LAKAKOMƐ mbola lam’akimi l’ɛnɔnyi divwa. Ɛlɔ kɛnɛ lekɔ l’ɛnɔnyi 43, koko lekɔ l’otale paka wa mɛtɛlɛ ɔtɔi. Etena kakɛnyi ambutshi ami dia lambosema, vɔ wakakeketsha dia dimi nkamba efula l’oyango waha dimi ndekaka ndjasha amboleka lo kɛnɛ kendana l’otale ami. Dia dimi monga l’akambo efula wa nsala, lakasale tshendo ya manɛka elowa la soko dia lokombo laso ndo lakayetɛka kɔmba. Tshendo yakɔ yakakutolaka wa kidiya efula.

Lo mɛtɛ, nkamba efula kotshikitanya awui tshɛ. Laki paka mondo y’efula ndo lakalɔshanaka kaanga la diangɔ dia totshitshɛ dia lo lɔsɛnɔ, ɛnyɛlɔ oko tanga dia tshendo yami ya diangɔ. Akɛnamaka di’ɛngɔ tshɛ kakasalema lo dikambo di’anto waki l’otale ami suke la mbala hiende. Lakakiyanaka efula lo dikambo diami, koko lam’akamakotsha ɛnɔnyi 14 dui sɔ diakatshikitana.

Lushi lɔmɔtshi, wamato ahende w’Ɛmɛnyi wa Jehowa wakaye ndjosomba elowa le mi, ko wakanɔmbɛ dia dimi mbeka la wɔ Bible. Kombet’edja, lakashihodia dia mbeya Jehowa ndo sangwelo diande mbaki dui di’ohomba efula oleki ndjakiyanya di’otale ami. Dui sɔ diakakimanyiya efula. Osambu 73:28 akayonga divɛsa dialekami nanga. Etenyi ka ntondo ka divɛsa diakɔ mbutaka ɔnɛ: ‘Nsukana la Nzambi kele ɔlɔlɔ le mi.’

La shashimoya nkumbo kaso kakonɔ oma la Côte d’Ivoire otsha lo Burkina Faso ndo lɔsɛnɔ lami lakatshikitana efula. L’etenyi ka ngelo kakamadjasɛka ntondo, anto waki la mbekelo ka mɛnami oma la wedi wa tshendo y’elowa. Koko l’etenyi ka ngelo kaso k’oyoyo, dimi laki ɔngɛndangɛnda ndo le anto efula lakɔsamaka oko ɛngɔ ka diambo. Anto efula wakamendaka tɛɛ, diakɔ diele lakatshikala mingu efula hatombe lokombo. Oma laasɔ, lakohɔ di’aki ohomba efula dimi ndjasukanya la Jehowa. Lakafundɛ filialɛ k’Ɛmɛnyi wa Jehowa mukanda, ko vɔ wakatomɛ onto l’oshika. Nani, laki misiɔnɛrɛ, akaye ndjomenda la mututu.

Etadimbo wa lo ngelo kaso waki wa nkɛtɛ ndo wakongaka nshi tshɛ ɛsɛlɔ ndo lɔmɔtɔ lo nshi y’avula. Nani akakɔka mbala efula la mututu ande etena kakandayaka ndjeka la mi Bible, koko nde kopekɔ. Lushi lɔmɔtshi, nde akanɔmbɛ dia ndjɔmbɔsa otsha lo losanganya. Lakeyaka dia dui sɔ nembetshiyaka ntomba oma lo lokombo la so ndo mbikikɛ woho wayotamendaka anto tɛɛ. Laadiko dia laasɔ, mɛmbami l’ɔkɔngɔ wa mututu aki oko onto lawahɛɛ wotsho laadiko dia tshuka nɛ dia nde okongaka l’okakatanu wakɛndjakɛndja  mututu akɔ. Kaanga mbakidiɔ ngasɔ, laketawɔ, lo mbɔhɔ etenyi ka hende ka divɛsa dialekami nanga diata ɔnɛ: ‘Dimi lambetɛ Nkum’Olongo Nkumadiɔndjɔ Jehowa eshamelo kami.’

