1. a) Ɔkɛndɛ akɔna wakasha Nzambi Adama? b) Ntatɛ oma laasɔ, ngande wakamba ekambi waki Nzambi la losha l’ɔtɛkɛta?

 JEHOWA NZAMBI akasha anto losha l’ɔtɛkɛta. Lo ekambɔ k’Ɛdena Nzambi akasha Adama ɔkɛndɛ wa mbɔlɛ nyama tshɛ nkombo. Adama akasha nyama la nyama lokombo laki la kitshimudi. (Etatelu 2:19, 20) Ntatɛ oma laasɔ, ekambi waki Nzambi wakalongola losha l’ɔtɛkɛta dia ntombola Jehowa ndo mbutɛ anto akina akambo wendana la nde. Atet’edja, ekambi wa Nzambi wakakambe la losha lɔsɔ dia nkadimola Bible di’anto efula wakoke mbeka awui wendana la Jehowa.

2. a) Naa atɔndɔ wakayele Kɔmite k’Ekadimwelo ka Bible k’Andja w’Oyoyo l’olimu awɔ? b) Kakɔna kayoteka lo sawo nɛ?

² Ekɔ nunu di’ekadimwelo wa Bible, koko dimɔtshi ndeka dikina eshika. Dia nkadimola Bible lo yoho y’oshika, Kɔmite k’Ekadimwelo ka Bible k’Andja w’Oyoyo akɔsɛ yɛdikɔ dia ndjela atɔndɔ asato w’ohomba anɛ: 1) Nɛmiya lokombo la Nzambi ndo nkamba lalɔ l’Ɔtɛkɛta ande mbala efula oko wakalakambema l’efundelo w’etatelo. (Adia Mateo 6:9.) 2) Nkadimola losango l’etatelo tshɛkɛta lo tshɛkɛta lo ahole wakoka. Lɛnɛ ahakoke, ko nkadimola lo  ndjela lokanyi la shikaa. 3) Nkamba la tɔtɛkɛta ta wɔɔdu mbadia ndo mboka. a (Enda nɔtɛ ka l’ɛse ka dikatshi.) (Adia Nehemiya 8:8, 12.) Atɔndɔ asato w’ohomba anɛ wekɔ lo ndjelama oma le akadimodi wa Ekadimwelo k’andja w’oyoyo l’ɛtɛkɛta wotshikitanyi ndekana 130. Lo sawo nɛ, tayeka woho wakambawɔ l’atɔndɔ asɔ lo ovuswelo wa Ekadimwelo k’andja w’oyoyo ka 2013 ndo woho wakadimɔmatɔ l’ɛtɛkɛta ekina lo ndjela atɔndɔ asɔ.

3, 4. a) Lende atanaso Tetragramɛ? b) Kakɔna kakasale dikadimwelo efula dia Bible la lokombo la Nzambi?

³ Lokombo la Nzambi lakakangemaka lo alɛta anɛi wa lo Hɛbɛru welamɛ ɔnɛ Tetragramɛ. Sho koka ntana Tetragramɛ shɔ lo efundelo w’edjedja wakafundama l’anya wa lo Hɛbɛru, ɛnyɛlɔ oko wɛɔmbɔ wa lo Ndjale ka lɛɛhɔ. Sho koka ntana nto kɔpi mɔtshi lo Septante ka lo Grɛkɛ. Waa kɔpi shɔ yakafundama ɛnɔnyi oko 200 la ntondo ka Kristo ndo ɛnɔnyi oko 100 l’ɔkɔngɔ wa Kristo. Anto efula mambaka etena kɛnawɔ woho wɛnama lokombo la Nzambi mbala efula lo Efundelo w’edjedja wa l’anya.

