Ngande wele diɔtɔnganelo diasaso la Jehowa?
“Nyoyasukanya la Nzambi, ko nde ayoyasukanya la nyu.”—JAK. 4:8.
1. Lande na kahombaso nsala dia diɔtɔnganelo diasaso la Jehowa ntshikala nge?
ONDE wɛ ekɔ Ɔmɛnyi wa Jehowa? Naka ngasɔ, kete wɛ ekɔ la ɛngɔ ka nɛmɔ efula, mbuta ate diɔtɔnganelo diasayɛ la Nzambi. Koko di’ɔtɔnganelo sɔ diekɔ lo waale aha tsho oma lo tɔsɛngiya t’andja waki Satana koko ndo oma lo eongelo kaso k’anto wele keema kokele. Akristo tshɛ wekɔ lo ndɔshana la okakatanu ɔsɔ. Ɔnkɔnɛ, diɔtɔnganelo diasaso la Jehowa pombaka ntshikala nge.
2. a) Diɔtɔnganelo kɛdikɛdi na? (Enda nɔtɛ.) b) Ngande wakokaso nkeketsha diɔtɔnganelo diasaso la Jehowa?
2 Ngande wɔsayɛ diɔtɔnganelo diasayɛ la Jehowa? Onde wɛ nangaka nkeketsha diɔtɔnganelo sɔ? Jakɔba 4:8 mɛnyaka woho wakokayɛ nsala dui sɔ lo mbuta ɔnɛ: “Nyoyasukanya la Nzambi, ko nde ayoyasukanya la nyu.” Tolembete dia ekɔ akambo ahende wele ohomba. * Naka sho nsala kɛnɛ kahombama dia ndjasukanya la Nzambi kete nde lawɔ ayoyasukanya laso. Naka sho salaka ngasɔ, kete diɔtɔnganelo diasaso la Jehowa diayotakeketalaka. Etombelo wayonga la dui sɔ ele, diɔtɔnganelo sɔ diayonga dui dia mɛtɛ le so. Sho tetemalaka monga la eshikikelo kele oko kɛnɛ kaki la Yeso etena kakandate ate: “Ɔnɛ lakatome ekɔ onto la mɛtɛ ndo . . . Dimi mbeeyaka.” (Jni. 7:28, 29) Kakɔna kahombama shikaa dia ndjasukanya la Jehowa?
Ngande wakokayɛ sawolaka la Nzambi? (Enda odingɔ 3)
3. Kakɔna katokimanyiya dia sho sawolaka la Jehowa?
3 Sawo dia mbala la mbala la Jehowa ekɔ dui di’ohomba dia sho ndjasukanya la nde. Ngande wakokayɛ sawolaka la Nzambi? Ngande watoyosawolaka la ɔngɛnyi ayɛ wele etale? Mbala mɔtshi nyu fundanɛka mikanda, tɛkɛtaka lo telefɔnɛ ndo ondo nyu salaka dui sɔ mbala la mbala. Sho sawolaka la Jehowa lo mbɔlɔmbaka mbala la mbala. (Adia Osambu 142:2.) Sho mbetawɔka dia Jehowa ntɛkɛta la so etena kadiaso Ɔtɛkɛta ande wakafundama ndo kakanaso yimba lɔkɔ mbala la mbala. (Adia Isaya 30:20, 21.) Nyɛsɔ tɔsɛdingole woho wele toho tohende tasawolaso la Jehowa tɔsɔ keketshaka dimama diasaso la nde ndo kimanyiyaka dia diɔtɔnganelo diasaso la nde monga dui dia mɛtɛ mɛtɛ.
JEHOWA TƐKƐTAKA LA SO LO TSHIMBO YA WEKELO WA BIBLE
4, 5. Ngande wasawola Jehowa la so lo tshimbo y’Ɔtɛkɛta ande wakafundama? Sha ɛnyɛlɔ.
4 Aha la taamu, sho mbetawɔka dia Bible kekɔ la losango laki Nzambi le anto tshɛ wa l’andja w’otondo. Ko onde Bible mɛnyaka woho wakoka onto l’onto ndjasukanya la Jehowa? Eelo. Lo ngande? Naka sho mbadiaka ndo mbekaka Bible mbala la mbala, sɛdingolaka woho wɔsaso kɛnɛ katatɔ ndo kanaka yimba lo woho wakokaso nkamba l’alako w’oma lɔkɔ lo nsɛnɔ yaso, kete tekɔ lo mbetawɔ dia Jehowa ntɛkɛta la so lo tshimbo y’Ɔtɛkɛta ande. Dui sɔ tokimanyiyaka dia sho monga la diɔtɔnganelo dia ma ma la nde.—Hɛb. 4:12; Jak. 1:23-25.
