L’ƆKƆNGƆ wa Anita * batizama dia monga Ɔmɛnyi wa Jehowa, omɛnde akatatɛ mbɔhɛnyahɛnya efula. Anita mbutaka ate: “Omɛmi akashimbe diaha ntshɔ lo nsanganya ndo akashimbe diaha kaanga dimola lokombo laki Nzambi. Dimola tsho lokombo Jehowa, akakonyaka omɛmi dia mbidɔdɔ la nkɛlɛ.”

Anita aki nto l’okakatanu okina dia mbetsha anande awui wendana la Jehowa. Anita mbutaka ate: “Ɔtɛmwɛlɔ wa Jehowa wakashimbama lo luudu lami hita. Dimi komonga la lotshungɔ la mbetsha anami Bible lo sɛkɛ kana ntshɔ la wɔ lo nsanganya.”

Oko wadiɛnya ɛnyɛlɔ ka Anita, ɔlɔshamelo w’oma le ase nkumbo koka monga ohemba wa wolo le Okristo dia nama olowanyi ande. L’atei w’awui wakoka kɔlamelo y’Okristo monga l’ohemba mbele ndo hemɔ kahakɔnɔ, nyɔi k’ɔna kana k’olonganyi ndo naka ose nkumbo ɔmɔtshi amboka Jehowa ɔkɔngɔ. Ko, kakɔna kakoka nkimanyiya Okristo dia ntshikala la kɔlamelo le Jehowa?

Etena kahomanayɛ l’ehemba wa ngasɔ, akokayɛ nsala? Ɔpɔstɔlɔ Pɔɔlɔ akate ate: “Nyekɔ la ohomba w’ekikelo.” (Hɛb. 10:36) Ko kakɔna kakoka kokimanyiya dia mbikikɛ?

Yoho ya ntondo yakokaso nkondja ekeketshelo kahombama dia mbikikɛ ehemba wa ngasɔ ele, ndjaɛkɛ le Nzambi lo dɔmbɛlɔ. Tɔsɛdingole ɛnyɛlɔ kɛmɔtshi. Mpokoso ka wolo kakakomɛ nkumbo kaki Ana Lushi l’ɔtɔi lɔmɔtshi l’ɔkɔngɔ wa midi. Omɛnde lakatshukana la nde l’edja k’ɛnɔnyi 30, akavu la shashimoya. Ana mbutaka ate: “Nde kokalola nto oya la ngelo oma l’olimu ndo nde aki paka l’ɛnɔnyi 52.”

Ngande wakakoke Ana ndjasɛnya? Nde akatatɛ nkamba olimu wakawokimanyiya efula nɛ dia nde akayashaka tshɛ lɔkɔ, koko dui sɔ koshidiya lɔkɔnyɔ laki la nde. Nde mbutaka ate: “Lakɛkɛ otema ami tshɛ le Jehowa ndo lakɔsɛngasɛnga dia kimanyiyami dia dimi ntondoya ɔkɛyi ami.” Onde Jehowa akakadimola alɔmbɛlɔ ande? Nde akashikikɛ dia Jehowa akookadimola, nɛ dia nde mbutaka ate: “Wɔladi wakoka paka Nzambi oto mbisha wakambisha ki ka lo yimba ndo yoonge ya dimɛna. Dimi bu la taamu dia Jehowa ayoyolola omɛmi.”—Flpɛ. 4:6, 7.

Ɔnɛ “Latukaka dombelo” akalake dia nde ayokotshɛ ekambi ande kɛnɛ tshɛ kewɔ l’ohomba dia ntshikala la kɔlamelo le nde. (Osam. 65:2) Onde wɛ hetawɔ dia eshikikelo kɛsɔ keketshaka mbetawɔ? Onde dui sɔ hakokimanyiya dia mboka lande na kahombayɛ ndo wɛ mbikikɛ?

Jehowa keketshaka ekambi ande lo tshimbo y’etshumanelo k’Akristo. Ɛnyɛlɔ, etena kaki etshumanelo ka la Tɛsalɔnika l’ɛhɛnyɔhɛnyɔ w’efula, Pɔɔlɔ akakeketsha Akristo asɔ ɔnɛ: “Nyotetemale keketshana ndo mbodiana lam’asanyu, oko wasalanyu.” (1 Tɛs. 2:14; 5:11) Lo monga kaamɛ lo ngandji ndo lo kimanyiyana onto l’onto, Akristo wa la Tɛsalɔnika wakashike tanga la ntondo k’ehemba ɛsɔ wakadje mbetawɔ kawɔ l’ohemba. Ekikelo kawɔ kekɔ ɛnyɛlɔ k’oshika le so ɛlɔ kɛnɛ ndo tosholɛka dui dimɔtshi diakoka tokimanyiya dia mbikikɛ.

