeso? (Enda kiombo.)

⁶ Lo sawo nɛ ndo diayela, tayɔsɛdingola wɛɛla esambele wakakambe la Yeso. Etena kayototasɛdingolaka wɛɛla tshɛ, tayoyaokaka ambola anɛ: Naa kitshimudi ya wɛɛla ɔnɛ? (Kɛsɔ tokimanyiyaka dia sho nkondja ewo.) Lande na kakakambe Yeso la wɛɛla ɔnɛ? (Dui sɔ tokonyaka lo oshihodielo.) Ngande wakokaso nkamba la wetshelo w’oma lo wɛɛla ɔnɛ lo nsɛnɔ yaso ndo dia nkimanyiya anto akina? (Dui sɔ diayotokonya dia sho nkondja lomba.) L’ekomelo, kakɔna katetsha wɛɛla ɔnɛ lo kɛnɛ kendana la Jehowa ndo Yeso?

7. Naa kitshimudi ya wɛɛla wa lɔtɔngɔ la mutardɛ?

⁷ Adia Mateo 13:31, 32. Naa kitshimudi ya wɛɛla waki Yeso wa lɔtɔngɔ la mutardɛ? Lɔtɔngɔ la mutardɛ lekɔ didjidji dia losango la Diolelo ndo etombelo w’oma l’olimu w’esambishelo, mbuta ate etshumanelo k’Akristo. L’ɛnyɛlɔ ka lɔtɔngɔ la mutardɛ loleki “tshitshɛ l’atei wa ntɔngɔ tshɛ,” etshumanelo k’Akristo kakatatɛ l’anto yema tshitshɛ lo 33 T.D. Koko l’ɔkɔngɔ w’ɛnɔnyi akumi angana eto, etshumanelo kakahame esadi esadi. Tɔ kakahame polo ndo lo yoho yoleki kɛnɛ kakalongamɛka anto. (Kɔl. 1:23) Ohamelo ɔsɔ wakikɔ la wahɔ nɛ dia Yeso akate dia “tofudu ta l’olongo” koka ‘mbidjasɛ lo ntahe yalɔ.’ Tofudu ta didjidji tɔsɔ nembetshiyaka anto wele l’etema w’ɛlɔlɔ watana mbo ya ndɛ ya lo nyuma, ekokelo  ndo wɔladi l’atei w’etshumanelo k’Akristo.—Ɛdika la Ezekiyele 17:23.

8. Lande na kakakambe Yeso la wɛɛla wa lɔtɔngɔ la mutardɛ?

⁸ Lande na kakakambe Yeso la wɛɛla ɔnɛ? Nde akakambe la wɛɛla wa wolelo wa diambo wa lɔtɔngɔ la mutardɛ, dia mɛnya wolo wele la losango la Diolelo diaki Nzambi wa mpama, nkokɛ ndo mbekola wekamu tshɛ. Ntatɛ oma lo 1914, dui dia diambo diambosalema lo kɛnɛ kendana la ohamelo wa etenyi ka la nkɛtɛ k’okongamelo waki Nzambi. (Is. 60:22) Wanɛ wɔtɔ lo okongamelo ɔsɔ kondjaka ekokelo ka diambo ka lo nyuma. (Tuk. 2:7; Is. 32:1, 2) Laadiko dia laasɔ, woho watatetemala Diolelo ntshɔ otsha la ntondo mɛnyaka dia ndooko onto lakoka memadia dui sɔ ndo ɔnɛ diɔ koka mbekola wekamu tshɛ.—Is. 54:17.

9. a) Wetshelo akɔna wakokaso nkondja oma lo wɛɛla wa lɔtɔngɔ la mutardɛ? b) Kakɔna katetsha wɛɛla ɔnɛ lo kɛnɛ kendana la Jehowa ndo Yeso?

