1, 2. Kakɔna kakasale Yeso la dikɔlɔ dia Nisana 14, 33 T.D.? (Enda osato wele lo mbɔtwɛlɔ.)

WONYA wambodja, ndo wɛdi wekɔ kasaa la Jɛrusalɛma. La dikɔlɔ dia Ngɔndɔ ka Nisana 14, 33 T.D., Yeso nde l’apɔstɔlɔ ande wakasale Dambo di’Elekanelo, dia mbohɔ woho wakatshungɔ ase Isariyɛlɛ oma lo lɔhɔmbɔ la l’Edjibito ndo laasɔ ko ambeta ntambe 15. Oma laasɔ, Yeso akayɔhɔhɔla nde l’apɔstɔlɔ ande wa kɔlamelo 11 dambo dia laande dia vɔ mbohɔka nyɔi kaki suke la mbokomɛ la ntondo ka wonya mbidja. *—Mat. 26:1, 2.

² Yeso akasale dɔmbɛlɔ ko akasha apɔstɔlɔ ande mapa waha la wodoya lo mbatɛ ɔnɛ: “Nyɔshi, nyole.” Oma laasɔ, nde akɔshi dikɔhɔ dia vinyɔ ndo l’ɔkɔngɔ wa nde nsala dɔmbɛlɔ nto, nde akawasha lo mbatɛ ɔnɛ: “Nyɔnɔ nyu tshɛ.” (Mat. 26:26, 27) Oma laasɔ, Yeso kombasha nto mbo ya ndɛ koko akalembetshiya ambeki ande wa kɔlamelo asɔ awui efula wakahombe salema la dikɔlɔ sɔ.

3. Ambola akɔna wayangaso nsɛdingola lo sawo nɛ?

³ Mbokɛmaka dia Yeso akahɔhɔla Eohwelo ka nyɔi kande kelamɛ nto ɔnɛ “Dambo dia dikɔlɔ dia Nkumadiɔndjɔ.”  (1 Kɔr. 11:20) Lo kɛnɛ kendana la dambo sɔ, ambola anɛ monyiyamaka: Lande na kahombaso nsala Eohwelo ka nyɔi ka Yeso? Kakɔna kalembetshiya mapa la vinyɔ? Ngande wakokaso ndjalɔngɔsɔla dia Eohwelo? Waa na wahomba ndɛ mapa ndo nnɔ vinyɔ? Ndo ngande wasala Akristo akambo lo yoho yɔtɔnɛ la kɛnɛ kata Afundelo lo ndjela elongamelo kele lawɔ?

4. Kakɔna kakatosalɛ Yeso diɛsɛ la nyɔi kande?

⁴ Oko weso tokanula taki Adama, takahowɔ pɛkato la nyɔi. (Rɔmɔ 5:12) Lam’ele sho bu kokele, ndooko onto lakoka mbisha Nzambi oshinga w’etshungwelo wa lɔsɛnɔ lande kana l’anto akina. (Osam. 49:6-9) Diɛsɛ la nyɔi kande, Yeso akafute oshinga w’etshungwelo wetawɔma, mbuta ate demba diande dia kokele ndo dikila diande diakatshulɔma. Lo mbisha Nzambi nɛmɔ di’oshinga w’etshungwelo, Yeso akasale dia sho ntshungɔ oma lo pɛkato la nyɔi ndo nongola woshasha wa lɔsɛnɔ la pondjo.—Rɔmɔ 6:23; 1 Kɔr. 15:21, 22.

5. a) Ngande weyaso dia Nzambi nde la Kristo mbokaka anto wa l’andja w’otondo ngandji? b) Lande na kahombaso mbɔtɔ lo Eohwelo ka nyɔi ka Yeso?

