Aya ɛnɔnyi efula wele ekanda aso wakalembetshiyaka ɔnɛ Ngɔngɔ ka la Mangɔngɔ ekɔ lokombo lakawasha Satana Diabolo l’ɔkɔngɔ wa nde mbitshanyema oma l’olongo. Olembetshiyelo ɔsɔ wakashama ngasɔ nɛ dia dibuku dia Ɛnyɛlɔ mɛnyaka dia Satana Diabolo mbele ɔnɔmbɔdi wa ɔlɔshamelo walɔshama ekambi waki Nzambi wa l’andja w’otondo. (Ɛny. 12:1-17) Akafɔnyamaka diele oko Ngɔngɔ ekɔ lokombo lokina la prɔfɛsiya laki Satana.

Koko ambola efula wambonyiyama l’ɔtɛ wa olembetshiyelo ɔsɔ. Lande na? Tɔsɛdingole dui nɛ: Lo ntɛkɛta dia etena kayɔlɛndjama Ngɔngɔ, Jehowa akate lo kɛnɛ kendana la Ngɔngɔ kakɔ ɔnɛ: “Dimi layunyukimo le wehu tshe wa fudu yatuhatulaka, ndu le nyama ya l’ukunda dia nyu ndjala mbu yawo ya nde.” (Ezek. 39:4) Oma laasɔ, Jehowa akakotsha ɔnɛ: “Dimi layusha Ngongo dihuli di’ekhundelu lu Isariyele, . . . Leko kayuwukhunde Ngongo la ului andi tshe w’antu.” (Ezek. 39:11) Ko ngande wakoka etongami ka lo nyuma ndɛma oma le “fudu yatuhatulaka, ndu le nyama ya l’ukunda”? Ngande wakokawɔ mbisha Satana “dihuli di’ekhundelu” lanɛ la nkɛtɛ? Bible mɛnyɛka hwe dia Satana ayodjama lo difuku diaha l’ekomelo l’edja k’ɛnɔnyi 1000, koko hawotowɔlɛ kana mbokundɛ.—Ɛny. 20:1, 2.

Sho mbeyaka dia l’ekomelo k’ɛnɔnyi 1000, Satana ayotondjama oma lo difuku diaha l’ekomelo ndo “nde ayotomba dia ndjonganyiya wedja lo atshuku akɔ anɛi wa nkɛtɛ, Ngɔngɔ la Mangɔngɔ, dia mbatshumanya dikambo dia ta.” (Ɛny. 20:8) Ko ngande wakoka Satana minganyiya Ngɔngɔ naka ndamɛ mbele Ngɔngɔ? Ɔnkɔnɛ, Satana bu “Ngɔngɔ” katɛkɛtama lo prɔfɛsiya ka Ɛzɛkiyɛlɛ ndo lo dibuku dia Ɛnyɛlɔ.

Ko akɔna ele Ngɔngɔ ka la Mangɔngɔ? Dia sho nkadimola lo dimbola sɔ, sho pombaka nsala ntondo eyangelo lo Afundelo dia mbeya akɔna alɔsha ekambi waki Nzambi. Bible hatɛkɛta tsho dia ɔlɔshamelo w’oma le ‘Ngɔngɔ ka la Mangɔngɔ’ koko tɔ tɛkɛtaka ndo dia ɔlɔshamelo w’oma le “khum’ekanga ka la ngel’a kushi” ndo w’oma le “khumi ya dikanga ya la kete.” (Ezek. 38:2, 10-13; Dan. 11:40, 44, 45; Ɛny. 17:14; 19:19) Onde dui sɔ mɛnyaka dia ekɔ weho wa ɛlɔshamelo wotshikitanyi? Ondo aha ngasɔ. Aha la taamu, lanɛ Bible kekɔ lo ntɛkɛta dia ɔlɔshamelo akɔ waamɛ lo nkamba la nkombo y’otshikitanyi. Ko lande na kakokaso  mbuta ngasɔ? Nɛ dia Afundelo totɛka dia wedja tshɛ wa la nkɛtɛ wayotambɛ lo ɔlɔshɛlɔ w’ekomelo ndo dui sɔ diayokonya lo ta di’Aramangɛdɔna.—Ɛny. 16:14, 16.

