ESAMBISHELO ka lokumu l’ɔlɔlɔ mbele olimu woleki ohomba wakambema la nkɛtɛ ɛlɔ kɛnɛ. Oko weyɛ okambi wa Jehowa, wɛ mbɔsaka dia mbisha lonya l’olimu wa mbetɛ anto ambeki ekɔ tshondo ya diɛsɛ. Koko aha la taamu, wɛ mbetawɔka dia ambatshi mboka ndo apandjudi pomanaka la ehemba etena katetemalawɔ monga la ohetoheto l’esambishelo.

Apandjudi amɔtshi wambongaka l’okakatanu dia ntana onto lakoka nsawola la wɔ etena kewɔ lo esambishelo ka lo luudu la luudu. Lo mɛtɛ, mbeyaka monga ko anto efula wa lo ɛtshi kaso ka nkɛtɛ hawotanema la wakawɔ. Etena katshɔso dia tosawola l’ampokami aso, vɔ mbeyaka ntona losango la Diolelo kana monga la wendjudi. Apandjudi akina mongaka la ɔlɛmbɛlɔ nɛ dia vɔ wekɔ la ɛtshi ka nkɛtɛ ka woke koonga la etombelo w’amɛna, koko vɔ wekɔ la wɔma nɛ dia vɔ mɛnaka dia hawotokoka mana la nkindjakindja ɛtshi kakɔ ka nkɛtɛ. Ase etshumanelo amɔtshi wambosambisha l’edja k’ɛnɔnyi efula, ndeka woho wakawalongamɛka ndo vɔ wambɔkɔmɔ.

Onde sho pombaka mamba lo mbeya ɔnɛ okambi waki Jehowa tshɛ koka mpomana la ekakatanu wakoka nkitshakitsha ohetoheto ande l’esambishelo? Ndooko. Hatokoke nongamɛ ɔnɛ ekɔ dui dia wɔdu nsambisha losango l’akambo wa mɛtɛ waki Nzambi washimbɛ nsɛnɔ lo andja ɔnɛ walɔmbɔma oma le “kanga kɔlɔ,” mbuta ate Satana Diabolo.—1 Jni. 5:19.

Oyadi ekakatanu tshɛ wahomana layɛ l’esambishelo, onga la eshikikelo dia Jehowa koka kokimanyiya dia wɛ mbatondoya. Ko kakɔna kakokayɛ nsala dia mfudia ohetoheto ayɛ l’esambishelo? Ɛsɔ tɔsɛdingole alako amɔtshi.

Ɔnɔnyi tshɛ, nunu di’anto wekɔ lo nkoma Ɛmɛnyi wa Jehowa w’eyoyo lo batizama. Naka wɛ  ekekɔ kodibatizamaka, kete aha la taamu wɛ ekɔ lo nkondja wahɔ oma le apandjudi waya la diewo. Naka wɛ aya opandjudi wa Diolelo l’edja k’ɛnɔnyi efula, onde honga dui dia lowando ndo dia dimɛna dia wɛ nkimanyiya wanɛ weke eyoyo?

Yeso akeyaka di’ambeki ande wekɔ l’ohomba w’ɛlɔmbwɛlɔ dia vɔ nkoma esambisha wa tomanamana ndo nde akawaɛnya woho wahomba olimu akɔ kambema. (Luka 8:1) Ɛlɔ kɛnɛ nto, ohomba wekɔ wa ndowanya anto akina dia vɔ nkoma esambisha wa tomanamana.

Hatohombe mfɔnya dia opandjudi w’oyoyo ayonga la diewo dia nsambisha lo ntomba tsho l’esambishelo. Nde ekɔ l’ohomba w’onto lele la lɔsɛngɔ ndo la ngandji mbolowanya. Olowanyelo ɔsɔ koka mendana la woho wa 1) nɔngɔsɔla mbɔtwɛlɔ ndo nsala wɛnyɛlɔ, 2) nsawola l’ompokami kana ombetshetshi, 3) nkaha ekanda aso, 4) ntshɔ dia tenda onto lakɛnya nsaki ndo 5) ntatɛ wekelo wa Bible. Ondo etombelo w’amɛna koka monga naka ɔnɛ lalowanyawɔ sɛdingolaka ndo mbokoyaka toho tesambishelo tawɛnya ɔnɛ lawolowanya. (Luka 6:40) Aha la taamu, opandjudi w’oyoyo mongaka la lowando le onto l’ohokamɛ ndo lawosha ekimanyielo l’etena kende l’ohomba. Ndo nto, opandjudi wahataleke mpokɔ akambo kondjaka wahɔ etena kawandolawɔ ndo kawɛnyawɔ kɛnɛ kahombande nsala.—Und. 4:9, 10.

