LO 1870, djui ya tshitshɛ y’ambeki wa Bible yaki la Pittsburgh (Allegheny) la Pennsylvanie, l’États-Unis, wakatatɛ nsala eyangelo lo Afundelo. Charles Taze Russel mbaki ɔnɔmbɔdi awɔ ndo vɔ wakatatɛ nsala eyangelo lo kɛnɛ kendana la oshinga w’etshungwelo waki Yeso ndo aha la ntshimbatshimba wakashihodia dia dui sɔ diekɔ ohomba lo sangwelo diaki Jehowa. Vɔ mɛtɛ waki la ɔngɛnɔngɛnɔ etena kakaweye dia oshinga w’etshungwelo mbadiholɛ anto tshɛ lokuke dia nkondja panda mbidja ndo wanɛ wahatetshama awui wendana la Yeso. Vɔ wakatshutshuyama dia salaka Eohwelo ka nyɔi kaki Yeso ɔnɔnyi tshɛ.—1 Kɔr. 11:23-26.

Ɔnangɛso Russell akatatɛ ntondja Tshoto y’Etangelo ya Siɔna, yakasukɛka wetshelo wa oshinga w’etshungwelo oko djembetelo yoleki dimɛna ya ngandji ka Nzambi. Tshoto y’Etangelo yakelɛka nshi ya Eohwelo ka nyɔi ka Kristo ɔnɛ: “Etena k’ohomba efula” ndo yakakeketshaka ambadi ayɔ dia salaka Eohwelo oyadi la Pittsburgh kana ahole akina. Tshoto y’Etangelo yakate ɔnɛ: “Oyadi anto, ahende kana asato wele la mbetawɔ” ndo kaanga onto ɔtɔi mbongi dia nsala Eohwelo, “vɔ wekɔ kaamɛ la Nkumadiɔndjɔ.”

Ɔnɔnyi tshɛ, anto wakayaka efula la Pittsburgh dia ndjosala Eohwelo. Dikatshi dia leta diakataka ɔnɛ: “Anto wele la wasaso l’etema wayokolongola.” Ambeki wa Bible waki la Pittsburgh wakahangiyaka ndo wakaleshaka anangɛwɔ l’akadiyɛwɔ wa lo nyuma la lolango la wɔ. Lo 1886, losanganya la “assemblée générale” lakasalema nshi efula lo nshi ya Eohwelo. Tshoto y’Etangelo yakataka ɔnɛ “yaka la otema ayɛ tshɛ dia ndjɛnya ngandji le ombetsha, le anto ande ndo lo akambo ande wa mɛtɛ.”

L’edja k’ɛnɔnyi efula, ambeki wa Bible waki la Pittsburgh wakasalaka nsanganya ya weke lo wahɔ w’anto waki la mbetawɔ l’oshinga w’etshungwelo wakayaka lo Eohwelo. Lam’ele lofulo l’ambeki wa Bible lakatadɛka ndo lofulo l’anto wakɔtɔka lo Eohwelo lakadɛ lo andja w’otondo. Ɔnangɛso Ray Bopp l’oma lo etshumanelo ka Chicago mbohɔka dia lo 1910 akɔsama wenya efula dia mbetshetsha mapa la vinyɔ nɛ dia suke l’anto tshɛ l’atei w’anto nkama wakɔtɔ lo Eohwelo wakikɔ akitami.

Naa diangɔ diakawakambaka la diɔ lo Eohwelo? Kaanga mbeyamadiɔ dia Yeso akakambe la vinyɔ lo Dambo dia dikɔlɔ dia Nkumadiɔndjɔ, Tshoto y’Etangelo yakalɔmbɛ dia vɔ tokokamba l’etena kɛmɔtshi la ashi w’elowa wekewɔ kodimbaka kana elowa wa vinyɔ ya lahɛ, diaha nkɔsha wanɛ waki ‘wɔdu lo demba.’ Koko le wanɛ “wakeyaka dia wanu wadɔdɔ mbaki dimɛna nkamba lawɔ,” wakawashakawɔ. L’ɔkɔngɔ diko, ambeki wa Bible wakayoshihodiaka dia vinyɔ ya bela ya pudipudi mbakikɔ didjidji dia dikila diaki Yeso.

