1. Akambo akɔna wakatombe lo ɔnɔnyi wa 66? (Enda osato wele lo mbɔtwɛlɔ.)

OHƆSA dia ndo wɛ mbaki Okristo ɔmɔtshi wakadjasɛka la Jɛrusalɛma l’ɔnɔnyi wa 66. Akambo efula wekɔ lo salema. Owandji w’ase Rɔmɔ welɛwɔ Florus ambova talata 17 oma lo eombelo ka lo tɛmpɛlɔ. Ase Juda wambondama mbala kakɔ ɔtɔi la kɛlɛ. Wambodiaka asɔlayi efula w’ase Rɔmɔ ndo wambota dia wambokondja dipanda oma le ase Rɔmɔ. Koko, ase Rɔmɔ wambosala akambo aha la ntshimbatshimba. L’ɔkɔngɔ wa ngɔndɔ shato tsho, asɔlayi 30000 wambodinga Jɛrusalɛma l’ɛlɔmbwɛlɔ ka Cestius Gallus. Ase Juda wakatɔmbɔkɔ wamboyashɛ lo atshuku wa lo tɛmpɛlɔ, koko l’ekomelo a shimu asɔlayi w’ase Rɔmɔ wambokoma lo mpele dia l’andja dia tɛmpɛlɔ ko wambotatɛ ditola. Anto tshɛ wa l’osomba wambotatɛ mboka wɔma. Ngande wotoyoyaoka lo mɛna akambo asɔ tshɛ?

2. Kakɔna kakahombe Akristo nsala etena kakawɛnyi asɔlayi w’ase Rɔmɔ wambodinga osomba awɔ, ndo ngande wakawayokondja diaaso dia nsala dui sɔ?

² Ɛnɔnyi efula la ntondo, Yeso akahɛmɔla ambeki ande lo kɛnɛ kendana la dikambo sɔ lo mbadjangɛ ate: “Lam’ayonyɛna  Jɛrusalɛma yambodingama l’asɔlayi, kanyeye dia elanyelo kayɔ kaya suke. L’etena kɛsɔ, wanɛ wele la Judeya kawolawɔ otsha l’akona, wanɛ wele l’etei kayɔ kawotombe ndo wanɛ wele lo tosamba watokalolake l’osomba.” (Luka 21:20, 21) Ngande wakawakoke nkitanyiya didjango dia Yeso dia ntomba oma la Jɛrusalɛma, etena kele asɔlayi wakadinge osomba w’otondo? Dikambo dimɔtshi dia diambo diakatombe. Asɔlayi w’ase Rɔmɔ wakatombe oma la Jɛrusalema la nshashimuya. Oko wakate Yeso, ta sɔ ‘diakasusama.’ (Mateo 24:22) Kam’akamɔ asɔlayi, mbakakondja Akristo wa kɔlamelo diaaso dia nkitanyiya didjango dia Yeso dia ndawɔ aha la ntshimbatshimba otsha l’akona. * (Enda nɔtɛ ka l’ɛse ka dikatshi.) L’ɔnɔnyi wa 70, asɔlayi w’ase Rɔmɔ wakakalola la Jɛrusalɛma. L’etena kɛsɔ, vɔ wakalanya osomba. Koko onto tshɛ lakakitanyiya didjango dia Yeso akahandɔ.

3. Akambo akɔna wafɔna la wanɛ wakasalema lo ntambe ka ntondo wayanga mɛna Akristo kem’edja, ndo kakɔna kayangaso nsɛdingola?

³ Ɛhɛmwɛlɔ la wadjango wa Yeso mendanaka ndo la nshi yaso nyɛ. Kem’edja nto, tayanga mɛna akambo wa woho akɔ waamɛ. Yeso akakambe la akambo wakete lo ntambe ka ntondo dia nembetshiya kɛnɛ kayosalema etena kayotatɛ “mfɔnu ka woke” la nshashimuya. (Mateo 24:3, 21, 29) Oko wakahandɔ Akristo waki la kɔlamelo etena kakalanyema Jɛrusalɛma, mbayohandɔ “olui a woke w’anto” etena kayoya elanyelo k’andja w’otondo. (Adia Ɛnyɛlɔ 7:9, 13, 14.) Ekɔ ohomba efula sho nshihodia kɛnɛ kata Bible lo kɛnɛ kendana l’akambo wa lo nshi yayaye asɔ. Lande na? Nɛ dia nsɛnɔ yaso nemanɛka l’akambo asɔ. Diakɔ diele, tayanga nsɛdingola woho wendana onto l’onto l’akambo asɔ.

