1. a) Lande na kele ɔnɛ ekɔ etena k’ohomba efula dia sho ndɔ la Satana? b) Lande na keyaso dia sho koka mbidja otshumba lo ta dialɔso la Satana?

SATANA ekɔ lo ndɔsha atshikadi w’akitami ndo “ɛkɔkɔ ekina.” (Jni. 10:16) Oyango waki Diabolo ele wa ndɛ ekambi waki Jehowa efula nɛ dia etena kambootshikalɛ kaya mondo. (Adia Ɛnyɛlɔ 12:9, 12.) Onde sho koka mbidja otshumba lo ta dialɔso la Satana? Eelo. Bible mbutaka ɔnɛ: “Nyɔlɔshane la Diabolo, ko nde ayonyolawɔ.”—Jak. 4:7.

2, 3. a) Lande na kele kanyi y’ɔnɛ Satana bu ekɔ l’atei wa toho takamba la nde dia nkotsha eyango ande? b) Ngande weyaso dia Satana ekɔ onto la mɛtɛ mɛtɛ?

² Anto efula mbetawɔka kanyi y’ɔnɛ Satana bu. Le wɔ Satana la ɛdiɛngɛ wekɔ anto wa lɔfɔnya wa lo abuku, lo filmɛ yotsha anto wɔma ndo lo tovidɛo. Anto asɔ mbutaka dia ndooko onto a nombe lakoka mbetawɔ dia nyuma ya kɔlɔ yekɔ. Ko onde wɛ fɔnyaka dia Satana koka monga la lonyangu lo mbeya dia nde la ɛdiɛngɛ ande bu l’andja ɔnɛ? Ondo bu. Wanɛ wahetawɔ dia Satana ekɔ mbetɛmaka totshungu oma le nde. (2 Kɔr. 4:4) Kanyi y’ɔnɛ nyuma ya kɔlɔ bu ekɔ yoho mɔtshi l’atei wa toho takamba la Satana dia minganyiya anto.

³ Oko weso ekambi waki Jehowa, sho bu l’atei w’anto wanganyiyama. Sho mbeyaka dia Diabolo ekɔ onto la mɛtɛ mɛtɛ nɛ dia  nde mbakatɛkɛta la Eva lo tshimbo y’oloyi. (Etat. 3:1-5) Satana akɔnyɔla Jehowa lo dikambo dia Jɔbɔ. (Jobo 1:9-12) Satana akahembe Yeso. (Mat. 4:1-10) L’ɔkɔngɔ wa Diolelo diaki Nzambi mbotɔ lo 1914, Satana mbakatatɛ ‘ndɔsha’ atshikadi w’akitami. (Ɛny. 12:17) Ta sɔ diekɔ lo tatetemala nɛ dia Satana ekɔ lo nyanga dia mfukutanya mbetawɔ k’atshikadi wa l’atei w’akitami 144 000 ndo ɛkɔkɔ ekina. Dia sho mbidja otshumba lo ta sɔ, sho pombaka ndɔshana la Satana ndo ntshikala nge lo mbetawɔ kaso. Lo sawo nɛ, tayanga nsɛdingola awui asato wakoka tokimanyiya dia nsala dui sɔ.

4. Kakɔna kɛnya dia Satana ekɔ la ofunu?

⁴ Satana ekɔ onto l’anyanya laha bu la ndjakitshakitsha. Ofunu ndo lotamanya mbakatshutshuya etongami ka lo nyuma kɛsɔ dia mbidja lowandji laki Jehowa taamu ndo ndjaetɛ ndaamɛ oko jambizambi. Diakɔ diele, yoho mɔtshi yakokaso ndɔshana la Satana ele, mbewɔ monga la ofunu ndo nsala dia monga la okitshakitsha. (Adia 1 Petero 5:5.) Ko ofunu kɛdikɛdi na? Onde mbala tshɛ mbonga ofunu kɔlɔ?

5, 6. a) Onde mbala tshɛ mbatongaka ofunu kɔlɔ? Lembetshiya. b) Woho akɔna w’ofunu wele kɔlɔ, ndo naa bɛnyɛlɔ dia l’Afundelo diɛnya dui sɔ?

