1. Dikoka diakɔna diakoka tokimanyiya dia mbokoya waonga waki Nzambi?

JEHOWA akatosha dikoka dia ndjadja lo dihole di’anto akina. Lo wedi ɔmɔtshi, sho koka monga la kanyi ya dui dimɔtshi diele tatahomanaka la diɔ. (Adia Ɛfɛsɔ 5:1, 2.) Ngande wakokaso nkamba la woshasha wakatosha Nzambi ɔsɔ la lomba tshɛ? Ahombaso nsala diaha dikoka sɔ ndjotosalɛ kɔlɔ?

2. Lande na kataso dia Jehowa mɛnaka asui aso?

² Aha la taamu, sho ngɛnangɛnaka nɛ dia Nzambi akalake Akristo w’akitami lɔsɛnɔ lahavu l’olongo ndo lɔsɛnɔ la pondjo lanɛ la nkɛtɛ le “ɛkɔkɔ ekina” waki Yeso wele la kɔlamelo. (Jni. 10:16; 17:3; 1 Kɔr. 15:53) Koko wanɛ wayotɔsɛna lɔsɛnɔ lahavu l’olongo ndo wanɛ wayɔsɛna lɔsɛnɔ la pondjo la nkɛtɛ, hawotodiɛnɛ l’asui wadiɛnɛso la wɔ ɛlɔ kɛnɛ. Jehowa ekɔ lo mɛna ekakatanu wahomana la so oko wakandɛnaka woho wakadiɛnɛka ase Isariyɛlɛ etena kakiwɔ lo lɔhɔmbɔ l’Edjibito. Diakɔ diele, “l’atei asui awo tshe, ndi akasuwi kame la wo.” (Is. 63:9) Ɛnɔnyi nkama oma laasɔ, ase Juda wakandama la wɔma l’ɔtɛ wakaalɔshaka atunyi awɔ diaha vɔ nyomohika tɛmpɛlɔ, koko Nzambi akawatɛ ate: ‘Ɔnɛ  lanyonanda ekɔ lo munanda ɔna sso diami.’ (Zek. 2:8) L’ɛnyɛlɔ k’ombutshi wa womoto wele la kɛtshi k’efula otsha le ɔnande, Jehowa salaka akambo la ngandji lo wahɔ w’ekambi ande. (Is. 49:15) Lo wedi ɔmɔtshi, Jehowa ndjadjaka lo dihole di’anto akina ndo nde akatosha dikoka sɔ.—Osam. 103:13, 14.

3. Kakɔna kɛnya dia Yeso aki la kɛtshi?

³ Yeso akokaka kandji kaki l’anto akina kaanga lo akambo wakinde kopomana la wɔ. Ɛnyɛlɔ, anto k’anto wakokaka ewandji w’ɛtɛmwɛlɔ wɔma nɛ dia vɔ wakaakesaka ndo wakawaɛnyaka paa la dɛmbɛlɛmbɛ di’oma le ana w’anto. (Mat. 23:4; Makɔ 7:1-5; Jni. 7:13) Yeso komboka wɔma kana kesama, koko nde akakoke nshihodia awui wele nde atahomanaka la wɔ. Diakɔ diele, “lam’akandɛnyi elui w’anto, nde akawaoke kɛtshi, nɛ dia vɔ wakahɛnyahɛnyamaka ndo komonga la okimanyedi oko ɛkɔkɔ waha la olami.” (Mat. 9:36) L’ɛnyɛlɔ ka She, Yeso aki la ngandji ndo la kɛtshi.—Osam. 103:8.

4. Ngande wele woho wakɛnyi Yeso asui w’anto aki la shɛngiya le nde?

⁴ Etena kakɛnyi Yeso anto wasowa nde akatshutshuyama dia mbaoka ngandji. Lo nsala ngasɔ, nde akokoya la kɔlamelo tshɛ ngandji kaki She. L’ɔkɔngɔ wa vɔ nsambisha efula, Yeso l’apɔstɔlɔ ande wakalange ntshɔ lo dihole dia diɛta dia tomuya. Lam’ele nde akoke olui w’anto wakokongaka kɛtshi, Yeso akɔsɛ etena ka “mbaetsha akambo efula.”—Makɔ 6:30, 31, 34.