⁵ Oshinga w’etshungwelo mɛnyaka dia Nzambi mbokaka anto wa l’andja w’otondo ngandji. (Jni. 3:16) Olambo waki Yeso tɛnyaka dia nde lawɔ tookaka ngandji. Diakɔ diele, etena kakandasɛnaka l’olongo oko “ukambi a komba” waki Nzambi, Yeso aki ‘la ɔngɛnɔngɛnɔ lo dikambo di’anto.’ (Tuk. 8:30, 31) Lowando lele laso le Nzambi ndo le Ɔnande pombaka totshutshuya dia mbɔtɔ lo Eohwelo ka nyɔi kaki Yeso ndo kɛsɔ ayɛnya dia tekɔ lo nkitanyiya didjango diata ɔnɛ: “Kanyotshake ɔnkɔnɛ dia mbohɔkami.”—1 Kɔr. 11:23-25.

6. Ngande wahombaso mbɔsa mapa la vinyɔ yatokambaka laso lo Eohwelo?

⁶ Etena kakandahɔhɔla Eohwelo, Yeso kokadimola lo yoho ya dihindo mapa la vinyɔ otsha lo demba la dikila diande dia mɛtɛ mɛtɛ. Koko nde akate lo kɛnɛ kendana la mapa ate: “Mapa ɔnɛ wekɔ didjidji dia demba diami.” Lo kɛnɛ kendana la vinyɔ nde akate ate: “Vinyɔ nyɛ yekɔ didjidji dia ‘dikila diami dia sheke’ diayotshulɔma lo wahɔ w’anto efula.” (Makɔ 14:22-24) Mbokɛmaka hwe dia mapa la vinyɔ wekɔ tsho tolembetelo kana didjidji.

7. Kakɔna kalembetshiya mapa watokambaka laso lo Eohwelo?

⁷ Lo diaaso dia laande sɔ dia lo 33 T.D., Yeso akakambe la mapa waha la wodoya wakatshikala etena kakawasale Dambo di’Elekanelo. (Etum. 12:8) Lo Afundelo, wodoya nembetshiyaka ɛhɔndɛlɔ kana pɛkato. (Mat. 16:6, 11, 12; Luka 12:1) Mbokɛmaka dia Yeso akakoke mɛtɛ nkamba la mapa waha la wodoya nɛ dia vɔ waki didjidji dia demba diande diele bu la pɛkato. (Hɛb. 7:26) Ɔnkɔnɛ, woho wa mapa wa ngasɔ mbakamba laso lo Eohwelo.

8. Kakɔna kalembetshiya vinyɔ yatotokambaka layɔ lo Eohwelo?

⁸ Oko wele vinyɔ yakakambe la Yeso lo Nisana 14, 33 T.D., aki didjidji dia dikila dia Yeso mbele ndo vinyɔ yatokambaka laso lo Eohwelo nshi nyɛ. Yeso akadiakema lo dihole diaki l’andja w’osomba wa Jɛrusalɛma di’elamɛ ɔnɛ Gɔlgɔta ndo dikila diande diakatshulɔma “dia edimanyielo ka pɛkato.” (Mat. 26:28; 27:33) Mapa la vinyɔ yatokambaka laso lo Eohwelo ekɔ didjidji di’olambo w’oshinga wolo wakakimɔ Yeso lo waahɔ w’anto wa l’andja w’otondo ndo sho mandolaka woshasha wa la ngandji ɔsɔ. Ɔnkɔnɛ, ekɔ ohomba di’onto l’onto ndjalɔngɔsɔla lo kɛnɛ kendana la Dambo dia dikɔlɔ dia Nkumadiɔndjɔ sɔ diasalema ɔnɔnyi tshɛ.

9. a) Lande na kele ekɔ ohomba mbadiaka avɛsa wa lo Bible watɛkɛta dia Eohwelo? b) Ngande wayaokayɛ lo kɛnɛ kendana la oshinga w’etshungwelo?

