“Wɛ akasale dikambo sɔ lo ndjela lolango layɛ”
“Wɛ akashɛ awui anɛ le akanga wa tomba ndo le ambeyi wa mukanda, ko ambowashola le ana w’akɛnda.”—LUKA 10:21.
1. Kakɔna kakakonya Yeso dia ngɛnangɛna “l’ekimanyielo ka nyuma k’ekila”? (Enda osato wele lo mbɔtwɛlɔ.)
OHƆSA dia wɛ ekɔ lo mɛna Yeso Kristo angɛnangɛna “l’ekimanyielo ka nyuma k’ekila.” Ondo wɛ ekɔ lo mɛna woho wangɛnangɛnande, wamɔnamɔnande ndo wende la ɔlɔ lo elungi kande. Kakɔna kakookonya dia nde monga la ɔngɛnɔngɛnɔ wa ngasɔ? Nde aki oma la ntoma ambeki ande 70 dia vɔ tosambisha lokumu l’ɔlɔlɔ la Diolelo diaki Nzambi. Nde akalangaka mbeya woho wakakoke ambeki ande nkotsha ɔkɛndɛ ɔsɔ. Andɔshi efula wa lokumu l’ɔlɔlɔ wakikɔ lɛkɔ ɛnyɛlɔ, akanga wa tomba, afundji wakɔtɔ kalasa efula ndo Afarisɛ. Vɔ wakatshutshuyaka anto dia vɔ mbɔsa Yeso oko otshudi w’abaya w’anyanya ndo ambeki ande oko anto ‘waheye mukanda ndo oko anto k’anto.’ (Ets. 4:13; Makɔ 6:3) Koko ambeki ande wakakalola oma lo esambishelo wele la ɔngɛnɔngɛnɔ w’efula. Vɔ wakasambisha kaanga mbakawalɔshama ndo oma le ɛdiɛngɛ. Kakɔna kakaakimanyiya dia vɔ monga l’ɔngɛnɔngɛnɔ ndo la dihonga?—Adia Luka 10:1, 17-21.
2. a) Lo woho akɔna waki ambeki waki Yeso oko ana w’akɛnda? b) Kakɔna kakakimanyiya ambeki waki Yeso dia nshihodia akambo wa mɛtɛ wa lo nyuma?
2 Yeso akatɛ Jehowa ɔnɛ: “Papa, wɛ Owandji w’olongo la nkɛtɛ, lambokotombola lo sɛkɛ, nɛ dia wɛ akashɛ akambo anɛ le akanga wa tomba ndo le ambeyi wa mukanda ko ambowashola le ana w’akɛnda. Eelo, Papa, wɛ akasale dikambo sɔ lo ndjela lolango layɛ.” (Mat. 11:25, 26) Yeso konangaka mbuta dia ambeki ande wakikɔ ana w’akɛnda lo yoho ya mɛtɛ mɛtɛ. Koko nde akeyaka dia vɔ wakikɔ ana w’akɛnda lo mbaɛdika l’ambeyi wa mukanda wa lo nshi shɔ wakayaɔsaka oko akanga wa tomba. Dui dioleki ohomba ele, Yeso aketsha ambeki ande dia vɔ monga oko ana w’akɛnda lo monga la okitshakitsha ndo mbetawɔ mbetshama. (Mat. 18:1-4) Wahɔ akɔna wakawakondja lo monga la okitshakitsha? Lo tshimbo ya nyuma k’ekila, Jehowa akaakimanyiya dia vɔ nshihodia akambo wa mɛtɛ wa lo nyuma etena kele ase timba ndo ambeyi wa mukanda wanɛ wakaahetshaka wakatetemala mbetɛma totshungu oma le Satana ndo oma lo otako awɔ.
