1. Ohomba akɔna wele la mbetawɔ? (Enda osato wele lo mbɔtwɛlɔ.)

ONDE wɛ atayambolaka ɔnɛ: ‘Jehowa ayoshimbɛ lo mfɔnu ka woke?’ Ɔpɔstɔlɔ Pɔɔlɔ akate ate, dionga dimɔtshi dioleki ohomba diahombaso monga ladiɔ dia shimbamɛ ele mbetawɔ. Nde akate ate: “Onto lele bu la mbetawɔ hakoke ngɛnyangɛnya Nzambi.” (Hɛbɛru 11:6) Dui sɔ mbeyaka mbokama wɔdu, koko kɛnɛ kele mɛtɛ ele, “aha anto tshɛ mbonga la mbetawɔ.” (2 Tɛsalɔnika 3:2) Avɛsa ahende anɛ tokimanyiyaka dia nshihodia ɔnɛ ekɔ ohomba efula nkeketsha mbetawɔ kaso.

2, 3. a) Naa ohomba wele la mbetawɔ kaso? b) Awui akɔna wayangaso nsɛdingola?

² Ɔpɔstɔlɔ Petero akatɛkɛta dikambo dia “mpemba” mbetawɔ. (Adia 1 Petero 1:7.) Mfɔnu ka woke kaya kemembe ndo sho kombolaka monga “l’atei w’anto wele la mbetawɔ kakimanyiya dia anima ntshikala la lɔsɛnɔ.” (Hɛbɛru 10:39) Diakɔ diele, sho pombaka nsala la wolo dia nkeketsha mbetawɔ kaso. Sho kombolaka monga l’atei w’anto wayolongola difuto l’etena kayɛnama Yeso Kristo owandji aso. Diakɔ diele, oko pami kakasɛngasɛnga Yeso dia mbofudiɛ mbetawɔ, sho la wɔ koka mbuta ɔnɛ: “Okimanyiya lɛnɛ eemi l’ohomba wa mbetawɔ!” (Makɔ 9:24) L’ɛnyɛlɔ k’apɔstɔlɔ, sho lawɔ koka mbuta ɔnɛ: “Ofudia mbetawɔ kaso.”—Luka 17:5.

 ³ Lo sawo nɛ, tayɔsɛdingola awui wayela anɛ: woho wakokaso nkeketsha mbetawɔ kaso, woho wakokaso mɛnya ɔnɛ mbetawɔ kaso kekɔ ka wolo, ndo lande na kahombaso monga l’eshikikelo ɔnɛ Nzambi ayotokadimola etena kɔlɔmbaso dia sho mfudia mbetawɔ.

4. Bɛnyɛlɔ diakɔna diakoka totshutshuya dia nkeketsha mbetawɔ kaso?

⁴ Lam’ele mbetawɔ kekɔ ohomba efula, Jehowa akatosha bɛnyɛlɔ efula dia mbetawɔ lo Bible. Awui asɔ “wakafundama dia tosha wetshelo.” (Rɔmɔ 15:4) Bɛnyɛlɔ diaka Abrahama, Sara, Izaka, Jakɔbɔ, Mɔsɛ, Rahaba, Ngidiyɔna, Baraka, ndo di’anto akina efula koka totshutshuya dia nkeketsha mbetawɔ kaso. (Hɛbɛru 11:32-35) Laadiko dia bɛnyɛlɔ dia lo nshi y’edjedja, tekɔ lo mambiyama nto la bɛnyɛlɔ dia mbetawɔ di’anangɛso l’akadiyɛso ɛlɔ kɛnɛ. * (Enda nɔtɛ ka l’ɛse ka dikatshi.)