⁹ Yoho mɔtshi ele, lo mbadiaka avɛsa wa lo Bible watɛkɛta dia Eohwelo watanema lo Tɔsɛdingolake Afundelo lushi la lushi ndo sho koka kanaka yimba la kɛnɛ kakasale Yeso yema tshitshɛ la ntondo ka nde mvɔ. Dui sɔ koka tokimanyiya dia sho nɔngɔsɔla etema aso lo kɛnɛ kendana la Dambo dia dikɔlɔ dia Nkumadiɔndjɔ. * Kadiyɛso kɛmɔtshi akafunde ate: “Sho tolongamɛka Eohwelo l’asolo walomɔlomɔ ndo sho ngɛnangɛnaka dui sɔ ɔnɔnyi tshɛ. Dimi mbohɔka lushi lakamemala suke la dibaya di’odo wa papa kami ka ngandji . . . etena kakamawendaka, laki la lowando l’efula l’otema lo kɛnɛ kendana l’oshinga w’etshungwelo. . . . Lakeyaka avɛsa tshɛ wendana la dui sɔ ndo woho wa mbalembetshiya. Koko etena kakamayokana yimba lo kɛnɛ kendana la nyɔi, otema ami wakayololaka l’ɔngɛnɔngɛnɔ lo ɛlɔlɔ tshɛ wakondjaso diɛsɛ la oshinga w’etshungwelo.” Etena kayalɔngɔsɔlaso dia Eohwelo, ekɔ ohomba sho nkana yimba lo woho wele olambo waki Yeso totshungolaka oma lo lɔhɔmbɔ la pɛkato la nyɔi.

10. Naka sho ndjalɔngɔsɔla dia Eohwelo, shɛngiya yakɔna yakoka monga la dui sɔ l’olimu aso w’esambishelo?

¹⁰ Sho koka ndjalɔngɔsɔla dia Eohwelo lo mfudia olimu w’esambishelo, ɛnyɛlɔ lo nkamba olimu w’ombatshi mboka wa tshanda lo nshi ya Eohwelo. Naka sho mbelɛ ambeki aso wa Bible ndo anto akina oya lo Dambo dia dikɔlɔ dia Nkumadiɔndjɔ, kete tayonga la ɔngɛnɔngɛnɔ lo ntɛkɛta awui wendana la Nzambi, Ɔnande ndo ɛtshɔkɔ wayokondja anto wangɛnyangɛnya Jehowa ndo wotombola.—Osam. 148:12, 13.

11. Ngande wakalɛka ase Kɔrɛtɔ amɔtshi mapa ndo nnɔ vinyɔ ya lo Eohwelo lo yoho ya kɔlɔ?

¹¹ Etena kayalɔngɔsɔlayɛ dia Dambo dia dikɔlɔ dia Nkumadiɔndjɔ, ekɔ ohomba nsɛdingola kɛnɛ kakafundɛ ɔpɔstɔlɔ Pɔɔlɔ etshumanelo k’Akristo ka la Kɔrɛtɔ. (Adia 1 Kɔrɛtɔ 11:27-34.) Pɔɔlɔ akate dia onto tshɛ lalɛ mapa ndo lanɔ vinyɔ ɔnɔnɔ ekɔ la “onongo wa demba la dikila dia Nkumadiɔndjɔ” Yeso Kristo. Diakɔ diele, okitami pombaka “ndjasɛdingola ndo l’ɔkɔngɔ wa nde ndjashikikɛ” mbakokande ndjɔlɛ mapa ndo nnɔ vinyɔ. Koko, “onto lalɛ ndo lanɔ aha la nshihodia kɛnɛ kalembetshiya demba  amboyayangɛ onongo.” Lam’ele vɔ waki la lɔkɛwɔ la kɔlɔ, ase Kɔrɛtɔ efula waki ‘wɔdu la hemɔ ndo efula waki lo mvɔ lo nyuma.’ Ondo, amɔtshi wakalɛka ndo wakanɔka efula la ntondo kana etena kakasalemaka Eohwelo ndo kɛsɔ mbakakonyaka diaha vɔ nsungukala lo nyuma kana lo yimba. Lam’ele vɔ wakalɛka mapa ndo wakanɔka vinyɔ lo yoho ya kɔlɔ, dui sɔ akaakonyaka diaha vɔ mbetawɔma le Nzambi.