Tena dimɔtshi dimi la Nani takakɔka lo lɔmɔtɔ, koko lam’ele takalangaka nsanganya sho kombidjaka yimba l’emuse ɛsɔ. Ande otshikitanu waki lam’asa ɔmɔnɔmɔnɔ w’oludi la ngandji wakamɛnyi l’anto wa lo Mbalasa ka Diolelo, l’anto wa l’andja wakamendaka tɛɛ la lɔsɔkɔ tshɛ lee! Lakayobatizama l’ɔkɔngɔ wa ngɔndɔ divwa.

Etenyi ka sato ka divɛsa dialekami nanga mbutaka ɔnɛ: ‘Dia mbewoyaka elimu ayɛ tshɛ.’ Lakeyaka di’olimu w’esambishelo ayonga okakatanu woleki woke le mi. Lakohɔ mbala ka ntondo kakamatshu l’esambishelo ka luudu la luudu. Ana w’akɛnda ndo epalanga wakamendaka tɛɛ, watandjele ndo watɔlɛ yoho yakamatakɛndakɛndaka. Lo mɛtɛ dikambo sɔ diakambisha lonyangu, koko etena kakamayaoholaka dia vɔ wekɔ l’ohomba wa paradiso oko dimi laki l’akoka wa mbikikɛ.

Dia mbetɛ akambo wɔdu, lakakondja mututu w’etshimbi esato waki la pedalɛ l’anya. Onto lakasambishaka la mi akapusaka l’akona ko naka tambokoma l’ohole w’eholola ko nde fumbɔ lo mututu. Kaanga mbele, olimu w’esambishelo waki ntondo tshondo y’okakatanu, l’ɔkɔngɔ diko vɔ wakayombisha ɔngɛnɔngɛnɔ w’efula, diakɔ diele lo 1998, lakayonga ombatshi mboka wa pondjo.

Lakalɔmbɔlaka ambeki wa Bible efula ndo ambeki anɛi l’atei awɔ wakayobatizamaka. Ndo nto, ɔnangɛmi ɔmɔtshi la womoto l’otema ɔtɔi akayetawɔka akambo wa mɛtɛ. Mboka woho wakasale anto akina ehamelo keketshakami mbala efula etena kemi l’ohomba w’ekeketshelo. Lushi lɔmɔtshi latata malariya, lakalongola mukanda ɔmɔtshi oma la Côte d’Ivoire. Lakatatɛ la wekelo wa Bible l’ombeki ɔmɔtshi wa l’inivɛrsite wa la Burkina Faso ndo lakayowoshaka ɔnangɛso ɔmɔtshi dia ntetemala mbeka la nde. L’ɔkɔngɔ diko ombeki ɔsɔ akayonɔka otsha la Côte d’Ivoire. Laki l’ɔngɛnɔngɛnɔ dia mboka ɔnɛ nde aya opandjudi wahatabatizama.

Ngande wayasɛnyami? Okongamelo ɔmɔtshi wakimanyiya akanga wa dikɔmɔ wakambetsha ɔtɛlɛlɔ. Ombetsha aso ɔmɔtshi akɛnyi mbekelo yami y’olimu ko akate ate: “Sho pombaka keetsha woho wasalawɔ savɔ.” Ndo kɛsɔ mbakawasale. Nshi nyɛ lekɔ lo solɛ anto ahɔndɔ ndo lekɔ lo nsala savɔ yele ohomba la ngelo. Anto nangaka savɔ yami ndo tshutshuyaka anto akina dia vɔ ndjisomba. Dimi tɔlɛka anto savɔ yakɔ dimɛ lo nkamba la mututu w’etshimbi esato.

Lonyangu ko, lakayotshika olimu w’ombatshi mboka lo 2004, l’ɔtɛ wa hemɔ ka wolo ka l’ɔkɔngɔ. Koko, lekɔ lo ntetemala ntshɔ l’esambishelo mbala la mbala.

Anto mbutaka ɔnɛ dimi mbeyamaka oma l’ɔmɔnɔmɔnɔ ami. L’ekɔ l’ɔkɔkɔ wa dimɛna efula wa monga l’ɔngɛnɔngɛnɔ nɛ dia ndjasukanya la Nzambi mbaki ɔlɔlɔ le mi.—Kɔndwama oma le Sarah Maiga.