LUSHI lɔmɔtshi lo eleko k’ɔwɔ ka lo 1970, laki lo mbeto ka lopitadi la woke la Valley Forge, l’osomba wa Phoenixville, Pennsylvanie, l’États-Unis. Onganga ɔmɔtshi wa pami akambɛdikaka wodelo wa dikila l’ɔkɔngɔ wa minitɛ akumi asato tshɛ. Lakatataka hemɔ kɛmɔtshi kasambemɛ ndo laasɔ ko lele la ɛnɔnyi 20 lakamba olimu w’ɔsɔlayi. Onganga wakambolɛ yema ɔsɔ akatshimbe wɔɔngɔ. Lam’ele dikila diami diakatetemala mbudɛ, lakawombola nte “onde wɛ atɛnaka onto ɔmɔtshi avɔ lo washo ayɛ?” Elongi kande kakalana ndo nde akakadimola ɔnɛ “talɛnaka.”

L’etena kɛsɔ, lakɛnyi dia halotoka. Ngande wakayokomɛka dikambo lo lopitadi lɔsɔ? Layanga nyɔkɔndɔlɛ ɔkɔndɔ wa lɔsɛnɔ lami.

Lakonge la hemɔ etena kakamakambaka lo luudu lɔmɔtshi lakawataka anto etena kakalɔmaka ta la Vietnam. Lakangɛnangɛnaka nkimanyiya ɛkɔnyi, wanɛ wakahomɔka mpota ndo lakayadjɛ oyango wa nkoma dɔkɔtɛlɛ. Lakakome la Vietnam lo Ngɔndɔ k’esambele 1969. L’ɛnyɛlɔ k’eyoyo tshɛ, wakambetshetsha lomingu l’otondo l’oyango wa dimi mbeya ngelo ndo woho wele djungudungu.

Kombeta edja, lakatatɛ nkamba olimu lo lopitadi latawɔ anto lo dibongo dia Mékong Delta la Dong Tam. Elikɔptɛrɛ efula wakayaka l’asalayi wakahomɔ. Lakalangaka wodja aso ndo nkamba olimu ɔsɔ efula, diakɔ diele laki suke dia nkamba olimu akɔ. Takakokɛka asɔlayi wakayaka la mpota, oma laasɔ ko sho ndjowaɔtshiya lo mvudu ya mbolo lɛnɛ akatataka anto ndo mvudu shɔ yaki la waa klimatizɛrɛ. Lɛkɔ akikɔ dɔkɔtɛlɛ, onganga wakakanaka ntɛdi y’eshishi, ɔnɛ lakasolaka waa mpota ndo ɔnɛ lakembolaka ɛkɔnyi, vɔ tshɛ wakakambaka kaamɛ ndo wakasalaka tshɛ dia nkokɛ nsɛnɔ y’anto. Lakɛnyi dia etshumu ndo atapa w’edima amɔtshi wakayaka la wɔ lo elikɔptɛrɛ kɔnɔngɔmaka. Wakambutɛ ɔnɛ, lo etshumu ɛsɔ, akikɔ emunyi w’asɔlayi wakadiakemaka lo ata. Ngasɔ mbakamasha lo nya lo ta.

Etena kakimi ɔlɔngɔlɔngɔ, lakeyaka awui amɔtshi wa mɛtɛ waketshaka Ɛmɛnyi wa Jehowa. Mama kami ka ngandji akekaka Bible la Ɛmɛnyi wa Jehowa, koko nde kopama polo lo batisimu. Lakangɛnangɛnaka mbidjasɛ lam’akekaka mama Bible. Lushi lɔmɔtshi, dimi la omi aki mama takatetaka suke la Mbalasa ka  Diolelo kɛmɔtshi. Lakawombola nte “naa ɔtɛmwɛlɔ ɔnɛ?” Nde akakadimola ɔnɛ “tosombɔke nsukana l’anto ango.” Lam’ele lakolangaka ndo lakayaɛkɛka le nde, lakakambe la dako diande. Diakɔ diele, lakatshike monga la diɔtɔnganelo l’Ɛmɛnyi wa Jehowa.

Lam’akamakalola oma la Vietnam, lakayongaka la mposa ka Nzambi lo lɔsɛnɔ lami. Lakatetemala mbohɔ awui wa kɔlɔ wakete. Akɛnama dia lɛnɛ akamatshu, ndooko onto lakeyaka kɛnɛ kakasalema la Vietnam. Dimi mbohɔka kɛnɛ kakasale anto amɔtshi wakelɛ asalayi wa l’États-Unis ɔnɛ andjaki w’ana w’akɛnda l’ɔtɛ w’alapɔlɔ wakaye ɔnɛ ana w’akɛnda waha l’onongo wekɔ lo ndjakema lo ta.