5, 6. Dia sho mbokoya ngandji ka Nzambi, ngande wahombaso nsalɛ anto akina akambo? Sha ɛnyɛlɔ. (Enda osato wele lo mbɔtwɛlɔ.)

⁵ Sho koka mbokoya ngandji kaki Nzambi lo woho wasalɛso anto akambo. Tɔshi ɛnyɛlɔ kɛnɛ: Alan ɔlɔngɔlɔngɔ ɔmɔtshi w’Okristo ekɔ lo nkana yimba lo kɛnɛ kendana la ɔnangɛso laya osombe ndo lahayɛna dimɛna dia mbadia. Nde aya l’okakatanu dia ntshɔ lo esambishelo ka lo luudu la luudu. Alan ambohɔ ɛtɛkɛta waki Yeso w’ɔnɛ: “Nyosale anto kɛnɛ kalanganyu vɔ nyosalɛ.” (Luka 6:31) Diakɔ diele, Alan amboyambola ate ‘kakɔna kakombolami di’anto salɛmi?’ Nde ambosha okadimwelo ɔnɛ ‘dimi nangaka di’anto nkɛnya lami ponde.’ Ko onde ɔnangɛso l’osombe ekɔ l’akoka wa nkɛnya la nde ponde? Kɛnɛ kakate Yeso mɛnyaka dia sho pombaka ndjambola ɔnɛ ‘kakɔna kotomokombola di’onto okina salɛmi otondongaka dimi mambohomana l’awui wele la nde?’

⁶ Alan atonge osombe koko nde ekɔ la dikoka dia nkanyiya awui wahatawokomɛka. Nde ekɔ lo menda ɔnangɛso laya osombe ndo ekɔ lo mbohokamɛ la yambalo tshɛ. Yema yema, Alan amboshihodia kɛnɛ kalembetshiya monga osombe w’onto wele l’okakatanu dia mbadia Bible kana ntshɔ dia tosambisha lo luudu la luudu. Etena kamboshihodia Alan ekakatanu wele l’ɔnangɛso l’osombe ɔsɔ, nde ambɛna woho wakokande mbokimanyiya ndo kombolaka nsala dui sɔ. Sho la wɔ koka nsala woho akɔ waamɛ. Dia sho mbokoya ngandji ka Nzambi, sho pombaka ndjadja lo dihole di’anangɛso.—1 Kɔr. 12:26.

7. Ngande wakokaso nshihodia ekakatanu wele l’anto akina?

⁷ Aha nshi tshɛ mbatongaka wɔdu nshihodia ekakatanu wele l’anto akina. Anto efula wekɔ lo mpomana l’ekakatanu wele sho tatahomanaka la wɔ. Anto amɔtshi wekɔ lo mpomana la ekakatanu wa l’alemba wele oko mpomɔ mpota, hemɔ kana lotshundu l’osombe. Akina wekɔ lo mpomana la ekakatanu wa lo yimba wele oko ɔkɔmwɛlɔ,  shɔkɛ kana akambo akina. Akina nto wekɔ lo nkumbo kahasangi ɔtɛmwɛlɔ kana ombutshi ɔtɔi w’odia ana ndamɛ. Onto tshɛ ekɔ la okakatanu ɔmɔtshi ondo wele tatahomanaka la wɔ. Lo ntena dia ngasɔ, ngande wakokaso mbokoya ngandji ka Nzambi? Ele lo mpokamɛ onto akɔ polo tamboshihodia okakatanu wele la nde lo yɛdikɔ yakoka. Dui sɔ diayotokimanyiya dia sho mbokoya ngandji kaki Jehowa lo nsala akambo lo ndjela ehomba wele l’onto akɔ. Teye dia ehomba wele l’onto l’onto ntshikitana, koko sho koka mbasha ekeketshelo ka lo nyuma ndo mbakimanyiya lo yoho mɔtshi shikaa.—Adia Rɔmɔ 12:15; 1 Petero 3:8.