3. Ambola akɔna wayangaso nsɛdingola lo sawo nɛ?
3 Aha la taamu, Yeso akonge la ɔngɛnɔngɛnɔ. Nde aki l’ɔngɛnɔngɛnɔ lo mɛna woho wakashola Jehowa akambo wa mɛtɛ wa lo nyuma woshɛmi etale. Jehowa akawashola le akanga w’okitshakitsha w’oma lo waoho tshɛ oyadi woho akɔna wa kalasa yakawɔtɔ. Nde akangɛnangɛna lo woho waketawɔka Jehowa wetshelo ɔsɔ. Ko onde Jehowa ambotshikitana? Ngande wɛnyande dia nde tetemalaka mbetawɔ yoho ya wetshelo shɔ? Etena katatayange okadimwelo, tayɛna dia sho koka monga la ɔngɛnɔngɛnɔ w’efula l’ɛnyɛlɔ ka Yeso.
TEKƆ LO MBEWOYA ANTO TSHƐ AKAMBO WA MƐTƐ WOSHƐMI ETALE
4. Lo toho takɔna tambɛnama dia Tshoto y’Etangelo ya wɔdu yekɔ woshasha wa la ngandji?
4 Lo ɛnɔnyi weke kambeta, wetshelo wa lo nyuma wakatondja okongamelo waki Jehowa waki wɔdu ndo mbokɛmaka hwe. Tɔsɛdingole bɛnyɛlɔ sato. Ɛnyɛlɔ ka ntondo, otombelo wa Tshoto y’Etangelo * ya wɔdu. Otombelo wa numɛlɔ kɛsɔ aki tshondo ya woshasha wa la ngandji le wanɛ wele la okakatanu wendana la ɔtɛkɛta kana wa wadielo. Ɛtɛ wa nkumbo mɛnaka dia anawɔ wosha kɔmatɛrɛ lo wekelo wa Tshoto y’Etangelo, yele ehomɔ kalekaso ndeshama mbo ya ndɛ ya lo nyuma. Anto efula wakafunde mikanda dia mɛnya lowando lawɔ l’omak’ɛse otema. Kadiyɛso kɛmɔtshi akafunde dia nde akengengaka mbisha kɔmatɛrɛ lo wekelo wa Tshoto y’Etangelo lo mbuta ate “lakikɔ ɔsɔnyi lo nsanganya.” Koko nshi nyɛ nde aya bu ɔsɔnyi. L’ɔkɔngɔ wa nde ntatɛ nkamba la Tshoto y’Etangelo ya wɔdu, nde akafunde ɔnɛ: “Nshi nyɛ losha kɔmatɛrɛ ndekana mbala ɔtɔi ndo laya bu la wɔma. Lekɔ lo nkaloya Jehowa ndo okongamelo ande losaka.”
5. Naa ɛlɔlɔ ɛmɔtshi w’oma lo Bible kambovusɔma ka Ekadimwelo k’andja w’oyoyo?
5 Ɛnyɛlɔ ka hende ekɔ ka otombelo wa Bible—Ekadimwelo k’andja w’oyoyo kambovusɔma lo Angɛlɛ. Tɔ kakatondjama lo losanganya la l’ɔnɔnyi lo Ngɔndɔ ka dikumi 5, 2013. * Avɛsa efula waya la tɔtɛkɛta yema tshitshɛ koko wekɔ la eokelo kakɔ kaamɛ ndo kokɛma hwe. Ɛnyɛlɔ, Jobo 10:1 aki la tɔtɛkɛta 27 koko aya la tɔtɛkɛta 19; Tukedi 8:6 aki la tɔtɛkɛta 20 koko aya la tɔtɛkɛta 13. Avɛsa akɔ ahende mbokɛmaka hwe lo Bible kambovusɔma. Ɔnangɛso ɔmɔtshi l’okitami laya la kɔlamelo l’edja k’ɛnɔnyi akumi akate ɔnɛ: “Etena kakamadia dibuku dia Jobo lo Bible kambovusɔma, lakoke oko ɔsɔ mbaki mbala kami ka ntondo ka dimi dishihodia.” Anto efula wakate ɛtɛkɛta wa ngasɔ.
