1. Ngande wakambaso la dɔmbɛlɔ diele lo Mateo 6:9-13 lo olimu aso w’esambishelo?

ANTO efula kokaka mbuta dɔmbɛlɔ dia Shɛso lo yimba. Etena kasambishaso, mbala efula sho kambaka la ɛtɛkɛta wa lo dɔmbɛlɔ dia ɛnyɛlɔ dia mbetsha ampokami aso ɔnɛ Diolelo diaki Nzambi mbele lowandji la mɛtɛ layokadimola nkɛtɛ paradiso. Sho kambaka nto la dikambo dia ntondo dia lo dɔmbɛlɔ sɔ dia mɛnya ɔnɛ Nzambi ekɔ la lokombo lande l’oshika ndo lɔ pombaka kidiama kana ‘mbɔsama oko ekila.’—Mat. 6:9.

2. Ngande weyaso ɔnɛ Yeso hakombola dia sho kalolɛka dɔmbɛlɔ dia ɛnyɛlɔ tshɛkɛta lo tshɛkɛta tena tshɛ dialɔmbaso?

² Onde Yeso akakombola dia sho kalolɛka dɔmbɛlɔ sɔ tshɛkɛta lo tshɛkɛta etena tshɛ kalɔmbaso, oko wasala ase Lokristokristo efula? Ndooko. Yema la ntondo ka Yeso nsala dɔmbɛlɔ dia ɛnyɛlɔ sɔ, nde akate ate: “Etena kalɔmbanyu, tanyokalolɛke akambo akɔ waamɛ.” (Mat. 6:7) Lo diaaso dikina, nde akayosala dɔmbɛlɔ sɔ nto koko lo nkamba la ɛtɛkɛta wotshikitanyi. (Luka 11:1-4) Ɔnkɔnɛ lo nsala dɔmbɛlɔ sɔ, Yeso akatokimanyiya dia sho mbeya akambo wahombaso nɔmbaka ndo lo ndjela ohomba wa dikambo  la dikambo. Diakɔ diele, diɔ mbelamɛka ɔnɛ dɔmbɛlɔ dia ɛnyɛlɔ.

3. Ambola akɔna wahombaso kanaka la wɔ yimba etena katatasɛdingola dɔmbɛlɔ dia ɛnyɛlɔ?

³ Lo sawo nɛ ndo diayela, tayɔsɛdingola awui wele lo dɔmbɛlɔ dia ɛnyɛlɔ. Etena kayototasalaka dui sɔ, yambola ɔnɛ: ‘Ngande wakoka dɔmbɛlɔ dia ɛnyɛlɔ nɛ kimanyiyami dia ndowanya alɔmbɛlɔ ami? Ndo dui dioleki ohomba, onde dimi lekɔ lo nsɛna lo yoho yɔtɔnɛ la dɔmbɛlɔ sɔ?’

4. Kakɔna katohola etelo k’ɔnɛ “Shɛso,” ndo lo yoho yakɔna yɔɔsa Akristo wele la elongamelo ka ndjɔsɛna la nkɛtɛ Jehowa ɔnɛ “Shɛso”?

⁴ Etelo k’ɔnɛ “Shɛso,” aha “Papa kami,” toholaka ɔnɛ tehɔ lo “nkumbo k’otondo k’anangɛso” wokana ngandji ka mɛtɛ. (1 Pet. 2:17) Ande diɛsɛ dia dimɛna diele la so lee! Akristo w’akitami wakotama oko ana wa Nzambi wele la elongamelo ka tɔsɛna l’olongo, mbelɛka Jehowa ɔnɛ “Shɛso” lo yoho ya shikaa. (Rɔmɔ 8:15-17) Akristo wele la elongamelo ka ndjɔsɛna pondjo pondjo la nkɛtɛ vɔ lawɔ kokaka mbelɛ Jehowa ɔnɛ “Shɛso.” Nde ekɔ Ombishi awɔ wa lɔsɛnɔ ndo la ngandji tshɛ, nde kotshaka ehomba w’atɛmɔdi ande wa mɛtɛ. Wanɛ wele la elongamelo ka ndjɔsɛna la nkɛtɛ asɔ, wayoyala ana wa Nzambi lo yoho ya shikaa l’ɔkɔngɔ wa vɔ nkoma kokele ndo wa vɔ ntshikala la kɔlamelo lo ohemba w’ekomelo.—Rɔmɔ 8:21; Ɛny. 20:7, 8.