4. Ngande wayotatɛ mfɔnu ka woke?

⁴ Ngande wayotatɛ mfɔnu ka woke? Tɔ kayotatɛ la elanyelo k’ɛtɛmwɛlɔ wa kashi tshɛ. Lo Bible, ɛtɛmwɛlɔ wa kashi mbelamɛka “Babilɔna ka Woke, nyango wamato wa numba.” (Ɛnyɛlɔ 17:5-7) Lande na kelamɛ ɛtɛmwɛlɔ wa kashi ɔnɛ wamato wa numba? Nɛ dia ewandji w’ɛtɛmwɛlɔ keema la kɔlamelo le Nzambi. Lo dihole dia vɔ nsukɛ la kɔlamelo tshɛ Yeso ndo Diolelo diande, vɔ sukɛka mandji y’ana w’anto ndo minyaka yimba oma lo wetshelo w’oma lo Bible dia vɔ ndeka monga la nshɛngiya. Ɔtɛmwɛlɔ awɔ keema oko ɔtɛmwɛlɔ wa pudipudi w’Akristo w’akitami. (2 Kɔrɛtɔ 11:2; Jakɔba 1:27; Ɛnyɛlɔ 14:4) Ko waa na wayolanya Babilɔna ka woke? Jehowa ayosala dia “nseke dikumi” ya “nyama ka ngala ka beela” “nkotsha kanyi” yande. “Nyama ka ngala ka beela” nembetshiyaka O.N.U, ndo “nseke dikumi” nembetshiyaka atshunda tshɛ wa pɔlitikɛ wawosukɛ.—Adia Ɛnyɛlɔ 17:3, 16-18.

5, 6. Lande na kataso ɔnɛ elanyelo ka Babilɔna ka woke halembetshiya di’anto wa lɔkɔ tshɛ wayodiakema?

⁵ Onde anto tshɛ wa l’ɛtɛmwɛlɔ wa kashi wayodiakema etena kayolanyema Babilɔna ka woke? Ndooko. Jehowa akalodia omvutshi Zɛkariya la nyuma dia mfunda lo dikambo dia kɛnɛ kayosalema. L’etena kɛsɔ, onto ɔmɔtshi laki l’ɔtɛmwɛlɔ wa kashi ayota ate: “Dimi  kema umvutshi, ukambi wekambo mbemi, ne dia dimi leli kangayo umaka nshi yami ya dikenda. Naka untu omotshi ayuwumbula ati: Na puta ku yeli lu anya aye? Ku ndi ayûkaluya diui ati: Yo yeli puta yakamahumo lu luudu l’engenyi ami.” (Zekariya 13:4-6) Mbokɛmaka dia, kaanga ewandji w’ɛtɛmwɛlɔ wayanguna dia vɔ bu ewandji w’ɛtɛmwɛlɔ ndo wayanguna dia vɔ komonga l’ɛtɛmwɛlɔ wa kashi ɛsɔ.

⁶ Kakɔna kayokomɛ ekambi waki Nzambi l’etena kɛsɔ? Yeso akate ate: “Lo mɛtɛ, otondonga nshi shɔ kosusama, tshike ndooko onto lotoshimbamɛ, koko nshi shɔ ya[yo]susama l’ɔtɛ w’asɔnami.” (Mateo 24:22) Lo ntambe ka ntondo, mfɔnu kaki la Jɛrusalɛma ‘kakasusama.’ Dui sɔ diakasha “asɔnami,” mbuta ate Akristo w’akitami diaaso dia ndawɔ. Woho akɔ waamɛ mbele, etenyi ka ntondo ka mfɔnu ka woke ‘kayosusama’ l’ɔtɛ “w’asɔnami.” Atshunda wa pɔlitikɛ, mbuta ate “nseke dikumi” hawotokondja diaaso dia ndanya ekambi waki Nzambi. Koko, ayonga etena ka mondo ka wɔladi kam’ayokomɛ etenyi ka ntondo ka ta sɔ.

7, 8. Naa diaaso diayonga l’ɔkɔngɔ w’ɛtɛmwɛlɔ wa kashi tshɛ nanyema, ndo kakɔna kayotshikitanya ekambi wa Nzambi l’anto akina l’etena kɛsɔ?