⁵ Diksiɔnɛrɛ dimɔtshi mbutaka dia onto lele la ofunu “ndjaɔsaka la nɛmɔ ndo la wotsho w’efula” ndo ɔnɛ ofunu “ekɔ woho ɔmɔtshi wayaɔsa onto l’ɔtɛ wele nde, ewotɔ kana angɛnyi ande wakasale dui dimɔtshi dia dimɛna kana wekɔ la ɛngɔ kɛmɔtshi ka dimɛna.” Teye dia bu kɔlɔ nsala dui sɔ. Ɔpɔstɔlɔ Pɔɔlɔ akafundɛ ase Tɛsalɔnika ate: “Diakɔ diafunaso dikambo dianyu lo tshumanelo diaki Nzambi l’ɔtɛ wa ekikelo kanyu ndo mbetawɔ kele la nyu lo woho wadiɛnɛnyu la ɛhɛnyɔhɛnyɔ ndo la asui.” (2 Tɛs. 1:4) Ɔnkɔnɛ, ndjaoka dimɛna l’ɔtɛ w’olimu wakamba anto akina kana ndjafuna shoamɛ koka monga dui dia dimɛna. Hatohombe monga la sɔnyi l’ɔtɛ wa nkumbo kaso, dioho diaso kana dihole diakatole.—Ets. 21:39.

⁶ Lo wedi okina, ekɔ woho ɔmɔtshi w’ofunu wakoka nanya diɔtɔnganelo diasaso la Jehowa. Yoho y’ofunu shɔ koka tokonya dia sho momala ndo ntona dako lo dihole dia dietawɔ l’okitshakitsha tshɛ. (Osam. 141:5) Onto lele la yoho y’ofunu ya ngasɔ “ndjaakanaka lo yoho yambotamba elelo” kana “ndjaɔsaka dia nde ndeka anto akina.” Jehowa petshaka ofunu wɔsɔhanyemi la otako. (Ezek. 33:28; Am. 6:8) Satana mongaka l’ɔngɛnɔngɛnɔ etena kayafuna anto l’otako tshɛ nɛ dia nde la wɔ ekɔ l’otako. Satana akafune efula lo dikambo dia Nimɛrɔdɛ, Farawɔ ndo Abisalɔma nɛ dia anto asɔ tshɛ wakayafune lo yoho ya kɔlɔ. (Etat. 10:8, 9; Etum. 5:1, 2; 2 Sam. 15:4-6) Ofunu waki la shɛngiya lo woho wakasale Kɛna kɔlɔ. Nde akalongola dako oma le Nzambi, koko l’ɔtɛ w’otako ande nde akatone engwelo. L’otako tshɛ, nde akɔnyɔla ɔhɛmwɛlɔ w’oma le Jehowa ndo dui sɔ diakokonya esadi eto lo mpokoso.—Etat. 4:6-8.

7, 8. a) Mfuna lokoho la demba kɛdikɛdi na, ndo lande na kele ɔsɔ koka monga yoho y’ofunu ya kɔlɔ? b) Lembetshiya woho wakoka ofunu mfukutanya wɔladi wa lo etshumanelo.

⁷ Ɛlɔ kɛnɛ, anto ndjafunaka lo toho efula ta kɔlɔ. Mbala efula, ofunu fɔnaka la tshelo ya mbuta dia lokoho lɔmɔtshi la demba ndeka lokina. Diksiɔnɛrɛ dimɔtshi mbutaka ɔnɛ mfuna lokoho la demba kɛdikɛdi “mpetsha anto wele la nkoho kina y’alemba ndo mbaakanɛ kɔlɔ.” Ndo diɔ mbutaka nto ɔnɛ “ɔsɔ ekɔ tshelo yetawoya anto wele la nkoho y’alemba yotshikitanyi ɔnɛ vɔ wekɔ la waonga ndo akoka wotshikitanyi ndo ɔnɛ nkoho y’alemba mɔtshi ndeka kina.” Ofunu wa lokoho la demba konyaka lo ewanu, ata ndo kaanga l’odiakanelo.

⁸ Awui asɔ hawohombe tanema lo etshumanelo k’Akristo. Naka ofunu nkonya ambetawudi lo ewanu kete dui sɔ koka mbela  mindjo yaha pe. Kɛsɔ mbakakomɛ Akristo wa lo ntambe ka ntondo ndo Jakɔba akawafundɛ lo mbaoka dimbola di’ohomba efula diata ɔnɛ: “Oma lende aya ewanu la ata l’atei anyu?” (Jak. 4:1) Naka sho mombanɛka tokumbɛkumbɛ ndo mbɔsaka dia sho ndeka anto akina, kete dui sɔ koka monga la shɛngiya l’ɛtɛkɛta ndo l’etsha aso ndo dui sɔ diayoshaka anto akina paa wonya tshɛ. (Tuk. 12:18) Mbokɛmaka dia, ofunu koka mfukutanya wɔladi wa l’etshumanelo.