Kaanga wɛ kodjaka welo dia nkɛtshanya l’ampokami ayɛ, eya dia onto lakoka ndeka nsawola la yɛ dimɛna ele ɔnɛ latasambisha la yɛ. Ohɔ dia Yeso akatome ambeki ande “ahende ahende” dia tosambisha. (Luka 10:1) Lam’ele wakatasambishaka kaamɛ, vɔ wakakokaka keketshana ndo tshutshuyana lam’asawɔ. Ɔnkɔnɛ, nsambisha kaamɛ l’osekaso ombetawudi, ekɔ diaaso dia dimɛna dia ‘keketshana, onto l’onto.’—Rɔmɔ 1:12.

Ko naa awui amɔtshi wakokanyu nsawola? Onde ɔmɔtshi l’atei anyu akahomana la dui diakeketsha l’esambishelo? Onde wɛ akashola dui dimɔtshi di’ohomba lo wekelo ayɛ w’onto ndamɛ kana wa lo nkumbo? Lushi lɔmɔtshi, wɛ mbeyaka nsambisha l’onto lahatolekaka ntomba la yɛ. Onde wɛ mbeyaka woho wakandeye akambo wa mɛtɛ? Kakɔna kakooshikikɛ dia ɔnɛ ekɔ okongamelo wa Jehowa? Naa waɛsɛ kana awui amɔtshi wakahomana lande? Wɛ koka mbotɛ awui amɔtshi wakahomana layɛ l’esambishelo. Oyadi etombelo akɔna wakoka monga la esambishelo, nsambisha kaamɛ l’onto ɔmɔtshi mbishaka diaaso dia “keketshana . . . lam’asanyu.”—1 Tɛs. 5:11.

Dia monga l’ohetoheto l’esambishelo ekɔ ohomba ntetemala monga la mbekelo y’amɛna ya wekelo. “Ɔhɔmbɔ wa kɔlamelo ndo kɛsɔ” ekɔ lo ntondja wetshelo lo asawo wotshikitanyi. (Mat. 24:45) Diakɔ diele, ekɔ asawo wotshikitanyi wakokayɛ mbeka dia wɛ ndɛ lo nyuma. Ɔnɛ ekɔ ɛnyɛlɔ ka dimɛna ka sawo diakokayɛ mbeka lo wekelo w’onto ndamɛ: Lande na kele olimu w’esambishelo w’ekɔ ohomba efula? Kiombo yele lo sawo nɛ yekɔ la ɛkɔkɔ ɛmɔtshi.

Sɛdingola ɛkɔkɔ wele lo kiombo yakɔ ayokoka kotshutshuya dia wɛ nsambisha l’ohetoheto. Lande na kahayasɔnɛ ɔtɛ a dui ɔsɔ lo wekelo ayɛ w’onto ndamɛ dia wɛ ndjoshola ɛkɔkɔ ekina? Oma laasɔ, ayonga ohomba wɛ nkana yimba la ɛkɔkɔ akɔ ndo avɛsa wasukɛ ɛkɔkɔ akɔ. Dui sɔ ayokeketsha ohetoheto ayɛ l’esambishelo.

Okongamelo wa Jehowa toshaka mbala la mbala alako watokimanyiya dia sho ndowanya olimu aso w’esambishelo. Laadiko di’esambishelo ka lo luudu la luudu, sho koka ɛnyɛlɔ fundɛka anto mikanda, nsambisha lo telefɔnɛ, lo toshinga, lo ahole wa lo sɛkɛ, lo tshakitudi ndo lo bɛtshi dia nkɛtɛ diandawɔ ekanda. Ndo nto, sho koka ndjakongɛ dia nsambisha lo ɛtshi ka nkɛtɛ kahaleke nsambishama.

Onde wɛ ekɔ suke dia nkamba l’alako asɔ? Onde wɛ ambohembaka nkamba l’amɔtshi l’atei awɔ? Efula ka wanɛ wambohembaka wakakondja etombelo w’ɛlɔlɔ. Tɔsɛdingole bɛnyɛlɔ sato.

Ɛnyɛlɔ ka ntondo mendanaka l’alako wele lo Olimu Aso wa Diolelo wɛnya woho wahombaso ntatɛ mbeka l’anto Bible. Alako akɔ wakakimanyiya kadiyɛso April dia nde mbeka Bible l’asekande wa l’olimu asato. Nde aki la ɔngɛnɔngɛnɔ  etena kaketawɔ asekande asato asɔ dia nde mbasambisha ndo kakawatatɛ ndja lo nsanganya ya lo etshumanelo.