Etena kasɛdingolaso Afundelo asɔ tshɛ watɛkɛta dia woho wayɔlɔshama ekambi waki Nzambi lo ɔlɔshamelo w’ekomelo, mɛnamaka dia aha Satana mbelamɛ ɔnɛ Ngɔngɔ ka la Mangɔngɔ koko ekɔ osanga wa wedja. Onde osanga wa wedja ɔsɔ wayɔlɔmbɔma oma le “khum’ekanga ka la ngel’a kushi” ka lo yoho ya didjidji? Hatokoke mbuta dui sɔ l’eshikikelo. Koko kɛsɔ mbɔtɔnɛka la kɛnɛ kakate Jehowa lo dikambo dia Ngɔngɔ ɔnɛ: “Nyu la wedja efula nyayutumba uma lu dihuli dianyu dia la kuma ka leke la ngel’a kushi, tshe wayahemi lu falasa, ului a wuki w’antu, limba la wuki l’alimbi.”—Ezek. 38:6, 15.

Woho akɔ waamɛ mbele, ɔprɔfɛta Danyɛlɛ lakasɛnɛ lo nshi ya Ezekiyele akate lo dikambo dia nkum’ekanga ka lo nɔrdɛ ɔnɛ: “Kumu y’uma l’ehutwelu la y’uma la ngel’a kushi yayuwâta asulu. Ndi ayutsho la kele ka wulu dia ntulanya la ntushila antu efula ushiki. Ndi ayuhika mvudu y’apema ya diulelu diandi l’asa ashi a waki la ukungu wa lutumbu w’ekila. L’okongo diku, ekumelu kandi ayenama; nduku layûkimanyia.” (Dan. 11:44, 45) Dui sɔ mbɔtɔnɛka la kɛnɛ kata dibuku dia Ezekiyele lo dikambo dia kɛnɛ kayosala Ngɔngɔ.—Ezek. 38:8-12, 16.

Dui diakɔna diayosalema oma laasɔ diendana la ɔlɔshamelo w’ekomelo ɔsɔ? Danyɛlɛ totɛka ɔnɛ: ‘L’etena kɛsɔ Mikayɛlɛ [Yeso Kristo] ayonɛ [lo Aramangɛdɔna,] owandji wa woke lakemala [ntatɛ lo 1914] lo wahɔ wa wodja ayɛ. Paa kayoyala lo etena kakɔ [mfɔnu ka woke] woho wahatayalaka lo wodja edja ndo etena kakɔ. Kele l’etena kɛsɔ ase wodja ayɛ tshɛ wofundami nkombo lo dibuku wayoshimbamɛ.’ (Dan. 12:1) Dui sɔ diayosala Yeso ɔnɛ lele onyimpala waki Nzambi kɔndwama nto lo Ɛnyɛlɔ 19:11-21.

Ko akɔna ele “Ngɔngɔ la Mangɔngɔ” kɔtɛkɛtami lo Ɛnyɛlɔ 20:8? Lo ohemba w’ekomelo wa lo ekomelo k’ɛnɔnyi 1000, wanɛ wayɔtɔmbɔkwɛ Jehowa wayonga la lɔkɛwɔ l’andjakanyi l’ɛnyɛlɔ ka ‘Ngɔngɔ ka la Mangɔngɔ,’ mbuta ate wanɛ wayɔlɔsha ekambi waki Nzambi lo etenyi k’ekomelo ka mfɔnu ka woke. Elui akɔ ehende tshɛ wayodiakema lo pondjo. (Ɛny. 19:20, 21; 20:9) Diakɔ diele l’ekomelo k’ɛnɔnyi kinunu, anto asɔ tshɛ kokaka mbelamɛ ɔnɛ “Ngɔngɔ la Mangɔngɔ.”

Oko weso ambeki w’eshika w’Ɔtɛkɛta waki Nzambi, tekɔ lo kongɛ l’asolo walomɔlomɔ dia mɛna ɔnɛ layanga mɛmba ɔkɛndɛ wa “khum’ekanga ka la ngel’a kushi.” Koko oyadi onto akɔna tshɛ layɔlɔmbɔla osanga wa wedja, tekɔ la eshikikelo di’awui ahende anɛ wayosalema: 1) Ngɔngɔ ka la Mangɔngɔ l’alembe ande wayɔlɔshama ndo wayolanyema ndo 2) Nkumekanga kaso Yeso Kristo Ɔnɛ lolɛ, ayoshimbɛ ekambi waki Nzambi ndo ayowalɔmbɔla otsha l’andja w’oyoyo lɛnɛ ayonga wɔladi ndo ekokelo ka mɛtɛ.—Ɛny. 7:14-17.