1, 2. a) Diɔtɔnganela diakɔna diele lam’asa monga la kɔlamelo le Jehowa ndo aha mbeta lo wedi w’akambo wa diatɔnelo wa l’andja ɔnɛ? (Enda osato wele lo mbɔtwɛlɔ.) b) Lo na onga anto efula la kɔlamelo, ko dui sɔ mbelaka etombelo akɔna?

EKAMBI wa Jehowa wokongaka la lomangemange ndo hawɔtɔ l’akambo wadja diatɔnelo, ɛnyɛlɔ ngandji ka wodja, lokoho la demba ndo dioho. Lande na? Nɛ dia sho mbokaka Jehowa ngandji, tekɔ la kɔlamelo le nde ndo sho mbokitanyiyaka. (1 Joani 5:3) Oyadi lo dihole diakɔna diadjasɛso kana diakatotɔ, sho ndjelaka atɔndɔ waki Nzambi. Monga la kɔlamelo le Jehowa ndo lo Diolelo diande mbele dui dioleki akambo akina tshɛ ohomba la fwa. (Mateo 6:33) Diakɔ diakokaso mbuta ɔnɛ sho “keema ase andja ɔnɛ.”—Adia Joani 17:11, 15, 16; Isaya 2:4.

² Ɛlɔ kɛnɛ, anto efula wa l’andja ɔnɛ wekɔ la kɔlamelo lo wodja awɔ, dioho, mbekelo ndo kaanga lo elui awɔ wa tɔkɛnyɔ. Lonyangu ko, dui sɔ konyaka efula ka l’atei awɔ lo shɛmanedi, mpetsha anto akina ndo lo tena dimɔtshi ndjaka wanɛ wele lo lɛkɛ lokina. Kaanga mbahatɔtɔ lo wedi ɔmɔtshi lo akambo w’ɔlɔshanelo asɔ, anto asɔ koka monga la shɛngiya le so ndo le  nkumbo yaso ndo sho koka diɛnɛ l’akambo efula wa wɛngiya. Mbeyaka monga dui dia wɔdu efula mbeta lo wedi w’emboledi etena kɔsawɔ tɛdikɔ tele keema la losembwe l’ɔtɛ weyaso ɔnɛ Nzambli akatotonge la dikoka dia mbeya kɛnɛ kele ɔlɔlɔ kana bu. (Etatelu 1:27; Euhwelu k’Elembe 32:4) Ngande watoyoyaokaka etena kasalema dui dimɔtshi diele keema la losembwe? Onde wɛ totshikalaka lomangemange kana todisukɛka?

3, 4. a) Lande na kahatete lo wedi ɔmɔtshi etena koonga awui w’ɔlɔshanelo? b) Kakɔna kayotɔsɛdingola lo sawo nɛ?

³ Anto efula mbɔtɔka l’awui w’ɔlɔshanelo nɛ dia emboledi mbaetawoyaka ɔnɛ paka lo nsala ngasɔ mbakoka onto monga ose wodja l’oshika. Koko sho tekɔ lo ndjela Yeso. Diakɔ diele, sho hatɔtɔ l’awui wa pɔlitikɛ ndo hatotshu lo ta. (Mateo 26:52) Akristo wa mɛtɛ hawɔshi dia olui ɔmɔtshi ndeka okina l’andja waki Satana ɔnɛ. (2 Kɔrɛtɔ 2:11) Sho hatokoke ndjatambiya kaanga lo dikambo ɔtɔi di’ɔlɔshanelo dia l’andja ɔnɛ.—Adia Joani 15:18, 19.

⁴ Lam’ele sho bu kokele, ondo anto amɔtshi l’atei aso weeke la tokanyi ta kɔlɔ otsha le anto wotshikitanyi la wɔ. (Jeremiya 17:9; Ɛfɛsɔ 4:22-24) Lo sawo nɛ, tayɔsɛdingola atɔndɔ amɔtshi wayotokimanyiya dia ndɔshana la tokanyi tɔsɔ ndo tokanyi tadja diatɔnelo. Tayɔsɛdingola nto woho wakokaso monga la kɔlamelo lo Diolelo lo ndjaekiya dia kanyiyaka woho wakanyiya Jehowa nde la Yeso.

5, 6. Etena kaki Yeso la nkɛtɛ, ngande wakandɔsaka elui w’anto wotshikitanyi, ndo lande na?