⁴ Mbokɛmaka hwe dia, lokombo la Nzambi pombaka tanema lo Bible. Polo ɛlɔ kɛnɛ, dikadimwelo efula hadiokambe la lokombo la Nzambi. Ɛnyɛlɔ, ɛnɔnyi ehende eto l’ɔkɔngɔ wa Ekadimwelo k’andja w’oyoyo k’Afundelo w’Akristo wa lo Grɛkɛ ntondjama, Bible ka American Standard Version ka lovusola kakatondjama. Bible kakɔ ka lo 1901 kaki la lokombo la Nzambi, koko ka l’ɔnɔnyi wa 1952 ka lovusola komonga la lokombo la Nzambi. Lande na? Nɛ dia akadimudi atɔ wakɛnyi ɔnɛ “lo mɛtɛ hakoke” nkamba la lokombo la Nzambi. Dikadimwelo efula, dia lo Angɛlɛ ndo dia l’ɛtɛkɛta ekina, diakasale woho akɔ waamɛ.

5. Lande na kele ekɔ ohomba nkamba la lokombo la Nzambi lo Bible?

⁵ Onde ekɔ mɛtɛ ohomba di’akadimudi nkamba la lokombo la Nzambi kana aha nkamba lalɔ? Eelo ekɔ ohomba vɔ nkamba lalɔ! Jehowa lele kiɔkɔ ya Bible kombolaka di’anto mbeya lokombo lande. Okadimudi w’oshika pombaka mbeya kɛnɛ kakombola kiɔkɔ yatɔ ndo kɛsɔ kayohomba monga la shɛngiya lo tɛdikɔ t’okadimwelo ande. Afundela efula mɛnyaka dia lokombo la Nzambi lekɔ ohomba ndo lɔ pomboka nɛmiyama. (Etumbelu 3:15; ​Osambu 83:18; 148:13; Isaya 42:8; 43:10; Joani 17:6, 26; Etsha 15:14) Jehowa akatshulwɛ afundji wa Bible nyuma kande dia vɔ nkamba la lokombo lande mbala nunu la nunu l’Efundelo w’edjedja wa l’anya. (Adia Ezekiele 38:23.) Ɔnkɔnɛ, etena kanya akadimudi lokombo la Nzambi, vɔ hawɔlɛmiya Jehowa.

6. Lande na kakayokotshama lokombo la Nzambi lo ahole asamalo lo Ekadimwelo k’andja w’oyoyo kambovuswama?

 ⁶ Ɛlɔ kɛnɛ, tolembetelo tamboleka efula tɛnya dia sho pombaka nkamba la lokombo Jehowa. Bible k’Ekadimwelo k’andja w’oyoyo ka 2013 kambovuswama kekɔ la lokombo la Nzambi mbala 7216. Mbuta ate mbala shamalo yambaahema ladiko dia lofulo laki lo Bible kakatombe la ntondo katɔ. Lo mbala shamalo shɔ, tshanu yakayokotshamaka nɛ dia lokombo la Nzambi lakayoshɔmaka lo wɛɔmbɔ wa lo Ndjale ka lɛɛhɔ weke kambishɔma. b (Enda nɔtɛ ka l’ɛse ka dikatshi.) Mbala tshanu yakɔ shɔ yakashɔma lo 1 Samuele 2:25; 6:3; 10:26; 23:14, 16. Mbala kasamalo, lo Embadi 19:18, kakayokotshama oko etombelo wa wekelo wa lotshimola w’efundelo w’edjedja wa l’anya wa Bible wa mbɛkɛ otema.

7, 8. Kakɔna kalembetshiya lokombo Jehowa?

⁷ Akristo wa mɛtɛ mɛnaka di’ekɔ ohomba mbeya kitshimudi ya mɛtɛ ya lokombo la Nzambi. Lokombo lande nembetshiyaka ɔnɛ: ‘Nde salaka dia ndjaala.’ c (Enda nɔtɛ ka l’ɛse ka dikatshi.) Lo nshi yakete, mikanda aso wakalembetshiyaka kitshimudi ya lokombo la Nzambi lo nkamba la Etombelo 3:14, diata ɔnɛ: ‘Dimi layoyala kɛnɛ kayomɔsɔna dia ndjala.’ Bible kakavuswama lo 1984 kakalembetshiya ɔnɛ Jehowa ndjalaka ndamɛ kɛnɛ kasɔnande dia ndjala l’oyango wa nkotsha alaka ande. d (Enda nɔtɛ ka l’ɛse ka dikatshi.) Koko, ovuswelo wa lo 2013 nembetshiyaka ɔnɛ: “L’etena kele lokombo Jehowa mbeyaka mbela lokanyi lɔsɔ, dui sɔ hadiokomɛ tshikima lo kɛnɛ kasɔnande ndamɛ dia ndjaala. Dui sɔ mbidjaka nto kɛnɛ kahɔhɔlande dia tɔ ndjala lo kɛnɛ kendana l’etongelo kande ndo l’okotshamelo wa sangwelo diande.”