 Osalelo wa Eohwelo ka nyɔi ka Yeso akashaka diaaso dia nkana lomba dimɛna. Lo tshumanelo dimɔtshi, anto efula wakandamaka la kandji ndo l’ekomelo ka Eohwelo, efula wakatɛkɛtaka dikambo diakɔ. Dibuku Jehowa diakatondjama lo 1934, diakate dia Eohwelo hahombe salema “la lonyangu” l’ɔtɛ wa nyɔi ka paa kakavu Yeso koko tɔ pombaka salema “la ɔngɛnɔngɛnɔ” l’ɔtɛ wele Yeso Ɔnɔmbɔdi oko Nkumekanga ntatɛ lo 1914.

Otshikitanu wa woke wakasalema lo 1935 lo woho wahomba Eohwelo salemaka l’ɔtɛ wa eokelo kotshikitanyi ka “lemba la woke l’anto” (KJ), kana “olui a woke w’anto” watɛkɛtama lo Ɛnyɛlɔ 7:9. Polo l’etena kɛsɔ, ekambi waki Jehowa wakɔsaka olui ɔsɔ oko waki Akristo wele bu la ohetoheto efula. Ɛlɔ kɛnɛ, olui w’anto waheyama mbadia ɔsɔ weyama oko atɛmɔdi wa kɔlamelo wele la elongamelo ka ndjɔsɛna lo paradiso ka la nkɛtɛ. L’ɔkɔngɔ wa otshikitanu wɛnyami la diko salema ndo wa nde ndjasɛdingola, ɔnangɛso Russell Poggensee akate ɔnɛ: “Jehowa kombishami elongamelo k’otsha l’olongo lo tshimbo ya nyuma kande k’ekila.” Ɔnangɛso Poggensee ndo anto akina waki la kɔlamelo oko nde wakatshike ndɛ mapa koko wakatetemala ndja lo Eohwelo.

“Etena k’ohomba” kɛsɔ ka esambishelo ka laande kakashaka anto tshɛ diaaso dia mɛnya lowando lo oshinga w’etshungwelo. Bulletin wa lo 1932 wakakeketsha Akristo diaha monga ‘anto waya lo nsanganya’ ko ndɛka tsho mapa koko ‘hawosambisha’ losango l’akambo wa mɛtɛ. Lo 1934, Bulletin akatɛkɛta ‘di’ɛkɔkɔ ekina’ lo mumbola ɔnɛ: “Onde anto 1000 wayoya lo Eohwelo?” Lo kɛnɛ kendana la akitami, Informateur akate ɔnɛ: “Vɔ mongaka la ɔngɛnɔngɛnɔ paka naka wambosambisha awui wendana la Diolelo.” L’edjedja ka wonya, ngasɔ mbakadiayohomba monga ndo le wanɛ wele la elongamelo ka ndjɔsɛna la nkɛtɛ. *

Le ekambi waki Jehowa tshɛ, otsho wasalema Eohwelo mbele otsho woleki ekila lo ɔnɔnyi. Vɔ salaka Eohwelo oyadi lo tena di’ekakatanu. Lo 1930, yɔnɛ Pearl English nde la Ora wa kadiyɛnde wakande lɔkɛndɔ la kilɔmɛtrɛ 80 dia tosala Eohwelo. Etena kakinde lo lokanu la Chine, Harold King akafunde waa pɔɛmɛ ndo esambo wendana la Eohwelo ndo akasale mapa la vinyɔ lo nkamba la eponga la elowa. Etena kakalɔmaka ata ndo kakasekɛma olimu aso oma lo Erɔpɛ wa lo ehotwelo polo l’Amérique centrale ndo l’Afrique, anangɛso wakatetemala nsala Eohwelo ka nyɔi ka Yeso la dihonga tshɛ. Oyadi dihole diakɔna dieso kana dikambo diakɔna diele laso, sho sanganaka dia ntombola Jehowa Nzambi ndo Yeso Kristo lo etena k’ohomba ka Eohwelo.