Dia nkotsha ehomba ami wa lo nyuma, lakatatɛ ntshɔ lo ɛtɛmwɛlɔ wotshikitanyi. Lakikɔ la ngandji ka Nzambi, koko awui wakamɛnaka lo ɛtɛmwɛlɔ wakatɛwɔlaka. L’ekomelo, lakayotshɔka lo Mbalasa ka Diolelo k’Ɛmɛnyi wa Jehowa la Delray Beach, Floride. Akikɔ Lushi la lomingu Ngɔndɔ ka hende 1971.

Etena kakamakome ko sawo dia lo sɛkɛ diaya suke la nshila, diakɔ diele lakatshikala dia ndjela wekelo wa Tshoto y’Etangelo. Handjohɔ ɔtɛ a dui wakakɛtshanyemaka lushi lɔsɔ, koko dimi mbohɔka paka woho wakafolaka ana w’akɛnda Bible yawɔ dia mbishola avɛsa. Dui sɔ diakamambiya efula. Lakahokamɛka ndo lakendaka tsho. Etena kakamatamɔka oma lo Mbalasa ka Diolelo, ɔnangɛso ɔmɔtshi laki l’ɛnɔnyi 80 akaye oya lalemi. Lokombo lande Jim Gardner. Nde akantshume dibuku diaki l’ɔtɛ a dui ɔnɛ La vérité qui conduit à la vie éternelle ko akamumbola ate: “Lam’alangayɛ, onde wɛ nangaka mbɔsa dibuku nɛ?” Oma laasɔ, takokana dia nde ndja Lushi la nɛi la pindju dia sho ndjotatɛ mbeka Bible.

L’otsho wa lushi la lomingu lɔsɔ laki la ekongelo ka ntshɔ l’olimu. Lakakambaka lo luudu lasakɛwɔ anto la wanyandja lo lopitadi lɔmɔtshi la prive l’osomba wa Boca Raton, la Floride. Lakakambaka oma lo eshidi 11:00 w’otsho polo eshidi 7:00 wa pindju. Lam’ele l’otsho ɔsɔ lofunge komonga, dui sɔ akankimanyiya dia mbadia dibuku Vérité. Ɔnɔmbɔdi aso akasukana la mi, akapɔtɔla dibuku diakɔ, akende lo lohoso ladiɔ ko akamimbola ɔnɛ: “Onde wɛ mɛtɛ hokoma Ɔmɛnyi wa Jehowa?” Lakawɔkɔsɔladiɔ ndo lakawotɛ nte: “Laakatadia, koko mɛnamaka dia layokoma Ɔmɛnyi wa Jehowa.” Nde akamɔ oma lalemi ndo lakamane diadia l’otsho akɔ waamɛ.

Lakatatɛ wekelo ami wa Bible wa ntondo la ɔnangɛso Gardner lo mombola ɔnɛ: “Kakɔna kayangaso mbeka?” Nde akakadimola ate: “Tayanga mbeka dibuku diakamakosha.” Lakawotɛ nte: “Lakashidiyisha diadia.” Ɔnangɛso Gardner akambutɛ la lɔsɛngɔ tshɛ ate: “Tayanga nsɛdingola tshapita ya ntondo.” Laki la diambo lo menda akambo efula wakimi koshihodia lo wadielo ami dimɛ. Nde akadia la mi avɛsa efula lo ekadimwelo kami ka Bible ka King James Version. Laasɔ mbakamayekaka awui wendana la Jehowa Nzambi ka mɛtɛ. La pindju ka lushi lɔsɔ, ɔnangɛso Gardner lakamelɛka la ngandji tshɛ ɔnɛ Jim, akeke la mi totshapita tosato ta dibuku Vérité. Lushi la nɛi tshɛ la pindju, takekaka totshapita tosato. Lakangɛnangɛnaka wekelo ɛsɔ efula. Ande diɛsɛ diaki lami dia  mbetshama oma le ɔnangɛso l’okitami ɔsɔ lakeyanaka la ɔnangɛso Charles Taze Russell lee!

