Tokondja wetshelo oma lo wɛɛla wa talata
“Nde akasha ɔmɔtshi talata tshanu, okina talata hiende ndo okina nto lotalata ɔtɔi.”—MAT. 25:15.
1, 2. Lande na kakasha Yeso wɛɛla wa talata?
LO WƐƐLA wa talata, Yeso akɛnya hwe ɔkɛndɛ wele l’ambeki ande w’akitami. Ekɔ ohomba sho mbeya kitshimudi ya wɛɛla ɔnɛ, nɛ dia vɔ wekɔ la shɛngiya le Akristo tshɛ oyadi wanɛ wele la elongamelo k’otsha l’olongo kana ka la nkɛtɛ.
2 Yeso akasha wɛɛla wa talata oko etenyi k’okadimwelo lo dimbola di’ambeki ande dia mbeya “djembetelo yakɔna yayɛnya woongelo [ande] ndo etena k’ekomelo k’andja.” (Mat. 24:3) Ɔnkɔnɛ, wɛɛla wa talata wekɔ lo kotshama lo nshi yaso nyɛ ndo vɔ wekɔ djembetelo mɔtshi yɛnya dia Yeso ekɔ ndo ekɔ lo mbolɛ oko Nkumekanga.
3. Wetshelo akɔna wakondjaso oma lo wɛɛla watanema lo Mateo tshapita 24 ndo 25?
3 Wɛɛla wa talata wekɔ l’atei wa wɛɛla ɛnɛi wɔkɔndwami lo Mateo 24:45 polo 25:46. Wɛɛla ekina esato wekɔ wɛɛla wa ɔhɔmbɔ wa kɔlamelo ndo kɛsɔ, wa esekaseka dikumi wa dimuma ndo wa ɛkɔkɔ la mbudi. Wɛɛla ɛsɔ nto wekɔ etenyi kɛmɔtshi k’okadimwelo waki Yeso lo dimbola diendana la djembetelo ya woongelo ande. Lo wɛɛla ɛnɛi ɛsɔ tshɛ, Yeso akake epole ɔsɛkɛ lo awui wakahombe ntshikitanya ambeki ande wa mɛtɛ l’anto akina lo nshi y’ekomelo. Wɛɛla wa ɔhɔmbɔ, esekaseka wa dimuma ndo wa talata mendanaka l’ambeki ande w’akitami. Lo wɛɛla wa ɔhɔmbɔ wa kɔlamelo, Yeso akatɔtɔmiya dia djui ya tshitshɛ y’akitami wakalongola ɔkɛndɛ wa ndesha anto wa lo luudu lande mbo ya ndɛ lo nshi y’ekomelo ndo ɔnɛ vɔ pombaka monga la kɔlamelo ndo kɛsɔ. Lo wɛɛla wa esekaseka wa dimuma, Yeso akate di’ambeki ande w’akitami tshɛ pombaka ndjalɔngɔsɔla ndo sungukalaka, weya dia Yeso ekɔ lo ndjaye kaanga mbahaweye lushi kana wonya. Lo wɛɛla wa talata, Yeso akate dia akitami pombaka monga la etete lo nkotsha ɛkɛndɛ awɔ w’Okristo. Yeso akakambe la wɛɛla w’ekomelo wa ɛkɔkɔ la mbudi lo dikambo di’anto wele la elongamelo ka ndjɔsɛna la nkɛtɛ. Nde akatɔtɔmiya ɔnɛ vɔ pombaka monga la kɔlamelo ndo nsukɛ tshɛ lo tshɛ anango Kristo weke la nkɛtɛ. * Nyɛsɔ tɔsɛdingole wɛɛla wa talata.
OWANDJI AMBOSHA AS’OLIMU ANDE FALANGA
4, 5. Akɔna ele didjidji dia pami kana owandji watɛkɛtama lo wɛɛla wa talata, ndo nɛmɔ diakɔna diaki la kɛnɛ kaki la nde?