5, 6. Naa woshasha wa dimɛna wakoka ambutshi mbisha anawɔ, ndo kakɔna kakoka ɔna tshɛ nsala la woshasha akɔ? (Enda osato wele lo mbɔtwɛlɔ.)

⁵ Ambutshi mbishaka anawɔ woshasha wa dimɛna etena kawaetshawɔ dia nɔmba ndo kaakimanyiwɔ dia mbɔsa Jehowa oko Shɛwɔ lele l’olongo lawakotshɛ ehomba awɔ. Ɔnangɛso ɔmɔtshi lele nshi nyɛ omendji w’otshimbedi l’Afrique du Sud mbutaka ɔnɛ: “Oma ko etena kakotɔ anaso wa wamato, lakalɔmbaka kaamɛ la wɔ otsho tshɛ onyake lushi lakimi komongaka la ngelo. Anaso wa wamato mbutaka mbala la mbala ɔnɛ vɔ hawohɔ ɛtɛkɛta shikaa wakatamaka lo alɔmbɛlɔ asɔ. Koko vɔ mbohɔka ɔngɛnɔngɛnɔ wakongaka la wɔ, woho wakawasawolaka la Jehowa Shɛso lo dɔmbɛlɔ ndo wɔladi la lotui tshitshi laki la wɔ. Kam’akawonge l’akoka wa nɔmba, lakaakeketsha dia nɔmbaka la dui dia wolo dia dimi mboka woho wakɛnɛmɔlɛwɔ Jehowa tokanyi ndo nsaki yawɔ. Ɔsɔ aki diaaso di’ohomba dia mbeya kɛnɛ kaki l’etema awɔ. Oma laasɔ, lakawaɛnyaka l’ɔkɔmi tshɛ woho wa mbidja awui amɔ w’ohomba wa lo dɔmbɛlɔ dia ɛnyɛlɔ lo alɔmbɛlɔ awɔ dia alɔmbɛlɔ awɔ monga la ehikamelo k’ɔlɔlɔ.”

⁶ Etombelo wakonge la dui sɔ ko, ana wa wamato waki ɔnangɛso ɔsɔ wakayosala ehamelo wa lo nyuma w’amɛna. Vɔ wekɔ l’ɔngɛnɔngɛnɔ lo awala awɔ, ndo vɔ la waomɛwɔ wekɔ lo kambɛ Nzambi olimu wa lo tena tshɛ. Ndooko woshasha woleki woke wakoka ambutshi mbisha anawɔ ko ndeka wɔnɛ wa mbakimanyiya dia vɔ monga la diɔtɔnganelo dia dimɛna la Jehowa. Diakɔ diele, ekɔ ohomba dia ɔna tshɛ nkokɛ diɔtɔnganelo di’oshinga wolo sɔ. Dui sɔ mendanaka la mbeka dia nanga lokombo laki Nzambi ndo lisha dilɛmiɛlɔ dioleki.—Osam. 5:11, 12; 91:14.

7. Diɛsɛ diakɔna diele la ekambi waki Nzambi, ko kakɔna katɔlɔmba dui sɔ?

⁷ Tekɔ la diɛsɛ dia mbeya lokombo laki Nzambi ndo monga ‘anto wakasɔnama dikambo dia lokombo lande.’ (Ets. 15:14; Is. 43:10) Tekɔ lo nsɛngasɛnga Shɛso ka l’olongo ɔnɛ: “Lokombo layɛ lakidiame.” Sho pombaka nɔmbaka Jehowa nto dia nde tokimanyiya di’aha nsala kana mbuta dui dimɔtshi diakoka mɔnyɔla lokombo lande  l’ekila. Hatohombe monga oko anto amɔtshi waki lo ntambe ka ntondo waki kosalaka akambo wakawasambishaka. Ɔpɔstɔlɔ Pɔɔlɔ akafunde lo dikambo diawɔ ɔnɛ: “Lokombo la Nzambi lekɔ lo tɛngama le ase wedja l’ɔtɛ anyu.”—Rɔmɔ 2:21-24.

8, 9. Sha ɛnyɛlɔ kɛnya woho watshɔkɔla Jehowa wanɛ wasala la wolo dia nkidia lokombo lande.