⁷ Kakɔna kayosalema l’ɔkɔngɔ w’ɛtɛmwɛlɔ wa kashi ndanyema? Ɔsɔ ayonga etena ka nkɛnɛmɔla mɛtɛ kɛnɛ kele l’etema aso. Lo etena kɛsɔ, anto efula wayoyanga ekokelo ndo ekimanyielo oma le atshunda w’anto, mbuta ate “ave wa l’akona.” (Ɛnyɛlɔ 6:15-17) Koko, ekambi wa Jehowa wayokongɛ ekokelo oma le nde. Etena ‘kakasusama’ ta dia lo ntambe ka ntondo, ɔsɔ komonga etena k’ase Juda tshɛ kadimola etema mbala kakɔ ɔtɔi dia monga lo Lokristo la mɛtɛ. Koko, ɔsɔ aki etena ka wanɛ wamboshilaka monga Akristo ntomba oma la Jɛrusalema lo ndjela didjango diaki Yeso. Woho akɔ waamɛ mbele, lo nshi yayaye etena ‘kayosusama’ ta diayɔlɔshama Babilɔna ka Woke, hatolongamɛ di’anto efula wayokadimola etema mbala kakɔ ɔtɔi dia monga lo Lokristo la mɛtɛ. Koko, ɔsɔ ayonga diaaso dia atɛmɔdi tshɛ wa mɛtɛ mɛnya ngandji kokawɔ Jehowa ndo nsukɛ Akristo w’akitami.—Mateo 25:34-40.

⁸ Hateye shikaa kɛnɛ kayeta lo etena kɛsɔ k’ehemba. Tatolongamɛke dia lɔsɛnɔ layonga wɔdu, koko ayonga ohomba sho ndjahombia. Lo ntambe ka ntondo, Akristo wakatshike mvudu yawɔ ndo wakakikɛ ekakatanu wa wolo dia ntshikala la lɔsɛnɔ. (Makɔ 13:15-18) Toyambole onto l’onto ɔnɛ: ‘Onde dimi lekɔ suke dia ntshika lomombo la l’emunyi? Onde dimi mbetawɔka nsala kɛnɛ tshɛ kele ɔlɔlɔ dia ntshikala la kɔlamelo le Jehowa?’ Ohokanyiya yema! L’etena kɛsɔ, shoamɛ ato mbayɔtɛmɔlaka Nzambi kaso oyadi kɛnɛ tshɛ kayosalema oko wakasale omvutshi Danyɛlɛ.—Danyele 6:10, 11.

9, 10. a) Losango lakɔna layewoya ekambi wa Nzambi lo mfɔnu ka woke? b) Kakɔna kayosala atunyi w’ekambi wa Nzambi?

⁹ Mfɔnu ka woke hatonga etena ka  nsambisha ‘lokumu l’ɔlɔlɔ la Diolelo.’ Laasɔ ko etena ka nsambisha losango lakɔ kambeta. L’etena kɛsɔ, “ekomelo” kayoya! (Mateo 24:14) Ekambi waki Nzambi wayewoya la dihonga tshɛ losango la wolo la kilombo layonga la nshɛngiya le anto tshɛ. Ondo losango lɔsɔ layɛnya dia andja wa kɔlɔ waki Satana wayanga ndanyema tshɛ lo tshɛ. Bible mbɛdikaka losango lɔsɔ la mbɔkɔ ya weke etena katatɔ ɔnɛ: “Mbɔkɔ ya weke yele lɔwɔkɔ la lɔwɔkɔ laki la wotsho wele oko kilɔ akumi ahende yakakwɛka anto oma l’olongo oko mvula, ko anto wakatɛngɛ Nzambi l’ɔtɛ wa sui dia mvula ka mbɔkɔ, nɛ dia sui sɔ diaki wolo wa mamba.”—Ɛnyɛlɔ 16:21.

¹⁰ Atunyi aso wayoka losango la wolo lɔsɔ. Jehowa akalodia omvutshi Ezekiyɛlɛ la nyuma dia nembetshiya woho wayosala olui wa wedja welamɛ lo Bible ɔnɛ Ngɔngɔ ka la Mangɔngɔ lo mbuta ɔnɛ: “Khumadiondjo [Jehowa] kata ati: Lu lushi lako, tukanyi tayuya lu yimba yaye, ku we ayusanguya esangweyu ka kolo. Ku we ayuta wati: Dimi layumbela lu ngelu yaha la kumbu ya peli. Dimi layutsho le wane weli la mumuya, wudjashi la lutui tshitshi, le wane tshe waha adjaselu awo la peli, ndu waha la tukengeti kuyanga kuki. Dimi layutsho dia ntosa diango dia dimbu, ndu dia ntosa diango dia lohotola. Dimi layukadimula lunya lami dia ntolosha ahuli wakalanyema wambulala antu kakiane, ndu dia ntolosha antu wakasanganyema uma lu wedja, wakakundja dungalunga la diango, wudjashi k’atei a kete.” (Ezekiele 38:10-12) Otshikitanyi l’anto akina tshɛ, ekambi waki Nzambi hawotoka wɔma wate kana oko anto “wudjashi k’atei a kete.” Wedja hawotokoka mbikikɛ nto. Vɔ wayonga la kɛlɛ k’efula dia ndɔsha Akristo w’akitami wa Jehowa ndo wanɛ waasukɛ.

