MAMA akamimbola ate: “Lande na kahayalange ntɛmɔla watshɛyɛ? Onde wɛ heye dia l’ɔtɛ awɔ mbeyɛ la lɔsɛnɔ? Onde wɛ hakoke monga kaanga la yema ya lowando le wɔ? Ngande wakokayɛ ntona mbekelo yakatotshikɛ watshɛso ambeta nɔnga efula? Lo ntona dia nɛnya watshɛso ayonga oko onto lata ɔnɛ ɔtɛmwɛlɔ aso wekɔ anyanya.” L’ɔkɔngɔ wa nde mbuta ngasɔ, mama akatatɛ ndela.

Ngɔndɔ ngana la ntondo, Ɛmɛnyi wa Jehowa wakalɔmbɛ mama dia mbeka la nde Bible. Nde konanga mbeka Bible, koko dia mɛnya ɔnɛ nde ekɔ la loshilambo nde akawatɛ dia vɔ ndjekaka la mi Bible. Koko, nde akayonga la lonyangu lo dikambo diami. Dui sɔ diakamambiya efula nɛ dia lakongaka nshi tshɛ l’okitanyiya otsha le nde. Koko lam’ele lakalangaka ngɛnyangɛnya Jehowa, dimi kokoka nto mama l’akambo tshɛ. Ɔsɔ komonga dui dia tshitshɛ, koko Jehowa akambisha wolo.

Ase nkumbo kami waki l’ɔtɛmwɛlɔ w’ase Buda, oko anto efula wa lo Japon. Koko l’ɔkɔngɔ wa dimi mbeka ngɔndɔ hiende kaamɛ l’Ɛmɛnyi wa Jehowa, laketawɔ dia Bible mbutaka mɛtɛ. Lam’akameke dia laki la Papa kele l’olongo, dimi lakakombola mɛtɛ mbeeya dimɛna. L’etatelo, dimi la mama takangɛnangɛnaka nsawola akambo wakamekaka. Dimi lakatatɛ mbɔtɔ lo nsanganya ya Lushi la lomingu lo Mbalasa ka Diolelo. Oko wakameke akambo efula, lakatɛ mama dia dimi layanga ntshika ndjasha lo sɛlɛmɔnyi y’ase Buda. Mbala kakɔ ɔtɔi, nde akatshikitanya dionga diande. Nde akate ate: “Monga l’onto ɔmɔtshi lo nkumbo lahoke watshɛso ngandji ekɔ tshondo ya mananu.” Nde akanɔmbɛ dia ntshika wekelo wa Bible ndo otshwelo wa lo nsanganya. Dimi konongamɛka ndooko lushi ɔnɛ mama koka mbutɛmi dikambo dia ngasɔ. Ndo lakayambola nte ɔnɛ mama kana onto okina.

Papa akete la mama wedi. Dimi lakeke l’Ɛfɛsɔ tshapita 6 dia Jehowa akalangaka dia dimi nkitanyiya ambutshi ami. Dimi lakalangaka dia nkumbo kaso monga nto lo wɔladi, ndo lakafɔnyaka nte naka dimi mbahokamɛ, kete ondo ndo vɔ lawɔ wayompokamɛ. L’etena kɛsɔ, lakahombe nɔngɔsɔla ɛgzamɛ wa la kalasa, ɔnkɔnɛ lakahombe nsala kɛnɛ kakambutɛka ambutshi ami l’edja ka ngɔndɔ shato. Koko lakalake Jehowa dia layotatɛ mbɔtɔ nsanganya nto l’ɔkɔngɔ wa ngɔndɔ shato shɔ.

Yɛdikɔ yami yaki kɔlɔ l’ɔtɛ w’ɛkɔkɔ ehende. Ɔkɔkɔ wa ntondo, lakafɔnya dia l’ɔkɔngɔ wa ngɔndɔ shato layotetemala monga la nsaki ka wolo ka kambɛ Jehowa. Lo dihole dia monga  ngasɔ, diɔtɔnganelo diami la nde diakayɔlaka esadi eto. Ɔkɔkɔ wa hende, mama la papa wakasale tshɛ dia mbetawoyami dia dimi ntshika kambɛ Jehowa.

