1. Lande na kele mbokoya Yeso tosukanyaka suke la Jehowa?

SHO tongaka suke dia mbokoya anto wele sho nangaka lonto ndo lɔkɛwɔ lawɔ. L’atei w’anto tshɛ wakasɛnɛ lanɛ la nkɛtɛ, ndooko onto lakokaso mbokoya ko ndeka Yeso Kristo. Lande na? Nɛ dia Yeso ndamɛ akate ate: “Onto lambɔmɛna ambɛna ndo Papa.” (Jni. 14:9) Lam’ele Yeso kɛnɛmɔlaka lo yoho ya kokele lonto la She, diakɔ diele ɔnɛ lawɛna mɛnaka She. Ɔnkɔnɛ, etena kokoyaso Yeso sho ndjasukanyaka la Jehowa Onto loleki woke l’andja w’otondo. Ande ɛlɔlɔ waya lo mbokoya waonga ndo mboka yaki Yeso lee!

2, 3. a) Lande na kakasale Jehowa di’awui wendana la Ɔnande fundama lo Bible, ndo kakɔna kalongamɛnde dia sho nsala? b) Kakɔna kayotɔsɛdingola lo sawo nɛ ndo lo sawo diayela?

² Ko ngande wakokaso mbeya woho wele Yeso? Diɛsɛ ko lo ɛlɔmbwɛlɔ ka nyuma k’ekila, awui wendana la Yeso wakafundama lo Bible. Jehowa akasale di’awui asɔ fundama oko watanemawɔ lo Afundelo w’Akristo wa lo Grɛkɛ nɛ dia nde nangaka sho mbeya awui wendana la Ɔnande dia sho mbookoya. (Adia 1 Petero 2:21.) Ɛnyɛlɔ kakatotshikɛ Yeso lo Bible mbɛdikamaka  la “wanya.” Jehowa tɔlɔmbaka dia sho tatshɔka l’ɔkɔngɔ wa Yeso ndo tayelaka wanya ande. Nde akatotshikɛ ɛnyɛlɔ ka kokele koko sho bu anto wele kokele. Jehowa halongamɛ dia sho ndjela wanya waki Yeso lo yoho ya kokele. Shɛso nongamɛka dia sho mbokoya Ɔnande lo yoho yoleki dimɛna lo ndjela akoka aso oko anto wele keema kokele.

³ Nyɛsɔ tɔsɛdingole waonga amɔtshi w’amɛna waki Yeso. Lo sawo nɛ, tayɔtɛkɛta dia okitshakitsha ndo kɛtshi kaki Yeso ndo lo sawo diayela, tayɔsɛdingola dihonga ndo shɛnɔdi yande. Lo kɛnɛ kendana la dionga la dionga, tayokadimola lo ambola anɛ: Kakɔna kalembetshiya dionga sɔ? Ngande wakatotshikɛ Yeso ɛnyɛlɔ lo kɛnɛ kendana la dionga sɔ? Ndo ngande wakokaso mbookoya?

4. Okitshakitsha kɛdikɛdi na?

⁴ Okitshakitsha kɛdikɛdi na? Lo andja ɔnɛ wele anto la ndjadiya, anto amɔtshi koka mfɔnya ɔnɛ onto lele la okitshakitsha ekɔ ɔhɔdu kana hayaɛkɛ lende ndamɛ. Koko aha ngasɔ mbediɔ. Okitshakitsha nɔmbaka di’onto nkeketala ndo monga la dihonga. Onto lele la okitshakitsha ekɔ onto lele bu la otako ndo la lotamanya. Onto mongaka la okitshakitsha oma lo woho wayaɔsande ndamɛ. Diksiɔnɛrɛ dimɔtshi di’awui wa lo Bible mbutaka ɔnɛ: “Okitshakitsha kɛdikɛdi mbeya dia tekɔ anto w’anyanya la ntondo ka Nzambi.” Naka sho monga la okitshakitsha w’efula la ntondo ka Nzambi, kete hatotoyaɔsa dia sho ndeka anto akina. (Rɔmɔ 12:3; Flpɛ. 2:3) Bu dui dia wɔdu le anto wele keema kokele dia monga la okitshakitsha. Koko sho koka monga la okitshakitsha naka sho mbeya dihole diele laso la ntondo ka Nzambi lo ndjela wanya w’Ɔnande.

