LO LOSANGANYA la laande lakasalema la Nagoya, la Japon lo Ngɔndɔ ka nɛi 28, 2013, ɔnangɛso Anthony Morris lele ose Olui-walɔmbɔla akasha diewoyelo dia laande diendana la otombelo wa dibuku di’oyoyo lo ɔtɛkɛta wa Japonais diele l’ɔtɛ a dui ɔnɛ Bible—Lo ndjela Evanjiliɔ wa Mateo. Ndekana anto 210 000 waki lo losanganya lɔsɔ mbidja ndo wanɛ wakayelaka losanganya lakɔ lo tshimbo y’Ɛtɛrnɛtɛ, wakade saka l’etena k’otale.

Lam’ele wakatondja dibuku dia Evanjiliɔ wa Mateo lo ndjela Bible—Ekadimwelo k’andja w’oyoyo ka lo Japonais, dibuku diele la ndjɛkɛ 128 sɔ diekɔ dibuku dia laande. Ɔnangɛso Morris akalembetshiya dia dibuku sɔ diakatondjama “dia nkotsha ehomba w’ase Japon.” Naa awui w’ohomba watanema lo dibuku sɔ? Lande na kakadiatondjama? Onde anto wakadingɛnangɛna?

Woho wakakongɛma Evanjiliɔ wa Mateo akambiya anto. Alɛta wa lo abuku efula wa la Japon fundamaka lo wemema kana lo wekeke ndo alɛta wa lo abuku amɔtshi w’ɛprimɛwɔ mbidja ndo ekanda aso weke katomba wakatondjama lo wekeke. Koko alɛta wa lo dibuku di’oyoyo sɔ wakafundama lo wemema nɛ dia yoho shɔ mbaleka fundama lo tojurnalɛ ndo lo ekanda wa la Japon. Ambadi efula w’ase Japon mɛnaka dia dibuku sɔ diekɔ wɔdu mbadia. Laadiko dia laasɔ, wakadje tɔtɛ t’awui t’ahɔnyi lo lɛkɛ tshɛ dia nkimanyiya ambadi dia vɔ mɛna esadi eto awui w’oleki ohomba.

Aha la ntshimbatshimba, anangɛso l’akadiyɛso wa la Japon wakatatɛ nkondja wahɔ oma lo dibuku Evanjiliɔ wa Mateo. Kadiyɛso kele la ɛnɔnyi 80 l’ɛmɔtshi mbutaka ate: “Lambadiaka dibuku dia Mateo mbala efula, koko woho wakatondjama dibuku nɛ l’alɛta wa wemema ndo la tɔtɛ t’awui tahɔnyi, akankimanyiya dia dimi nshihodia dako dia lo dikona diakasha Yeso.” Kadiyɛso kɛmɔtshi k’osekaseka akafunde ate: “Lakamane la mbadia dibuku Evanjiliɔ wa Mateo lo etena ɔtɔi. Dimi tokambaka la ekanda wele l’alɛta wa wekeke koko anto efula wa la Japon ndekaka nanga ekanda wele l’alɛta wa wemema.”

Lande na kele dibuku sɔ kotshaka lo yoho ya laande ehomba w’ase Japon? Kaanga mbele ase Japon efula hawoyaekesanyiya la Bible, vɔ ngɛnangɛnaka mbadia dibuku sɔ. Dibuku dia Evanjiliɔ wa Mateo ayosha anto wele watɛnaka Bible ndooko lushi diaaso dia vɔ nkimɛ lo anya awɔ etenyi kɛmɔtshi k’ɔtɛkɛta w’ekila ndo kiadia.

Lande na kakasɔnama dibuku dia Mateo? Le ase Japon efula, tshɛkɛta “Bible” mbaoholaka Yeso Kristo. Ɔnkɔnɛ, dibuku dia Mateo diakasɔnama nɛ dia diɔ kɔndɔlaka ɔlɔndji ndo eotwelo ka Yeso, nyango Dako diande dia lo dikona, prɔfɛsiya ya diambo yakandasha yendana la nshi y’ekomelo ndo ɛtɛ w’awui asɔ mbakahombe mɛtɛ ngɛnyangɛnya ase Japon.