Lo Mbalasa ka Diolelo, lakahomana l’Ɛmɛnyi wa Jehowa efula wakalɔshama oma le nkumbo yawɔ. Vɔ wakashikikɛ ɔnɛ Jehowa ayokokeketsha. (Mateo 10:34-37) Vɔ wakanembetshiya ɔnɛ naka dimi ntshikala la kɔlamelo otsha le Jehowa, kete nkumbo kami koka ndjeeka akambo wendana la nde. Dimi lakakombolaka ndjaɛkɛ le Jehowa, ɔnkɔnɛ lakatatɛ nɔmba l’etete.

Nkumbo kami kakandɔsha lo toho totshikitanyi. Mama akanɔmbɛ dia dimi ntshika mbeka ndo akahembaka nkana la mi yimba lo dikambo sɔ. Ntena efula, lakatshikalaka tsho kii. Etena kakamatɛkɛtaka dikambo dimɔtshi, takongaka mbala efula la londjo nɛ dia onto l’onto akalangaka mɛnya woho wende la shadiya. Ɛlɔ kɛnɛ, lamboshihodia dia otonga laki la dilɛmiɛlɔ di’efula lo nsaki ya mama ndo lo dietawɔ diande, tshike londjo totolonga. Ambutshi ami wakambishaka elimu efula diaha dimi ntapɔ oma la ngelo. Tena dimɔtshi, vɔ wakandjihɛka luudu kana aha tshikɛmi kaanga yangɔ ya ndɛ.

Mama akalɔmbɛ anto akina dia vɔ mbokimanyiya dia mbetawoyami. Nde akasawola l’ombetsha ami, koko dimi kotshikitanya kanyi yami. Mama akatshu lami le owandji ande wa lo dihole diakandakambaka olimu woho wa nde tombetawoya ɔnɛ ɛtɛmwɛlɔ tshɛ wekɔ anyanya. Nde akelɛ ewotɔ aso lo telefɔnɛ ndo akade ekoko wa delo awalɔmba ekimanyielo. Dikambo sɔ diakanyangiya efula. Koko lo nsanganya, dikumanyi wakambitɛ ɔnɛ etena kasawola mama l’anto akina lo dikambo di’okakatanu aso dimi lande, lo mɛtɛ nde ekɔ lo mbasambisha.

Ambutshi ami wakalangaka dia dimi mbɔtɔ kalasa y’adidi l’oyango wa dimi nkondja olimu wa dimɛna. Sho tshɛ takatshimbe wɛɔngɔ l’ɔtɛ wa dikambo sɔ, laasɔ sho kokoka disawola lo wɔladi,  ɔnkɔnɛ lakaafundɛ mikanda efula dia mbalembetshiya eyango ami. Papa akandama la nkɛlɛ k’efula ndo akate ate: “Naka wɛ fɔnyaka ɔnɛ wɛ koka ntana olimu, tanawɔ lui, naka aha ngasɔ kete wɛ ntomba oma lanɛ.” Lakalɔmbɛ Jehowa ndo lakawotɛ dia nde kimanyiyami. La wedi a pindju, etena kakimi l’esambishelo, akadiyɛso ahende wakambisha olimu wa mbetshaka anawɔ. Papa kɔngɛnangɛna dikambo sɔ, ɔnkɔnɛ nde kɔtɛkɛtɛtshami nto ndo nde akaminya yimba. Mama akate ate otoleka dimɛna dimi monga ondjakanyi lo dihole dia monga Ɔmɛnyi wa Jehowa.