5, 6. a) Akɔna ele Mikayɛlɛ Arkandjelo? b) Ngande wakɛnya Mikayɛlɛ dia nde aki la okitshakitsha?

⁵ Ngande wakɛnya Yeso okitshakitsha? Bible mɛnyaka dia Ɔnaki Nzambi akakɛnɛmɔla okitshakitsha ntatɛ etena kakinde l’olongo oko etongami ka lo nyuma kaki la wolo ndo etena kakinde lanɛ la nkɛtɛ oko onto la kokele. Tɔsɛdingole bɛnyɛlɔ dingana to.

⁶ Dionga diande. Judɛ, ofundji wa Bible kɔndɔlaka dui dimɔtshi diakasale Yeso la ntondo ka nde ndja lanɛ la nkɛtɛ. (Adia Judɛ 9.) Mikayɛlɛ Arkandjelo, mbuta ate Yeso ‘akawane nde la Diabolo’ kanga kɔlɔ. Vɔ wakawane l’ɔtɛ wa “odo wa Mɔsɛ.” Tohɔ dia l’ɔkɔngɔ wa nyɔi ka Mɔsɛ, Jehowa akokundɛ lo dihole diele ndooko onto leya. (Euh. 34:5, 6) Ondo Diabolo akalange nkamba la odo wa Mɔsɛ dia ntondja ɔtɛmwɛlɔ wa kashi. Oyadi l’ɔtɛ w’oyango akɔna waki la Diabolo lo yimba, Mikayɛlɛ akonge la dihonga. Dibuku dimɔtshi mbutaka dia tshɛkɛta ya lo Grɛkɛ yakakadimɔma ɔnɛ ‘akawane’ ‘mendanaka la kilombo’ ndo yɔ mɛnyaka ‘dia Mikayɛlɛ akawane la Diabolo dia mbɔsa odo wa Mɔsɛ.’ Koko owandji w’andjelo akeyaka dia aha nde mbaki la lotshungɔ la nombosha. Lo dihole dia nde nsala ngasɔ, nde akatɔlɛ dikambo sɔ la ntondo ka Shushi yaheme laadiko dia tshɛ, mbuta ate Jehowa. Ɔnkɔnɛ, Mikayɛlɛ kotandja lowandji lande elelo kaanga lo etena kakawɔsɔmbwɛ. Ande okitshakitsha waki lande lee!

7. Ngande wakɛnya Yeso okitshakitsha oma lo ɛtɛkɛta ande ndo oma lo etsha ande?

⁷ Etena kakandasambishaka lanɛ la nkɛtɛ, Yeso akatɛkɛtaka ndo akasalaka akambo lo yoho yɛnya dia nde aki la okitshakitsha wa mɛtɛ. Ɛtɛkɛta ande. Yeso kokotola yambalo y’anto oya lende. Lo dihole dia nde nsala ngasɔ, nde akatɔlaka lotombo tshɛ otsha le She. (Makɔ 10:17, 18; Jni. 7:16) Nde  kombahemɛ ambeki ande kana mɛnya dia vɔ waki l’ɛse kande. Koko nde akawashaka nɛmɔ, akaawandolaka lo awui w’ɛlɔlɔ wakawasalaka ndo akɛnyaka dia nde ndjaɛkɛka lewɔ. (Luka 22:31, 32; Jni. 1:47) Etsha ande. Yeso akasɔnɛ dia nsɛna lɔsɛnɔ lele la wɛdimo lo mbewɔ monga la lomombo la l’emunyi. (Mat. 8:20) Nde aki suke dia nsala tumu yakasalaka akanga w’okitshakitsha yele anto akina konangaka ndjisala. (Jni. 13:3-15) Nde mɛtɛ akɛnya okitshakitsha lo monga la okitanyiya. (Adia Filipɛ 2:5-8.) Otshikitanyi l’anto waki la lotamanya ndo waki komonga la okitshakitsha, Yeso akakitanyiyaka kɛnɛ kakɔlɔmbaka Nzambi lo monga la “okitanyiya polo ndo lo nyɔi.” Shi mbokɛmaka hwe dia Yeso, Ɔna onto aki la “otema w’okitshakitsha”?—Mat. 11:29.