Ɛnyɔlɔ ka hende mendanaka la okahelo wa periodikɛ yaso. Takakeketshama dia nyanga anto wangɛnangɛna weho ɛmɔtshi w’asawo wa lo ekanda aso. Omendji w’otshimbedi ɔmɔtshi wa lo États-Unis akate dia nde akakahɛ ewandji ɛmɔtshi wa lo kɔpanyi yatshulawɔ wa pinɛ Réveillez-vous ! wele la sawo diatɛkɛta dia pinɛ ya mituka. Ndo nto, nde la wadɛnde wakakahe lo biro y’adɔkɔtɛlɛ ndekana 100, numɛlɔ yaki la sawo diata ɔnɛ “ Mieux comprendre son médecin ”. Nde mbutaka ate: “Takakondjaka etombelo w’amɛna lo nkamba la mbɔtwɛlɔ ndo lo nkaha ekanda aso. L’ɔkɔngɔ wa sho monga lawɔ oko angɛnyi lo ahole asɔ, takayongaka la waaso wa nsawola la wɔ efula.”

Ɛnyɛlɔ ka sato mendanaka la esambishelo ka lo telefɔnɛ. Kadiyɛso Judy akatome mukanda otsha lo Mbalasa kalɔmbɔla olimu wa l’andja w’otondo dia mɛnya lowando lande lo yɛdikɔ yendana la esambishelo ka lo telefɔnɛ. Nde akate ate nyango laki aya osombe w’ɛnɔnyi 86 lakadiɛnɛka la waa hemɔ akasambishaka mbala la mbala lo telefɔnɛ ndo akongaka la ɔngɛnɔngɛnɔ w’efula lo woho wakandekaka Bible l’onto ɔmɔtshi laki la ɛnɔnyi 92.

Alako wendana la esambishelo watanema lo ekanda aso mongaka la etombelo w’amɛna. Kamba lawɔ nɛ dia vɔ koka kokimanyiya dia wɛ ntetemala monga la ɔngɛnɔngɛnɔ ndo l’ohetoheto l’olimu w’esambishelo.

Ntondoya l’olimu w’esambishelo halemanɛ ntondontondo la lofulo l’ekanda wakahɛso anto, lofulo l’anto weka laso Bible, kana lofulo l’anto wambotokimanyiya dia vɔ nkoma ekambi waki Jehowa. Ɛnyɛlɔ, anto angana wakakimanyiya Nɔa laadiko di’anto wa lo luudu lande dia vɔ nkoma atɛmɔdi wa Jehowa? Koko nde akatondoya l’olimu w’esambishelo. Kɛnɛ koleki ohomba ele woho wakambɛso Jehowa la kɔlamelo.—1 Kɔr. 4:2.

Apandjudi efula wa Diolelo mɛnaka ɔnɛ dia vɔ mfudia ohetoheto awɔ l’esambishelo, ekɔ ohomba vɔ ndjadjɛ eyango la wɛdimo. Naa eyango ɛmɔtshi wakokayɛ ndjadjɛ? Eyango ɛmɔtshi wakokayɛ ndjadjɛ tanemaka lo kiombo ndjo.

L’ekimanyelo ka Jehowa, yanga toho takokayɛ nkondja etombelo w’ɛlɔlɔ l’esambishelo. Etena kakotshayɛ eyango ayɛ, wɛ ayonga l’ɔngɛnɔngɛnɔ lo nsala dui sɔ ndo la ɔlɔ lo mbeya ɔnɛ wɛ ekɔ lo nsala kɛnɛ tshɛ kakokayɛ nsala dia nsambisha lokumu l’ɔlɔlɔ.

Lo mɛtɛ, nsambisha lokumu l’ɔlɔlɔ koka monga okakatanu. Koko ekɔ awui amɔtshi wakokayɛ nsala dia monga l’ohetoheto l’esambishelo. Kosawolake la onto latasambisha layɛ, onga la mbekelo y’amɛna ya wekelo, kokambake l’alako washa ɔhɔmbɔ wa kɔlamelo ndo yadjɛ eyango la wɛdimo. Laadiko dia laasɔ, ohɔ dia Nzambi akakosha diɛsɛ diahadjama anya dia monga Ɔmɛnyi ande ndo nsambisha lokumu l’ɔlɔlɔ. (Is. 43:10) Ande ɔngɛnɔngɛnɔ wayonga layɛ naka wɛ ntetemala nsambisha lokumu l’ɔlɔlɔ lee!