⁸ Jehowa salaka dia ditongami diande ndjaala kɛnɛ kalangande vɔ ndjaala. Ɛnyɛlɔ, Nzambi akasɔnɛ Nɔa dia ndjaala ombiki wa wato, Bezalɛlɛ dia nde ndjaala manyi ya disɛlasɛla, Ngidiyɔna dia nde ndjaala ɔndɔshi waata wa woke ndo Pɔɔlɔ dia ndjaala misiɔnɛrɛ. Lokombo la Nzambi ekɔ la kitshimudi le ekambi ande, diakɔ diele Kɔmite k’Okadimwelo ka Bible k’Andja w’Oyoyo kakadje lokombo la Nzambi lo ekadimwelo katɔ.

9. Lande na kakete okadimwelo wa Bible lo ɛtɛkɛta ekina lo dihole dia ntondo?

⁹ Dikadimwelo efula kamamba dia Bible minyaka lokombo l’oshika la Nzambi. Koko, vɔ kambaka la titrɛ “Nkumadiɔndjɔ” kana lokombo la nzambi kɛmɔtshi ka lo ngelo kewɔ. Ɔsɔ ekɔ ɔkɔkɔ ɔmɔtshi wa woke wakayotshutshuya Olui-Walɔmbɔla dia mɛna ɔnɛ ekɔ ohomba efula di’anto wa lo ɛtɛkɛta tshɛ monga la Bible kalɛmiya lokombo la Nzambi. (Adia Malaki 3:16.) Diakɔ diele, ɛlɔ kɛnɛ lokombo la Jehowa lekɔ lo nɛmiyama lo Ekadimwelo k’andja w’oyoyo lo ɛtɛkɛta ndekana 130.

10, 11. Naa ekakatanu ɛmɔtshi watenama etena katakadimɔma Ekadimwelo k’andja w’oyoyo otsha lo ɛtɛkɛta ekina?

¹⁰ Ekakatanu wekɔ efula etena katakadimɔma Ekadimwelo k’andja w’oyoyo oma l’Angɛlɛ otsha lo ɛtɛkɛta ekina. Ɛnyɛlɔ, ekadimwelo ka lo Angɛlɛ kakambe la  tshɛkɛta ya lo Hɛbɛru “Shɛɔlɛ” yele lo Undaki 9:10 ndo lo avɛsa akina. Etelo kɛsɔ kakatanemaka ndo lo Bible nkina ya lo Angɛlɛ. Koko, tshɛkɛta shɔ totoyokoka kambema lo ɛtɛkɛta efula nɛ dia ambadi efula wa lo ɛtɛkɛta akɔ kombeyaka etelo ka lo Hɛbɛru “Shɛɔlɛ”. Etelo kɛsɔ kotanemaka lo adiksiɔnɛrɛ awɔ ndo amɔtshi wakafɔnyaka dia ɔsɔ aki lokombo la dihole dimɔtshi. L’ɔtɛ wa ɛkɔkɔ ɛsɔ, akadimudi wakakondja lotshungɔ la nkadimula tshɛkɛta ya lo Hɛbɛru “Shɛɔlɛ” ndo tshɛkɛta ya lo Grɛkɛ “Hadɛsɛ” ɔnɛ “Diombo.” Ɔsɔ ekɔ okadimwelo w’oshika ndo waleka mbokiya afundelo hwe.