5. Ngande wakɛnya Elidja dia nde aki la mbetawɔ ka wolo le Jehowa, ndo dimbola diakɔna diakokaso ndjambola?

⁵ Ɛnyɛlɔ kɛmɔtshi k’oma lo Bible ekɔ ka omvutshi Elidja. Etena kakanayɛ yimba la ɛnyɛlɔ kande, kolembete akambo atanu wakandɛnya wɛkamu wa wolo le Jehowa. 1) Etena kakatɛ Elidja nkumekanga Ahaba ɔnɛ, Jehowa ayela ɔwɔ, nde akawotɛ l’eshikikelo tshɛ ate: ‘Oko wele mɛtɛ Jehowa Nzambi k’Isariyɛlɛ lakambɛmi la lɔsɛnɔ, lo ɛnɔnyi ɛnɛ, loonge kana mvula hatɔlɔ naka dimi latate dui!’ (1 Khumi ya Dikanga 17:1) 2) Elidja aketawɔka dia Jehowa ayowosha nde l’anto akina kɛnɛ kayowonga la tɔ ohomba dia nsɛna lo nshi y’ɔwɔ. (1 Khumi ya Dikanga 17:4, 5, 13, 14) 3) Elidja aki nto l’eshikikelo dia Jehowa ayolola ɔnaki wadi aki odo. (1 Khumi ya Dikanga 17:21) 4) Nde komonga la taamu dia dja ya Jehowa yayotshumba olambo ande l’okongo wa Karamɛlɛ. (1 Khumi ya Dikanga 18:24, 37) 5) Kaanga la ntondo ka mvula ndɔ, Elidja akatɛ Ahaba l’eshikikelo tshɛ ate: “Utshu, utuli, utuno, ne dia lundju la mvula loso.” (1 Khumi ya Dikanga 18:41) Ɔnkɔnɛ, l’ɔkɔngɔ wa nsɛdingola akambo anɛ, sho koka ndjambola ɔnɛ: ‘Onde mbetawɔ kami kekɔ wolo oko ka Elidja?’

6. Ɛngɔ kakɔna keso l’ohomba oma le Jehowa dia nkeketsha mbetawɔ kaso?

⁶ Lam’ele hatokoke nkeketsha mbetawɔ kaso l’akoka aso hita, sho pombaka nɔmba Nzambi nyuma k’ekila. Lande na? Nɛ dia mbetawɔ ekɔ olowa ɔmɔtshi l’atei w’elowa wa nyuma k’ekila. (Ngalatiya 5:22) Ayonga dui dia lomba le so etena kayotoyelaka alako waki Yeso dia nɔmbaka dia ndeka nkondja nyuma k’ekila. Yeso akalake dia Jehowa ‘ayosha nyuma k’ekila le wanɛ wɔɔlɔmbatɔ.’—Luka 11:13.

7. Lembetshiya woho wakokaso ntetemala nkeketsha mbetawɔ kaso.

 ⁷ L’ɔkɔngɔ wa sho monga la mbetawɔ ka wolo le Nzambi, sho pombaka kikokɛ. Sho koka mbɛdika mbetawɔ la dja. Etena katatɛso mpɛtsha dja, lombe koka monga wolo w’efula. Koko, naka hatokotsha nkunyi lo dja yakɔ, kete yɔ yayotɔɔlaka yema yema polo ndo yɔ nkoma otoko wa tshitshi. Koko naka sho kotshaka nkunyi mbala la mbala lo dja yakɔ, kete tayoyikimanyiya dia yɔ mpɛta dimɛna. Ngasɔ mbediɔ ndo lo dikambo dia mbetawɔ kaso. Naka sho ntetemala mbadia ndo mbeka Ɔtɛkɛta wa Nzambi lushi tshɛ, ngandji kaso k’akambo wa lo Bible ndo otsha le Jehowa kayohama. Etombelo wayonga la dui sɔ ele, tayokokɛ ndo nkeketsha mbetawɔ kaso.

8. Kakɔna kayokokimanyiya dia nkeketsha ndo nkokɛ mbetawɔ kayɛ?

⁸ Wɛ hahombe ngɛnangɛna tsho l’akambo wakayeke la ntondo ka batisimu kayɛ. (Hɛbɛru 6:1, 2) Ɛnyɛlɔ, mbekaka prɔfɛsiya ya lo Bible yamboshilaka la kotshama, ayokokimanyiya dia nkeketsha ndo nkokɛ mbetawɔ kayɛ. Wɛ koka nto nkamba l’Ɔtɛkɛta wa Nzambi dia mɛna kana mbetawɔ kayɛ kekɔ mɛtɛ wolo.—Adia Jakɔba 1:25; 2:24, 26.