⁸ Sho nangaka nkidia lokombo laki Nzambi. L’ɔkɔngɔ w’omɛnde mvɔ la shashimoya, kadiyɛso kadjasɛ la Norvège akatshikala nde la ɔnande la pami laki l’ɛnɔnyi ehende eto. Nde mbutaka ate: “Ɔsɔ aki oko ndjadi kambombalɛ la yanyi ya tɛɛ. Lakalɔmbaka lushi tshɛ, suke la wonya a tango tshɛ dia dimi nkondja wolo wa mbikikɛ lɔkɔnyɔ lami di’aha dimi ndjɔsa yɛdikɔ ya kɔlɔ kana nshisha kɔlamelo ko ndjosha Satana ɔkɔkɔ wa mɔnyɔla Jehowa. Lakalangaka nkidia lokombo la Jehowa ndo lakalangaka dia ɔnami ndjɛnana la she nto lo paradiso.”—Tuk. 27:11.

⁹ Onde Jehowa akakadimola alɔmbɛlɔ waha la lokaki wa ngasɔ? Eelo. Kadiyɛso kɛsɔ akakondja ekeketshelo l’ɔtɛ wakandasanganaka mbala la mbala kaamɛ l’asekande ambetawudi. L’ɔkɔngɔ w’ɛnɔnyi etanu, nde akatshukama la ekumanyi kɛmɔtshi ka l’etshumanelo. Ɛlɔ kɛnɛ, ɔnande aya l’ɛnɔnyi 20 ndo ambobatizama. Nde mbutaka ate: “Lekɔ l’ɔngɛnɔngɛnɔ w’efula lo woho wambokimanyiya omɛmi dia mboodia.”

10. Ngande wayokidia Nzambi lokombo lande tshɛ lo tshɛ?

¹⁰ Kakɔna kalɔmbama dia lokombo laki Nzambi kidiama tshɛ lo tshɛ ndo mbɛdiama oma lo ntɛngɔ tshɛ? Jehowa ayokidia lokombo lande etena kayondonya anto tshɛ wɔnyɔla lowandji lande. (Adia Ezekiele 38:22, 23.) L’etena kɛsɔ, anto wayotakomaka kokele yema yema. Ande woho wakombolaso mɛna etena kayɔsa anto tshɛ lokombo Jehowa ekila lee! L’ekomelo, Shɛso ka l’olongo ‘ayolɛ diangɔ tshɛ, ndo anto tshɛ.’—1 Kɔr. 15:28.

11, 12. Lo 1876, kakɔna kakashihodia Akristo wa mɛtɛ?

¹¹ Ntondo ka Yeso mbidɛ l’olongo, apɔstɔlɔ ande wakawombola ɔnɛ: “Nkumadiɔndjɔ, onde wɛ ayanga mbololɛ Isariyɛlɛ diolelo l’etena kɛnɛ?” Okadimwelo wakawasha Yeso mɛnyaka ɔnɛ, ɔsɔ komonga etena ka vɔ mbeya etena kakahombe Diolelo diaki Nzambi ntatɛ mbolɛ. Nde akatɛ ambeki ande dia ndeka ndjasha lo olimu w’ohomba efula wakandawasha: olimu w’esambishelo. (Adia Etsha 1:6-8.) Koko, Yeso akatɛ ambeki ande dia vɔ kongɛka oyelo wa Diolelo diaki Nzambi. Diakɔ diele, Akristo waki oma ko nshi y’apɔstɔlɔ wakatatɛ nɔmba dikambo dia oyelo adiɔ.

¹² Lam’akasukana etena ka Diolelo diaki Nzambi monga l’anya wa Yeso dia nde ntatɛ mbolɛ l’olongo, Jehowa akakimanyiya ekambi ande dia vɔ nshihodia akambo wendana la nshi y’ekomelo. Lo 1876, sawo dimɔtshi diakafundama oma le Charles Taze Russell diakatondjama lo jurnalɛ yele l’ɔtɛ a dui ɔnɛ Bible Examiner. Sawo sɔ diaki l’ɔtɛ a dui ɔnɛ: “Les temps des Gentils: Quand prennent-ils fin?,” diakɛnya ɔnɛ 1914 ekɔ ɔnɔnyi w’ohomba efula. Sawo sɔ, diakɛnya diɔtɔnganelo diele lam’asa “tena esambeli” dia lo prɔfɛsiya ka Danyɛlɛ la “etena kakashikikɛma k’ase wedja” kakatɛkɛta Yeso. *—Dan. 4:16; Luka 21:24.