8, 9. Ngande wakokaso mɛnya okitshakitsha?

⁸ Ngande wakokaso mbokoya Yeso lo kɛnɛ kendana la monga la okitshakitsha? Oma lo dionga diaso. Okitshakitsha ayotoshimba diaha sho ntandja lowandji laso elelo. Naka sho mbeya dia sho bu la lotshungɔ la nombosha, kete hatotonga suke dia mɔnyɔla anto akina lo tɔkɔmɔkɔmɔ tawɔ kana mbidja tamu lo tɛdikɔ tɔsawɔ. (Luka 6:37; Jak. 4:12) Okitshakitsha tokimanyiyaka dia sho mbewɔ “ndjala ololo efula” lo mɔnyɔlaka anto wele bu l’akoka kana la ɛkɛndɛ wele laso. (Und. 7:16) Dikumanyi diele la ndjakitshakitsha hawoyaɔshi dia vɔ ndeka asekawɔ ambetawudi. Lo dihole dia vɔ nsala ngasɔ, alami asɔ ‘mbɔsaka di’anto akina mbaleka’ ndo vɔ mɛnyaka oma lo dionga diawɔ dia vɔ wekɔ l’ɛse k’anto akina.—Flpɛ. 2:3; Luka 9:48.

⁹ Tɔsɛdingole ɛnyɛlɔ kaki ɔnangɛso Walter Thorn, lakakambe oko omendji w’otshimbedi lo etatelo ka 1894. L’ɔkɔngɔ wa nde nkamba ɛnɔnyi efula l’olimu ɔsɔ, wakawelɛ dia nde tokamba lo fɛrmɛ ka la New York ndo nde akatokambaka lo luudu lakawalamaka nkɔkɔ. Nde akate ate: “Etena tshɛ kakanyiyami diɛsɛ dia laande diele lami, dimi tshɔka lo tshuku dia luudu ko mbutaka ɔnɛ: ‘Dimi onto l’anyanya, ɔkɔkɔ wa na watomonga la otako?’” (Adia Isaya 40:12-15.) Ɔsɔ mɛtɛ ekɔ ɛnyɛlɔ k’okitshakitsha.

10. Ngande wakokaso mɛnya okitshakitsha oma lo ɛtɛkɛta aso ndo oma lo etsha aso?

¹⁰ Oma lo ɛtɛkɛta aso. Naka sho monga la okitshakitsha, kete dui sɔ diayɛnama oma lo ɛtɛkɛta aso. (Luka 6:45) Etena kasawolaso l’anto akina, sho pombaka mbewɔ mbika epole ɔsɛkɛ lo akoka kana lo waɛsɛ wele laso. (Tuk. 27:2) Lo dihole dia nsala ngasɔ, tayoka washo lo awui w’ɛlɔlɔ wasala anangɛso l’akadiyɛso ndo tayowawandola l’ɔtɛ wa waonga, akoka ndo kɛnɛ tshɛ kele ɔlɔlɔ kasalawɔ. (Tuk. 15:23) Oma lo etsha aso. Akristo wele la okitshakitsha hawoyasha lo nyanga lokumu lo andja ɔnɛ. Koko vɔ sɛnaka lɔsɛnɔ l’ɔsɛlɛngɛ, lo nsala kaanga elimu w’ɔsa anto wa lo andja ɔnɛ oko anyanya l’oyango wa ndeka kambɛ Jehowa. (1 Tim. 6:6, 8) Laadiko di’akambo asɔ tshɛ, sho koka mɛnya okitshakitsha aso lo monga la okitanyiya. Nɔmbamaka monga la yimba ya ndjakitshakitsha dia sho ‘nkitanyiya wanɛ walɔmbɔla’ etshumanelo ndo mbetawɔ ndjela ɛlɔmbwɛlɔ kalongolaso oma le okongamelo wa Jehowa.—Hɛb. 13:17.