⁹ Wetshelo akɔna wakokaso nkondja oma lo wɛɛla wa lɔtɔngɔ la mutardɛ? Mbeyaka monga ko tekɔ lo nsɛna lo dihole diele Ɛmɛnyi wa Jehowa yema tshitshɛ kana lɛnɛ ele etombelo wa l’esambishelo hawɛnama esadi. Koko naka sho mbohɔ dia Diolelo koka mbekola wekamu tshɛ, kete dui sɔ ayotokimanyiya dia sho mbikikɛ. Ɛnyɛlɔ, etena kakakome ɔnangɛso Edwin Skinner la Inde lo 1926, nde akatane paka Ɛmɛnyi wa Jehowa yema tshitshɛ tsho lo wodja ɔsɔ. L’etatelo, ehamelo kondeka monga ndo olimu w’esambishelo komonga wɔdu. Koko ɔnangɛso akatetemala nsambisha ndo akɛnyi woho w’ekola losango la Diolelo wekamu wa weolo. Ɛlɔ kɛnɛ, ndekana Ɛmɛnyi wa Jehowa 37 000 wekɔ lo nsambisha l’ohetoheto la Inde ndo ndekana anto 108 000 wakɔtɔ lo Eohwelo ka nyɔi ka Yeso ɔnɔnyi wetshi. Tɔsɛdingole ɛnyɛlɔ kekina kɛnya woho wakahame losango la Diolelo la diambo tshɛ. Lo ɔnɔnyi akɔ waamɛ wakakome ɔnangɛso Skinner la Inde, mbakatatɛ olimu w’esambishelo la Zambie. Koko ɛlɔ kɛnɛ, ndekana apandjudi 170 000 wekɔ lo nsambisha lɛkɔ ndo anto oko 763 915 wakɔtɔ lo Eohwelo lo 2013. Kɛsɔ mɛnyaka dia onto 1 lo anto 18 wakɔtɔ lo Eohwelo la Zambie. Ande ehamelo wa diambo wa ngasɔ lee!

10. Naa kitshimudi ya wɛɛla wa wodoya?

¹⁰ Adia Mateo 13:33. Naa kitshimudi ya  wɛɛla waki Yeso wa wodoya? Wɛɛla ɔnɛ nto mendanaka la losango la Diolelo ndo etombelo w’oma lɔkɔ. “Okuna” ekɔ didjidji dia wedja tshɛ ndo wodelo w’okuna ekɔ didjidji di’ohamelo wa losango la Diolelo lo tshimbo y’olimu w’esambishelo. Ohamelo wa lɔtɔngɔ la Mutardɛ mɛnamaka hwe, koko wodelo wa wodoya hɛnama l’etatelo. Dui sɔ ndjɛnamaka paka l’ɔkɔngɔ wa tolembetelo tɔmɔtshi.

11. Lande na kakakambe Yeso la wɛɛla wa wodoya?

¹¹ Lande na kakakambe Yeso la wɛɛla wa wodoya? Nde akɛnyaka dia losango la Diolelo lekɔ la wolo wa diangana lo ahole tshɛ ndo mbela etshikitanu. Losango la Diolelo lambokoma “polo ndo l’ahole woleki etale wa lo nkɛtɛ.” (Ets. 1:8) Koko, aha mbala tshɛ mbatɛnamaka etshikitanu wela losango lɔsɔ ndo mbeyaka monga ko etombelo ɛmɔtshi w’oma lo losango lɔsɔ hawɛnami l’etatelo. Kɛnɛ kele mɛtɛ ele, etshikitanu salemaka aha tsho lo kɛnɛ kendana la lofulo l’anto koko ndo nto vɔ tshikitanyaka l’onto la wanɛ wetawɔ losango lasha panda.—Rɔmɔ 12:2; Ɛf. 4:22, 23.

12, 13. Sha bɛnyɛlɔ diɛnya woho wakahame esambishelo ka Diolelo l’ɛnyɛlɔ ka wɛɛla wa wodoya.