13. Kakɔna kakasalema lo 1914, ndo kakɔna katoshikikɛ akambo wakatatɛ salema lo andja ɔnɛ oma ko etena kɛsɔ?

¹³ Lo 1914, ta diakayala lam’asa wedja wa l’Erɔpɛ diakayokokanɛ ndo diakayonga ta  dia l’andja w’otondo. Koko etena kakashile ta sɔ lo 1918, ndjala ya kasha yakonge ndo hemɔ ya mamba yakadiakisha anto efula ndeka ndo woho wakawavu lo ta. Ɔsɔ ekɔ “djembetelo” yakasha Yeso di’anto mbeya ɔnɛ woongelo ande wahɛnama oko Nkumekanga k’oyoyo ka la nkɛtɛ yambotatɛ kotshama. (Mat. 24:3-8; Luka 21:10, 11) Tolembetelo efula mɛnyaka dia ɔnɔnyi wa 1914 mbele etena kakalongola Nkumadiɔndjɔ Yeso Kristo “dɛmbɔ dia nkoso.” Nde “akatshu, atalɛndja ndo dia toshidiya ɔlɛndjɛlɔ ande.” (Ɛny. 6:2) Dia mbɛdia olongo, nde akalɔsha Satana la ɛdiɛngɛ ande ta, ko akawatshanya lo emamu wa nkɛtɛ. Oma ko etena kɛsɔ, anto wekɔ lo mɛna mɛtɛ k’ɛtɛkɛta ɛnɛ wakafundama l’ɛlɔmbwɛlɔ ka nyuma: “Mfɔnu kayanga monga la nkɛtɛ ndo lo ndjale, nɛ dia Diabolo amboya le nyu ele la nkɛlɛ k’efula, eya dia etena kambootshikalɛ kaya mondo.”—Ɛny. 12:7-12.

14. a) Lande na kele ekɔ ohomba ntetemala nɔmba dia Diolelo diaki Nzambi ndja? b) Naa ɔkɛndɛ wele la so?

¹⁴ Prɔfɛsiya kele lo Ɛnyɛlɔ 12:7-12, nembetshiyaka lande na kele eotwelo ka Diolelo diaki Nzambi kakayonga paka l’etena kakatatɛ akambo wa wolo watatetemala nsoya anto. Yeso lele Nkumekanga ka lo Diolelo diaki Nzambi akatatɛ mbolɛ l’atei w’atunyi ande. Tayotetemala nɔmba dia Diolelo diaki Nzambi ndja polo ndo lam’ayondoshidiya ɔlɛndjɛlɔ ande ndo lam’ayondonya akambo wa kɔlɔ la nkɛtɛ. Koko l’etena kɛnɛ, sho pombaka nsɛna lo yoho yɔtɔnɛ la dɔmbɛlɔ dia ɛnyɛlɔ lo mbisha lonya l’okotshamelo wa “djembetelo” yoleki tshɛ. Yeso akatatshi ɔnɛ: “Lokumu l’ɔlɔlɔ lɔnɛ la Diolelo  layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”—Mat. 24:14.

15, 16. Ngande wakokaso nsɛna lo yoho yɔtɔnɛ la dɔmbɛlɔ diasalaso dia lolango laki Nzambi salema la nkɛtɛ?

¹⁵ Ambeta ɛnɔnyi oko 6000 wele lolango laki Nzambi lakasalemaka dimɛna efula lanɛ la nkɛtɛ. Diakɔ diele, Jehowa akakoke menda etatelo ka dimɛna efula kɛsɔ kakandasha anto ko mbuta ɔnɛ: “Ukuku kawo.” (Etat. 1:31) Oma laasɔ Satana akatɔmbɔkɔ, ndo oma l’etena kɛsɔ anto angana ato mbakayotatɛ nsala lolango laki Nzambi lanɛ la nkɛtɛ. Koko ɛlɔ kɛnɛ, tekɔ la diɛsɛ dia nsɛna l’etena kele Ɛmɛnyi wa Jehowa oko miliyɔ enanɛi hawosale tsho dɔmbɛlɔ dia lolango laki Nzambi salema la nkɛtɛ, koko wekɔ lo nsala la wolo dia nsɛna lo yoho yɔtɔnɛ la dɔmbɛlɔ sɔ. Vɔ wekɔ lo nsala dui sɔ oma lo yoho yawɔ ya lɔsɛnɔ ndo lo ndjasha l’ohetoheto tshɛ l’olimu wa mbetɛ anto ambeki.