⁵ Naka wɛ aya l’okakatanu dia ntshikala lomangemange kana ntona dia sukɛ wedi ɔmɔtshi, yambola ɔnɛ: ‘Ngande wotosala Yeso lo dikambo nɛ?’ Etena kaki Yeso la nkɛtɛ, ase Juda, ase Ngalileya, ndo ase Samariya wakalɔshanaka ndo vɔ kombokanaka. Ohokana yimba la bɛnyɛlɔ nɛ. Ase Juda la ase Samariya kɔtɛkɛtshanyaka. (Joani 4:9) Afarisɛ ndo Asadukɛ kosangaka lolemi l’akambo efula. (Etsha 23:6-9) Ase Juda wakekaka Ɛlɛmbɛ wakafɔnyaka ɔnɛ vɔ ndeka anto akina waki kombeka. (Joani 7:49) Ndo anto efula wakahetshaka afutshanyi w’elambo ndo ase Rɔmɔ. (Mateo 9:11) Koko, Yeso kɔmbɔtɔ lo akambo w’ɛlɔshanelo asɔ. Kaanga mbele nshi tshɛ, nde aketshaka akambo wa mɛtɛ wendana la Jehowa ndo mbakandeyaka ɔnɛ Isariyɛlɛ ekɔ wodja wa laande waki Nzambi, ndooko lushi lakandetsha ambeki ande ɔnɛ vɔ ndeka anto akina. (Joani 4:22) Koko, nde akawaetsha dia nanga anto tshɛ.—Luka 10:27.

⁶ Lande na kele Yeso kɔmbɔsa di’olui ɔmɔtshi w’anto ndeka okina? L’ɔtɛ wa woho wɔsande nde la She anto. Jehowa akatonge anto dia vɔ ndodia nkɛtɛ la nkoho y’alemba yotshikitanyi. (Etatelu 1:27, 28) Diakɔ diele, Jehowa la Yeso hawɔshi dia woho ɔmɔtshi wa lokoho la demba, wodja kana ɔtɛkɛta ndeka okina. (Etsha 10:34, 35; Ɛnyɛlɔ 7:9, 13, 14) Sho pombaka mbokoya ɛnyɛlɔ ka kokele kɛsɔ.—Mateo 5:43-48.

7, 8. a) Lo wedi akɔna wahombaso monga, ndo lande na? b) Kakɔna kahombaso mbohɔka lo kɛnɛ kendana la okandwelo w’ekakatanu w’anto?

 ⁷ Lande na kahatahombe nsukɛ ɔnɔmbɔdi ɔmɔtshi w’onto kana lowandji lɔmɔtshi? Nɛ dia tekɔ lo wedi wa Jehowa. Nde mbele Ɔnɔmbɔdi aso. L’ekambɔ k’Ɛdɛna, Satana akate dia Jehowa keema Ɔnɔmbɔdi wa dimɛna w’anto. Satana akalange mbetawoya anto ɔnɛ yoho yande ya nsala akambo ndeka ya Nzambi dimɛna. Jehowa totshikaka dia shoamɛ nsɔna wedi walangaso mbeta. Ko kayotota lo dikambo diayɛ? Onde wɛ kitanyiyaka Jehowa l’ɔtɛ wetawɔyɛ ɔnɛ yoho yande ya nsala akambo mboleki yayɛ dimɛna? Onde wɛ shikikɛka dia paka Diolelo diande mbakoka nkandola ekakatanu wele la so? Kana onde wɛ sukɛka kanyi y’ɔnɛ anto koka ndjalɔmbɔla vɔamɛ dimɛna aha l’ekimanyielo ka Nzambi?—Etatelu 3:4, 5.

⁸ Ɛnyɛlɔ, naka onto ambokombola kanyi yayɛ lo dikambo dia tshunda dimɔtshi dia pɔlitikɛ, ase olui ɔmɔtshi wa pɔlitikɛ kana atshunda amɔtshi wa woho akɔ, ngande wayoyokadimola? Elui ɛmɔtshi wa ngasɔ koka monga la kanyi y’ɔlɔlɔ ndo nangaka nkimanyiya anto. Koko sho mbeyaka dia paka Diolelo diaki Jehowa to mbakoka nkandola ekakatanu w’anto ndo minya akambo wa wɛngiya tshɛ. Ndo nto, sho ndjelaka ɛlɔmbwɛlɔ katosha Jehowa l’etshumanelo, lo dihole dia onto l’onto salaka kɛnɛ kafɔnyande ɔnɛ kekɔ dimɛna. Diakɔ diele, etshumanelo kekɔ kaamɛ.