6. Ngande wayaokayɛ lo etshikitanu wakasalema wendana la eokelo kaso ka Mateo 24:45-47?
6 Ɛnyɛlɔ ka sato, tɔsɛdingole bɛnyɛlɔ dimɔtshi diendana la etshikitanu weke kasalema lo eokelo kaso. Etshikitanu wendana la eokelo kaso ka “ɔhɔmbɔ wa kɔlamelo ndo kɛsɔ” wakatondjama lo Tshoto y’Etangelo ya Ngɔndɔ k’esambele 15, 2013, wakatɔngɛnyangɛnya. (Mat. 24:45-47) Elembetshiyelo wakashama ɔnɛ ɔhɔmbɔ wa kɔlamelo mbele Olui-walɔmbɔla, ndo anto “wa lo luudu” wekɔ wanɛ waleshama lo nyuma, oyadi akitami kana “ɛkɔkɔ ekina.” (Jni. 10:16) Ekɔ mɛtɛ dui di’ɔngɛnɔngɛnɔ dia mbeka akambo wa mɛtɛ asɔ ndo mbaetsha anto weke eyoyo. Naa toho tokina takɛnya Jehowa dia nde mbetawɔka wetshelo wa wɔdu ndo wokɛma hwe?
YOHO YA WƆDU NDO YOKƐMA HWE YA NKOTOLA YAMBALO LO ƐKƆNDƆ WA LO BIBLE
7, 8. Naa bɛnyɛlɔ dimɔtshi dia prɔfɛsiya ya didjidji yatanema lo Bible?
7 Naka aya ɛnɔnyi akumi wakambɛyɛ Jehowa, kete ondo wɛ ambɛna etshikitanu wasalema lo woho walembetshiya ekanda aso ɛkɔndɔ wa lo Bible. Lande na kediɔ ngasɔ? Lo nshi yakete, ekanda aso wakalembetshiyaka ɛkɔndɔ wa lo Afundelo lo yoho ya didjidji ndo okotshamelo awɔ. Ɛkɔndɔ wa lo Bible wakɔsamaka oko awui wa didjidji ndo ekotshamelo wa prɔfɛsiya akɔsamaka oko okotshamelo awɔ. Onde ekɔ divɛsa dimɔtshi diele la prɔfɛsiya ya didjidji? Eelo. Ɛnyɛlɔ, Yeso akatɛkɛta dia “djembetelo y’omvutshi Jɔna.” (Adia Mateo 12:39, 40.) Yeso akalembetshiya ɔnɛ, Jɔna otovɔ l’otema a lose otondongaka Jehowa kombokokɛ ndo dui sɔ aki didjidji dia nyɔi ka Yeso ndamɛ.
8 Bible kekɔ la prɔfɛsiya kina ya didjidji. Ɔpɔstɔlɔ Pɔɔlɔ akatɛkɛta dia efula ka l’atei ayɔ. Ɛnyɛlɔ, diɔtɔnganelo diaki lam’asa Abrahama la Hangara ndo Sara aki didjidji dia diɔtɔnganelo dia lam’asa Jehowa la wodja w’Isariyɛlɛ ndo etenyi ka l’olongo k’okongamelo waki Nzambi. (Ngal. 4:22-26) Woho akɔ waamɛ mbele, tabɛrnakɛlɛ, tɛmpɛlɔ, Lushi l’Ekesanelo, ɔlɔmbɛdi a laadiko ndo awui akina wa lo Ɛlɛmbɛ wa Mɔsɛ “waki didjidji dia akambo w’ɛlɔlɔ wakahombe ndja.” (Hɛb. 9:23-25, 10:1) Sho mongaka la ɔngɛnɔngɛnɔ ndo keketshamaka etena kekaso prɔfɛsiya ya diambo ya ngasɔ. Ko onde sho koka mbuta ɔnɛ anto, awui ndo diangɔ tshɛ diatɛkɛtama lo Bible ekɔ didjidji di’onto kana dia ɛngɔ kɛmɔtshi?