9, 10. Ngande wakeketala mbetawɔ kaso lo a) monga l’angɛnyi w’amɛna? b) nsanganya ya l’etshumanelo? c) olimu w’esambishelo?

⁹ Ɔpɔstɔlɔ Pɔɔlɔ akate dia Akristo koka ‘keketshana, onto l’onto oma lo mbetawɔ k’osekande.’ (Rɔmɔ 1:12) Dui sɔ alembetshiyadiɔ? Etena ketshaso wenya kaamɛ la anangɛso l’akadiyɛso, sho koka keketshana lo mbetawɔ. Dui sɔ diekɔ mɛtɛ djekoleko etena ketshaso wenya kaamɛ la wanɛ ‘wakahembama’ lo mbetawɔ. (Jakɔba 1:3) Angɛnyi wa kɔlɔ nanyaka mbetawɔ kaso, koko angɛnyi w’amɛna kikeketshaka. (1 Kɔrɛtɔ 15:33) Diakɔ diele, tekɔ lo keketshama dia mbɔtɔka lo nsanganya mbala la mbala. Lɛkɔ, sho koka totetemala ‘keketshana lam’asaso.’ (Adia Hɛbɛru 10:24, 25.) Laadiko dia laasɔ, wetshelo wakondjaso lo nsanganya keketshaka mbetawɔ kaso. Bible mbutaka ɔnɛ: “Mbetawɔ ndjaka oma lo kɛnɛ koka onto.” (Rɔmɔ 10:17) Ɔnkɔnɛ, yambola wate: ‘Onde nsanganya y’Akristo ya mbala la mbala yekɔ ohomba lo lɔsɛnɔ la mi?’

¹⁰ Sho keketshaka nto mbetawɔ kaso etena ketshaso anto akina ndo kaasambishaso lokumu l’ɔlɔlɔ la lo Bible. L’ɛnyɛlɔ k’Akristo wa lo ntambe ka ntondo, sho mbekaka woho wa ndjaɛkɛ le Jehowa ndo tɛkɛta la dihonga tshɛ la ntondo k’ehemba tshɛ.—Etsha 4:17-20; 13:46.

11. Lande na kaki Kalɛba la Jashua la mbetawɔ ka wolo, ndo ngande wakokaso mbaokoya?

¹¹ Mbetawɔ kaso otsha le Jehowa pamaka etena kɛnaso woho watokimanyiyande ndo wakadimolande alɔmbɛlɔ aso. Kɛsɔ mbakakomɛ Kalɛba nde la Jashua. Vɔ wakakɛnɛmɔla mbetawɔ otsha le Jehowa etena kakawatshu tokemba Nkɛtɛ ya daka. Lam’akatetaka nshi, mbetawɔ kawɔ kakaleke monga wolo etena tshɛ kakawɛnaka woho wakaakimanyiyaka  Jehowa. L’eshikikelo tshɛ, Jashua akatɛ ase Isariyɛlɛ ate: ‘Ndooko dui ɔtɔi lo alaka tshɛ w’amɛna wakanyolake Jehowa Nzambi kanyu diaki kokotshama.’ Nde akayotaka l’ɔkɔngɔ ate: ‘Nyoke Jehowa wɔma ndo nyookambe la olowanyi.’ Oma laasɔ nde akakotsha ate: ‘Koko dimi l’ase luudu lami tayokambɛka Jehowa.’ (Jashua 23:14; 24:14, 15) Etena kayaɛkɛso le Jehowa ndo kɛnaso woho watokimanyiyande onto l’onto, mbetawɔ kaso kayoleka monga wolo.—Osambu 34:8.