4 Adia Mateo 25:14-30. Aya edja kele ekanda aso wekɔ lo nembetshiya ɔnɛ, pami kana owandji watɛkɛtama lo wɛɛla wa talata ekɔ Yeso ndo ɔnɛ nde akande lɔkɛndɔ lo mbidɛ otsha l’olongo lo 33 T.D. Lo wɛɛla wa talata, Yeso akɛnya dia nde akadɛ otsha l’olongo “dia tahenyama l’okudi wa nkumekanga.” (Luka 19:12) Etena kakandadɛ l’olongo, Yeso kombahema l’okudi mbala kakɔ ɔtɔi. * Koko nde “akatodjasɛ lo lonya l’omi la Nzambi. Oma ko etena kɛsɔ, nde ekɔ lo nkonga polo etena kayokitshama atunyi ande oko kihona k’ekolo ande.”—Hɛb. 10:12, 13.
5 Pami katɛkɛtama lo wɛɛla aki la talata enanɛi, ɔsɔ mɛtɛ aki falanga y’efula lo nshi shɔ. * La ntondo ka nde mɛngɔla, nde akasha ase olimu ande talata shɔ ko akawatɛ dia vɔ mundaka okanda l’ɔkɔngɔ ande. L’ɛnyɛlɔ ka pami kɛsɔ, Yeso akikɔ la ɛngɔ kɛmɔtshi koleki nɛmɔ la ntondo ka nde mbidɛ l’olongo. Naa ɛngɔ kɛsɔ? Okadimwelo mendanaka la olimu wakandakambe etena kakinde la lɔsɛnɔ lanɛ la nkɛtɛ.
6, 7. Kakɔna kalembetshiya talata?
6 Yeso akashaka nɛmɔ di’efula l’olimu w’esambishelo ndo wa mbetsha anto. (Adia Luka 4:43.) L’ekimanyiyelo k’olimu ɔsɔ, nde akakambaka ekambɔ kakayonga la etombelo w’ɛlɔlɔ. La ntondo ka laasɔ, nde akatɛ ambeki ɔnɛ: “Nyedia washo, nyende, dikambɔ diambɛla dia muna.” (Jni. 4:35-38) Nde akeyaka di’anto akina waki l’etema ɛlɔlɔ wakahombe ndjokoma ambeki ande. L’ɛnyɛlɔ ka okambi w’ekambɔ w’oshika, Yeso takandahombe munda lɔkɛndɔ aha la takoke ekambɔ kaki suke la dinela kɛsɔ. Diakɔ diele, yema tshitshɛ l’ɔkɔngɔ wa nde mbolɔ ndo la ntondo ka nde mbidɛ l’olongo, nde akasha ambeki ande ɔkɛndɛ wa woke lo mbatɛ ɔnɛ: “Nyotshu ndo nyetɛ anto wa lo wedja tshɛ ambeki.” (Mat. 28:18-20) Mbokɛmaka dia Yeso akawasha ɛngɔ ka nɛmɔ, mbuta ate ɔkɛndɛ wa nsambisha.—2 Kɔr. 4:7.
7 Ko akokaso mbuta lo tshena pe? Etena kakandasha ambeki ande ɔkɛndɛ wa mbetɛ anto ambeki, Yeso mɛtɛ akawasha “diangɔ diande” kana talata yande. (Mat. 25:14) Lo tshena pe, talata nembetshiyaka ɔkɛndɛ wa nsambisha ndo wa mbetɛ anto ambeki.
8. Kaanga mbele ase olimu wakalongola lofulo lotshikitanyi la talata, kakɔna kakalongamɛka owandji?
8 Wɛɛla wa talata mɛnyaka dia owandji akasha ose olimu ɔmɔtshi talata tshanu, okina talata hiende ndo okina lotalata ɔtɔi. (Mat. 25:15) Kaanga mbele ase olimu wakalongola lofulo la talata lotshikitanyi, owandji akalongamɛka dia vɔ tshɛ nkamba la talata yakɔ dimɛna, mbuta ate ndjasha dimɛna l’esambishelo lo ndjela akoka awɔ. (Mat. 22:37; Kɔl. 3:23) Lo ntambe ka ntondo, ntatɛ lo Pɛntɛkɔsta 33 T.D., ambeki waki Kristo wakatatɛ minda okanda la talata yakɔ. Etete kawɔ l’esambishelo ndo l’olimu wa mbetɛ anto ambeki kɔndwama lo dibuku dia lo Bible di’Etsha w’apɔstɔlɔ. *—Ets. 6:7; 12:24; 19:20.