¹² Mbala efula, etombelo w’oma l’esambishelo ndjɛnamaka paka l’ɔkɔngɔ w’ɛnɔnyi ɛmɔtshi. Ɛnyɛlɔ, Franz nde la Margit atshukanyi wokamba nshi nyɛ lo Bɛtɛlɛ kekina ndo wakakambaka lo Bɛtɛlɛ ka la Brésil lo 1982, wakasambisha l’osomba ɔmɔtshi wa tshitshɛ. L’atei w’anto wakekaka la wɔ Bible mbaki ndo mama kɛmɔtshi nde l’anande anɛi. Ɔna laki enondo lo apami aki la ɛnɔnyi 12 ndo lo nshi shɔ nde aki ɔsɔnyi efula. Mbala efula, nde akayashɛka la ntondo ka wekelo wa Bible ntatɛ. L’ɔtɛ wakawawanya oma lo ɛtshi ka nkɛtɛ kɛsɔ, atshukanyi asɔ kotetemala mbeka la wɔ. Koko vɔ wakayoyaka ndjembola osomba ɔsɔ l’ɔkɔngɔ w’ɛnɔnyi 25. Kakɔna kakawayotanaka? Vɔ wakayotanaka etshumanelo kele l’apandjudi 69, apandjudi 13 wakikɔ ambatshi mboka wa pondjo ndo nsanganya tshɛ yakasalemaka lo Mbalasa ka Diolelo k’oyoyo. Ko kayotota lo kɛnɛ kendana la ɔna lakikɔ ɔsɔnyi? Nde ekɔ lo nkamba nshi nyɛ oko ɔnɔmbɔdi w’olui wa dikumanyi. L’ɛnyɛlɔ ka wodoya wa lo wɛɛla waki Yeso, losango la Diolelo lakahame ndo lakatshikitanya nsɛnɔ y’anto efula ndo dui sɔ diakasha atshukanyi asɔ ɔngɛnɔngɛnɔ w’efula.

¹³ Wolo wahɛnama watshikitanya nsɛnɔ wele la losango la Diolelo wakɛnama lo esomba wakasekɛma olimu aso. Hateye woho wakoma losango la Diolelo l’esomba ɛsɔ ndo ntena efula sho mambiyamaka lo menda etombelo watongaka la dui sɔ. Tɔshi ɛnyɛlɔ ka osomba wa Cuba. Losango la Diolelo lakakome la Cuba lo 1910 ndo ɔnangɛso Russell akatshu lɛkɔ lo 1913. Koko ehamelo kondeka monga l’etatelo. Ko kakɔna keta la Cuba ɛlɔ kɛnɛ? Ɛlɔ kɛnɛ, ndekana apandjudi 96000 wekɔ lo nsambisha losango la Diolelo ndo anto oko 229726 wakɔtɔ lo Eohwelo lo 2013, mbuta ate onto ɔtɔi lo anto 48 wa lo ɛtshi ka nkɛtɛ kɛsɔ akɔtɔ lo Eohwelo. Oyadi lo esomba wahatasekɛma olimu aso, losango la Diolelo lambokoka nkoma lo bɛtshi dia nkɛtɛ diele Ɛmɛnyi wa Jehowa wa lɛkɔ fɔnyaka dia esambishelo katakome. *—Und. 8:7; 11:5.

14, 15. a) Wetshelo akɔna wakokaso nkondja oma lo wɛɛla waki Yeso wa wodoya? b) Kakɔna katetsha wɛɛla ɔnɛ lo kɛnɛ kendana la Jehowa ndo Yeso?

¹⁴ Wetshelo akɔna wakokaso nkondja oma lo wɛɛla waki Yeso wa wodoya? Naka sho nkana yimba la kitshimudi ya wɛɛla waki Yeso wa wodoya, kete tayɛna dia ndooko ohomba wa sho ndjakiyanya amboleka lo woho wahomba losango la Diolelo  nkoma le miliyɔ y’anto wahatalioke. Jehowa ekɔ lo nsukɛ elimu ande tshɛ. Ko kayotota lo kɛnɛ kendana la olimu aso w’esambishelo? Ɔtɛkɛta wa Nzambi kadimolaka ɔnɛ: “Uneki wuhu aye la pindju. Tushaki lunya laye mumuya la dikolo, ne dia we heyi kana kene kana keku kayuluwana, kana vo ahendi wayula ololo.” (Und. 11:6) Lo mɛtɛ, hatohombe mbohɛ dia nɔmbaka Onto lele lo kiɔkɔ ya olimu w’esambishelo djekoleko lo kɛnɛ kendana la wedja wakasekɛma olimu aso.—Ɛf. 6:18-20.

¹⁵ Laadiko dia laasɔ, hatohombe nkɔmɔ naka hatɛnyi etombelo w’ɛlɔlɔ l’etatelo k’olimu aso. Hatohombe pondjo mɔnyɔla “lushi l’akambu wa tshitshe.” (Zek. 4:10) Sho mbeyaka nkondja etombelo w’amɛna efula oleki ndo woho wafɔnyaso.—Osam. 40:5; Zek. 4:7.