11. a) Kakɔna kahombaso mbohɔka lo kɛnɛ kendana la woho wayoyelana akambo lo mfɔnu ka woke? b) Kakɔna kayosala anto etena kayowɛna tolembetelo?

¹¹ Kakɔna kayosalema oma laasɔ? Bible hatotɛ woho shikaa wayoyelana akambo, koko ondo akambo amɔtshi wayosalema l’etena kakɔ kaamɛ. Lo prɔfɛsiya kande kendana la ekomelo ka dikongɛ di’akambo nɛ, Yeso akate ate: “Tolembetelo tayoyala lo wonya, lo ngɔndɔ ndo lo tɔɔtɔ ndo asui wayoyala lo wedja wa la nkɛtɛ, nɛ dia hawoteya kɛnɛ ka nsala l’ɔtɛ wa lohelo l’asuku w’ashi wa lo ndjale. Anto wayɔkɔ hohakayi l’ɔtɛ wa wɔma ndo wa elongamelo k’akambo wayosalema lo nkɛtɛ k’otondo, nɛ dia diangɔ dia wolo dia l’olongo diayosutshasutshama. Ko l’etena kɛsɔ, vɔ wayɛna Ɔna onto ayaye lo dinge la wolo ndo la lotombo l’efula.” (Luka 21:25-27; adia Makɔ 13:24-26.) Onde okotshamelo wa prɔfɛsiya kɛsɔ wayonga ndo l’akambo wotsha anto wɔma ndo la tolembetelo l’olongo? Tokonge tsho, tayɛna kɛnɛ kayosalema. Koko, sho mbeyaka ɔnɛ lam’ayɛna atunyi wa Nzambi tolembetelo, vɔ wayoka wɔma ndo wayosaka lokomba.

12, 13. a) Kakɔna kayeta etena kayoya Yeso “la wolo ndo la lotombo l’efula”? b) Kakɔna kayosala ekambi waki Nzambi l’etena kɛsɔ?

¹² Kakɔna kayeta etena kayokalola Yeso “la wolo ndo la lotombo l’efula”? Nde  ayofuta wanɛ wele la kɔlamelo ndo ayosha wanɛ wele bu la kɔlamelo dilanya. (Mateo 24:46, 47, 50, 51; 25:19, 28-30) Yeso akakambe la wɛɛla ɔmɔtshi dia ndeka nembetshiya dui sɔ dimɛna. Nde akate ate: “Lam’ayoya Ɔna onto lo lotombo lande la andjelo tshɛ kaamɛ la nde, nde ayodjasɛ lo kiti kande ka lowandji ka lotombo. Ko wedja tshɛ wayotshumana la ntondo kande, ko nde ayokakitola anto woho watokakitolaka olami ɛkɔkɔ la mbudi. Nde ayetsha ɛkɔkɔ lo lonya lande l’omi ndo mbudi lo lonya lande la lɔmɔsɔ.” (Mateo 25:31-33) Kakɔna kayokomɛ ɛkɔkɔ ndo mbudi? Vɔ tshɛ wayolomboshama. Mbudi, mbuta ate wanɛ wele bu la kɔlamelo “wayotshɔ lo elanyelo ka pondjo.” Koko ɛkɔkɔ, mbuta ate wanɛ wele la kɔlamelo wayokondja lɔsɛnɔ la pondjo.—Mateo 25:46.

¹³ Kakɔna kayosala mbudi etena kayoweya ɔnɛ vɔ wayolanyema? Vɔ “wayoyatshatsha la lonyangu.” (Mateo 24:30) Kakɔna kayosala Akristo w’akitami la wanɛ waasukɛ? Vɔ wayosala kɛnɛ kakate Yeso ɔnɛ: “Lam’ayotatɛ akambo asɔ salema, kanyokeketale ndo kanyonge la dihonga, nɛ dia etshungwelo kanyu kaya suke.”—Luka 21:28.

