NAKA sho mbɛdika otamba w’ɔlivɛ w’akoto akoto ndo wa diambo la otamba w’osase wa dimɛna wa la Lɛbanɔna, kete otamba w’ɔlivɛ hawokoke tambiya. Otamba w’ɔlivɛ wekɔ la dikoka dia nyomotomba. Etamba ɛmɔtshi w’ɔlivɛ mbiviyaka ɛnɔnyi oko 1000. Edio w’otamba w’ɔlivɛ wekɔ l’akoka wa ntondja nsɔngu kaanga naka wakahembola okendeka awɔ. Etena tshɛ kayotshikalaka edio w’otamba w’ɔlivɛ la lɔsɛnɔ, vɔ koka ntomba nto.

Jɔbɔ laki papa ka nkumbo aki la eshikikelo ɔnɛ kaanga nde ambovɔ nde koka nsɛna nto. (Jobo 14:13-15) Nde akakambe la osongo ondo wa ɔlivɛ dia mbisha ɛnyɛlɔ kɛnya dia nde aki la eshikikelo dia Nzambi ekɔ la dikoka dia mboolola. Jɔbɔ akate ɔnɛ: ‘Elongamelo kekɔ kaanga le osongo. Naka vɔ wambɔkɔtama, vɔ wayɔmɔnga nto.’ Naka avula ndɔ efula, kete l’ekimanyielo ka edio awɔ, osongo w’ɔlivɛ wamboma koka nyomotondja ‘ntahe oko osongo w’oyoyo.’—Jobo 14:7-9.

Oko watolongamɛka okambi wa dikambɔ dia mɛna woho wamɔnga osongo w’ɔlivɛ wakahembɔma, Jehowa Nzambi nongamɛka mbolola ekambi ande ndo anto akina efula. (Mat. 22:31, 32; Jni. 5:28, 29; Ets. 24:15) Tayonga la ɔngɛnɔngɛnɔ wa mamba dia mɛna wanɛ wakavu wambolɔ ndo mbowaɛna wangɛnangɛna la lɔsɛnɔ nto.