12. Ngande wakokaso mɛnya ɔnɛ tekɔ la mbetawɔ ka wolo?

¹² Ngande wakokaso mɛnya ɔnɛ tekɔ la mbetawɔ ka wolo? Ombeki Jakɔba akate ate: “Dimi layokɛnya mbetawɔ kami oma l’etsha ami.” (Jakɔba 2:18) Etsha aso mɛnyaka ɔnɛ tekɔ la mbetawɔ ka wolo. Nyɛsɔ tende lande na kediɔ ngasɔ.

13. Ngande wakɛnɛmɔlaso mbetawɔ kaso etena kasambishaso?

¹³ Olimu w’esambishelo mbele yoho yoleki dimɛna ya nkɛnɛmɔla mbetawɔ kaso. Lande na? Nɛ dia etena kasambishaso, sho mɛnyaka dia tekɔ lo mbetawɔ ɔnɛ ekomelo kaya suke ndo ɔnɛ ‘tɔ hatotshimbatshimba!’ (Habakuka 2:3) Dia mbeya kana mbetawɔ kaso kekɔ wolo, sho koka ndjambola ɔnɛ: ‘Naa ohomba wele l’olimu w’esambishelo le mi? Onde dimi salaka kɛnɛ tshɛ kakokami nsala dia mbutɛ anto akina awui wendana la Nzambi? Onde dimi nyangaka waaso wa nsala akambo efula l’olimu wakambɛmi Jehowa?’ (2 Kɔrɛtɔ 13:5) Nyɛsɔ tɛnya wolo wele la mbetawɔ kaso lo salaka “wotelo wa lo sɛkɛ dikambo dia panda,” mbuta ate lo sambishaka lokumu l’ɔlɔlɔ.—Adia Rɔmɔ 10:10.

14, 15. a) Ngande wakokaso mɛnya mbetawɔ lo lɔsɛnɔ laso la lushi la lushi? b) Nkɔndɔla dui dimɔtshi diɛnya etombelo wele la mbetawɔ ka wolo.

 ¹⁴ Sho mɛnyaka nto mbetawɔ kaso le Jehowa etena kakikɛso ekakatanu wa wolo wa lo lɔsɛnɔ la l’andja ɔnɛ. Etena keso la hemɔ, kambotɔkɔmɔ, kambotohandjɔ wɔɔngɔ, wola kana etena keso l’akambo akina, sho pombaka monga la mbetawɔ ɔnɛ Jehowa nde la Yeso “wayotokimanyiya l’etena kahombama.” (Hɛbɛru 4:16) Sho mɛnyaka mbetawɔ kaso le Jehowa etena kɔlɔmbaso dia nde tokimanyiya. Yeso akate ate, sho koka nɔmba Jehowa dia nde tosha “mbo ya ndɛ ya lushi l’ɛlɔ lo ndjela ehomba wa lo lushi.” (Luka 11:3) Ɛkɔndɔ wa lo Bible mɛnyaka dia Jehowa koka tosha ɛngɔ tshɛ keso l’ohomba. Ɛnyɛlɔ, lo nshi y’ɔwɔ wa wolo waki l’Isariyɛlɛ, Jehowa akasha Elidja mbo ya ndɛ ndo ashi wa nnɔ. Bible mbutaka ɔnɛ, ‘angwangwa wakawelaka mapa la onatshi la pindju ndo mapa la onatshi la dikɔlɔ ndo nde akanɔka ashi w’oma lo kiɔkɔ.’ (1 Khumi ya Dikanga 17:3-6) Tekɔ la mbetawɔ ɔnɛ Jehowa koka tosha nto kɛnɛ keso la tɔ ohomba.