¹¹ Tɔtɛkɛta ta lo Hɛbɛru la Grɛkɛ tɛnya “anima” taki nto wolo nkadimola lo ɛtɛkɛta ɛmɔtshi. Lo ɛtɛkɛta ɛsɔ, tshɛkɛta yɛnya “anima” nembetshiyaka mbala efula okishi w’onto lakavu kana ɛngɔ kɛmɔtshi katomba oma lo demba di’onto etena kavɔnde. Dia mbewɔ eokelo ka kɔlɔ kɛsɔ, akadimudi wakakondja lotshungɔ dia nkadimola tshɛkɛta “anima” lo ndjela awui wodingi tshɛkɛta yakɔ. Elembetshiyelo ka tokitshimudi totshikitanyi ta tshɛkɛta “anima” koka tanema lo apandisɛ wa lo Traduction du monde nouveau—avec notes et références. Elembetshiyelo w’ohomba wendana la tɔtɛkɛta ta lo Hɛbɛru ndo ta lo Grɛkɛ fundama lo nɔtɛ ya l’ɛse ka dikatshi ya lo ekadimwelo kambovuswama l’oyango w’afundelo wa Bible monga wɔɔdu mbadia ndo wɔɔdu mboka.

12. Etshikitanu akɔna ekina wakasalema lo Bible kakavuswama lo 2013? (Enda nto sawo diele l’ɔtɛ a dui ɔnɛ: “L’édition anglaise révisée de 2013 de la Traduction du monde nouveau” ya Tshoto y’Etangelo ya alɛta wa totshitshɛ lo Falase.)

¹² Ambola w’oma le akadimudi wakɛnya wokelo ekina wa kɔlɔ wakoka monga w’afundelo  wa Bible. Ɔnkɔnɛ, lo Ngɔndɔ ka divwa 2007, Olui-walɔmbɔla akasha lotshungɔ dia vusola ekadimwelo ka lo Angɛlɛ. Kɔmite k’okadimwelo kakasɛdingola ambola nunu la nunu wakambola akadimudi wa Bible etena kakatasalemaka ovuswelo. Ditelo dia lo Angɛlɛ w’edjedja diakahɛnama la nɛ di’eyoyo diatɛkɛtama nshi nyɛ. Dui sɔ diaketɛ awui afundelo wɔɔdu mbadia ndo wɔɔdu mboka aha la nshisha kɛnɛ kalangawɔ mbuta. Okadimwelo wambokadimɔma atete ndoko edja lo ɛtɛkɛta ekina wakakimanyiya nto akadimudi dia ndowanya afundelo wa lo Angɛlɛ.—Tukedi 27:17.

13. Ngande wayaoka anto efula lo kɛnɛ kendana la Bible ka 2013 kambovuswama?

¹³ Ngande wayaoka anto efula lo kɛnɛ kendana la Ekadimwelo k’andja w’oyoyo ka lo Angɛlɛ kambovuswama? Mbalasa k’Ɛmɛnyi wa Jehowa kalɔmbɔla olimu wa l’andja w’otondo ka la Brookyn, New York, kekɔ lo nongola nunu dia mikanda wa lowando oma le anangɛso l’akadiyɛso. Efula wekɔ lo ndjaoka oko wakayaoke kadiyɛso kɛmɔtshi kakafunde ɔnɛ: “Bible ekɔ oko shɛtɛshɛtɛ yoludi tɔ la dɛngalɛnga di’oshinga wolo. Mbadia ɛtɛkɛta wa Jehowa lo yoho yokɛma hwe lo nkamba la ekadimwelo kakavuswama lo 2013 koka mbɛdikama la ɔsɛdingwelo w’ɛlɛngalɛnga ɔtɔi ɔtɔi, lo ngɛnangɛna ngaingai ka bɛkɛ diatɔ, pudipudi katɔ, kulɛrɛ katɔ ndo dimɛna diatɔ. Avɛsa wele la ɛtɛkɛta wa wɔɔdu kimanyiyakami dia dimi nyomoleka mbeya Jehowa lele oko ombutshi wokumbate etena kambadiɛnde ɛtɛkɛta ande wa lotutsha.”

14, 15. Ngande wayaoka anto lo kɛnɛ kendana la Ekadimwelo k’andja w’oyoyo lo ɛtɛkɛta ekina?