11. Kɛtshi kɛdikɛdi na?

¹¹ Kɛtshi kɛdikɛdi na? Kɛtshi ekɔ tshelo ya mboka anto ngandji. Afundelo mɛnyaka dia Jehowa la Yeso mbokanaka kɛtshi ndo ngandji k’efula. (Luka 1:78; 2 Kɔr. 1:3; Flpɛ. 1:8) Lo kɛnɛ kendana la kɛnɛ kata Afundelo lo dikambo dia kɛtshi, dibuku  dimɔtshi di’awui wa Bible mbutaka ɔnɛ: “Dui sɔ nɔmbaka dia sho ndjahombia dia nkimanyiya anto akina wele lo dihombo. Monga la kɛtshi nɔmbaka nto dia sho ndjasha ndo nsala dui dimɔtshi diayoshimbɛ nsɛnɔ y’anto akina kana dia vɔ ndjɔsɛna yoho kina ya lɔsɛnɔ.” Kɛtshi ekɔ dionga dimɔtshi diatshutshuya onto dia nsala dui dimɔtshi di’ɔlɔlɔ. Onto lele la kɛtshi, tshutshuyamaka dia nsala etshikitanu lo nsɛnɔ y’anto akina.

12. Kakɔna kɛnya dia Yeso aki la kɛtshi k’efula otsha le anto akina, ndo kɛtshi kɛsɔ kakotshutshuyaka dia nsala na?

¹² Ngande wakɛnya Yeso kɛtshi? Oma lo nsaki ndo etsha ande wa kɛtshi. Yeso aki la kɛtshi k’efula otsha le anto akina. Etena kakandɛnyi Mariya w’ɔngɛnyi ande ndo anto akina walela l’ɔtɛ wa nyɔi ka Lazaro y’ɔnangɛwɔ, “Yeso akalele.” (Adia Joani 11:32-35.) Lam’ele nde akandama la kɛtshi k’efula l’otema, aha la ntshimbatshimba Yeso akolola Lazaro, oko wakandolola ɔna pami laki wadi aki odo. (Luka 7:11-15; Jni. 11:38-44) Ondo Yeso akasha Lazaro diɛsɛ dia tɔsɛna l’olongo. Lo diaso dimɔtshi la ntondo ka laasɔ, Yeso ‘akoke olui a woke w’anto wakaye le nde kɛtshi.’ Lam’ele Yeso akawaoke kɛtshi, “nde akatatɛ mbaetsha akambo efula.” (Makɔ 6:34; Kingdom Interlinear) Ande etshikitanu wakahombe nsala efula ka wanɛ wakoke wetshelo ande lee! Tolembete dia l’ɔtɛ wa kɛtshi k’efula kaki la Yeso, nde kokomɛka tsho lo monga la nsaki koko kɛtshi kɛsɔ kakotshutshuya dia nde nkimanyiya anto akina.—Mat. 15:32-38; 20:29-34; Makɔ 1:40-42.