5 Ɛnyɛlɔ, ngande wayaokayɛ etena kadiayɛ ɛtɛkɛta wa Yeso w’ɔnɛ “nyotshike ndjaombɛ diangɔ dia nɛmɔ la nkɛtɛ”? Naka wɛ ekɔ lo mbetsha waahɔ wa Diolelo lo dihole dia ntondo lo lɔsɛnɔ layɛ, kete Jehowa ekɔ lo kaandola. Lo wedi okina, naka wɛ mɛnaka ohomba wa mbetɛ lɔsɛnɔ layɛ ɔsɛlɛngɛ ndo ndjasha efula lo wahɔ wa Diolelo, kete eya dia Jehowa ekɔ lo kokimanyiya dia wɛ mbeya kɛnɛ kahombayɛ nsala dia ndjasukanya la nde.—Mat. 6:19, 20.
6, 7. a) Shɛngiya yakɔna yele la wekelo wa Bible lo ngandji kokaso Jehowa ndo lo ngandji katokande? b) Oyango akɔna wahomba monga la so etena kekaso Bible?
6 Wekelo wa Bible hakomɛ tsho lo tɛnya toho takokaso mpama lo nyuma. Koko vɔ fudiaka nto lowando laso lo waonga wa Jehowa w’amɛna ndo kɛsɔ totshutshuyaka dia sho mbooka ngandji k’efula. Etena katahame ngandji kokaso Nzambi, ngandji kande oya le so fulaka ndo dui sɔ keketshaka dimama diasaso la nde.—Adia 1 Kɔrɛtɔ 8:3.
7 Dia sho ndjasukanya la Jehowa, ekɔ ohomba sho mbeka Bible l’oyango wa dimɛna. Joani 17:3 mbutaka ɔnɛ: “Dia vɔ nkondja lɔsɛnɔ la pondjo, vɔ pombaka keya wɛ Nzambi ɔtɔi ka mɛtɛ, la Yeso Kristo lakayatome.” Diakɔ diele, oyango aso hahombe monga tsho wa nkondja ewo koko dia ‘mbeya’ Jehowa dimɛna oko Onto.—Adia Etumbelu 33:13; Osam. 25:4.
8. a) Kakɔna kakoka tokiyanya lo menda kɛnɛ kakasalɛ Jehowa nkumekanga Azariya oko wɔkɔndwamidiɔ lo 2 Khumi ya Dikanga 15:1-5? b) Ngande wele woho weyaso Jehowa tokimanyiyaka diaha mbidja taamu lo etsha ande?
8 Naka sho mbeya Jehowa dimɛna, kete hatotoyakiyanya amboleka naka ɛkɔndɔ ɛmɔtshi wa lo Bible tokonyaka dia ndjambola lande na kakasale Jehowa akambo lo yoho kapanda. Ɛnyɛlɔ, ngande wayaokayɛ lo kɛnɛ kakasalɛ Jehowa Azariya nkumekanga ka la Juda? (2 Khum. 15:1-5) Tolembete dia kaanga mbele “antu wakakolamelaka nambula elambu la ntshumba malashi lu alunga,” Azariya lo wedi ande “akatshaka akambu w’usimbwi lu ashu wa [Jehowa].” Koko, “[Jehowa] akasuya khum’ekanga, ku ndi akayala la sudi edja ndu lushi landi la nyoi.” Lande na? Ɔkɔndɔ hate lande na. Ko onde dui sɔ koka tokiyanya ndo tokonya lo ndjambola kana Jehowa akasha Azariya dilanya aha la ɔkɔkɔ w’oshika? Naka sho mbeyaka waonga wa Jehowa dimɛna, kete hatotoyakiyanya. Dui sɔ tokonyaka dia mbeya nto ɔnɛ Jehowa pokolaka nshi tshɛ ‘la losembwe.’ (Jer. 30:11) Ewo ka ngasɔ toshikikɛka ɔnɛ kaanga naka sho hateye lande na kele Jehowa akasalɛ Azariya ngasɔ, sho koka monga la eshikikelo dia Jehowa akasale akambo la losembwe.
9. Naa akambo wakayokonya dia Jehowa ndjoka Azariya hemɔ ka sudi?
9 Lo dikambo sɔ, sho tanaka elembetshiyelo ekina lo avɛsa akina wa lo Bible. Nkumekanga Azariya akeyamaka nto oko nkumekanga Uziya. (2 Khum. 15:7, 32) Ɔkɔndɔ wa woho ɔsɔ watanema lo 2 Ekondo 26:3-5, 16-21, totɛka dia kaanga mbele Uziya akasale kɛnɛ kele ɔlɔlɔ lo washo wa Jehowa lo etena kɛmɔtshi, l’ɔkɔngɔ diko ‘otema ande wakayala la lotamanya lakookonya lo elanyelo.’ L’otako tshɛ, nde akasale elimu wele nde komonga la lotshungɔ wakasalaka ɛlɔmbɛdi. Ɛlɔmbɛdi akumi enanɛi l’ɔtɔi wakɛnana la nde ndo wakawongola. Ko kakɔna kakasale Uziya? Nde akɛnya dia nde akikɔ la otako. Nde “akuki” ɛlɔmbɛdi kɛlɛ. Mbokɛmaka lande na kele Jehowa akawoke hemɔ ka sudi.