Monga la lɔngɛnyi l’oshika l’ase etshumanelo koka tokimanyiya dia mbutanɛ “akambo watokeketsha.” (Rɔmɔ 14:19) Ɔnɛ ekɔ etena ka laande kamboleka monga tena dia paa. Pɔɔlɔ akahomana l’ɛhɛnyɔhɛnyɔ w’efula ndo Jehowa akawosha wolo wa mbikikɛ. L’etena kɛsɔ, Nzambi akasha Pɔɔlɔ ekeketshelo k’efula lo tshimbo y’asekande ambetawudi. Ɛnyɛlɔ, etena kakatomɛ Pɔɔlɔ ase etshumanelo ka la Kɔlɔsayi mɔyɔ, nde akate lo dikambo diawɔ ɔnɛ: “Vɔ mbele kiɔkɔ ya ekeketshelo k’efula le mi.” (Kɔl. 4:10, 11) Eelo, ngandji kakawokaka Pɔɔlɔ mbakaatshutshuya dia mbosamba ndo mbokeketsha etena kakinde lo dihombo. Ondo wɛ ambolongolaka ekeketshelo ka ngasɔ ndo osukɔ oma le ase etshumanelo kayɛ.

Nzambi ambotoshaka kiɔkɔ kina y’ekeketshelo l’etshumanelo k’Akristo, mbuta ate dikumanyi. Apami wambotshunda lo nyuma asɔ kokaka monga “uku eshamelu uma lu lopepe, uku ukumbo uma lu ngimbi, uku ekedi w’ashi lu kete ya wumu, ndu uku dedi dia dive dia wuki l’usui watuhekuyaka antu.” (Is. 32:2) Ande ekeketshelo kakondjaso lee! Onde wɛ ekɔ lo nkondja wahɔ oma lo yɛdikɔ yoludi la ngandji shɔ? Ekeketshelo ndo osukɔ w’oma le dikumanyi koka tokimanyiya dia mbikikɛ.

Lo mɛtɛ, dikumanyi dia l’etshumanelo bu asadi w’ahindo. Vɔ wekɔ anto wele keema kokele ndo “wele la wɛɔdu oko [sho].” (Ets. 14:15) Koko, alɔmbɛlɔ wasalawɔ lo dikambo diaso kokaka nsala akambo efula. (Jak. 5:14, 15) Ɔnangɛso ɔmɔtshi ladjasɛ l’Italie akakikɛ l’edja k’ɛnɔnyi efula etombelo waki la hemɔ kelɛwɔ dystrophie musculaire, nde akate ɔnɛ: “Ngandji kakambokaka anangɛso ndo wembwelo awɔ wa la ngandji mbala la mbala akakimanyiya dia mbikikɛ.” Onde wɛ kondjaka wahɔ efula oma lo yɛdikɔ yoludi la ngandji y’oma le Jehowa shɔ, mbuta ate dikumanyi dia l’etshumanelo?

Ekɔ akambo akina wakokaso nsala dia mbikikɛ. Dikambo dimɔtshi ele, ntetemala nsala akambo wa lo nyuma. Tɔsɛdingole ɛnyɛlɔ k’ɔnangɛso John lele l’ɛnɔnyi 39 lakawashola la kansɛrɛ kahaleke tanema le anto. Nde mbutaka ate: “Laki la lɔkɔnyɔ l’efula, nɛ dia laasɔ ko leeke mɛtɛ ɔlɔngɔlɔngɔ.” L’etena kɛsɔ ko ɔnaki John ele l’ɛnɔnyi esato eto. John kotshaka ate: “Dui sɔ nembetshiyaka dia wadɛmi akahombaka nkokɛ aha ɔnaso oto, koko nde akahombaka kokɛmi ndo tshindɛkami otsha lo lopitadi.” Esakelo welɛwɔ chimiothérapie wakawambishaka, wakanɛndjaka efula ndo wakambishaka mɛngumɛngu. Aha ekakatanu ɛsɔ eto mbaki la wɔ. She John akatate hemɔ ka wolo efula ndo ase nkumbo wakahombaka mbokokɛ.

Ngande wakatondoya John nde la nkumbo kande ekakatanu wa wolo ɛsɔ? Nde mbutaka ate: “Kaanga mbakimi l’ɔlɛmbɛlɔ, lakasala la wolo dia nkumbo kaso salaka akambo wa lo nyuma mbala la mbala. Takɔtɔka nsanganya tshɛ, takasambishaka lomingu tshɛ ndo takasalaka ɔtɛmwɛlɔ wa lo nkumbo kaanga etena kaki dui sɔ wolo.” Lo mɛtɛ, John akeyaka dia dui di’ohomba diakakoke mbokimanyiya dia mbikikɛ ohemba tshɛ ele nkokɛ lonyuma. Onde nde ekɔ l’alako amɔtshi wa mbisha anto wadiɛnɛ l’ekakatanu ɛmɔtshi? Nde mbutaka ate: “L’ɔkɔngɔ w’onto monga l’okakatanu wa wolo la shashimoya, Jehowa ayowokeketsha ndo ayowoka ngandji dia nde monga la ki ka lo yimba. Jehowa kokaka kosha wolo oko wakandambisha.”

Aha la taamu, l’ekimanyielo ka Jehowa sho kokaka mbikikɛ ehemba kana tena dia wolo diakoka mpomana la so ɛlɔ kɛnɛ kana lo nshi yayaye. Nyɛsɔ toyaɛkɛ le Jehowa lo dɔmbɛlɔ, tonge la lɔngɛnyi la ma ma l’ase etshumanelo kaso, toyange ekimanyielo oma le dikumanyi di’Akristo ndo tosalake akambo wa lo nyuma mbala la mbala. Naka sho nsala ngasɔ, kete tayɔsɛna lo yoho yɔtɔnɛ l’ɛtɛkɛta wa Pɔɔlɔ w’ɔnɛ: “Nyekɔ la ohomba w’ekikelo.”