13. Lo yoho yakɔna yakatɛkɛtaka Yeso la kɛtshi otsha le anto akina? (Enda osato wele lo mbɔtwɛlɔ.)

¹³ Oma lo ɛtɛkɛta ande wa kɛtshi. Kɛtshi kaki Yeso kakotshutshuyaka dia nde ntɛkɛta la kɛtshi otsha le anto akina, djekoleko otsha le wanɛ wakɛngiyamaka. Ɔpɔstɔlɔ Mateo akakambe la ɛtɛkɛta waki Isaya otsha le Yeso lo mbuta ɔnɛ: “Nde hatohembola sɔpɔ diakawaminola ndo nde hatodima oshinga wa tala wotadimala.” (Is. 42:3; Mat. 12:20) Yeso akatɛkɛtaka lo yoho yakakeketshaka anto wele etema awɔ waki oko asɔpɔ wambominwama kana oko tala di’esɔ diotadimala. Nde akasambisha losango lele la elongamelo dia “nkonoya akanga w’etema wambate.” (Is. 61:1) Nde akalɔmbɛ wanɛ ‘waki la paa ndo la wetsho’ dia vɔ ndja le nde ndo akawashikikɛ ɔnɛ wayokondja “ekeketshelo.” (Mat. 11:28-30) Nde akashikikɛ ambeki ande dia Nzambi ekɔ la kɛtshi k’efula le atɛmɔdi ande tshɛ mbidja ndo “ana w’akɛnda,” mbuta ate wanɛ wɔsama oko bu ohomba lo ndjela yimba y’andja ɔnɛ.—Mat. 18:12-14; Luka 12:6, 7.

14. Ngande wakokaso mboka anto akina kɛtshi?

¹⁴ Ngande wakokaso mbokoya Yeso lo monga la kɛtshi? Oma lo ɛtɛkɛta aso wa kɛtshi. Hatotonga la ɛtɛkɛta wa kɛtshi lo yoho ya dihindo koko Bible tokeketshaka dia sho mbidja welo dia monga lawɔ. “Kɛtshi k’efula [ndo] lɔsɛngɔ” ekɔ tenyi dia l’onto l’oyoyo lahomba Akristo monga la lɔ. (Adia Kɔlɔsayi 3:9, 10, 12.) Ko ngande wakokayɛ monga la kɛtshi otsha le anto akina? Ekɔ ohomba wɛ ndjihola otema ayɛ. (2 Kɔr. 6:11-13) Hokamɛ la yambalo tshɛ etena kakotɛ onto ɔmɔtshi ekakatanu ande kana awui wokiyanya. (Jak. 1:19) Kamba la ekanelo kayɛ ka yimba ndo yambola ɔnɛ: ‘Otondongaka dimi mbele la ntondo ka dui diambookomɛ, ngande wotomoyaoka? Kakɔna kotomonga l’ohomba?’—1 Pet. 3:8.

15. Kakɔna kakokaso nsala dia nkimanyiya anto akina wakoka mɛnama oko asɔpɔ wambowominola kana oko tala di’esɔ diotadimala?

¹⁵ Oma lo etsha aso wa kɛtshi. Kɛtshi k’efula totshutshuyaka dia sho mbetawɔ dia  nsala etshikitanu lo nsɛnɔ y’anto akina, djekoleko wanɛ wakoka mɛnama oko asɔpɔ wambowominola kana oko oshinga wa tala wotadimala. Ngande wakokaso mbakimanyiya? Rɔmɔ 12:15 mbutaka ɔnɛ: “Nyolele la wanɛ walela.” Wanɛ wele la etema wambatɛ mbeyaka monga l’ohomba wa mbokama kɛtshi lo dihole dia mbatɛka tsho l’onyɔ. Kadiyɛso kɛmɔtshi kakakeketshama oma le asekande ambetawudi l’ɔkɔngɔ w’ɔnande la womoto mvɔ mbutaka ate: “Lakangɛnangɛna etena kakaye angɛnyi ami ndo kakawalelaka kaamɛ lami.” Sho koka nto mɛnya kɛtshi k’efula lo salaka akambo w’ɛlɔlɔ. Onde wɛ mbeyaka kadiyɛso kɛmɔtshi kakavusha omɛnde kele l’ohomba w’onto mbɔlɔngɔsɔlɛ diangɔ dimɔtshi lakande? Onde wɛ mbeyaka Okristo ɔmɔtshi waya osombe wele l’ohomba w’onto tshɔka la nde otsha lo nsanganya, otsha l’esambishelo ndo dia tɛnana la dɔkɔtɛlɛ? Kaanga awui wa totshitshɛ wa la kɛtshi mbosaleso onto, dui sɔ koka nsala otshikitanu wa woke lo lɔsɛnɔ l’osekaso ombetawudi lele lo dihombo. (1 Jni. 3:17, 18) Laadiko dia laasɔ, sho koka mboka anto akina kɛtshi lo ndjasha tshɛ l’esambishelo. Ɔsɔ mɛtɛ mbele yoho yoleki dimɛna ya nsala etshikitanu lo sɛnɔ y’anto wele la etema w’ɛlɔlɔ.