16. Naa kitshimudi ya wɛɛla waki Yeso wa omundji w’okanda ndo ɛngɔ ka nɛmɔ kakashɛma?

¹⁶ Adia Mateo 13:44-46. Naa kitshimudi ya wɛɛla waki Yeso wa omundji w’okanda ndo ɛngɔ ka nɛmɔ kakashɛma? Lo nshi ya Yeso, amundji w’okanda amɔtshi wakandaka nkɛndɔ y’etale polo lo Océan Indien dia toyanga adidi woleki amɛna. Omundji w’okanda wa lo wɛɛla waki Yeso ekɔ didjidji di’anto w’etema ɛlɔlɔ watshɔ lo ahole wa tale dia tokotsha ehomba awɔ wa lo nyuma. “Didi dimɔtshi di’oshinga wolo efula” ekɔ didjidji di’akambo wa mɛtɛ w’oshinga wolo wendana la Diolelo. Lam’ele omundji w’okanda akeye nɛmɔ diele la didi sɔ, “aha la ntshimbatshimba” nde akasondja diangɔ tshɛ diaki la nde dia nsomba didi diakɔ. Yeso akatɛkɛta nto di’onto lakakambaka l’ekambɔ ndo lakatotanaka ɛngɔ ka nɛmɔ “kakashɛma.” Otshikitanyi la omundji w’okanda, onto ɔsɔ konyangaka ɛngɔ ka nɛmɔ. Koko l’ɛnyɛlɔ k’omundji w’okanda, nde akasondja “ɛngɔ tshɛ” dia nkondja ɛngɔ ka nɛmɔ.

17. Lande na kakakambe Yeso la wɛɛla wa omundji w’okanda ndo ɛngɔ ka nɛmɔ kakashɛma?

¹⁷ Lande na kakakambe Yeso la wɛɛla ɛnɛ ehende? Nde akɛnya di’anto tanaka akambo wa mɛtɛ lo toho t’otshikitanyi. Anto amɔtshi salaka eyangelo dia ntana akambo wa mɛtɛ ndo tshɔɔka lo ahole wa tale dia taatana. Akina hawosale eyangelo koko wakatane akambo wa mɛtɛ ondo etena kakaasambisha onto ɔmɔtshi. Oyadi lo yoho yakɔna yakatatane akambo wa mɛtɛ, sho tshɛ takeye nɛmɔ diele la wɔ ndo takayahombia awui amɔtshi dia ntana akambo wa mɛtɛ.

18. a) Wetshelo akɔna wakokaso nkondja oma lo wɛɛla ɛnɛ ehende? b) Wɛɛla ɛnɛ atetshawɔ lo kɛnɛ kendana la Jehowa ndo Yeso?

¹⁸ Wetshelo akɔna wakokaso nkondja oma lo wɛɛla ɛnɛ ehende? (Mat. 6:19-21) Toyambole ɔnɛ: ‘Onde dimi lekɔ la ekanelo ka yimba kele oko kɛnɛ kaki l’anto wa lo wɛɛla ɛnɛ? Onde dimi mbɔsaka akambo wa mɛtɛ oko ɛngɔ ka nɛmɔ? Onde l’ekɔ la yimba ya ndjahombia dia ntana akambo wa mɛtɛ, kana onde dimi mbetawɔka di’awui akina wele oko ɛngɛnɔngɛnɔ wa lushi la lushi mbekolami yimba oma lo akambo wa mɛtɛ?’ (Mat. 6:22-24, 33; Luka 5:27, 28; Flpɛ. 3:8) Naka otema aso ngɛnangɛnaka akambo wa mɛtɛ lo yoho y’efula, kete tayoleka nkeketsha yɛdikɔ yaso ya mbetsha akambo wa mɛtɛ lo dihole dia ntondo lo nsɛnɔ yaso.

19. Kakɔna kayotɔsɛdingola lo sawo diayela?

¹⁹ Nyɛsɔ sho tshɛ tɛnya dia tamboka ndo tamboshihodia mɛtɛ kitshimudi ya wɛɛla tshɛ wambotɔsɛdingola wendana la Diolelo. Hatohombe nsala dui sɔ lo nkomɛ tsho dia mbeya kitshimudi yawɔ koko sho pombaka nkamba la wetshelo wakondjaso oma lɔkɔ. Lo sawo diayela, tayɔsɛdingola wɛɛla ekina esato ndo wetshelo wakokaso nkondja oma lɔkɔ.