¹⁵ Tekɔ l’eshikikelo ɔnɛ etena kakambaso l’atɔndɔ wa lo Bible, tayonga l’akoka wa nkotsha ehomba wa nkumbo yaso. Rebecca, kadiɛso kotshukami l’Asie kɔndɔlaka woho wakandakambe nde la nkumbo kande l’atɔndɔ wele lo Mateo 6:33 ndo Tukedi 10:4. Nde mbutaka di’omende akɛnyi di’olimu ande akadjaka diɔtɔnganelo diawɔ la Jehowa lo waale. Ɔnkɔnɛ, nde  akatshike olimu akɔ. Koko, vɔ waki l’ana anɛi wakawahombaka nsɛnya, diekɔ diele wakatatɛ nsondja diangɔ dia ndɛ dialahɛ. Etombelo waki l’olimu awɔ wa wolo ɔsɔ ele, lushi tshɛ wakakondjaka falanga ya nkotsha ehomba wa nkumbo kawɔ. Nde mbutaka ate: “Takɛnyi ɔnɛ Jehowa kotokalɛ pondjo. Sho kopombaka pondjo yangɔ ya ndɛ.” Onde wɛ ambongaka la dui dimɔtshi diakeketsha mbetawɔ kayɛ diafɔna la sɔ?

16. Kakɔna kayotokomɛ naka sho ndjaɛkɛ le Nzambi?

¹⁶ Hatohombe pondjo mbidja taamu ɔnɛ naka sho ndjela ɛlɔmbwɛlɔ ka Jehowa, kete nde ayotokimanyiya. Pɔɔlɔ akashile ɛtɛkɛta waki Habakuka etena kakandate ate: “Onto ɔlɔlɔ ayonga la lɔsɛnɔ l’ɔtɛ wa mbetawɔ.” (Ngalatiya 3:11; Habakuka 2:4) Diakɔ diele, sho pombaka monga la mbetawɔ ka wolo le Ɔnɛ lakoka tokimanyiya mɛtɛ. Pɔɔlɔ toholaka dia Nzambi ekɔ la “wolo ande wakamba le so, Nzambi kokaka mɛtɛ nsala akambo efula oleki kɛnɛ tshɛ kalɔmbaso kana kakanyiyaso.” (Ɛfɛsɔ 3:20) Ekambi waki Jehowa salaka kɛnɛ tshɛ kakokawɔ dia nsala lolango la Nzambi, koko vɔ mbeyaka nto ɔnɛ wekɔ la elelo. Tekɔ la lowando l’efula nɛ dia Jehowa ekɔ la so ndo ɔnɛ nde ekɔ lo ntshɔkɔla welo aso tshɛ.

17. a) Ngande wakakadimola Yeso apɔstɔlɔ ande? b) Lande na kahombaso nongamɛ la mbetawɔ k’efula ɔnɛ Jehowa ayokadimola alɔmbɛlɔ aso?

¹⁷ Lo ndjela kɛnɛ kambotɔsɛdingola, sho koka ndjaoka oko wakayaoke apɔstɔlɔ etena kakawalɔmbɛ Yeso ɔnɛ: “Ofudia mbetawɔ kaso.” (Luka 17:5) Yeso akakadimola apɔstɔlɔ ande lo yoho mɔtshi ya laande lo Pɛntɛkɔsta ka lo ɔnɔnyi wa 33, etena kakawalongola nyuma k’ekila ndo kakiwɔ l’akoka wa nyomoleka nshihodia alaka waki Nzambi. Dui sɔ diakakeketsha mbetawɔ kawɔ. Etombelo akɔna waki la diɔ? Wakatatɛ l’olimu wa woke w’esambishelo lo etena kakɔ. (Kɔlɔsayi 1:23) Onde sho kokaka nongamɛ la mbetawɔ k’efula ekadimwɛlo w’alɔmbɛlɔ aso? Jehowa tolakaka dia sho koka nongamɛ, ‘kɛnɛ kɔtɔnɛ la lolango lande.’—1 Joani 5:14.

18. Ngande watshɔkɔla Jehowa anto wele la mbetawɔ ka wolo?

¹⁸ Etena kayaɛkɛso tshɛ le Jehowa, nde ayotɔngɛnangɛna. Nde ayokadimola alɔmbɛlɔ aso wa la mbetawɔ, mbetawɔ kaso kayokeketala ndo tayokoma “anto wakoka nongola Diolelo dia Nzambi.”—2 Tɛsalɔnika 1:3, 5.