OKANDA WEKƆ LO MUNDAMA LA TALATA LO ETENA K’EKOMELO
9. a) Kakɔna kakasale ase olimu ahende wa kɔlamelo la talata yawɔ, ndo kakɔna kalembetshiya dui sɔ ? b) Ɔkɛndɛ akɔna wele la “ɛkɔkɔ ekina”?
9 Lo nshi y’ekomelo nyɛ, djekoleko oma lo 1919, akitami wa kɔlamelo waki Kristo wa la nkɛtɛ wakande okanda la falanga y’Owandji. L’ɛnyɛlɔ k’ase olimu ahende wa ntondo wa lo wɛɛla, anangɛso l’akadiyɛso w’akitami wakasale kɛnɛ tshɛ kakawakoke nsala lo nkamba la kɛnɛ kaki la wɔ. Bu ohomba ndjambola dia mbeya akɔna akalongola talata tshanu ndo akɔna akalongola talata hiende. Ase olimu akɔ ahende wa lo wɛɛla, onto l’onto akalodia lo ahende kɛnɛ kakandalongola, mbokɛmaka dia vɔ tshɛ waki l’etete. Ko ɔkɛndɛ akɔna wele la wanɛ wele la elongamelo ka ndjɔsɛna la nkɛtɛ? Vɔ wekɔ la ɔkɛndɛ w’ohomba efula. Wɛɛla waki Yeso wa ɛkɔkɔ la mbudi tetshaka ɔnɛ, wanɛ wele la elongamelo ka ndjɔsɛna la nkɛtɛ wekɔ la diɛsɛ dia nsukɛ anango Kristo la kɔlamelo l’olimu w’esambishelo ndo wa mbetsha anto. Lo nshi ya paa y’ekomelo nyɛ, elui akɔ ehende wekɔ lo nkamba kaamɛ oko “olui ɔtɔi” lo monga la ohetoheto l’olimu wa mbetɛ anto ambeki.—Jni. 10:16.
10. Naa djembetelo ya woke yɛnya woongelo wa Yeso?
10 Owandji akahombe mɛtɛ nongamɛ etombelo w’amɛna. Oko wakataditshi la diko, ambeki ande wa kɔlamelo wa lo ntambe ka ntondo wakafudia diangɔ diande. Ko kayotota lo etena k’ekomelo kɛnɛ kakotshama wɛɛla wa talata? Ɔkɔndɔ mɛnyaka dia ambeki waki Yeso wa kɔlamelo wokokambaka olimu w’esambishelo woleki ohomba ndo wa mbetɛ anto ambeki. Diɛsɛ la weelo wadjawɔ dia nsambisha, nunu nkama y’ambeki w’eyoyo wekɔ lo kotshama l’atei w’apandjudi wa Diolelo ɔnɔnyi tshɛ. Olimu w’esambishelo ndo wa mbetɛ anto ambeki ekɔ djembetelo ya woke yɛnya woongelo wa Yeso. Lo mɛtɛ, Owandji awɔ ekɔ l’ɔkɔkɔ wa ngɛnangɛna.
Kristo akasha ambeki ande ɔkɛndɛ wa nɛmɔ wa nsambisha (Enda odingɔ 10)
ETENA KAKƆNA KAYOYA OWANDJI DIA NDJOKOYA LA WƆ?
11. Kakɔna katokonya dia mbuta dia Yeso ayoyokoya la ekambi ande lo mfɔnu ka woke?
11 Yeso ayoya dia ndjokoya l’ase olimu ande oya l’ekomelo ka mfɔnu ka woke. Kakɔna katokonya dia mbuta ngasɔ? Lo prɔfɛsiya kofundami lo Mateo tshapita 24 ndo 25, Yeso akate mbala ko mbala dia oyelo ande. Lo ntɛkɛta lo kɛnɛ kendana la dombwelo diayosalema lo mfɔnu ka woke, nde akate ɔnɛ anto “wayɛna Ɔna onto ayaye lo wange wa l’olongo.” Nde akahɛmɔla ambeki ande wa lo nshi y’ekomelo dia vɔ sungukalaka lo mbatɛ ɔnɛ: “Hanyeye lushi lakɔna layoya Nkumɛnyu” ndo “Ɔna onto ayoya lo wonya wahanyafɔnya.” (Mat. 24:30, 42, 44) Mbokɛmaka dia etena kakate Yeso ɔnɛ “owandji awɔ akakalola ndo akakoya la wɔ,” nde akatɛkɛtaka dia etena kayondela dombwelo lo ekomelo ka dikongɛ nɛ di’akambo. *—Mat. 25:19.
