Ɔkɔkɔ wele ekambɔ k’ɛdɛna mendanaka la yɛ

DIKAMBO dialeka mambiya l’atei w’akambo wata waa nomb’ewo mɔtshi y’awui wa lo Bible dia ndɔshana l’ɔkɔndɔ wendana l’ekambɔ k’Ɛdɛna ele woho watawɔ di’abuku akina wa lo Bible hawosukɛ ɔkɔndɔ wendana l’ekambɔ k’Ɛdɛna. Ɛnyɛlɔ, Prɔfɛsɛrɛ Paul Morris ka wekelo wendana l’awui w’ɔtɛmwɛlɔ akafunde ate: “Ahole akina wa lo Bible hawotondola okanda djɛshi di’ɔkɔndɔ wa Ɛdɛna.” Tomanyi efula mbeyaka mbetawɔ kanyi yande shɔ, koko tolembetelo mɛnyaka dia kɛnɛ kakandate kɛsɔ bu mɛtɛ.

Lo mɛtɛ, Bible tɛkɛtaka ahole dikambo dia ekambɔ k’Ɛdɛna, dia Adama, dia Eva ndo dia oloyi. * Koko munga kɛsɔ kasala nomb’ewo mɔtshi y’awui wa Bible kekɔ anyanya lo mbɛdika la munga kɛmɔtshi koleki woke kasalawɔ. Lo mɔnyɔla ɔkɔndɔ ɔsɔ wa lo dibuku di’Etatelo, ewandji w’ɛtɛmwɛlɔ ndo amɔnyɔdi wa Bible wekɔ lo ndɔshana la tshondo ya Bible. Lo woho akɔna?

Dia nshihodia awui akina wa lo Bible, ekɔ ohomba nshihodia kɛnɛ kakete l’ekambɔ k’Ɛdɛna. Ɛnyɛlɔ, Ɔtɛkɛta wa Nzambi wekɔ la oyango wa tokimanyiya dia ntana ekadimwelo lo ambola woleki ohomba wayaoka anto. Mbala efula, ekadimwelo washa Bible lo ambola asɔ mendanaka la kɛnɛ kakete l’ekambɔ k’Ɛdɛna. Tɔsɛdingole bɛnyɛlɔ dimɔtshi.

● Lande na katshundaso esombe ndo kavɔso? Adama l’Eva wakahombe nsɛna pondjo pondjo otowotetemala nkitanyiya Jehowa. Otondongaka vɔ kombɔtɔmbɔkwɛ, tshika vɔ kovɔ. Lushi lakawatɔmbɔkɔ, mbakawatatɛ la mvɔ. (Etatelo 2:16, 17; 3:19) Vɔ wakashisha eongelo kawɔ ka kokele ndo wakakoke tsho nsambiya tokanula tawɔ pɛkato ndo eongelo kɛsɔ. Bible mbutaka ɔnɛ: “Diakɔ diele, oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”​—Rɔmɔ 5:12.

● Lande na ka katshika Nzambi awui wa kɔlɔ? L’ekambɔ k’Ɛdɛna, Satana akelɛ Nzambi ɔnɛ kanga kashi ɔnɛ ladima ditongami diande kɛnɛ kele ɔlɔlɔ. (Etatelo 3:3-5) Ɔnkɔnɛ, nde akɔnyɔla lotshungɔ lele la Jehowa la nɔmbɔla. Adama l’Eva wakasɔnɛ dia ndjela Satana, ɔnkɔnɛ vɔ wakoke lowandji laki Jehowa ɔkɔngɔ ndo wakate dia onto koka nshikikɛ ndamɛ kɛnɛ kele ɔlɔlɔ ndo kɛnɛ kele kɔlɔ. Oma lo losembwe ndo lomba lande la kokele, Jehowa akeyaka dia aki paka yoho tshɔi ya nkandola dikambo sɔ lo yoho ya dimɛna, ntshika dia etena kɛmɔtshi mbeta, ndo mbisha anto diaaso dia vɔ ndjalɔmbɔla vɔamɛ oko wakawasɔnɛ. Awui wa kɔlɔ wɛnaso ndja oma lo yɛdikɔ mɔtshi, lo woho watetemala Satana nsɛngiya anto ndo dui sɔ diakayasholaka yema yema mɛtɛ k’ohomba kɛnɛ: Onto bu l’akoka wa ndjalɔmbɔla ndaamɛ aha la ekimanyielo kaki Nzambi.​—Jɛrɛmiya 10:23.