¹⁶ Ɛnyɛlɔ, kadiyɛso kɛmɔtshi kakabatizama lo 1948 kele misiɔnɛrɛ l’Afrikɛ mbutaka ɔnɛ: “Lo yoho yɔtɔnɛ la etenyi ka dɔmbɛ dia ɛnyɛlɔ kɛnɛ, mbala efula dimi nɔmbaka di’anto wele oko ɛkɔkɔ sambishama ndo kimanyiyama dia mbeya Jehowa ntondo ka ndjohɔ okanga a kɔngɔlɔ wanyu amboshila. Ndo nto, etena kongami suke dia nsambisha onto ɔmɔtshi, dimi nɔmbaka Jehowa lomba dia munanda otema w’onto akɔ. Ndo lo kɛnɛ kendana l’anto wele oko ɛkɔkɔ wambootanemaka, dimi nɔmbaka dia Jehowa ntshɔkɔla welo wadjaso dia ndjasha le wɔ.” Dui dia diambo ko, kadiyɛso kele la ɛnɔnyi 80 kɛsɔ ekɔ lo ntondoya lo olimu ande w’esambishelo, ndo l’ekimanyielo k’anto akina, nde ambokimanyiya anto efula dia monga Ɛmɛnyi wa Jehowa. Aha la taamu, wɛ koka nkanyiya bɛnyɛlɔ di’amɛna di’anto akina wayasha tshɛ dia nsala lolongo laki Nzambi oyadi elelo wendana la lotshundu wele la wɔ.—Adia Filipɛ 2:17.

17. Ngande wayaokayɛ lo kɛnɛ kendana l’akambo wayosalɛ Jehowa anto wa la nkɛtɛ lo nshi yayaye?

¹⁷ Tayotetemala nɔmba dia lolongo laki Nzambi salema polo ndo lam’ayonyɛma atunyi wa Diolelo diaki Nzambi la nkɛtɛ. Oma laasɔ, tayɛna woho wayosalema lolango laki Nzambi tshɛ lo tshɛ etena kayolwama miliyara y’anto lo paradiso ka la nkɛtɛ. Yeso akate ate: “Tanyambake dia dikambo sɔ, nɛ dia etena kekɔ lo ndjaye kele wanɛ tshɛ wele lo waombo wohɔma wayoka dui diande ko wayotomba. Wanɛ wakasalaka akambo w’ɛlɔlɔ lo eolwelo ka lɔsɛnɔ ndo wanɛ wakasalaka akambo wa kɔlɔ lo eolwelo ka kilombo.” (Jni. 5:28, 29) Ande ɔngɛnɔngɛnɔ wayonga la so etena kayotolongola wakiso wokaso ngandji wakavu lee! Nzambi “ayokitola asɔyi tshɛ oma lo washo [aso].” (Ɛny. 21:4) Anto efula wayolɔ waki “anto wa kɔlɔ,” wakasɛnaka ndo wakavu aha la mbeka akambo wa mɛtɛ wendana la Jehowa Nzambi nde la Ɔnande. Ayonga diɛsɛ dia mamba dia nkimanyiya anto wayolwama asɔ dia mbeya lolango laki Nzambi ndo asangwelo ande l’oyango wa mbakimanyiya dia nkotsha kɛnɛ kalɔmbama dia nkondja “lɔsɛnɔ la pondjo.”—Ets. 24:15; Jni. 17:3.

18. Naa ehomba woleki weke waleka anto monga l’ohomba?

¹⁸ Dia anto wa l’andja w’otondo monga lo wɔladi ndo kaamɛ, ekɔ ohomba dia Diolelo diaki Nzambi ndja dia ndjokidia lokombo laki Jehowa. Ɔnkɔnɛ, etena kayokotshama akambo asato wa ntondo wa lo dɔmbɛlɔ dia ɛnyɛlɔ mbayokotshama ehomba woleki weke w’anto. L’etena kɛnɛ, tekɔ la ehomba ekina wa shikaa wakatɛkɛtama lo akambo anɛi wambotshikala lo dɔmbɛlɔ dia ɛnyɛlɔ dia Yeso. Tayɔsɛdingola akambo asɔ lo sawo diayela.