16. Ɛtɛkɛta wa ngande wahombaso ntondja dia nkeketsha wanɛ wambɔkɔmɔ?

¹⁶ Oma lo ɛtɛkɛta aso wa kɛtshi. Kɛtshi kaso k’efula otsha le anto akina totshutshuyaka dia sho nkamba la “ɛtɛkɛta w’esambelo le wanɛ wambɔkɔmɔ.” (1 Tɛs. 5:14) Kakɔna kahombaso mbuta dia nkeketsha anto asɔ? Sho koka nkeketsha timba tawɔ lo mbatɛ ɛtɛkɛta wɛnya dia sho ndjakiyanyaka lo dikambo diawɔ ndo ndjashaka le wɔ. Sho koka nto mbawandolaka l’otema ɔtɔi dia vɔ mbeya dia wekɔ la waonga ndo l’akoka w’amɛna. Ekɔ dimɛna mbaohola dia Jehowa mbakaakotola oyale Ɔnande ndɔ ɔnɛ vɔ wekɔ la nɛmɔ lo washo ande. (Jni. 6:44) Taashikikɛ dia Jehowa ndjashaka lo yoho y’efula le ekambi ande wele la “etema wambate” kana “etema wa ndjakitshakitsha.” (Osam. 34:18) Ɛtɛkɛta aso wa kɛtshi koka monga tshondo y’ɛkɔnwɛlɔ le anto wele l’ohomba w’ekeketshelo.—Tuk. 16:24.

17, 18. a) Ngande walɔmba Jehowa dikumanyi dia vɔ salɛ ɛkɔkɔ akambo? b) Kakɔna kayotɔsɛdingola lo sawo diayela?

¹⁷ Dikumanyi di’Akristo le, Jehowa nyɔlɔmbaka dia nyu nama ɛkɔkɔ ande la kɛtshi k’efula. (Ets. 20:28, 29) Nyohɔ dia nyu mbele la ɔkɛndɛ wa ndesha, nkeketsha ndo nkimanyiya ɛkɔkɔ ande. (Is. 32:1, 2; 1 Pet. 5:2-4) Ɔnkɔnɛ, ekumanyi kele la kɛtshi k’efula hahemɛ ɛkɔkɔ, hawadjɛ dɛmbɛlɛmbɛ kana mbafundɛ dia vɔ nsala awui amɔtshi wewɔ bu l’akoka wa nsala. Lo dihole dia nde nsala ngasɔ, nde pombaka mbangɛnyangɛnya ele la eshikikelo ɔnɛ ngandji kokawɔ Jehowa ayowatshutshuya dia vɔ mbokambɛ lo yoho yewɔ l’akoka.—Mat. 22:37.

¹⁸ Lam’ele tekɔ lo mbokoya Yeso lo monga l’okitshakitsha ndo la kɛtshi, sho mɛtɛ tshutshuyamaka dia ntetemala nkɛndakɛnda lo wanya ande. Lo sawo diayela, tayɔsɛdingola waonga ahende waki Yeso, mbuta ate dihonga ndo shɛnɔdi.