12, 13. a) Kakɔna kakatɛ owandji ase olimu ahende wa ntondo, ndo lande na? b) Etena kakɔna kadjama akitami djembetelo y’ekomelo? (Enda kiombo yele l’ɔtɛ a dui ɔnɛ “ Vɔ mbikoyaka la wɔ etena kavɔwɔ.”) c) Difuto diakɔna diayolongola wanɛ wɔsama oko ɛkɔkɔ?
12 Lo wɛɛla ɔnɛ, etena kakaye owandji nde akayotanaka dia ase olimu ahende wa ntondo, mbuta ate ɔnɛ lakandasha talata tshanu ndo ɔnɛ lakandasha hiende wakonge la kɔlamelo nɛ dia onto l’onto akalodia kɛnɛ kakawawosha lo ahende. Owandji akatɛ ase olimu ahende asɔ onto l’onto ɔnɛ: “Kawɔ, wɛ ekɔ ose olimu w’ɔlɔlɔ ndo wa kɔlamelo! Wɛ aki la kɔlamelo lo diangɔ yema tshitshɛ. Dimi layokɔsɔna dia wɛ namaka diangɔ efula.” (Mat. 25:21, 23) Ko kakɔna kakokaso nongamɛ kayoyota Owandji, mbuta ate Yeso Kristo ɔnɛ lakatombɔma etena kayondela dombwelo lo nshi yayaye?
13 Wanɛ wele didjidji di’ase olimu ahende wa ntondo, mbuta ate ambeki ande w’akitami wayodjama djembetelo y’ekomelo la ntondo ka mfɔnu ka woke ntatɛ. (Ɛny. 7:1-3) La ntondo ka Aramangɛdɔna, Yeso ayowasha difuto diawɔ dia l’olongo diakawalakema. Wanɛ wele la elongamelo ka nsɛna la nkɛtɛ wakasukɛka anango Kristo l’olimu w’esambishelo, wayɔsama oko ɛkɔkɔ ndo wayokondja diɛsɛ dia nsɛna lanɛ la nkɛtɛ lo ɛlɔmbwɛlɔ ka Diolelo.—Mat. 25:34.
OSE OLIMU WA KƆLƆ NDO WA NƐNDƐ
14, 15. Onde Yeso akalange mbuta di’anango w’akitami efula wayonga anto wa kɔlɔ ndo wa nɛndɛ? Lembetshiya.
14 Ose olimu w’ekomelo wa lo wɛɛla ɔnɛ akatokundɛka talata yande lo dihole dia munda layɔ okanda kana toyidja lo bankɛ. Nde akɛnya dia nde ekɔ la ekanelo ka yimba ka kɔlɔ l’ɔtɛ wakandatone nkamba olimu lo wahɔ w’owandji ande. Owandji ande akakoke mbotɛ ɔnɛ wɛ ekɔ “ose olimu wa kɔlɔ ndo wa nɛndɛ.” Owandji ande akɔkɔsɔla lotalata lakɔ ko akalisha ɔnɛ laki la talata dikumi. Wakakasha ose olimu wa kɔlɔ ɔsɔ “lo wodjima wa l’andja.” ‘Lɛkɔ mbakandahombe ndelaka ndo kakatanya wanyu.’—Mat. 25:24-30; Luka 19:22, 23.