9. Lo nshi yakete, ngande wakalembetshiyamaka ɔkɔndɔ wa lo Bible wendana la Nabɔta?
9 Lo nshi yakete, kɛsɔ mbakatasalaka mbala efula. Tɔshi ɛnyɛlɔ k’ɔkɔndɔ waki Nabɔta lele aha la onongo, nkumekanga ka womoto Jɛzabɛlɛ akakongɛ dia mbodiaka dia Ahaba w’omɛnde ndjɔsa ekambɔ kande ka vinyɔ. (1 Khum. 21:1-16) Lo 1932, ekanda aso wakalembetshiyaka dia ɔkɔndɔ ɔsɔ aki prɔfɛsiya ka didjidji. Akatama dia Ahaba nde la Jɛzabɛlɛ waki didjidji dia Satana la okongamelo ande, Nabɔta aki didjidji dia Yeso ndo nyɔi kaki Nabɔta aki didjidji dia nyɔi kaki Yeso. Ɛnɔnyi akumi l’ɔkɔngɔ, lo dibuku “ Que ton nom soit sanctifié ” diakatondjama lo 1961, akatama dia Nabɔta aki didjidji di’akitami ndo Jɛzabɛlɛ aki didjidji dia Lokristokristo. Woho wakasoyama Nabɔta oma le Jɛzabɛlɛ aki didjidji dia woho wakahombe akitami ndjosoyama lo nshi y’ekomelo. L’edja k’ɛnɔnyi efula, ekambi waki Nzambi wakɛnyi dia yoho ya nembetshiya ɛkɔndɔ wa lo Bible shɔ keketshaka mbetawɔ. Ko lande na kamboyotshikitanyema yoho shɔ?
10. a) Ngande wele kɛsɔ yele la ɔhɔmbɔ ambokimanyiya lo kɛnɛ kendana la elembetshielo wa ɛkɔndɔ wa lo Bible? b) Ɛlɔ kɛnɛ ekanda aso woleka mendana la na?
10 Oko wakokaso mɛna, aya ɛnɔnyi efula wele Jehowa ambokimanyiya “ɔhɔmbɔ wa kɔlamelo ndo kɛsɔ” dia nde ndeka monga la kɛsɔ. Kɛsɔ yele la ɔhɔmbɔ ambokimanyiya dia sho monga la eokelo k’oshika ka prɔfɛsiya ya lo Bible lo dihole dia mbokaka ɛkɔndɔ wa lo Bible tsho oko prɔfɛsiya ya didjidji. Laadiko dia lasɔ, akayɛnama dia elembetshiyelo wa ntondo w’endana l’awui wa didjidji ndo okotshamelo awɔ aketɛka wolo efula di’anto nshihodia. Lo kɛnɛ kendana la ɛkɔndɔ wa lo Bible, aki wolo nkamba la wetshelo w’oma lɔkɔ, mbohɔ ɔnɛ lele didjidji dia dui kapanda ndo lande na. Kɛnɛ koleki ele, naka sho nsala eyangelo lo ndjela yoho yakalembetshiyamaka awui lo nshi y’edjedja, kete hatotoshihodia dimɛna atɔndɔ wendana la lɔkɛwɔ ndo wetshelo wakokaso nkondja oma lo ɛkɔndɔ wa lo Bible. Diakɔ diele, ɛlɔ kɛnɛ ekanda aso woleka mendana la wetshelo wa wɔdu, wendana la mbetawɔ, ekikelo, ndjakimɔ le Nzambi ndo waonga akina wakondjaso oma l’ɛkɔndɔ wa lo Bible. *
Ɛnyɛlɔ kaki Nabɔta toshaka wetshelo w’ohomba (Enda odingɔ 11)
11. a) Naa eokelo kaya laso lo kɛnɛ kendana la ɔkɔndɔ wa Nabɔta, ndo lande na kele ɛnyɛlɔ kɛsɔ kekɔ ohomba leso? b) Lande na kele ekanda aso wa nshi nyɛ hawoyoleka mendana l’awui wa didjidji ndo okotshamelo awɔ? (Enda sawo “Ambola w’oma le ambadi” diele lo numɛlɔ kɛnɛ.)