9. Ngande watokimanyiya Bible dia sho ndɔshana la tshelo ya funaka lokoho laso la demba ndo weho ekina tshɛ w’ofunu wa kɔlɔ? (Enda osato wele lo mbɔtwɛlɔ.)

⁹ Naka tekɔ la mbekelo ka fɔnyaka dia sho ndeka anto akina, kete sho pombaka mbohɔ dia ‘onto tshɛ lele la otako, ekɔ wɔnɔnyi le Jehowa.’ (Tuk. 16:5) Ekɔ ohomba sho nsɛdingola nto woho wɔsaso anto wele la lokoho lokina la demba, woye oma lo wedja ekina ndo wele la mbekelo yotshikitanyi la yaso. Naka sho mongaka la mbekelo ka funaka lokoho laso la demba kana wodja aso, kete tekɔ lo mbohɛ dia ‘oma le onto ɔtɔi mbakatonge Nzambi anto wa lo wedja tshɛ.’ (Ets. 17:26) Diakɔ diataso ɔnɛ, tekɔ paka la lokoho ɔtɔi la demba nɛ dia anto tshɛ ndja oma le tshɛso ɔtɔi, mbuta ate Adama. Ɔnkɔnɛ, ayonga dui di’enginya dia mbuta ɔnɛ nkoho mɔtshi y’alemba ndeka nkina. Ekanelo ka ngasɔ kotshaka oyango waki Satana wa mfukutanya ngandji ndo kaamɛ kele lam’asa Akristo. (Jni. 13:35) Dia sho ndɔshana la Satana ndo mbodja otshumba, sho pombaka nshika ntanga la ntondo ka woho tshɛ w’ofunu wele kɔlɔ.—Tuk. 16:18.

10, 11. a) Lande na kele onto koka ndjonga la ngandji k’andja ɔnɛ? b) Lande na ondo kakayonga Dɛmasɛ la ngandji k’andja ɔnɛ?

¹⁰ Satana mbele “owandji w’andja ɔnɛ” ndo vɔ wekɔ lo nɔmbwama oma le nde. (Jni. 12:31; 1 Jni. 5:19) Diakɔ diele, awui efula weta lo andja ɔnɛ hawɔtɔnɛ la kɛnɛ kata Bible. Koko aha awui tshɛ weta l’andja ɔnɛ mbele kɔlɔ. Koko sho pombaka nongamɛ dia lo tshimbo y’andja ande, Satana ayokamba la nsaki yaso dia tokonya lo nsala pɛkato, nanga andja ɔnɛ ndo minya yimba lo woho wa ntɛmɔlaso Jehowa.—Adia 1 Joani 2:15, 16.

¹¹ Ngandji k’andja ɔnɛ kakonge la shɛngiya le Akristo amɔtshi wa lo ntambe ka ntondo. Ɛnyɛlɔ, Pɔɔlɔ akafunde ate: “Dɛmasɛ akandawɔ dikambo nde akalange andja ɔnɛ.” (2 Tim. 4:10) Bible hatotɛ shika shɛngiya y’andja ɔnɛ yakakonya Dɛmasɛ dia ndawɔ Pɔɔlɔ. Mbeyaka monga ko Dɛmasɛ akatatɛ monga la ngandji k’efula ka mbo ya l’emunyi ndeka oweso w’akambo wa lo nyuma. Ko naka ngasɔ mbakidiɔ kete Dɛmasɛ akashisha waɛsɛ wa weke wa lo nyuma. Lande na? Onde mɛtɛ andja ɔnɛ wotokoka mbisha Dɛmasɛ diangɔ efula ko ndeka ɛtshɔkɔ wotowosha Jehowa oko wakinde otshindedi wa Pɔɔlɔ?—Tuk. 10:22.