L’ɔkɔngɔ wa mingu ngana, lakakome opandjudi wa lokumu l’ɔlɔlɔ. Jim akankimanyiya lo ekakatanu waki la mi mbidja ndo w’esambishelo ka lo luudu la luudu. (Ets. 20:20) Lam’ele lakasambishaka kaamɛ la Jim lakayokoma lo nanga olimu w’esambishelo. Lekɔ lo ntetemala mbɔsa olimu w’esambishelo oko diɛsɛ dioleki woke le mi. Ekɔ ɔngɛnɔngɛnɔ w’efula dia monga okambi kaamɛ la Nzambi.—1 Kɔr. 3:9.

Layanga nyɔkɔndɔlɛ dui dimɔtshi dia lo lɔsɛnɔ lami, mbuta ate ngandji kakamokaka Jehowa ntondo. (Ɛny. 2:4) Ngandji kokami Jehowa kimanyiyakami dia dimi ntondoya etena kohɔmi awui wakete lo ta ndo ekakatanu ekina efula.—Is. 65:17.

Dimi mbohɔka kɛnɛ kakete lushi lɔmɔtshi la laande lo eleko ka ntshitshi lo 1971. Ambutshi ami waki oma la mbitshanyami oma lo luudu lakamadjasɛka. Omi aki mama konangaka mbidjasɛ l’Ɔmɛnyi wa Jehowa lakande. Dimi komonga l’akuta efula l’etena kɛsɔ. Lakafutamaka l’ɔkɔngɔ wa mingu hiende lo lopitadi lakamakambaka ndo suke l’akuta tshɛ wakamakondjaka, lakasombaka paka ahɔndɔ wa ndɔta dia tombaka l’esambishelo dia mɛnamaka oko okambi wa Jehowa. Lakikɔ la yema ya dikuta yakamombe koko yakikɔ lo bankɛ ka la Michigan lɛnɛ akamole. Diakɔ diele l’edja ka nshi mɔtshi, lakahombe mbidjasɛ lo mutuka ami. Lakanyaka ndɛdu ndo lakayalɔngɔsɔlaka lo nkomba ya lo dihole diakatalamaka mituka.

Lushi lɔmɔtshi l’etena kakamadjasɛka lo mutuka ami, lakakome lo Mbalasa ka Diolelo wenya oko ehende la ntondo ka olui aso w’esambishelo nsala losanganya l’otsha lo esambishelo. Laasɔ ko dimi oma lo lopitadi lɛnɛ akamakambaka. Etena kakamadjasɛ  l’ɔkɔngɔ wa Mbalasa ka Diolelo lɛnɛ aki ndooko onto lakakoke mɛnami, lakatatɛ mbohɔ awui wakete la Vietnam, mbuta ate woho wakawatshumbaka anto ndo wakakɛlaka akila diakɔ diele, awui asɔ wakatatɛ tshindjami wɔɔngɔ efula. Lo wɔɔngɔ ami, akikɔ oko lakokaka ndo lakɛnaka woho wakamumbolaka ana w’apami onto l’onto ɔnɛ: “Onde layovɔ? Onde mɛtɛ layovɔ?” Lakeyaka dia wayovɔ, koko lakasalaka tshɛ dia mbakeketsha aha la mbatɛ kɛnɛ kele mɛtɛ. Etena kakamadjasɛ kɛsɔ, lakandama la kandji k’efula.

Etena kakamalɔmbaka, asɔyi wakakɛlɛ polo l’atama. (Osam. 56:8) Lakatatɛ kana yimba efula lo kɛnɛ kendana la elongamelo ka eolwelo. Oma laasɔ, lakeye dia: Lo tshimbo ya eolwelo, Jehowa Nzambi ayolola wanɛ tshɛ wakamɛnyi wadiakema ndo ayonya kandji kele lami ndo kele l’anto akina. Nzambi ayolola ana w’apami asɔ ndo vɔ wayonga la diaaso dia mbeka awui wa mɛtɛ wendana la nde. (Ets. 24:15) L’etena kɛsɔ, otema ami wakalole tɔɔ la ngandji ka Jehowa ndo dui sɔ diakananda asolo ami. Ɔsɔ ekɔ lushi la laande le mi. Lakasale kɛnɛ tshɛ kakamakoke nsala diaha dimi nshisha ngandji kakamokaka Jehowa ntondo djekoleko lo tena di’ehemba ndo di’ekakatanu ekina