11 Ko naa eokelo kaya laso lo kɛnɛ kendana la ɔkɔndɔ wa Nabɔta? Lo yoho ya wɔdu ndo yokɛma hwe, pami k’onto ɔlɔlɔ kɛsɔ komvɔ l’ɔtɛ wakinde didjidji dia prɔfɛsiya kaki Yeso kana k’akitami, koko nde akavu l’ɔtɛ wakinde kanga olowanyi. Nde akasɛnaka lo ndjela Ɛlɛmbɛ waki Jehowa la ntondo k’ɛlɔshamelo wa wolo. (Wal. 36:7; 1 Khum. 21:3) Ɔkɔndɔ ande wekɔ ohomba leso nɛ dia efula ka l’atei aso koka mpomana la ɛlɔshamelo wa woho ɔsɔ. (Adia 2 Timɔte 3:12.) Anto w’oma l’ahole tshɛ waya l’akoka wa nshihodia esadi eto, mbohɔ ndo nkamba la wetshelo w’ohomba wakeketsha mbetawɔ ɛsɔ.
12. a) Kakɔna kahatahombe mbuta lo kɛnɛ kendana la ɛkɔndɔ wa lo Bible? b) Kakɔna kambotokimanyiya dia sho monga la elembetshielo wokɛma hwe oyadi lo akambo wa lotshimola? (Enda nɔtɛ.)
12 Ko onde sho koka mbuta ɔnɛ ɛkɔndɔ wa lo Bible mendanaka paka la wetshelo wakokaso nkondja koko vɔ bu la tokitshimudi tokina? Ndooko. Ɛlɔ kɛnɛ, lo dihole dia nembetshiyaka ɛkɔndɔ wa lo Bible oko awui wa didjidji kana okotshamelo awɔ, ekanda aso woleka ntɛkɛta dia woho wɔtɔnɛ ɛkɔndɔ wa lo Bible. Ɛnyɛlɔ, sho koka mbuta ɔnɛ woho wakatshikala Nabɔta la kɔlamelo la ntondo ka ɔlɔshamelo ndo wa nyɔi toholaka kɔlamelo yaki Kristo ndo y’akitami ande. Koko, dui sɔ koka tohola nto kɔlamelo yele la efula ka “ɛkɔkɔ ekina” wa Nkumadiɔndjɔ. Dui sɔ mɛnyaka mɛtɛ dia Jehowa tetshaka lo yoho yokɛma hwe ndo ya wɔdu. *
YOHO YA WƆDU YA NSHIHODIA WƐƐLA WA YESO
13. Naa bɛnyɛlɔ diɛnya dia nshi nyɛ tolembetshiya wɛɛla waki Yeso lo yoho ya wɔdu ndo yokɛma hwe?
13 Yeso Kristo aki ombetsha a woke lo nkɛtɛ k’otondo. Yoho mɔtshi yakandetshaka aki okambelo wa la wɛɛla. (Mat. 13:34) Wɛɛla ndowanyaka ɛtɛkɛta w’onto, kotolaka yambalo y’anto ndo minandaka etema. Onde l’edja k’ɛnɔnyi, ekanda aso nembetshiyaka wɛɛla waki Yeso lo yoho ya wɔdu ndo yokɛma hwe? Eelo. Shi takangɛnangɛna dia nkondja eokelo k’oshika lo wɛɛla waki Yeso wa wodoya, lɔtɔngɔ la mutardɛ ndo ɔtɛi lo Tshoto y’Etangelo ya Ngɔndɔ k’esambele 15, 2008? Taya la eokelo k’oshika k’ɔnɛ wɛɛla ɛsɔ mendanaka la Diolelo diaki Nzambi ndo la olimu wa diambo wasalawɔ wa ntshumanya ambeki wa mɛtɛ waki Kristo oma lo andja ɔnɛ wa kɔlɔ.
14. a) Ngande wakalembetshiyaka ekanda aso wɛɛla w’ose Samariya l’ɔlɔlɔ? b) Ngande wootoka wɛɛla ɔsɔ ɛlɔ kɛnɛ?