12. Lo toho takɔna takokaso ndjondama lo “lokeso lele la ɔngɔnyi”?

¹² Dui dia woho ɔsɔ koka tokomɛ. Oko weso Akristo, sho kombolaka nkotsha ehomba aso wa lo demba ndo w’ase nkumbo kaso ndo dui sɔ bu kɔlɔ. (1 Tim. 5:8) Etena kendaso dihole dia dimɛna diakandasha Adama la Eva, dui sɔ toshikikɛka dia Jehowa nangaka dia sho monga la lɔsɛnɔ la dimɛna. (Etat. 2:9) Koko, Satana koka nkamba la nsaki yaso lo tshimbo ya “lokeso lele la ɔngɔnyi.” (Mat. 13:22) Anto efula fɔnyaka dia falanga koka mbakimanyiya dia vɔ monga la ɔngɛnɔngɛnɔ kana ɔnɛ diangɔ dia l’emunyi kimanyiyaka dia ntondoya lo lɔsɛnɔ. Onto lafɔnya ngasɔ ekɔ lo ndjakesa ndo dui sɔ koka tokonya lo nshisha ɛngɔ kele laso koleki nɛmɔ, mbuta ate lɔngɛnyi  lasaso la Jehowa. Yeso akahɛmɔla ambeki ande ɔnɛ: “Ndooko onto lakoka kambɛ ewandji ehende olimu, nɛ dia nde ayohetsha ɔmɔtshi ko ayolanga okina, kana nde ayɛkama ɔmɔtshi ko ayɛkɔ okina. Nyu hanyokoke kambɛ Nzambi la falanga olimu oko ɛhɔmbɔ.” (Mat. 6:24) Naka sho kambɛ ɛngɔnyi olimu, kete tayotshika kambɛ Jehowa ndo kɛsɔ mbakombola Satana dia sho nsala. Ɔnkɔnɛ, tatetawɔke pondjo dia falanga kana diangɔ diakoka sombama la falanga mfukutanya lɔngɛnyi lasaso la Jehowa. Dia sho ndɔshana la Satana, ekɔ ohomba sho monga la wɛdimo lo kɛnɛ kendana la diangɔ dia l’emunyi.—Adia 1 Timɔte 6:6-10.

13. Kanyi yakɔna ya kɔlɔ yele l’anto wa l’andja ɔnɛ lo kɛnɛ kendana la diwala ndo la kɔlamelo ya lo diwala?

¹³ Djonga kina yakamba la Satana ekɔ awui wa mindo wa dieyanelo. Ɛlɔ kɛnɛ, anto mbɔsaka diwala ndo kɔlamelo ya lo diwala oko dui diamboleka wolo ndo diambeta loowe. Ɛnyɛlɔ, womoto ɔmɔtshi laki opomi wa mishiki wa lokumu akate ate: “Ekɔ dui dia wolo ntshikala paka l’olonganyi ɔtɔi oyadi le pami kana le womoto. Halafɔnya dia ekɔ onto ɔmɔtshi lele la kɔlamelo kana lakoka ntshikala la kɔlamelo otsha le olonganyi ande.” Ɔkɛnyi okina wa pami akate ate: “Halafɔnya dia ekɔ onto ɔmɔtshi lakoka tshukana dia mbetsha lɔsɛnɔ lande l’otondo kaamɛ la olonganyi ande.” Satana ngɛnangɛnaka etena katshutshuyande anto dia vɔ mɔnyɔla woshasha w’oma le Nzambi wa diwala. Diabolo hangɛnangɛna etena k’ɔsa anto diwala la nɛmɔ kana etena kalombadiɔ. Ɔnkɔnɛ, dia sho ndɔshana la Satana ndo mbodja otshumba, ekɔ ohomba sho nɛmiya yɛdikɔ yaki Nzambi yendana la diwala.

14, 15. Ngande wakokaso nshika ntanga la ntondo k’awui wa mindo wa dieyanelo?

¹⁴ Oyadi tambotshukana kana teke onyemba, sho pombaka nshika ntanga la ntondo k’awui wa mindo wa dieyanelo. Ko onde ɔsɔ ekɔ yana ya dikambo? Ndooko. Ɛnyɛlɔ, naka wɛ ekɔ ɔlɔngɔlɔngɔ kete wɛ mbeyaka mboka woho wayɔsɛmaka asekayɛ wa la kalasa lo kɛnɛ kendana la dieyanelo kana otomanelo w’esato wɛnyawɔ anto etakataka lo telefɔnɛ. Tshelo shɔ mbɔsamaka l’ahole amɔtshi oko onto l’ɛnya ana w’akɛnda esato wɛnyawɔ anto etakataka. Bible mbutaka ɔnɛ: “Onto lasala monanyi ekɔ lo salɛ demba diande kɔlɔ.” (1 Kɔr. 6:18) Hemɔ yasambemɛ oma lo dieyanelo mbelaka asui ndo nyɔi. Efula ka esekaseka wahatatshukama wele wakashisha dimuma diawɔ nyangaka efula l’ɔtɛ wa kɛnɛ kakawasale. Etombelo wonga l’awui wa mindo wa dieyanelo ntshikitana etale la kɛnɛ katama lo tita nsango nɛ dia awui asɔ koka ndjotokonya lo mfɔnya ɔnɛ ndooko etombelo wa kɔlɔ wakokaso nkondja lo nsekola ɛlɛmbɛ waki Nzambi. Ekanelo ka yimba ka ngasɔ konyaka anto dia mindama lo “nkudu ka lokeso kele la pɛkato.”—Hɛb. 3:13.