● Naa sangwelo diaki Nzambi lo dikambo dia nkɛtɛ? L’ekambɔ k’Ɛdɛna, Jehowa akɛnya woho wahomba nkɛtɛ mongaka olangala. Nde akasha Adama l’Eva ɔkɛndɛ wa ndodia nkɛtɛ l’ana ndo dia ‘kiolɛ,’ dia paradiso k’olangala kɛsɔ kokanɛ lo nkɛtɛ k’otondo. (Etatelo 1:28) Laasɔ, sangwelo diaki Nzambi lo dikambo dia nkɛtɛ ekɔ dia tɔ monga paradiso kayodjasɛ anto wa kokele, nkumbo kele kaamɛ ka tokanula taki Adama l’Eva. Efula k’awui wofundami lo Bible mendanaka la ehomɔ kayokamba la Nzambi dia nkotsha sangwelo diande dia l’etatelo sɔ.

● Lande na kakaye Yeso lanɛ la nkɛtɛ? Ɔtɔmbɔkwɛlɔ wa l’ekambɔ k’Ɛdɛna wakela nyɔi le Adama l’Eva ndo le anawɔ, koko la ngandji tshɛ, Nzambi akasha anto elongamelo. Nde akatome Ɔnande la nkɛtɛ dia ndjokimɔ kɛnɛ kelɛ Bible oshinga w’etshungwelo. (Mateo 20:28) Kakɔna kalembetshiya dui sɔ? Eelo, Yeso aki “Adama w’ekomelo”; nde akatondoya lɛnɛ akakite Adama tatala. Yeso akatetemala monga la lɔsɛnɔ l’onto la kokele lo ntetemala monga l’okitanyiya ande le Jehowa. Oma laasɔ, nde aketawɔ nkimɔ lɔsɛnɔ lande oko olambo, kana oko oshinga w’etshungwelo lo mbisha anto wa kɔlamelo diaaso dia nkondja edimanyielo ka pɛkato yawɔ ndo dia vɔ ndjonga la woho wa lɔsɛnɔ laki l’Adama l’Eva l’ekambɔ k’Ɛdɛna la ntondo ka vɔ nsala pɛkato. (1 Kɔrɛtɔ 15:22, 45; Joani 3:16) Lo nsala ngasɔ, Yeso akashikikɛ dia sangwelo diaki Jehowa dia nkɛtɛ nkoma paradiso diayokotshama. *

Sangwelo diaki Nzambi diekɔ shikaa ndo diɔ bu kanyi mɔshi yaheyama ɔtɛ l’ekolo. Ɔsɔ ekɔ dui dia mɛtɛ. Oko waki ekambɔ k’Ɛdɛna dihole dia mɛtɛ diaki lanɛ la nkɛtɛ diaki la nyama ya mɛtɛ ndo l’anto wa mɛtɛ, mbele daka diaki Nzambi diendana la nshi yayaye diekɔ dui dia mɛtɛ ndo diayokotshama keem’edja. Onde nshi yayaye shɔ yayonga dui dia mɛtɛ le yɛ? Lo yɛdikɔ y’efula, dui sɔ nemanɛka la yɛ. Nshi yayaye ya ngasɔ mbakombolɛ Nzambi anto efula, kaanga wanɛ wakahomana la mpokoso lo nsɛnɔ yawɔ.​—1 Timɔte 2:3, 4.