14 Ko kayotota lo kɛnɛ kendana la ɛkɔndɔ ndo bɛnyɛlɔ diakasha Yeso? Dimɔtshi l’atei adiɔ diekɔ dia didjidji ndo dia prɔfɛsiya ndo dikina diekɔ la wetshelo. Ko ngande wakokaso mbeya dia ɔkɔndɔ kapanda wekɔ wa didjidji kana washa wetshelo? Okadimwelo wakayɛnamaka hwe lo dimbola sɔ l’ɔkɔngɔ w’ɛnɔnyi. Ɛnyɛlɔ, tende woho wakatalembetshiyaka wɛɛla waki Yeso wa ose Samariya l’ɔlɔlɔ. (Luka 10:30-37) Lo 1924, Tshoto y’Etangelo yakate ɔnɛ ose Samariya l’ɔlɔlɔ ekɔ didjidji dia Yeso; mboka k’oma la Jɛrusalɛma otsha la Jeriko kaki la eholola ndo l’akona aki didjidji di’anto wadiɛnɛ l’ata oma ko ɔtɔmbɔkwɛlɔ wa l’Ɛdɛna. Dengalenga diaki lo mboka aki didjidji di’akanga wa mbase, ɔlɔmbɛdi la ose Lɛwi wakalembetshiyaka ɛtɛmwɛlɔ. Ɛlɔ kɛnɛ, ekanda aso wokamba la wɛɛla ɔsɔ dia tohola ɔnɛ oko weso Akristo, sho pombaka kimanyiyaka wanɛ wele lo dihombo djekoleko lo nyuma. Onde dui sɔ hatosha ɔngɛnɔngɛnɔ lo mɛna dia Jehowa tetshaka wetshelo ande lo yoho yokɛma hwe?
15. Kakɔna kayotɔsɛdingola lo sawo diayela?
15 Lo sawo diayela, tayɛna wɛɛla okina waki Yeso wendana la esekaseka dikumi wa dimuma. (Mat. 25:1-13) Kakɔna kakasale Yeso di’ambeki ande wa lo nshi y’ekomelo ndjoshihodia wɛɛla ɔsɔ? Onde onto, ɛngɔ kana dui tshɛ diatɛkɛtama lo wɛɛla ekɔ didjidji dia dui dimɔtshi di’ohomba diayosalema lo nshi yayaye? Ko onde Yeso akalange dia sho nkondja wetshelo wakoka ndjotokimanyiya lo nshi y’ekomelo? Kɛsɔ mbayotɔsɛdingola lo sawo diayela.
^ od. 4 Tshoto y’Etangelo ya wɔdu yakatatɛ tondjama lo Angɛlɛ lo Ngɔndɔ k’esambele 2011. Oma laasɔ, yɔ yakayotatɛ tondjama ndo lo ɛtɛkɛta ekina.
^ od. 5 Ɛlɔngɔswɛlɔ wekɔ lo salema dia ntondja Bible kambovusɔma ndo lo ɛtɛkɛta ekina.
^ od. 10 Ɛnyɛlɔ dibuku Tokoya mbetawɔ kawɔ tɛkɛtaka dia nsɛnɔ y’anto 14 wotshikitanyi watɛkɛtama lo Bible. Awui wa lɔkɔ ndekaka mendana la wetshelo wakokaso nkondja koko aha l’awui wa didjidji kana kitshimudi ya prɔfɛsiya.
^ od. 12 Ɔtɛkɛta waki Nzambi wekɔ nto l’awui wakoka mɛnama oko “wolo nshihodia” ɛnyɛlɔ, awui amɔtshi wakafunde Pɔɔlɔ. Koko afundji wa Bible tshɛ wakakifunde lo ɛlɔmbwɛlɔ ka nyuma k’ekila. Wolo akɔ waamɛ mbakimanyiya Akristo wa mɛtɛ ɛlɔ kɛnɛ dia vɔ nshihodia akambo wa mɛtɛ woma le Nzambi, ndo mbasala dia sho mbeya ndo nshihodia “kaanga akambo wa lotshimola waki Nzambi.”—2 Pet. 3:16, 17; 1 Kɔr. 2:10.