¹⁵ Akokayɛ nsala naka wɛ ekɔ lo pembama dia ndjasha lo awui wa mindo wa dieyanelo? Ekɔ ohomba mbeya wɛɔdu ayɛ. (Rɔmɔ 7:22, 23) Lɔmba Nzambi dia nde kokimanyiya. (Flpɛ. 4:6, 7, 13) Ewɔka akambo wakoka ndjokokonya lo awui wa mindo wa dieyanelo. (Tuk. 22:3) Naka nsaki ya kɔlɔ yambokoyɛ, nyayɔ aha la ntshimbatshimba.—Etat. 39:12.

16. Kakɔna kakasale Yeso la ntondo k’ehemba w’oma le Satana, ndo wetshelo akɔna wakokaso nkondja oma lo ɛnyɛlɔ kɛsɔ?

¹⁶ Yeso akatotshikɛ ɛnyɛlɔ ka dimɛna ka nshika ntanga la ntondo k’ehemba. Nde kokesama lo alaka wakawosha Satana ndo nde kɔmbɔsa etena ka nsɛdingola etombelo w’ɛlɔlɔ ndo wa kɔlɔ wakahombe monga la dui sɔ. Koko mbala kakɔ ɔtɔi nde akookadimola ɔnɛ: “Akafundama ate.” (Adia Mateo 4:4-10.) Yeso akeyaka Ɔtɛkɛta waki Nzambi  ndo dui sɔ mbakookimanyiya dia mbɔsa yɛdikɔ aha la ntshimbatshimba ndo nshila avɛsa etena kakandahembama. Dia sho ndɔshana la Satana ndo mbodja otshumba, hatohombe mbetawɔ shoamɛ pembama dia nsala awui wa mindo wa dieyanelo.—1 Kɔr. 6:9, 10.

17, 18. a) Naa tolonga tokina taki Satana, ndo lande na kele dui sɔ hatambiya? b) Kakɔna kayanga komɛ Satana ndo lande na kele dui sɔ tokimanyiyaka dia mbikikɛ?

¹⁷ Aha ofunu, nsaki ka lomombo la l’emunyi ndo awui wa mindo wa dieyanelo ato mbele tolonga takamba la Satana. Nde ekɔ la tolonga tokina efula. Ɛnyɛlɔ, Akristo amɔtshi pomanaka la ɔlɔshamelo w’oma le ase nkumbo, lɔsɔkɔ l’oma le angɛnyi wa la kalasa kana oshimbelo w’olimu aso w’esambishelo oma le lɛɛta. Sho hatokashimɔ awui asɔ nɛ dia Yeso akewola ambeki ande ɔnɛ: “Anto tshɛ wayonyohetsha l’ɔtɛ wa lokombo lami, koko ɔnɛ layokikɛ polo l’ekomelo mbayoshimbamɛ.”—Mat. 10:22.

¹⁸ Ngande wakokaso ndɔshana la Satana ndo mbɔlɛndja? Yeso akatɛ ambeki ande ate: “Oma lo ekikelo kanyu mbayonyoshimbɛ nsɛnɔ yanyu.” (Luka 21:19) Ndooko ɛngɔ kakoka ana w’anto nsala kakoka tosalɛ kɔlɔ lo pondjo. Ndo ndooko onto lakoka ndanya lɔngɛnyi lasaso la Nzambi onyake paka sho mbetawe dia dui sɔ salema. (Rɔmɔ 8:38, 39) Nyɔi ka ekambi waki Jehowa hɛnya dia Satana ambodja otshumba nɛ dia Jehowa ayowaolola. (Jni. 5:28, 29) Eyango waki Satana hawotokotshama. L’ɔkɔngɔ wa olanyelo w’anto wa l’andja ɔnɛ wahoke Nzambi wɔma, Satana ayodjama lo lokanu l’edja k’ɛnɔnyi 1000. (Ɛny. 20:1-3) L’ekomelo k’Ɛlɔmbwɛlɔ kaki Yeso k’ɛnɔnyi kinunu, Satana “ayotshungɔma oma lo lokanu” lo tshanda mɔtshi dia nde minganyiya anto wa kokele lo ohemba w’ekomelo. Oma laasɔ, Diabolo ayolanyema lo pondjo. (Ɛny. 20:7-10) Satana ekɔ la wɔma nɛ dia nde ayanga nanyema koko sho hatoke wɔma. Ɔnkɔnɛ, nyɛsɔ tɔlɔshanake la Satana ndo totshikalake nge lo mbetawɔ nɛ dia sho koka mbodja otshumba.