9. Okakatanu akɔna waki la Akristo wa lo ntambe ka ntondo, ndo kakɔna kakawahombe nsala?

⁹ Lo ntambe ka ntondo, Akristo amɔtshi waki la Kɔrɛtɔ waki la tokanyi ta diatɔnelo ndo wakataka ɔnɛ: “‘Dimi oseka Pɔɔlɔ,’ ‘dimi oseka Apolo,’ ‘dimi oseka Kɛfasi,’ ‘dimi oseka Kristo.’” Lam’akoke Pɔɔlɔ dui sɔ, nde akanyange efula. Ɔsɔ aki okakatanu wa woke efula, nɛ dia wɔladi wa l’etshumanelo waki lo waale. Diakɔ diele nde akambola anango la akadiyɛnde ɔnɛ: ‘Onde Kristo ambatɔna?’ Pɔɔlɔ akaalake ɔnɛ: “Analengo, dimi lambonyɔsɛngasɛnga lo lokombo la Nkumɛso Yeso Kristo dia nyu tshɛ nsanga lolemi ndo diaha diatɔnelo monga lam’asanyu, koko dia nyu tshɛ monga kaamɛ lo yimba yaamɛ ndo lo tokanyi taamɛ.” Alako asɔ mendanaka ndo la so ɛlɔ kɛnɛ. Diatɔnelo hadiohombe monga kaanga fwushi l’etshumanelo.—1 Kɔrɛtɔ 1:10-13; adia Rɔmɔ 16:17, 18.

10. Kakɔna kakohola Pɔɔlɔ Akristo, ndo wetshelo akɔna wakondjaso oma lo dui sɔ?

¹⁰ Pɔɔlɔ akohola Akristo w’akitami dia vɔ wekɔ ase olongo ndo vɔ hawohombe ndjatambiya lo “akambo wa l’andja ɔnɛ.” (Filipɛ 3:17-20) * (Enda nɔtɛ ka l’ɛse ka dikatshi.) Akristo w’akitami wekɔ atomami wele enyimpala wa Nzambi la Kristo. Etena konga otomami lo wodja okina, nde hakoke mbɔtɔ l’akambo wa diatɔnelo ndo wa pɔlitikɛ wa lɛkɔ. Woho akɔ waamɛ mbele,  bu dui dia dimɛna dia Akristo w’akitami mbɔtɔ lo akambo wa diatɔnelo ndo wa pɔlitikɛ wa l’andja ɔnɛ. (2 Kɔrɛtɔ 5:20) Wanɛ wele la elongamelo ka nsɛna pondjo pondjo la nkɛtɛ vɔ la wɔ, wekɔ la kɔlamelo lo Diolelo dia Nzambi ndo hawɔtɔ lo awui wa pɔlitikɛ wa l’andja ɔnɛ.

11, 12. a) Dionga diakɔna diahombaso mbewɔ naka sho nangaka ntshikala la kɔlamelo lo Diolelo diaki Nzambi? b) Ngande wakɔsaka kadiyɛso kɛmɔtshi anto amɔtshi, ndo kakɔna kakookimanyiya dia ntshikitana?

¹¹ Lo ahole efula wa l’andja ɔnɛ, anto efula mongaka la diɔtɔnganelo dia laande la wanɛ wele la wɔ ɔlɔndji waamɛ, dioho diaamɛ ndo ɔtɛkɛta waamɛ. Mbala efula vɔ mongaka la ofunu wa ahole wakawotɔ. Koko, hatohombe mbetawɔ dia tokanyi tɔsɔ monga la nshɛngiya le so. Koko sho pombaka ntshikitanya yoho yaso ya nkanyiya ndo mbekiya nkum’etema yaso l’oyango wa sho nama lomangemange laso l’oseka dui tshɛ. Ngande wakokaso nsala dui sɔ?