L’ohetoheto tshɛ, apandjudi wa Diolelo wa la  Japon wakatatɛ kahɛ anto dibuku di’oyoyo sɔ lo esambishelo ka lo luudu la luudu ndo etena kasalawɔ waendelo w’eyoyo. Kadiyɛso kɛmɔtshi akafunde ate: “Kakianɛ laya la waaso efula wa kahɛ anto wa l’ɛtshi kami ka nkɛtɛ Ɔtɛkɛta wa Nzambi. L’ɔkɔngɔ wa midi wa lushi lakatalongola dibuku Evanjiliɔ wa Mateo lo losanganya la laande lɔsɔ, lakakahɛ onto ɔmɔtshi kɔpi ka diɔ.”

Ngande wakaha apandjudi dibuku Evanjiliɔ wa Mateo? Ase Japon efula mbeyaka tɔtɛkɛta tele oko “soko dia tshitshɛ,” “tanyokɛke nsombo adidi w’oshinga wolo” ndo “Tanyoyakiyanyake pondjo dikambo dia loyi.” (Mat. 6:34; 7:6, 13) Vɔ wakayokashimɔka dia mbeya dia ɔsɔ ekɔ ɛtɛkɛta waki Yeso Kristo. Etena kadiawɔ ɛtɛkɛta ɛsɔ lo Evanjiliyɔ wa Mateo, anto efula mbutɛka apandjudi ɔnɛ: “Dimi tolangaka mbadia Bible.”

Etena kakawola apandjudi dia tosala waendelo w’eyoyo le wanɛ wakalongola dibuku Evanjiliɔ wa Mateo, anto mbutaka tena efula ɔnɛ vɔ mala mbadia tenyi dimɔtshi kana dibuku diakɔ tshɛ. Pami kɛmɔtshi kaya la ɛnɔnyi 60 l’ɛmɔtshi akatɛ opandjudi ɔmɔtshi ate: “Aya mbala efula yamomadia dibuku nɛ ndo diɔ keketshakami. Lam’alangɛ, dimi nangaka wɛ ndjombetshaka awui efula wendana la Bible.”

Dibuku Evanjiliɔ wa Mateo diekɔ ohomba efula lo esambishelo ka lo sɛkɛ. Etena kakinde lo esambishelo ka lo sɛkɛ, kadiyɛso kɛmɔtshi akasha osekaseka ɔmɔtshi waketawɔ dibuku dia Evanjiliɔ wa Mateo adrɛsɛ ande w’Ɛtɛrnɛtɛ. L’ɔkɔngɔ wa wonya wa ntango ɔtɔi, osekaseka ɔsɔ akafundɛ kadiyɛso lo Ɛtɛrnɛtɛ dia nde amboshila mbadia etenyi kɛmɔtshi ka dibuku diakɔ ndo nde nangaka mbeya awui akina efula. L’ɔkɔngɔ wa lomingu ɔtɔi, nde akatatɛ mbeka Bible ndo oma laasɔ akatatɛ mbɔtɔ lo nsanganya.

Ndekana kɔpi 1 600 000 ya dibuku Bible—Lo ndjela Evanjiliɔ wa Mateo yakatomama lo tshumanelo dia la Japon. Ndo ngɔndɔ tshɛ Ɛmɛnyi wa Jehowa wekɔ lo nkaha kɔpi nunu akumi ya dibuku diakɔ. Mbɔtwɛlɔ ka dibuku sɔ mbutaka ɔnɛ: “Sho nongamɛka la otema ɔtɔi dia wadielo wa dibuku nɛ wayofudia saki kayɛ ka ndjasha lo Bible.”