15 Ose olimu ɔtɔi waki owandji akatokundɛka lotalata lande, onde laasɔ Yeso akalange mbuta di’ambeki ande amɔtshi w’akitami wayoyonga anto wa kɔlɔ kana akanga wa nɛndɛ? Ndooko. Tɔsɛdingole ɔkɔndɔ akɔ yema. Lo wɛɛla wa ɔhɔmbɔ wa kɔlamelo ndo wa kɛsɔ, Yeso akatɛkɛta dia ɔhɔmbɔ wa kɔlɔ wakakɔmɔla asekande ɛhɔmbɔ. Yeso konanga mbuta dia ɔhɔmbɔ wa kɔlɔ ayoyonga. Koko nde akahɛmɔlaka ɔhɔmbɔ wa kɔlamelo diaha nde ndjonga la waonga w’ɔhɔmbɔ wa kɔlɔ. Woho akɔ waamɛ mbele, lo wɛɛla wa esekaseka dikumi wa dimuma, Yeso kombuta dia k’ahende ɔtɔi k’ambeki ande w’akitami wayonga oko esekaseka etanu wa dinginya. Koko nde akahɛmɔla anango w’akitami lo dui diakakoke ndjosalema naka vɔ ndjotshika nsungukala ndo hawoyoyalɔngɔsɔla. * Diakɔ diele sho koka mbuta dia lo wɛɛla wa talata, Yeso konanga mbuta dia lo nshi y’ekomelo anango w’akitami efula wayonga akanga wa kɔlɔ ndo wa nɛndɛ. Koko, Yeso akahɛmɔla ambeki ande w’akitami lo mbaɛnya ohomba wa ntetemala monga la etete lo ‘munda okanda’ la talata yawɔ ndo mbewɔ dionga ndo etsha tshɛ wakoka mɛnya dia vɔ wekɔ ɔhɔmbɔ wa kɔlɔ.—Mat. 25:16.
16. a) Wetshelo akɔna wakondjaso oma lo wɛɛla wa talata? b) Ngande wambolowanya sawo nɛ eokelo kaso ka wɛɛla wa talata? (Enda kiombo yele l’ɔtɛ a dui ɔnɛ “ Elembetshiyelo w’eyoyo wa wɛɛla wa Talata.”)
16 Naa wetshelo ehende wakondjaso oma lo wɛɛla wa talata? Wetshelo wa ntondo ele: Owandji, mbuta ate Kristo akasha ase olimu ande w’akitami ɛngɔ kɛmɔtshi kɔsande la nɛmɔ di’efula, mbuta ate ɔkɛndɛ wa nsambisha ndo mbetɛ anto ambeki. Wetshelo wa hende ele: Kristo nongamɛka dia sho tshɛ monga la etete l’olimu w’esambishelo. Naka sho nsala ngasɔ, kete sho koka monga l’eshikikelo ɔnɛ Owandji ayoyotofuta l’ɔtɛ weso la mbetawɔ, wasungukalaso ndo l’ɔtɛ weso la kɔlamelo.—Mat. 25:21, 23, 34.
^ od. 3 Ɔhɔmbɔ wa kɔlamelo ndo kɛsɔ nembetshiyama dimɛna lo Tshoto y’Etangelo ya Ngɔndɔ k’esambele 15, 2013, lɛkɛ 21-22, odingɔ 8-10. Esekaseka dikumi wa dimuma wakalembetshiyama lo sawo dietshi lo numɛlɔ kɛnɛ. Wɛɛla wa ɛkɔkɔ la mbudi akalembetshiyama lo Tshoto y’Etangelo ya Ngɔndɔ ka dikumi l’ɔtɔi 15, 1995, lɛkɛ 15 ndo lo sawo diayela dia lo numɛlɔ kɛnɛ.
^ od. 4 Enda kiombo yele l’ɔtɛ a dui ɔnɛ “ Awui w’ɔtɔnɛ lo wɛɛla wa Talata la wa falanga y’ekenga.”
^ od. 5 Lo nshi ya Yeso, talata ɔtɔi aki la nɛmɔ dia dɛnariyo oko 6000. Lam’ele onto akakokaka futama dɛnariyo ɔtɔi lo lushi, mbokɛmaka dia onto akahombaka nkamba ɛnɔnyi 20 dia nkondja talata ɔtɔi.
^ od. 8 L’ɔkɔngɔ wa nyɔi k’apɔstɔlɔ, Satana akayela apɔstazi ndo dui sɔ diakaviya l’edja ka ntambe efula. Lo etena kɛsɔ, ndooko tɛdikɔ takɔsama dia olimu w’esambishelo kambema dia nkonya anto ambeki w’eshika waki Kristo. Koko etshikitanu wakahombe ndjosalema lo etena ka “dinela,” mbuta ate lo nshi y’ekomelo. (Mat. 13:24-30, 36-43) Enda Tshoto y’Etangelo ya Ngɔndɔ k’esambele 15, 2013, lɛkɛ 9-12.
^ od. 11 Enda Tshoto y’Etangelo ya Ngɔndɔ k’esambele 15, 2013, lɛkɛ 7-8, odingɔ 14-18.