¹² Ɛnyɛlɔ, Mirjeta * (enda nɔtɛ ka l’ɛse ka dikatshi) akotɔ l’osomba wakelamɛka ex-Yougoslavie. L’ɛtshi ka nkɛtɛ kakandole, anto wakahetshaka waoho wa Serbes. Etena kakandeke akambo wendana la Jehowa, nde akayoshihodia ɔnɛ Jehowa hɔshi dia olui ɔmɔtshi w’anto ndeka okina, koko Satana mbalanga di’anto petshana lam’asawɔ. Diakɔ diele, nde akayosala la wolo dia ntshikitanya ekanelo kande ka yimba. Koko, etena kakatatɛ ndɔshana waoho wotshikitanyi wa l’ɛtshi ka nkɛtɛ kakandadjasɛka, Mirjeta akayotatɛ monga nto la tokanyi ta kɔlɔ otsha le waoho wa Serbes. Nde kondjolanga mbasambisha nto. Nde akayeya dia dui sɔ diaki kɔlɔ, diakɔ diakandalɔmbɛ Jehowa dia mbokimanyi dia ntshika monga l’ekanelo kɛsɔ. Nde akawɔlɔmbɛ nto dia mbokimanyiya dia nde ntatɛ nkamba olimu w’ombatshi mboka. Mirjeta mbutaka ate: “Lakayɛna dia ndjasha tshɛ l’olimu w’esambishelo mbele ekimanyielo koleki. Lo ndjasha l’olimu ɔsɔ, lakayotatɛ mbokoya ngandji ka Jehowa, ndo lakayokashimɔ ko laya bu la tokanyi ta kɔlɔ tɔsɔ.”

13. a) Kakɔna kakakomɛ Zoila, ndo kakɔna kakandasale? b) Wetshelo akɔna wakondjaso oma lo ɛnyɛlɔ ka Zoila?

¹³ Kadiyɛso Zoila, akonɔ oma la Mexique otsha l’Erɔpɛ. Lo etshumanelo kakandatonga, aki ndo anangɛso l’akadiyɛso w’oma l’Amérique Latine. Zoila mbutaka ɔnɛ amɔtshi l’atei awɔ wakatɛtɛmɔlaka wodja aso, mbekelo ndo mishiki w’oma lɛkɔ. Zoila akanyangaka dui sɔ, ko nde akalɔmbɛ Jehowa dia mbokimanyiya di’aha nde lawɔ ndjonga ngasɔ. Ngande wototosala otondonga sho mbaki la ntondo ka dikambo diaki la nde sɔ? Anangɛso la akadiyɛso amɔtshi hawɔngɛnangɛna etena kokawɔ anto akina watɛkɛta kɔlɔ lo dikambo dia ngelo yakawotɔ. Diakɔ mbele, hatohombe pondjo mbuta kana nsala dui dimɔtshi diakoka mɛnya ɔnɛ olui ɔmɔtshi w’anto ndeka okina. Hatohombe mbidja diatɔnelo l’etshumanelo kana lo dihole dikina.—Rɔmɔ 14:19; 2 Kɔrɛtɔ 6:3.

14. Kakɔna kakoka kokimanyiya dia mbɔsa anto akina oko wawaɔsa Jehowa?

¹⁴ Sho tshɛ mbeyaka di’ekambi wa Jehowa wekɔ kaamɛ oko ase wodja ɔtɔi, diakɔ diele hatohombe pondjo mfɔnya ɔnɛ dihole kana wodja ɔmɔtshi ndeka okina. Koko ase nkumbo kana asukanyi  ayɛ koka kotshutshuya dia wɛ ndeka nanga dihole diakayotɔ. Ondo diakɔ diele lo tena dimɔtshi wɛ ndjongaka la tokanyi ta kɔlɔ otsha le anto wa lo wedja ekina, waoho, ɛtɛkɛta kana nkoho y’alemba. Kakɔna kakoka kokimanyiya dia ntshikitanya ekanelo kɛsɔ? Ele lo nkana yimba lo woho wɔsa Jehowa anto wasɛma wodja awɔ kana wafɔnya ɔnɛ vɔ ndeka anto akina. Sala eyangelo efula lo dikambo sɔ lo wekelo ayɛ w’onto ndamɛ kana lo Ɔtɛmwɛlɔ wa lo nkumbo. Oma laasɔ, lɔmba Jehowa dia kokimanyiya dia mbɔsa anto akina oko wawaɔsande.—Adia Rɔmɔ 12:2.

15, 16. a) Kakɔna kakoka anto amɔtshi nsala l’ɔtɛ wotshikitanyiso la wɔ? b) Ngande wakoka ambutshi nkimanyiya anawɔ dia ntshikala la kɔlamelo le Jehowa?