8. Kakɔna kakakimanyiya Yeso dia nde nkɛnɛmɔla ɔlɔlɔ ande?

⁸ Ɔna Nzambi akate ate: “Nkum’Olongo, . . . ekɔ ɔlɔlɔ le akanga wa lɔhɛndɛ ndo le anto wa kɔlɔ.” (Luka 6:35) Yeso akokoya ɔlɔlɔ waki Nzambi. Kakɔna kakookimanyiya dia nsala ngasɔ? Nde akasalɛka anto ɔlɔlɔ lo nkanyiya la ntondo shɛngiya yakakoke monga la ɛtɛkɛta ndo etsha ande le anto akina. Ɛnyɛlɔ, womoto ɔmɔtshi laki otshi wa pɛkato akaye le Yeso, akalele ndo akalɔya ekolo waki Yeso la asɔyi. Yeso akashihodia dia womoto ɔsɔ amboyatshumoya ndo nde akeye dia womoto ɔsɔ ayonyanga naka nde hosale akambo la kɛtshi. Yeso akawandola ndo akodimanyiya. Etena kakaanya Ofarisɛ ɔmɔtshi kɛnɛ kakasalema, Yeso akolembetshiya la ɔlɔlɔ tshɛ.—Luka 7:36-48.

9. Kakɔna kakoka tokimanyiya dia mbokoya ɔlɔlɔ wa Nzambi? Sha ɛnyɛlɔ.

⁹ Ngande wakokaso mbokoya ɔlɔlɔ wa Nzambi? Ɔpɔstɔlɔ Pɔɔlɔ akafunde ate: “Nɛ dia okambi wa Nkumadiɔndjɔ hahombe ndɔ ta, koko nde pombaka monga la memakana otsha le anto tshɛ.” (2 Tim. 2:24) Anto wele l’ɔkɔmi shihodiaka woho wakokawɔ nkandola ekakatanu aha la nyangiya anto akina. Tokane yimba lo woho wakokaso monga ɔlɔlɔ la ntondo k’akambo wayela anɛ: Owandji aso w’olimu hakambe olimu ande dimɛna. Kakɔna kahombaso nsala? Aya ngɔndɔ mɔtshi y’ambetsha ɔnangɛso ɔmɔtshi nsanganya, ko nde amboya. Kakɔna kayotowotɛ? L’esambishelo, ompokami aso ambototɛ ate “dimi bu l’etena ka nsawola layɛ wonya ɔsɔ.” Ngande wayotoyaoka? La ngelo, olonganyi aso ambotombola ɔnɛ “Lande na kakiyɛ kombitɛmi ekongelo kayɛ ka Lushi la samalo?” Onde tayowokadimola la kɛtshi? Lo ndjadja lo dihole di’anto akina ndo lo nsala dia nkanyiya shɛngiya yakoka monga la ɛtɛkɛta aso le wɔ, sho koka mbeya woho wa ntɛkɛta ndo nsala akambo lo mbokoya kɛtshi kaki Jehowa.—Adia Tukedi 15:28.

10, 11. Kakɔna kakoka tokimanyiya dia sho mbokoya lomba laki Nzambi? Sha ɛnyɛlɔ.

¹⁰ Dikoka diaso dia nkana yimba lo akambo wahatasalema koka tokimanyiya nto dia sho mbokoya lomba laki Jehowa ndo mbeya la ntondo etombelo wakoka monga la etsha aso. Lomba ekɔ dikoka dimɔtshi di’ohomba diaki Jehowa ndo naka nde nkamba la diɔ, nde koka mbeya la ntondo etombelo wayonga la woho ɔmɔtshi w’etsha. Sho bu l’akoka wa mɛna akambo lo yoho shɔ, koko sho kanaka yimba lo etombelo wakoka monga la kɛnɛ kalangaso nsala. Ase Isariyɛlɛ kombidja yimba lo etombelo wakakoke monga la ohendodi awɔ otsha le Nzambi. Kaanga mbele Nzambi akaasalɛ awui w’amɛna efula, Mɔsɛ akeyaka dia ase Isariyɛlɛ koka nsala kɛnɛ kele kɔlɔ lo washo wa Jehowa. La ntondo k’ase Isariyɛlɛ, nde akembe osambo wele la ɛtɛkɛta ɛnɛ: ‘Nɛ dia vɔ wekɔ wodja waha la ekanelo, ndo yimba bu l’atei awɔ. Otowonga la lomba le! Tshike vɔ  wotokana yimba lo dikambo sɔ. Vɔ wotokanyiya kɛnɛ kayowakomɛ.’—Euh. 31:29, 30; 32:28, 29.