Lo ntena dimɔtshi lakayambola dia kana mɛtɛ Jehowa nangaka dia dimi mamanɛ l’ambutshi ami lo yɛdikɔ y’efula ya nganɛ. Ɔnkɔnɛ dimi lakalɔmbɛ Jehowa ndo lakakane yimba la kɛnɛ kata Bible lo dikambo dia ngandji. Kɛsɔ akakimanyiya dia mɛna akambo la sso di’ɔlɔlɔ ndo lakayoshihodiaka ɔnɛ naka ambutshi ami wakandɔshaka, kete nɛ dia vɔ wakayakiyanyaka lo dikambo diami. Jehowa akakimanyia dia dimi ntshikitanya ekanelo kami ndo dia mbeya kɛnɛ kakamahombe nsala. Ndo nto, woho wakamalekaka ntomba l’olimu w’esambishelo, mbakamatalekaka ngɛnangɛna olimu akɔ. Eelo mɛtɛ, dimi lakalange monga ombatshi mboka.

Etena kakoke akadiyɛso amɔtshi ɔnɛ dimi nangaka monga ombatshi mboka, vɔ wakambutɛ vate dimi pombaka tokokonga yema dia nkɛlɛ k’ambutshi ami tokokitakita. Lakasale dɔmbɛlɔ dia nkondja lomba, lakasale eyangelo, lakakane yimba lo kɛnɛ kendana l’ɛkɔkɔ wakamalangaka monga ombatshi mboka ndo lakasawola la anangɛso l’akadiyɛso wambohokɔ akambo. Dimi lakɔshi yɛdikɔ ya ngɛnyangɛnya Jehowa. Ndo nto, lakayoshihodiaka dia oyadi kaanga otomokonga tshanda mɔtshi la ntondo ka dimi monga ombatshi mboka, ambutshi ami wototetemala ndɔshami.

Lakatatɛ nkamba oko ombatshi mboka l’ɔnɔnyi wakimi lo ka samalo ka sekɔndɛrɛ. Oma l’ɔkɔngɔ wa nkamba oko ombatshi mboka lo tshanda mɔtshi, lakakombola ntshɔ lo dihole diakiwɔ l’ohomba efula w’apandjudi. Koko papa la mama konanga dia dimi ntshɔ ko mimɔ oma la ngelo. Ɔnkɔnɛ, lakakonge polo ndo lam’akamakotsha ɛnɔnyi 20. Lakayɔlɔmba biro ka filialɛ dia vɔ tomami l’ɛtshi ka nkɛtɛ kaki suke l’ewotɔ ami lo sidɛ ka Japon diaha mama ndeka ndjakiyanya.

Lam’akamatomama lɛkɔ, dimi laki l’ɔngɛnɔngɛnɔ dia mɛna woho wakabatizamaka ambeki ami efula wa Bible. Dimi lakatatɛ mbeka Angɛlɛ nɛ dia lakalangaka nyomoleka ndjasha l’olimu ami w’esambishelo. Oma laasɔ, l’ɔkɔngɔ wa dimi mɛna ohetoheto waki l’ambatshi mboka wa laande ahende waki l’etshumanelo kaso ndo woho wakawakimanyiyaka anto akina, dimi lakɔshi yɛdikɔ dia ndo dimi lawɔ monga ombatshi mboka wa laande. L’etena kɛsɔ, mama akandama la hemɔ ka wolo mbala hiende y’etondo, ndo mbala yakɔ hiende dimi lakakalolaka la ngelo dia tookimanyiya. Dui sɔ diakawambiya efula ndo nde akoyokoma yema ɔlɔlɔ oya le mi.