¹⁵ Sho nangaka kambɛ Jehowa la nkum’otema ka dimɛna, diakɔ diele lo tena dimɔtshi sho nɔmbamaka dia ntshikitana l’asekaso wa l’olimu, wa la kalasa, asukanyi kana ewotɔ aso. (1 Petero 2:19) Yeso akatɔhɛmɔla ɔnɛ anto akina wayotohetsha l’ɔtɛ wotshikitanyiso la wɔ. Tatohɛke di’anto efula watɔlɔsha haweye akambo wendana la Diolelo diaki Nzambi. Diakɔ diele, vɔ hawoshihodia lande na kele ekɔ ohomba le so dia monga la kɔlamelo lo Diolelo diaki Nzambi, koko aha lo mandji y’ana w’anto.

¹⁶ Dia monga la kɔlamelo le Jehowa, sho pombaka mbokitanyiya oyadi kakɔna tshɛ kakoka anto akina tosalɛ kana totɛ. (Danyele 3:16-18) Ɛlɔngɔlɔngɔ l’esekaseka koka ndeka monga l’okakatanu dia ndjatshikitanya l’anto akina. Ambutshi le,  nyokimanyiya ananyu dia vɔ monga la dihonga la kalasa. Ananyu koka monga la wɔma dia ntona ntɛmɔla dalapo kana ntona monga lo fɛtɛ mɔtshi ya lo wodja. Etena kasalanyu Ɔtɛmwɛlɔ wa lo nkumbo, nyu koka nsɛdingola woho wɔsa Jehowa akambo asɔ. Nyowaetsha woho wakokawɔ nembetshiya anto akina kɛnɛ ketawɔwɔ hwe hwe ndo la dilɛmiɛlɔ tshɛ. (Rɔmɔ 1:16) Ndo nto, naka kokaka kete nyokimanyiya ananyu dia nsawola l’embetsha awɔ ndo mbalembetshiya kɛnɛ ketawɔso.

17. Tokanyi takɔna tahombaso mbewɔ, ndo lande na?

¹⁷ Tena tshɛ sho ngɛnangɛnaka mbo ya ndɛ, ɔtɛkɛta, ahole w’elangala ndo mbekelo ya lo dihole diakatole. Ko, onde sho mbɔsaka dia kɛnɛ kalangaso ndeka kɛnɛ kalanga anto akina? Jehowa nangaka dia sho ngɛnangɛna diangɔ diotshikitanyi diakandatonge. (Osambu 104:24; Ɛnyɛlɔ 4:11) Ko laasɔ, lande na ntshininala dia mɛnya ɔnɛ yoho mɔtshi ya nsala akambo ndeka yoho kina?

18. Lande na kele ekɔ dimɛna dia sho mbɔsa anto akina woho wawaɔsa Jehowa?

¹⁸ Jehowa nangaka dia weho w’anto tshɛ mbeka akambo wendana la nde, dia mbɔtɛmɔla ndo dia nsɛna pondjo pondjo. (Joani 3:16; 1 Timɔte 2:3, 4) Diakɔ mbele, naka anangɛso l’akadiyɛso wambosha tokanyi totshikitanyi la taso, ayonga dui dia lomba sho mbahokamɛ l’edja tshɛ kele tokanyi tawɔ mbetawɔmaka le Jehowa. Naka sho nsala dui sɔ, kete lɔsɛnɔ laso layonga dimɛna efula ndo l’ɔngɛnɔngɛnɔ ndo tayonga kaamɛ l’anangɛso la akadiyɛso. Oko wakatadiɛnyi, lam’ele tekɔ la kɔlamelo le Jehowa ndo lo Diolelo diande, hatokoke mbeta lo wedi ɔmɔtshi etena kasalema ɛlɔshanelo l’andja ɔnɛ. Sho tonaka ɔsɛmɔ ndo akambo wa shɛmanedi wa l’andja ɔnɛ wa Satana. Ande lowando lele la so l’ɔtɛ watetsha Jehowa dia monga la wɔladi ndo l’okitshakitsha lee! Sho ndjaokaka oko omembi w’esambo lakate ate: ‘Ande dimɛna ndo ande ɔlɔ dia onto la ɔnango mbidjasɛ kaamɛ lo wɔladi lee!’—Osambu 133:1.