14, 15. Olimu akɔna w’otshumanyelo wayosalema l’ɔkɔngɔ wa Ngɔngɔ ka la Mangɔngɔ ntatɛ ndɔsha ekambi wa Nzambi, ndo ngande wayosalema dui sɔ?

¹⁴ Kakɔna kayotomba l’ɔkɔngɔ wa Ngɔngɔ ka la Mangɔngɔ ntatɛ ndɔsha ekambi wa Nzambi? Bible mbutaka dia Ɔna onto “ayotoma andjelo, ko vɔ wayotshumanya asɔnami ande kaamɛ  oma lo atshuku akɔ anɛi, oma lo koma mɔtshi ya nkɛtɛ polo lo koma kina y’olongo.” (Mako 13:27; Mateo 24:31) Olimu ɔsɔ w’otshumanyelo hendana la etena kakatatɛ Akristo w’akitami nsɔnama. Ndo dui sɔ hendana la wodjelo wa djembetelo y’ekomelo le Akristo w’akitami weke la nkɛtɛ. (Mateo 13:37, 38) Wodjelo wa djembetelo ɔsɔ wayosalema yema la ntondo ka mfɔnu ka woke ntatɛ. (Ɛnyɛlɔ 7:1-4) Ko, kakɔna kalembetshiya olimu w’otshumanyelo ɔsɔ? Ɔsɔ ekɔ etena kayotshɔ Akristo w’akitami weke lanɛ la nkɛtɛ l’olongo ndo kayowotolongola difuto diawɔ. (1 Tɛsalɔnika 4:15-17; Ɛnyɛlɔ 14:1) Dikambo sɔ diayosalema lo etena kɛmɔtshi l’ɔkɔngɔ wa Ngɔngɔ ka la Mangɔngɔ ntatɛ ndɔsha ekambi wa Nzambi. (Ezekiele 38:11) Oma laasɔ, paka oko wakadite Yeso “anto w’ɛlɔlɔ wayɔhɛta oko osase wa wonya lo Diolelo dia Shɛwɔ.”—Mateo 13:43. * (Enda nɔtɛ ka l’ɛse ka dikatshi.)

¹⁵ Onde dui sɔ nembetshiyaka ɔnɛ Akristo w’akitami “wayɛmbama otsha l’olongo”? Anto efula wa lo Lokristokristo mbetawɔka dia Akristo wayɛmbama otsha l’olongo l’alemba w’emunyi. Vɔ mbetawɔka nto dia wayɛna Yeso la washo ayaye etena kayondokalola dia ndjolɛ nkɛtɛ. Koko, Bible mɛnyaka hwe dia okalwelo wa Yeso hawotɛnama la washo etena katatɔ ɔnɛ: “Djembetelo ya Ɔna onto yayɛnama l’olongo” ndo Yeso ayoya “lo wange wa l’olongo la wolo.” (Mateo 24:30) Bible mbutaka nto dia “emunyi la dikila hawokoke nkita Diolelo dia Nzambi.” Ɔnkɔnɛ, wanɛ wayotshɔ l’olongo pombaka ntondo “[n]kadimɔ mbala kakɔ ɔtɔi, lo mayi ka sso, lam’ayoda dimama di’ekomelo.” * (Enda nɔtɛ ka l’ɛse ka dikatshi.) (Adia 1 Kɔrɛtɔ 15:50-53.) Sho hatokambe la etelo k’ɔnɛ “mɛmbama otsha l’olongo” lanɛ dia nembetshiya dikambo sɔ, nɛ dia tɔ kekɔ la diɔtɔnganelo la wetshelo wa kashi wa lo Lokristokristo. Koko, Akristo w’akitami wa kɔlamelo weke la nkɛtɛ wayotshumanyema kaamɛ mbala kakɔ ɔtɔi.

16, 17. Kakɔna kayosalema la ntondo ka diwala dia Ɔna Ɔkɔkɔ salema?