12. a) Pɔɔlɔ akɛdika Eohwelo la na, ndo ɔhɛmwɛlɔ akɔna wakandasha wanɛ walɛ? b) Naka okitami ambosala pɛkato ka woke, ahombande nsala?

¹² Pɔɔlɔ akɛdika Eohwelo la olelo wa mbo ya ndɛ kaamɛ l’anto akina ndo nde akahɛmɔla wanɛ walɛ ate: “Hanyokoke monga nyanɔ lo dikɔhɔ dia Jehowa ko nyanɔ ndo lo dikɔhɔ di’ɛdiɛngɛ. Hanyokoke monga nyalɛ lo ‘mɛsa wa Jehowa’ ko nyalɛ ndo lo mɛsa w’ɛdiɛngɛ.” (1 Kɔr. 10:16-21) Naka okitami ambosala pɛkato ka woke, nde pombaka nyanga ekimanyielo ka lo nyuma. (Adia Jakɔba 5:14-16.) Naka okitami ambosala ‘akambo wɛnya dia nde amboyatshumoya,’ kete kɛsɔ ayɛnya dia nde hɔnyɔla olambo waki Yeso lo ndɛ mapa la vinyɔ ya lo Eohwelo.—Luka 3:8.

13. Lande na kele ekɔ ohomba nɔmba dikambo dia elongamelo kakatosha Nzambi?

¹³ Sho koka ndjalɔngɔsɔlasɔla lo kɛnɛ kendana la Eohwelo, lo nsala alɔmbɛlɔ lo elongamelo kakatosha Nzambi. Okambi waki Jehowa wele ombeki wa kɔlamelo w’Ɔnande hahombe mɔnyɔla olambo wa Yeso Kristo lo ndɛ mapa kana nnɔ vinyɔ ya lo Eohwelo naka nde bu la eshikikelo dia nde aya Okristo w’okitami. Ko ngande wakoka onto ndjashikikɛ dia nde hakoke kana kokaka ndɛ mapa ndo nnɔ vinyɔ?

14. Shɛngiya yakɔna yele la sheke y’oyoyo le akitami?

¹⁴ Wanɛ wele la lotshungɔ la ndɛ mapa ndo nnɔ vinyɔ ya lo Eohwelo, ekɔ wanɛ wele la eshikikelo dia vɔ wekɔ ase sheke y’oyoyo. Lo kɛnɛ kendana la vinyɔ, Yeso akate ate: “Vinyɔ nyɛ nembetshiyaka sheke y’oyoyo yambodjama l’ekimanyielo ka dikila diami.” (1 Kɔr. 11:25) Lo tshimbo y’ɔprɔfɛta Jɛrɛmiya, Nzambi akatatshi dia nde ayodja sheke y’oyoyo yayotshikitana la sheke y’Ɛlɛmbɛ yakandadje l’ase Isariyɛlɛ. (Adia Jeremiya 31:31-34.) Nzambi akadje sheke y’oyoyo l’ase Isariyɛlɛ wa lo nyuma. (Ngal. 6:15, 16) Sheke shɔ yakashikikɛma diɛsɛ la olambo wa Kristo ndo yakatatɛ nkamba olimu diɛsɛ la dikila diande diakatshulɔma. (Luka 22:20) Yeso mbele Ompakemi wa sheke y’oyoyo ndo akitami wa kɔlamelo wele lo sheke shɔ nongolaka difuto dia mbidɛ l’olongo.—Hɛb. 8:6; 9:15.