Lo ta, anto salaka awui wa diambo efula. Ndo dimi mbakasalaka awui asɔ. Koko lakankimanyiyama lo nkana yimba l’avɛsa ahende w’oma lo Bible walekami nanga. Divɛsa dia ntondo ele Ɛnyɛlɔ 12:10, 11, diata dia Diabolo akalɛndjama aha tsho l’ɔtɛ wa losango lasambishaso koko ndo l’ɔtɛ wa dikila di’Ɔna ɔkɔkɔ. Divɛsa dia hende ele, Ngalatiya 2:20. L’ekimanyielo ka divɛsa sɔ, dimi mbeyaka dia Kristo Yeso akavu lo “dikambo diami.” L’ekimanyiyelo ka dikila diaki Yeso, Jehowa mbetawɔkami ndo dimanyiyakami pɛkato yami. Woho wakameye dui sɔ akankimanyiya dia dimi monga la nkum’otema ka pudipudi ndo akankatshutshuya dia dimi nsala kɛnɛ tshɛ kakamakoke nsala dia nkimanyiya anto akina dia vɔ mbeya akambo wa mɛtɛ wendana la Jehowa Nzambi kaso ka kɛtshi.—Hɛb. 9:14.

Etena kakawoyami washo l’ɔkɔngɔ, dimi mongaka la lowando l’efula nɛ dia Jehowa kokɛkami nshi tshɛ. Ɛnyɛlɔ, lushi lakeye Jim dia dimi lakadjasɛka lo mutuka ami, nde akapomanya la kadiyɛso kaki la luudu la woke. Dimi mbetawɔka dia Jehowa akakambe la Jim ndo la kadiyɛso ka ngandji kɛsɔ dia mbishami dihole dia dimɛna dia mbidjasɛ. Jehowa ekɔ mɛtɛ la lɔsɛngɔ. Nde kokɛka atɛmɔdi ande wele la kɔlamelo.

Lo Ngɔndɔ ka tanu 1971, lakɛnyi dia ekɔ ohomba dimi ntshɔ otsha la Michigan dia toshidiya awui amɔtshi. La ntondo ka dimi mimɔ oma lo etshumanelo ka Delray Beach la Floride, lakalodia mikanda walembetshiya Bible lo mutuka ami ko lakande lɔkɛndɔ la kilɔmɛtrɛ oko 75 otsha lo nɔrdɛ. La ntondo ka dimi mimɔ oma lo ngelo kɛmɔtshi ka Géorgie, mikanda tshɛ waki lo mutuka wakashile. L’ohetoheto tshɛ, lakasambisha lokumu l’ɔlɔlɔ la Diolelo lo ahole wotshikitanyi. Lakatemalaka lo ahole wa nkanu ndo lakatakahaka traktɛ le anto waki suke la nkomba ya lo ahole wayɔkɔkɔlaka anto alemba. Polo nshi nyɛ, dimi ndjambolaka dia mbeya kana ntɔngɔ yakonɛma shɔ yakatombe.—1 Kɔr. 3:6, 7.

Etena kakamatatɛ mbeka akambo wa mɛtɛ, dimi komonga la ɔkɔmi djekoleko etena kakamasawolaka l’ase nkumbo kami. Lam’ele ngandji kakamokaka Jehowa ntondo kakahɛtahɛtaka efula, lakawasambishaka la wolo wolo lo mbatɛ akambo hwe hwe. Dimi mbokaka John nde la Ron y’anangɛmi ngandji k’efula ndo lakawasambishaka akambo wa mɛtɛ la wolo. Lakayowalɔmbaka edimanyielo lo mbekelo ka kɔlɔ kaki la mi. Dimi tetemalaka nɔmba dia lushi lɔmɔtshi vɔ wayetawɔ akambo wa mɛtɛ. Oma ko etena kɛsɔ Jehowa akambetsha woho wa monga la ɔkɔmi ndo dimi kɛnɛmɔlaka dionga sɔ etena kasambishami ndo ketshami.—Kɔl. 4:6.