¹⁴ Anto watɛkɛta ɛtɛkɛta ekina lo dihole dia Angɛlɛ wekɔ ndo vɔ lawɔ la lowando lo Ekadimwelo k’andja w’oyoyo. Opalanga ɔmɔtshi wa pami wa l’osomba wa Sofia, lo wodja wa Bulgarie mbutaka lo dikambo dia Bible ka lo ɔtɛkɛta wa bulgare ate: “Aya ɛnɔnyi efula wadiami Bible, koko latadiaka ekadimwelo kele wɔɔdu mboka ndo kananda otema nganɛ.” Woho akɔ waamɛ mbele, kadiyɛso kɛmɔtshi k’ose Albanie akafunde ate: “Ande  woho wele Ɔtɛkɛta wa Nzambi dimɛna lo albanais lee! Ande diɛsɛ dia Jehowa ntɛkɛta laso l’ɔtɛkɛta aso wa lootɔ lee!”

¹⁵ Lo wedja efula, Bible yekɔ oshinga wolo kana ekɔ okakatanu wa mamba dia ndjitana. Nkondja Bible ekɔ ɔtshɔkɔ wa mamba! Alapɔlɔ ɔmɔtshi w’oma la Rwanda wakate ɔnɛ: “Aya edja efula kele, anto efula wakekaka l’anangɛso Bible kopamaka nɛ dia vɔ komongaka la Bible. Vɔ kokokaka nsomba ekadimwelo kakamba l’ase ɔtɛmwelɔ wa lo ngelo kawɔ. Ndo mbala efula vɔ koshihodiaka lo yoho yokɛma hwe tokitshimudi t’avɛsa amɔtshi ndo dui sɔ diakatshindjatshindjaka ohamelo awɔ.” Etena kakawayokondja Ekadimwelo k’andja w’oyoyo l’ɔtɛkɛta awɔ wa lootɔ, nkumbo kɛmɔtshi ka la Rwanda kele la ana wa tohanda anɛi kakate ɔnɛ: “Sho kaloyaka Jehowa losaka mɛtɛ ndo ɔhɔmbɔ wa kɔlamelo ndo kɛsɔ lo tosha Bible kɛnɛ. Tekɔ ase wola wotohanda komɛ ndo takiso l’akuta wa nsombɛ ose nkumbo tshɛ Bible. Koko, kakianɛ sho tshɛ onto l’onto aya la Bible kande hita. Dia mɛnya lowando laso le Jehowa, sho mbadiaka Bible kaamɛ lo nkumbo lushi tshɛ.”

16, 17. a) Kakɔna kalanga Jehowa lo dikambo di’ekambi ande? b) Kakɔna kahombaso ndjashikikɛ dia nsala?

¹⁶ Ekadimwelo k’andja w’oyoyo kambovuswama, kayonyomoleka monga lo ɛtɛkɛta ekina efula lo nshi yayaye. Satana pembaka dia memadia olimu ɔsɔ, koko sho mbeyaka dia Jehowa nangaka di’ekambi ande tshɛ mpokamɛ kɛnɛ kawatɛnde lo yoho yokɛma hwe ndo l’ɔtɛkɛta wakokawɔ mboka dimɛna. (Adia Isaya 30:21.) Kem’edja, “nkete kayolola la ewo ka [Jehowa] oko atololaka ashi a wake.”—Isaya 11:9.

¹⁷ Nyɛsɔ toyashikikɛ dia nkamba l’oseka woshasha tshɛ w’oma le Jehowa, mbidja ndo ekandimwelo kɛsɔ kalɛmiya lokombo lande. Etawɔ dia Jehowa tɛkɛtaka la yɛ lushi tshɛ oma lo tshimbo y’Ɔtɛkɛta ande. Nde ekɔ l’akoka wa mpokamɛ la yambalo alɔmbɛlɔ aso tshɛ. Woho wasawolaso la Jehowa ɔsɔ wayotokimanyiya dia sho nyomoleka mbeeya dimɛna efula ndo ngandji kaso otsha le nde kayotetemala mpama.—Joani 17:3.