15. Waana wakɔsama otsha lo sheke ya Diolelo, ndo diɛsɛ diakɔna diayowokondja naka vɔ ntshikala la kɔlamelo?

¹⁵ Anto wele la diɛsɛ dia ndɛ mapa ndo nnɔ vinyɔ mbeyaka dia vɔ wakɔsama otsha lo sheke ya Diolelo. (Adia Luka 12:32.) Sheke shɔ yakadjama lam’asa Yeso l’ambeki ande w’akitami wanɛ wasowa kaamɛ la nde. (Flpɛ. 3:10) Lam’ele vɔ wekɔ lo sheke ya Diolelo, akitami wele la kɔlamelo asɔ wayotolɛ kaamɛ la Kristo oko nkumi ya dikanga pondjo pondjo. (Ɛny. 22:5) Akitami mbele la lotshungɔ la ndɛ mapa ndo nnɔ vinyɔ etena kasalema Dambo dia dikɔlɔ dia Nkumadiɔndjɔ.

16. Lembetshiya lo tshena pe Rɔmɔ 8:15-17.

¹⁶ Paka wanɛ weyama lo tshimbo ya nyuma dia vɔ wekɔ ana wa Nzambi mbele la lotshungɔ la ndɛ mapa ndo nnɔ vinyɔ ya lo Eohwelo. (Adia Rɔmɔ 8:15-17.) Tolembete dia Pɔɔlɔ akakambe la tshɛkɛta “Abba” ya lo Arameyɛ yalembetshiya ɔnɛ “Shɛso.” Ɔna akakokaka nkamba la tshɛkɛta nyɛ etena kakandasawolaka la she nɛ dia tshɛkɛta ya dimɛna efula nyɛ sanganyaka dilɛmiɛlɔ diele la tshɛkɛta “papa” la tshɛkɛta “Ipa.” Wanɛ “wakalongola nyuma” wekɔ ana wa  lo nyuma waki Nzambi. Nyuma kande kambaka lo timba tawɔ ndo mbashikikɛka dia vɔ waya akitami. Vɔ hawoshisha elongamelo ka ndjɔsɛna la nkɛtɛ oshishashisha, nɛ dia wekɔ la eshikikelo ɔnɛ wayotonga ekitɔ kaamɛ la Yeso lo Diolelo dia l’olongo naka vɔ ntshikala la kɔlamelo polo lo nyɔi. Ɛlɔ kɛnɛ, ekɔ paka atshikadi w’akitami l’atei w’akitami 144 000 watayele wanya waki Kristo ‘mbakasɔnama oma le Jehowa Ɔnɛ lele ekila.’ (1 Jni. 2:20; Ɛny. 14:1) Lo tshimbo ya nyuma ka Nzambi, vɔ mbutaka la dui dia wolo ɔnɛ “Abba, Shɛso.” Ande diɔtɔnganelo diele lam’asawɔ la Nzambi lee!

17. Naa elongamelo kele l’akitami, ndo ngande wakiɔsawɔ?

¹⁷ Naka wɛ ekɔ Okristo w’okitami, kete ekɔ ohomba wɛ mbidjaka lo alɔmbɛlɔ ayɛ elongamelo kayɛ k’otsha l’olongo. Etena kata Bible dia ‘wakanyolake dia nyotshukanya’ la Omi la l’olongo, mbuta ate Yeso Kristo ekɔ ohomba wɛ nkamba la ɛtɛkɛta ɛsɔ leyɛ wɛmɛ ndo nongamɛka dia ndjonga “wadi” Kristo. (2 Kɔr. 11:2; Jni. 3:27-29; Ɛny. 21:2, 9-14) Etena kɛnya Nzambi lo Bible ngandji kokande anande wa lo nyuma, eya dia ndo ‘wɛ mbokande ngandji kɛsɔ.’ Ndo etena kasha Jehowa anande w’akitami ɛlɔmbwɛlɔ lo tshimbo ya Ɔtɛkɛta ande, nyuma k’ekila kotshutshuyaka dia wɛ nkitanyiya ndo mbuta l’otema ayɛ ɔnɛ dui sɔ ‘mendanaka lami.’ Nyuma ka Nzambi kambaka leyɛ ndo mɛnyaka lo sɛkɛ dia wɛ aya la elongamelo k’otsha l’olongo.

