NTATƐ 1992, Olui-Walɔmbɔla wakasha dikumanyi diele la diewɔ ndo diambotshunda lo nyuma ɛkɛndɛ wakimanyiya waa Kɔmite yawɔ dia nkotsha elimu awɔ. * (Enda nɔtɛ ka l’ɛse ka dikatshi.) Akimanyedi asɔ, wele anto wa l’atei wa “ɛkɔkɔ ekina,” wekɔ osukɔ wa nɛmɔ le Olui-Walɔmbɔla. (Joani 10:16) Vɔ mbɔtɔka nsanganya ya salema lomingu la lomingu y’ase Kɔmite dia nkotsha ɛkɛndɛ awɔ. Ɔkɛndɛ awɔ ele dia mbisha oseka losango tshɛ lahombama ndo dia mbisha tokanyi tawɔ. Olui-Walɔmbɔla mbɔsa yɛdikɔ y’ekomelo ndo oma laasɔ akimanyedi asɔ mendaka dia kana yɛdikɔ yakɔsama yekɔ lo salema. Anangɛso wakayakimɔ la lolango asɔ, salaka oseka ɔkɛndɛ tshɛ wakawalongola. Vɔ mindaka kɛndɔ l’ase Olui-Walɔmbɔla otsha lo nsanganya ya laande ndo nsanganya wedja efula. Vɔ kokoka nto tomama dia tembola waa Bɛtɛlɛ oko enyimpala w’ase Olui-Walɔmbɔla.

Ɔnangɛso ɔmɔtshi lakakambe oko okimanyedi ntatɛ oma ko 1992 mbutaka ate: “Etena kakotshami ɔkɛndɛ wakawambisha, ase Olui-Walɔmbɔla koka ndjasha efula lo akambo wa lo nyuma.” Ɔnangɛso okina lakakambe oko okimanyedi l’edja k’ɛnɔnyi 20 mbutaka ate: “Ɔsɔ aki diɛsɛ dioleki tshɛ diakimi konongamɛka.”

Olui-Walɔmbɔla, mbishaka akimanyedi awɔ ɛkɛndɛ efula ndo vɔ mandolaka olemu wa wolo wakamba anangɛso wa kɔlamelo asɔ. Nyɛsɔ sho tshɛ ‘totetemale mbɔsa anto wele oko vɔ la nɛmɔ di’efula.’—Filipɛ 2:29.