KINGSLEY aki la ehomɔ kakimanyiya dia mboka dimɛna lo dihɛka etena kakandatatɛ wadielo ande wa Bible mbala ka ntondo lo Kalasa k’olimu wa teokrasi l’etshumanelo kawɔ. Nde akadia tshɛkɛta tshɛ dimɛna dimɛna aha la mpandja kaanga tshɔi. Koko, dui dia diambo ko nde komendaka lo Bible kande. Lande na?

Kingsley, lakadjasɛka la Sri Lanka aki tshungu. Ndo nde kombokaka dimɛna ndo aki l’ohomba wa kɔsa k’etshimbi dia mbetetaka. Ko, ngande wakayekaka pami kɛsɔ awui wendana la Jehowa ndo nkotsha kɛnɛ kalɔmbama dia mfundja lokombo lo Kalasa k’olimu wa teokrasi? Layanga nyolembetshiya.

Mbala ka ntondo kakamahomana la Kingsley, lakambe efula lo menda nsaki k’efula kaki la nde k’akambo wa mɛtɛ wa lo Bible. Nde akeke Bible la Ɛmɛnyi wa Jehowa efula, ndo dibuku diande dia Ewo katɔla otsha lo lɔsɛnɔ la pondjo dia l’ɔtɛkɛta w’akanga a totshungu diaki diaya omusu. * Nde aketawɔ kɛnɛ kakamɔlɔmbɛ dia nyomotatɛ mbeka la nde Bible, koko takahomana l’ekakatanu ehende.

Okakatanu wa ntondo, Kingsley akadjasɛka l’anto efula lo luudu lalamawɔ esombe ndo anto wele la dikɔmɔ. Lam’ele londjo l’anto wakatodinge laki efula ndo Kingsley kombokaka dimɛna, lakahombaka mbidiya dui ndo ntɛkɛta la wolo efula. Lo mɛtɛ,  onto tshɛ laki lo luudu lɔsɔ akokaka kɛnɛ kakatekaka dimi la nde lomingu tshɛ.

Okakatanu wa hende, Kingsley akakokaka mbadia ndo nembetɛ paka awui yema tshitshɛ tsho wakatekaka. Dia wekelo aso monga l’etombelo w’amɛna, Kingsley akalɔngɔsɔlaka dimɛna efula. La ntondo ka sho mbeka, nde akadiaka mbala la mbala kɛnɛ kakatahombaka mbeka, akadiaka avɛsa lo Bible kande ka l’ɔtɛkɛta w’akanga wa totshungu ndo akakongɛka lo yimba ekadimwelo wɔtɔnɛ la ambola. Akɛnama dia yoho shɔ yaki l’etombelo w’amɛna efula. Etena kakatekaka, nde akadjasɛka ɔkɔmi ekolo ande lo tapi, ahomɛ l’odihe l’ɔngɛnɔngɛnɔ tshɛ etena kakandalembetshiyaka la dui dia wolo kɛnɛ kakandekaka. Edja efula la ntondo, takekaka mbala hiende lo lomingu ndo takasalaka wenya ehende wa ntango lo wekelo tshɛ.

Kingsley aki la nsaki ka mbɔtɔ nsanganya lo Mbalasa ka Diolelo, koko ɔsɔ komonga yana ya dikambo. Nde aki l’ohomba di’onto mbokimanyiya dia mbidjasɛ ndo monɛ lo nkɔsa kande k’etshimbi, lo mutuka, ndo lo Mbalasa ka Diolelo. Diakɔ diele, anto efula wa l’etshumanelo wakengɔnyaka dia mbokimanyiya ndo wakɔsaka dui sɔ oko tshondo ya diɛsɛ. Lo nsanganya, Kingsley akasukanyaka baflɛ suke la tui diande, ko akahokamɛka la yambalo tshɛ ndo akongaka l’akoka wa mbisha kɔmatɛrɛ.

L’ɔkɔngɔ wa nde mbeka l’edja k’etena kɛmɔtshi, Kingsley akayɔsa yɛdikɔ ya mfundja lokombo lo Kalasa k’olimu wa teokrasi. Mingu hiende la ntondo ka nde nsala wadielo wa Bible mbala ka ntondo, lakawombola dia kana nde ekɔ lo mbohola ɔkɛndɛ ande. Nde akambutɛ l’eshikikelo tshɛ ate: “Eelo ɔnalengo, lambohola oko mbala 30.” Lakawandola lo welo wakandadje ndo lakɔlɔmbɛ dia dimi mpokamɛ wadielo ande. Nde akafola Bible kande ka l’ɔtɛkɛta w’akanga wa totshungu, akakitsha mpita yande lɔkɔ, ko akatatɛ mbadia. Koko, lakɛnyi dia mpita yande kombetetaka lo ndjɛkɛ kina ya lo Bible oko woho wakandahombe nsala. Nde akakimɛ wadielo wa Bible tshɛ l’ɔtɛ!

Lakakɛdia asɔyi polo l’atama, nɛ dia laki la taamu lo menda kɛnɛ kakandasale. Lakambola Kingsley woho wakandakoke nembetɛ wadielo ande paka lo mbala 30 tsho. Nde akakadimola ate: “Ndooko, lakoholaka mbala oko 30 lo lushi.” Ndekana ngɔndɔ k’otondo, Kingsley akadjasɛka lo tapi kande ko mbadiaka mbala la mbala ɔkɛndɛ ande polo lam’akandakimɛ l’ɔtɛ.

Oma laasɔ, lushi lakandahombe tosha ɔkɛndɛ ande lo Mbalasa ka Diolelo lakakoke. Etena kakashidiya Kingsley mbisha ɔkɛndɛ ande, ase etshumanelo wakade saka l’ɔngɛnɔngɛnɔ ndo efula wakalele lo menda eshikikelo kaki la ombeki ɔsɔ w’oyoyo wa lo kalasa. Opandjudi ɔmɔtshi wakayotshika mbisha asawo lo kalasa l’ɔtɛ wakinde la wɔma, akalɔmbɛ dia nyomofundja lokombo. Lande na? Nde mbutaka ate: “Naka Kingsley koka nsala dui sɔ, kete ndo dimi lawɔ!”

L’ɔkɔngɔ wa nde mbeka Bible l’edja k’ɛnɔnyi esato, Kingsley akayɛnyaka djembetelo ya ndjakimɔ kande le Jehowa lo batizama l’ashi lo Ngɔndɔ ka divwa 6, 2008. Kingsley aki Ɔmɛnyi wa Jehowa wele la kɔlamelo polo lo nyɔi kande lo Ngɔndɔ ka tanu 13, 2014 ndo nde aki l’eshikikelo ɔnɛ lo paradiso ka la nkɛtɛ nde ayotetemala la olimu ande wa kɔlamelo ele la wolo ndo la yoonge ya kokele. (Is. 35:5, 6)—Kɔndwama oma le Paul McManus.