L’ɔkɔngɔ w’ɛnɔnyi esambele, Atsushi, laki ombatshi mboka ɔmɔtshi wa laande lakamatɛkɛtshi dikambo diande, akatomɛ mukanda. Nde akakɔmiyaka l’oyango wa tshukami ndo nde akalangaka mbeya kanyi yaki la mi lo dikambo diande. Dimi komonga la ngandji ka lam’asa pami la womoto otsha le Atsushi, ndo dimi kɔfɔnyaka dia nde aki la tɔ oya le mi. Oma l’ɔkɔngɔ wa ngɔndɔ ɔtɔi, dimi lakookadimola nte dimi nangaka keeya dimɛna. Takayoshikikɛ dia sho akɔ ahende taki l’eyango waamɛ. Takalangaka ntetemala l’olimu wa lo tena tshɛ ndo taki suke dia mbetawɔ oseka ɔkɛndɛ tshɛ. L’ekomelo a shimu, takayotshukanaka. Dimi laki l’ɔngɛnɔngɛnɔ w’efula nɛ dia papa la mama, ndo ewotɔ aso ekina wakaye lo fɛtɛ ka diwala diaso.

Yema tshitshɛ l’ɔkɔngɔ wa laasɔ, etena kakatatatɛ nkamba oko ambatshi mboka wa pondjo, Atsushi akasɔnama oko ɔhɛna w’omendji  w’otshimbedi. L’ɔkɔngɔ diko, takayokambaka oko ambatshi mboka wa laande ndo oma laasɔ takayokamba olimu wa l’otshimbedi. Etena kakatashidiya membola tshumanelo dia l’otshimbedi aso mbala ka ntondo, biro ka filialɛ akatelɛ lo telefɔnɛ. Vɔ wakatɔlɔmbɛ dia kana sho tayolanga ntshɔ la Népal dia totetemala nkamba olimu aso wa l’otshimbedi.

Dimi lakayakiyanya efula lo woho wayoyaoka ambutshi ami naka dimi lamboleka mangana la wɔ etale. Etena kakamawaelɛ lo telefɔnɛ, papa akakadimola ate: “Wɛ ayanga tshɔ lo dihole dia dimɛna ɔnami.” Lomingu ɔtɔi la ntondo ka laasɔ, ɔngɛnyi ande ɔmɔtshi akawosha dibuku diakatɛkɛtaka akambo wa la Népal, ndo papa akɛnyi dia ɔsɔ aki dihole dia dimɛna membola.

Takonge l’ɔngɛnɔngɛnɔ w’efula wa monga l’atei w’anto walongɔna dimɛna wa la Népal. L’ɔkɔngɔ diko, ɛtshi ka nkɛtɛ ka Bangladesh kakayokotshama l’otshimbedi aso. Kaanga mbakitɔ suke la Népal, tɔ kakatshikitana la tɔ efula. Taki l’akambo efula wotshikitanyi l’olimu aso w’esambishelo. L’ɔkɔngɔ w’ɛnɔnyi etanu, wakatokaloya la Japon, lɛnɛ eso l’ɔngɛnɔngɛnɔ l’olimu w’otshimbedi ɛlɔ kɛnɛ.

Lakeke akambo efula lo dikambo dia Jehowa etena kakamakambaka la Japon, la Népal ndo la Bangladesh. Anto wa lo wedja ɛsɔ waki la mbekelo, waonga ndo kutimɛ yotshikitanyi. Ndo onto l’onto ekɔ la woho ande. Lakɛnyi woho wakokɛ Jehowa onto l’onto, wawaetawɔnde, waakimanyiyande ndo waatshɔkɔlande.

Lekɔ l’ɛkɔkɔ efula wa mbisha Jehowa losaka. Nde aketawɔ dia dimi mbeeya ndo mbookambɛ, ndo nde akambisha omi l’oshika l’Okristo. Nzambi akakimanyiya dia dimi mbɔsa tɛdikɔ t’amɛna ndo ɛlɔ kɛnɛ lekɔ la diɔtɔnganelo dia dimɛna lam’asami la nde ndo la nkumbo kami. Lekɔ lo nkaloya Jehowa losaka nɛ dia dimi la mama taya angɛnyi w’amɛna nto. Ɔnkɔnɛ, dimi lekɔ la lowando l’efula nɛ dia lakatane wɔladi lam’asami la Nzambi ndo la mama.