10. Lande na kele aha mbala tshɛ mbahombaso monga l’ohomba w’elembetshiyelo w’awui wasala Jehowa, ndo ngande wakokaso mfudia wɛkamu aso lo woho wasala Jehowa akambo la losembwe?
10 Wetshelo akɔna wakondjaso oma lo ɔkɔndɔ ɔsɔ? Tɔshi dia elembetshiyelo wokɛma hwe kofundama lo Ɔtɛkɛta wa Nzambi, oko wediɔ lo kɛnɛ kendana la ɛkɔndɔ ekina wa lo tshena pe wa lo Bible, onde wɛ otodja losembwe laki Nzambi taamu? Kana onde wɛ otɔfɔnya dia Bible kekɔ l’akambo efula watoshikikɛ dia Jehowa ekɔ onto lokosalaka nshi tshɛ kɛnɛ kele ɔlɔlɔ? (Euh. 32:4) Lo yɛdikɔ yayototalekaka mbeya dia Jehowa ekɔ Onto la mɛtɛ mɛtɛ, ngandji ndo lowando laso lo waonga ande wayohama polo lo yɛdikɔ yele hatotonga l’ohomba w’elembetshiyelo lo dui tshɛ diasala Jehowa. Teye dia lowando la ngasɔ, layofula lo ndjela welo wayotodja dia mbeka ndo nkana yimba lo Ɔtɛkɛta waki Nzambi wakafundama. (Osam. 77:12, 13) Dui sɔ, diayokeketsha diɔtɔnganelo diasaso la Jehowa ndo diɔtɔnganelo sɔ diayoleka monga dui dia mɛtɛ mɛtɛ.
SHO TƐKƐTAKA LA JEHOWA LO TSHIMBO YA DƆMBƐLƆ
11-13. Ngande weyayɛ dia Jehowa pokamɛka alɔmbɛlɔ? (Enda osato wele lo mbɔtwɛlɔ.)
11 Sho ndjasukanyaka la Jehowa lo tshimbo ya dɔmbɛlɔ. Sho mbotombolaka, mbokaka losaka ndo nyangaka ɛlɔmbwɛlɔ kande. (Osam. 32:8) Koko dia diɔtɔnganelo diasaso la Jehowa monga dui dia mɛtɛ mɛtɛ, sho pombaka monga la eshikikelo ɔnɛ nde mbokaka alɔmbɛlɔ.
12 Anto amɔtshi mbutaka dia dɔmbɛlɔ kimanyiyaka onto tsho dia ndjaoka dimɛna. Vɔ mbutaka ɔnɛ naka onto ambɛna diele oko dɔmbɛlɔ diande diambokadimɔma, kete ekɔ nɛ dia onto akɔ ambokana yimba dimɛna dimɛna lo ekakatanu wele la nde ndo ambakandola ndaamɛ. Otshikitanyi la dikanyiyakanyiya dia ngasɔ, ngande watoyeyaka dia Jehowa amboka dɔmbɛlɔ diayɛ?
13 Tɔsɛdingole ɛnyɛlɔ kɛnɛ: Etena kakandasɛnaka l’olongo la ntondo ka nde ndja lanɛ la nkɛtɛ, Yeso akɛnaka woho wakakadimolaka Jehowa alɔmbɛlɔ w’ekambi ande wa la nkɛtɛ. Diakɔ diele, etena kakandayokambaka olimu ande w’esambishelo lanɛ la nkɛtɛ, Yeso akakambaka la dɔmbɛlɔ oko yoho ya mɛnya She lele l’olongo nsaki yande. Onde nde ototetemala nsala ngasɔ, ɛnyɛlɔ mbetsha otsho w’otondo lo nɔmba, otondongaka nde komonga l’eshikikelo ɔnɛ Jehowa pokamɛka alɔmbɛlɔ? (Luka 6:12; 22:40-46) Onde nde otetsha ambeki ande dia vɔ nɔmbaka, naka nde akeyaka dia dɔmbɛlɔ ekɔ tsho la ekimanyielo ka lo yimba? Mbokɛmaka hwe dia Yeso akeyaka dia dɔmbɛlɔ ekɔ sawo dia mɛtɛ mɛtɛ la Jehowa. Lo diaaso dimɔtshi Yeso akate ate: “Papa, dimi lambokosha losaka nɛ dia wɛ pokamɛkami. Eelo, dimi mbeyaka dia wɛ topokamɛka nshi tshɛ.” Sho lawɔ koka monga l’eshikikelo ɔnɛ Jehowa ‘tokaka dɔmbɛlɔ.’—Jni. 11:41, 42; Osam. 65:2.