Etena kohɔmi ngandji kokami Jehowa, handohɛ anto akina wokami ngandji lo lɔsɛnɔ lami. Susan ya wadɛmi mbele onto okina lokami ngandji. Lakakombolaka ntshuka waadi lakakoke ndjokimanyiya dia dimi kotshaka ɛkɛndɛ ami wa lo nyuma. Susan ekɔ womoto lele la wolo ndo la lonyuma la dimɛna. Dimi mbohɔka kɛnɛ kakete lushi lɔmɔtshi etena kakamatshu lakawɔ lam’akatembɔnaka. Susan akadjasɛ mbɛlɛnganɛ la veranda ya luudu l’ambutshi ande la Cranston la Rhode Island. Nde akadiaka Tshoto y’Etangelo ele la Bible. Kɛnɛ kakamambiya ele nde akadiaka sawo diaki komonga dia wekelo ndo nde akatadiaka ndo avɛsa lo Bible. Lakate nte ‘kadiyɛso kɛnɛ ekɔ la lonyuma la dimɛna.’ Takatshukana lo Ngɔndɔ ka dikumi l’ahende 1971 ndo lekɔ la ɔngɛnɔngɛnɔ w’efula nɛ dia nshi tshɛ, nde ekɔ suke la mi ndo ekɔ lo sukɛmi. Kɛnɛ kaleka ngɛnyangɛnyami ele, kaanga mbambokande ngandji, nde ndekaka mboka Jehowa ngandji.

Dimi la Susan takatshɔkwama lo woho wakatote ana ahende, Jesse la Paul. Etena kakawayolaka, Jehowa aki kaamɛ la wɔ. (1 Sam. 3:19) Lam’ele vɔ wakalange akambo wa mɛtɛ, vɔ wakatɔngɛnyangɛnya dimi la Susan. Vɔ wekɔ lo ntetemala kambɛ Jehowa nɛ dia vɔ mbohɔka ngandji kakawawokaka ntondo. Vɔ akɔ ahende wambolekanya ɛnɔnyi 20 wakambɛwɔ Jehowa onto l’onto. Ndo nto, lekɔ l’ɔngɛnɔngɛnɔ w’efula nɛ dia dimi  mbɔsaka Stephanie nde la Racquel wadi w’anami oko anami wa wamato wa loota. Anami akɔ ahende wakatshuke wamato wele la lonyuma la dimɛna ndo woka Jehowa Nzambi ngandji l’etema awɔ ndo la alemba awɔ tshɛ.—Ɛf. 6:6.

L’ɔkɔngɔ wa batisimu kami, lakakambe ɛnɔnyi 16 la Rhode Island lɛnɛ akamatonga l’angɛnyi w’eshika. Lekɔ l’akambo efula wa diambo wohɔmi wendana la dikumanyi diakakambe kaamɛ lami. Laadiko dia laasɔ, lekɔ la lowando l’efula le emendji w’etshimbedi wanɛ waki la shɛngiya ya dimɛna le mi. Ekɔ mɛtɛ tshondo ya diɛsɛ dia nkamba kaamɛ la apami wakalame ngandji kakawokaka Jehowa ntondo. Lo 1987, takonɔ otsha lo Caroline du Nord dia tokamba lɛnɛ aki ohomba efula ndo lɛsɔ takatongaka nto l’angɛnyi w’eshika. *

Lo Ngɔndɔ k’enanɛi, 2002, dimi la Susan taketawɔ leeta dia tonga ase nkumbo ka Bɛtɛlɛ la Patterson, l’États-Unis. Lakakambaka lo departɛma diendana l’olimu w’esambishelo ndo Susan akakambaka lɛnɛ asolawɔ ahɔndɔ. Nde akangɛnangɛnaka nkamba lɛkɔ efula. Lo Ngɔndɔ k’enanɛi 2005, wakambisha diɛsɛ dia nkamba oko ose Olui-walɔmbɔla. Dimi ndjakitshakitshaka kaanga mbemi la diɛsɛ sɔ. Wadɛmi la ngandji akayakiyanya efula lo kɛnɛ kendana la ɔkɛndɛ ɔsɔ, olimu wele la wɔ mbidja ndo nkɛndɔ yakatahombe ntatɛ munda. Susan hekɛ weteto wa lo ndɛkɛ koko tekɔ lo munda nkɛndɔ efula ya lo ndɛkɛ. Susan mbutaka di’awui w’ekeketshelo watondokaka oma le waadi w’ase Olui-walɔmbɔla akina mbokimanyiyaka dia nde ndjashikikɛ dia sukɛmi lo yoho y’efula. Kɛsɔ mɛtɛ mbokondosalaka ndo dimi mbolangaka lo dui sɔ.

Lo biro ami lekɔ la foto yambohola awui efula. Yɔ mboholakami awui efula wa lo lɔsɛnɔ lami. Lakakondja ɛtshɔkɔ efula lo nsala kɛnɛ tshɛ kakamakoke nsala dia mbohɔ ngandji kakamokaka Jehowa ntondo.