18. Elongamelo kakɔna kele la “Ɛkɔkɔ ekina,” ndo ngande wayaokayɛ lo dui sɔ?

¹⁸ Naka wɛ ekɔ ose “olui a woke w’anto” wa lo “ɛkɔkɔ ekina,” eya dia Nzambi akakosha elongamelo ka nsɛna lanɛ la nkɛtɛ. (Ɛny. 7:9; Jni. 10:16) Wɛ mɛtɛ nangaka ndjɔsɛna pondjo pondjo lo paradiso ndo wɛ mongaka la ɔngɛnɔngɛnɔ lo nkana yimba la kɛnɛ kata Bible lo kɛnɛ kendana la lɔsɛnɔ la nkɛtɛ lo nshi yayaye. Wɛ nongamɛka ndjonga la wɔladi w’efula etena kayoyonga kaamɛ l’ase nkumbo kayɛ ndo anto w’ɛlɔlɔ akina. Wɛ ekɔ lo nongamɛ l’asolo walomɔlomɔ dia mɛna etena kayoshila ndjala, wola, asui, hemɔ ndo nyɔi. (Esam. 37:10, 11, 29; 67:6; 72:7, 16; Is. 33:24) Wɛ ekɔ lo nongamɛ nto dia nongola wanɛ wayolɔ oma lo nyɔi wele la elongamelo ka ndjɔsɛna pondjo pondjo lanɛ la nkɛtɛ. (Jni. 5:28, 29) Ande lowando lele layɛ lo woho wakakosha Jehowa elongamelo ka ndjɔsɛna la nkɛtɛ lee! Oyadi wɛ hale mapa ndo hanɔ vinyɔ, wɛ mbɔtɔka lo Eohwelo dia mɛnya lowando lele layɛ lo oshinga w’etshungwelo wakakimɔ Yeso Kristo.

19, 20. a) Ngande wakoka elongamelo kakakosha Nzambi monga dui dia mɛtɛ? b) Lande na kayoyɔtɔ lo Dambo dia dikɔlɔ dia Nkumadiɔndjɔ?

¹⁹ Oyadi wɛ ekɔ la elongamelo ka nsɛna lanɛ la nkɛtɛ kana l’olongo, tɔ kayokotshama naka wɛ monga la mbetawɔ le Jehowa Nzambi, le Yeso Kristo ndo lo oshinga w’etshungwelo. Etena katshɔyɛ lo Eohwelo, ekɔ ohomba kana yimba lo elongamelo kele layɛ ndo l’ohomba w’efula wele la nyɔi ka Yeso. Yadjɛ oyango dia monga l’atei wa miliyɔ y’anto wayɔtɔ lo Dambo dia dikɔlɔ dia Nkumadiɔndjɔ diayosalema Lushi la tanu Ngɔndɔ ka nɛi 3, 2015 l’ɔkɔngɔ wa ɛɔtwɛlɔ ka wonya lo Mbalasa ya Diolelo kana lo ahole akina lo andja w’otondo.

²⁰ Wɔtwɛlɔ wa lo Eohwelo koka mfudia lowando layɛ l’oshinga w’etshungwelo waki Yeso. Naka wɛ mpokamɛ dimɛna sawo diayoshama, kete dui sɔ mbeyaka kokonya dia wɛ mboka wanyayɛ anto ngandji lo mbasambisha awui wayoyotoka wendana la ngandji ka Jehowa ndo sangwelo diande dia woke diendana l’anto wa l’andja w’otondo. (Mat. 22:34-40) Kosale tshɛ dia mbɔtɔ lo Dambo dia dikɔlɔ dia Nkumadiɔndjɔ.