¹¹ Dia sho mbokoya lomba laki Nzambi, sho pombaka nkana yimba lo etombelo wayonga la etsha aso. Ɛnyɛlo, naka tekɔ lo membwana la onto ɔmɔtshi dia tshukana, kete ekɔ ohomba sho mbeya waale wele la nsaki ya dieyanelo. Hatohombe nkongɛ kana nsala dui tshɛ diakoka mfukutanya diɔtɔnganelo di’oshinga wolo diasaso la Jehowa. Koko, sho pombaka nsala akambo lo yoho yɔtɔnɛ la ɛtɛkɛta wakafundama lo ɛlɔmbwɛlɔ ka nyuma k’ekila wata ɔnɛ: “Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.”—Tuk. 22:3.

12. Ngande wakoka ekanelo ka yimba ka kɔlɔ monga waale?

¹² Onto lele la lomba mbeyaka dia ekanelo ka yimba koka mbɛdikama la dja. Naka sho nkamba la dja dimɛna kete yɔ yayotokimanyiya, ɛnyɛlɔ dia nkatɛ mbo ya ndɛ. Koko dja koka tokadia waale naka hatendji dimɛna ndo yɔ koka ntshumba luudu ndo anto wele lɔkɔ. Woho akɔ waamɛ mbele, ekanelo ka yimba kekɔ ohomba etena katokimanyiyatɔ dia mbokoya Jehowa. Koko tɔ koka monga waale etena kalodiamatɔ la nsaki y’awui wa mindo. Ɛnyɛlɔ, naka sho monga la mbekelo ka kanyiyaka awui wa kɔlɔ, kete dui sɔ diayototshutshuya dia nsala pɛkato. Mbokɛmaka dia naka sho ndjasha lo awui wa mindo, kete dui sɔ koka todiaka lo nyuma.—Adia Jakɔba 1:14, 15.

13. Kakɔna ondo kakafɔnya Eva lo yimba yande?

¹³ Tende woho wakayokoma Eva womoto la ntondo lo monga la nsaki ka ndɛ olowa wakasekɛma ‘w’oma l’osongo w’ewo ka kɛnɛ kele ɔlɔlɔ la kɛnɛ kele kɔlɔ.’ (Etat. 2:16, 17) Oloyi akawotɛ ɔnɛ: ‘Hanyotovɔ mɛ! Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ ko nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.’ Eva ‘akɛnyi di’elowa wa l’osongo akɔ waki amɛna dia ndɛ ndo amɛna lo washo.’ Etombelo akɔna waki la dui sɔ? ‘Nde akatatɛ nkɔhɔla olowa oma lɔkɔ ko akatatɛ ndɛ. L’ɔkɔngɔ diko, nde akayosha ndo omɛnde etena kakandayonga kaamɛ la nde, ko omɛnde akatatɛ ndɛ.’ (Etat. 3:1-6) Ondo Eva akafɔnya dia Satana ambowosholɛ ɛngɔ kɛmɔtshi ka dimɛna efula. Kaanga mbakawotɛ Satana kɛnɛ kaki ɔlɔlɔ la kɛnɛ kaki kɔlɔ, nde akahombe mbɔsa yɛdikɔ ndamɛ. Ande woho wakandakesama lee! L’ɔtɛ wa pɛkato kakasale Adama y’omaki Eva, “pɛkato [kakɔtɔ] l’andja oma le onto ɔtɔi ndo nyɔi oma lo pɛkato.”—Rɔmɔ 5:12.

14. Ngande watokimanyiya Bible dia sho mbewɔ lɔkɛwɔ la kɔlɔ?

 ¹⁴ Pɛkato kakasale Eva lo ekambɔ ka Ɛdɛna komonga awui wa mindo wa dieyanelo. Koko Yeso akayɔhɛmɔlaka anto diaha vɔ nkanyiya awui wa mindo wa dieyanelo. Nde akate ɔnɛ: “Onto tshɛ latetemala menda womoto polo lo mbokombola, nde amboshila nsala la nde loseka l’otema.” (Mat. 5:28) Ladiko dia laasɔ, Pɔɔlɔ akatɔhɛmɔla ɔnɛ: “Tanyokongɛke la ntondo dia nkotsha nsaki ya demba.”—Rɔmɔ 13:14.