14, 15. a) Waahɔ akɔna wakondjaso lo nsembɔ lo dikambo etena kalɔmbaso? b) Ngande wele alɔmbɛlɔ wa kadiyɛso kɛmɔtshi wakookimanyiya dia nkeketsha diɔtɔnganelo diasande la Jehowa?
14 Naka wɛ nsembɔ lo dikambo shikaa etena kasalayɛ alɔmbɛlɔ ayɛ, kete wɛ ayonga la eshikikelo dia Jehowa ayokadimola alɔmbɛlɔ ayɛ kaanga mbakoka monga ko nde hakadimodi mbala kak’ɔtɔi. Etena kakadimola Jehowa alɔmbɛlɔ ayɛ, nde mongaka onto la mɛtɛ mɛtɛ le yɛ. Laadiko dia laasɔ, etena katayaleke mbutɛ Jehowa tokanyi tayɛ t’omakɛse otema, mbayondoleka ndjasukanya la yɛ.
15 Tɔsɛdingole ɛnyɛlɔ kaki Kathy. * Nde kɔngɛnangɛnaka olimu w’esambishelo, kaanga mbele nde akayashaka lɔkɔ mbala la mbala. Nde nembetshiyaka ate: “Dimi mɛtɛ kɔngɛnangɛnaka olimu w’esambishelo. Etena kakamatshike olimu wa l’emunyi, ekumanyi kɛmɔtshi akalongamɛka dia dimi layokoma ombatshi mboka wa pondjo ndo nde akamɛnya ndo woho wa nsala dui sɔ. Lakɔshi yɛdikɔ ya nkamba olimu w’ombatshi mboka ndo lakatatɛ nɔmba Jehowa lushi tshɛ dia kimanyiyami dia dimi nanga olimu akɔ.” Onde Jehowa akakadimola alɔmbɛlɔ ande? Nde mbutaka ate: “Kakianɛ, aya ɛnɔnyi esato wemi ombatshi mboka. Etombelo wele la woho wakametshaka wenya efula l’esambishelo ndo wakamakondjaka wetshelo oma le akadiyɛmi akina ele, lakafudia akoka ami wa nsambisha. Ɛlɔ kɛnɛ, lolanga olimu w’esambishelo. Kɛnɛ koleki ele, laya la diɔtɔnganelo dia ma ma la Jehowa ndeka woho wakidiɔ ntondo.” Alɔmbɛlɔ waki Kathy wakokimanyiya dia mbetɛ diɔtɔnganelo diasande la Jehowa dui dia mɛtɛ.
TOSALE KƐNƐ KAHOMBASO NSALA
16, 17. a) Kakɔna kahombaso nsala dia nama diɔtɔnganelo diasaso la Jehowa ndo dia diɔ mpama? b) Kakɔna kayotɔsɛdingola lo sawo diayela?
16 Mpamia diɔtɔnganelo diasaso la Jehowa ekɔ oyango wa lo lɔsɛnɔ. Sho pombaka ntakola wanya dia ndjasukanya la Nzambi naka talanga dia nde la wɔ ndjasukanya la so. Ɔnkɔnɛ, nyɛsɔ totetemale sawolaka la Nzambi lo mbekaka Bible ndo lo nɔmbaka. Etombelo wayonga la dui sɔ ele, diɔtɔnganelo diasaso la Jehowa diayohama ndo kɛsɔ ayotokimanyiya dia ntondoya ehemba wahomana la so.
Pamia diɔtɔnganelo diasaso la Jehowa ekɔ oyango wa lo lɔsɛnɔ (Enda odingɔ 16, 17)
17 Koko ekakatanu mbeyaka ntetemala tɛnya paa kaanga mbayashaso lo alɔmbɛlɔ l’otema ɔtɔi. Lo tena dia ngasɔ, sho koka ndjoshisha wɛkamu aso le Jehowa. Sho mbeyaka ndjotatɛ ndjambola dia mbeya kana Jehowa mɛtɛ mbokaka alɔmbɛlɔ aso, ndo kana nde mbɔsaka la nɛmɔ diɔtɔnganelo diasaso la nde. Ngande wakokaso nkandola dui sɔ tele la eshikikelo dia diɔtɔnganelo diasaso la Jehowa diekɔ mɛtɛ? Kɛsɔ mbayotɔsɛndingola lo sawo diayela.