¹⁶ Kam’ayokoka Akristo w’akitami 144 000 l’olongo, ɛlɔngɔswɛlɔ w’ekomelo wa diwala dia Ɔna Ɔkɔkɔ wayotatɛ. (Ɛnyɛlɔ 19:9) Koko, dui dikina pombaka salema la ntondo ka etena k’ɔngɛnɔngɛnɔ kɛsɔ. Tatohɛke dia Ngɔngɔ ayɔlɔsha ekambi waki Nzambi etena keke atshikadi w’Akristo w’akitami amɔtshi la nkɛtɛ. (Ezekiele 38:16) Kakɔna kayosala ekambi wa Nzambi? Vɔ wayokitanyiya wadjango wata ɔnɛ: ‘Hatonga ohomba nyu ndɔ ta nɛ. Nyemale lo ahole anyu, nyotshikale ki kele nyende panda kayanga nyosha Jehowa. . . . Tanyokake wɔma ndo tanyatɛke asolo.’ (2 Ekondo 20:17) L’etena kɛmɔtshi l’ɔkɔngɔ wa Ngɔngɔ ntatɛ ndɔsha ekambi wa Nzambi, atshikadi w’Akristo w’akitami tshɛ weke la nkɛtɛ wayɔsama otsha l’olongo. Diakɔ diele Ɛnyɛlɔ 17:14 totɛka kɛnɛ kayosalema l’olongo lo kɛnɛ kendana la ta dia Ngɔngɔ. Atunyi w’ekambi wa Nzambi “wayɔlɔsha Ɔna Ɔkɔkɔ, koko lam’ele nde ekɔ Nkumi ka waa nkumi ndo Nkumekanga ka nkumi ya dikanga, Ɔna Ɔkɔkɔ ayowalɛndja.  Ndo nto, wanɛ wele kaamɛ la nde wakelamɛ ndo wakasɔnama ndo wele la kɔlamelo wayowalɛndja.” Ɔnkɔnɛ, Yeso kaamɛ la nkumi ya dikanga yande y’akitami 144 000 yayonga l’olongo, wayotshungola ekambi waki Nzambi wa la nkɛtɛ.

¹⁷ Etshungwelo kɛsɔ kayoyala etombelo w’oma lo ta di’Armangɛndɔna, diayotombola lokombo l’ekila la Jehowa. (Ɛnyɛlɔ 16:16) Wanɛ tshɛ wayɔsama oko mbudi, mbuta ate wanɛ wahatonga la kɔlamelo wayodiakema. Anto wa kɔlɔ hawotonga nto la nkɛtɛ ndo “olui a woke w’anto” wayohandɔ l’Armangɛndɔna. L’ekomelo, ɔngɛnɔngɛnɔ w’ekomelo wɔtɛkɛtami lo dibuku dia Ɛnyɛlɔ wayonga, mbuta ate diwala dia Ɔna Ɔkɔkɔ diayosalema. (Ɛnyɛlɔ 21:1-4) * (Enda nɔtɛ ka l’ɛse ka dikatshi.) Anto tshɛ wayohandɔ la nkɛtɛ wayonga anto wetawɔma le Nzambi, vɔ wayɛna ngandji k’efula kawaokande ndo lokaho lande. Tekɔ lo kongɛ etena kɛsɔ l’asolo walomɔlomɔ. Ande fɛtɛ ka diwala kayosalema lee!—Adia 2 Petero 3:13.

18. Oko wele akambo w’amɛna asɔ wayanga salema kem’edja, kakɔna kamboyoyashikikɛ dia nsala?

¹⁸ Oko wele akambo w’amɛna asɔ wayanga salema kem’edja, kakɔna kahomba onto tshɛ la l’atei aso nsala oma ko kakianɛ? Jehowa akalodia ɔpɔstɔlɔ Petero la nyuma dia mfunda ɔnɛ: “Lam’ele diangɔ sɔ tshɛ diayɔlɛlɔ lo yoho shɔ, nyokanyiya weho w’anto wahombanyu monga lo lɔkɛwɔ l’ekila ndo lo ditshelo diɛnya dia nyekɔ lo mamema Nzambi, etena kakonganyu ndo kohɔnyu woongelo wa lushi la Jehowa . . . Ɔnkɔnɛ analengo wa ngandji le, lam’ele nyekɔ lo nkonga akambo asɔ, nyosale kɛnɛ tshɛ kakokanyu nsala dia ndjotanema aha la vadi ndo aha l’ɛkɔmɔ ndo lo wɔladi.” (2 Petero 3:11, 12, 14) Ɔnkɔnɛ, nyɛsɔ toyashikikɛ dia namaka ɔtɛmwɛlɔ aso pudipudi, aha monga la losambi l’ɛtɛmwɛlɔ wa kashi ndo tosuke Yeso Kristo nkumekanga ka wɔladi.