15. Diangɔ dia nɛmɔ diakɔna diahombaso ndjaombɛ, ndo lande na?

¹⁵ Ekanelo kekina ka kɔlɔ ele, nkanyiya woho wakokaso nkoma akanga wa ɛngɔnyi ko hatoyoleka mbidja yimba lo akambo wendana la Nzambi. Lo mɛtɛ, ɔngɔnyi wa kanga falanga wekɔ oko “eheli k’ave k’utali lu tukanyi tandi.” (Tuk. 18:11) Yeso akasha ɛnyɛlɔ kɛmɔtshi dia mɛnya etombelo wa kɔlɔ w’onto “layaombɛ diangɔ dia nɛmɔ, koko bu ɔngɔnyi lo washo wa Nzambi.” (Luka 12:16-21) Jehowa mongaka l’ɔngɛnɔngɛnɔ etena kasalaso akambo w’ɔngɛnyangɛnya. (Tuk. 27:11) Sho mongaka l’ɔngɛnɔngɛnɔ w’efula etena ketawɔmaso le nde nɛ dia sho tamboyaombɛ “diangɔ dia nɛmɔ l’olongo.” (Mat. 6:20) Aha la taamu, diɔtɔnganelo dia dimɛna la Jehowa mbele ɛngɔ koleki nɛmɔ kakokaso monga la tɔ.

16. Kakɔna kakoka tokimanyiya dia sho mbewɔ ekiyanu?

¹⁶ Tokanyiya lonyangu lakoka ndjonga la so naka sho ndjasha tshɛ dia ndjaombɛ “diangɔ dia nɛmɔ la nkɛtɛ.” (Mat. 6:19) Yeso akakambe la ɛnyɛlo kɛmɔtshi dia mɛnya dia “ekiyanu wa l’andja ɔnɛ ndo lokeso lele la ɔngɔnyi” koka nanya ɔtɛkɛta wa Diolelo. (Mat 13:18, 19, 22) Oyadi vɔ ndjakiyanyaka lo kɛnɛ kendana la falanga kana bu, anto amɔtshi kanyiyaka etombelo wa kɔlɔ wakoka monga la falanga. Naka sho mongaka la ekiyanu waha pe, kete dui sɔ koka monga waale lo demba ndo lo lonyuma laso. Nyɛsɔ toyaɛkɛke le Jehowa ndo tohɔke ɔnɛ “Lunyangu l’utema w’untu latôlembiaka. Keli diui di’ololo diatôngenyangenyaka.” (Tuk. 12:25) Ɛtɛkɛta w’amɛna wekeketshelo w’oma le onto ɔmɔtshi layakiyanya dikambo diaso, koka ngɛnyangɛnya otema aso. Ndjihola otema aso otsha le ambutshi aso, olonganyi aso kana ɔngɛnyi aso wɛkɛso otema ndo lɛna akambo oko awaɛna Nzambi koka tokimanyiya dia sho mbewɔ ekiyanu.

17. Ngande watokimanyiya Jehowa dia sho ndɔshana la ekiyanu?

¹⁷ Ndooko onto lashihodia ekiyanu wele la so ko ndeka Jehowa. Pɔɔlɔ akafunde ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu lo tshimbo ya Kristo Yeso.” (Flpɛ. 4:6, 7) Ekɔ ohomba nkana yimba lo kɛnɛ kendana la wanɛ wasala dia sho kokamɛ oma lo waale wa lo nyuma, mbuta ate asekaso ambetawudi, dikumanyi, ɔhɔmbɔ wa kɔlamelo, andjelo, Yeso ndo Jehowa ndamɛ.

18. Ngande wakoka ekanelo ka yimba tokimanyiya?

¹⁸ Oko wambotodiɛna, ekanelo ka yimba koka tokimanyiya dia sho mbokoya waonga waki Nzambi, ɛnyɛlɔ ngandji. (1 Tim. 1:11; 1 Jni. 4:8) Tayonga la ɔngɛnɔngɛnɔ naka sho mbokana ngandji ka mɛtɛ, nsɛdingola etombelo wayonga la etsha aso ndo mbewɔ ekiyanu wakoka toshishɛ ɔngɛnɔngɛnɔ aso. Ɔnkɔnɛ, nyɛsɔ tokambake dimɛna la losha laso l’oma le Nzambi, mbuta ate dikoka dia nkanyiya kɛnɛ katokongɛ la ntondo ndo tokoya ngandji kaki Jehowa, ɔlɔlɔ, lomba ndo ɔngɛnɔngɛnɔ ande.—Rɔmɔ 12:12.