Etena kakasunyasunyaka Yeso lomu, nde akatɛkɛta l’onto ɔmɔtshi lele lɔsɛnɔ lande lakakadimɔ lo yoho ya diambo. Pami kɛsɔ aki ondjakanyi; nde akeyaka dia nde akasunga ndjakema. Koko nde akakadimɔ otsha le Yeso dia nyanga ekeketshelo ndo elongamelo. Ngande wakokadimola Yeso? Nde akokadimola ate: “Wɛ ayonga la mi lo paradiso.” (Luka 23:43) Naka Yeso nangaka mɛna ondjakanyi w’edjedja ɔsɔ lo paradiso, mbuta ate mboolola ndo mbosha diaaso dia ndjɔsɛna pondjo pondjo lo paradiso ka la nkɛtɛ, shi kete kɛsɔ mbakombolande ndo lo dikambo diayɛ? Eelo, kɛsɔ mbakombolande! Kɛsɔ mbakombola ndo She! Naka wɛ nangaka ndjɛna nshi yayaye shɔ, kete nsala kɛnɛ tshɛ keyɛ l’akoka wa nsala dia mbeka awui wendana la Nzambi kakatonge ekambɔ k’Ɛdɛna.

[Nɔte ka l’ɛse ka dikatshi]

[Kiombo/​Esato]

PRƆFƐSIYA K’AWUI WA LO BIBLE MBƆTƆNƐKA

“Dimi layodja lohetsho lam’asayɛ la womoto ndo lam’asa kanula yayɛ la kanula yande. Nde ayokominola lo ɔtɛ ndo wɛ ayowolumata lo etshindji.”​—Etatelo 3:15.

Ɔnɛ ekɔ prɔfɛsiya ka ntondo ka lo Bible kakate Nzambi l’Ɛdɛna. Ko ele womoto, tokanula, oloyi ndo kanula yawɔ? Ngande wakɛnama “lohetsho lakatama lɔsɔ”?

OLOYI

Satana Diabolo.​—Ɛnyɛlɔ 12:9.

WOMOTO

Okongamelo waki Jehowa wokengami la ditongami dia l’olongo. (Ngalatiya 4:26, 27) Isaya akatɛkɛta dia “womoto,” lo mbuta dia nde ayota wodja wa lo nyuma wa lo nshi yayaye.​—Isaya 54:1; 66:8.

KANULA Y’OLOYI

Wanɛ wasɔna dia nsala lolango laki Satana.​—Joani 8:44.

KANULA YA WOMOTO

Yɔ yekɔ ntondotondo Yeso Kristo, ɔnɛ lakatombe oma l’etenyi ka l’olongo k’okongamelo wa Jehowa. Etenyi kekina ka “kanula” shɔ ele anango Kristo wa lo nyuma, wanɛ wayolɛ la nde l’olongo. Akristo w’akitami asɔ mbakenga wodja wa lo nyuma, mbuta ate “Isariyɛlɛ wa Nzambi.”​—Ngalatiya 3:16, 29; 6:16; Etatelo 22:18.

OLUMATELO WA L’ETSHINDJI

Akahomuya Mɛsiya, koko etombelo wa dikambo sɔ waki wa lo tshanda mɔtshi tsho. Satana akatondoya dia ndjakisha Yeso etena kakinde lanɛ la nkɛtɛ. Koko Yeso akolwama.

OMINELO WA L’ƆTƐ

Satana ayohomɔ ɛngɛ ka nyɔi. Yeso ayolonya Satana lo pondjo. Koko la ntondo ka nde ndjolanya lo pondjo, Yeso ayonya awui wa kɔlɔ wakatatɛ Satana mbela l’Ɛdɛna.​—1 John 3:8; Revelation 20:10.

Dia Mbeya awui ɔtɛ a dui wɔtɛkɛtami lo Bible, enda biubukubuku La Bible​—Quel est son message ? yakatondjama oma le Ɛmɛnyi wa Jehowa.

[Osato]

Adama l’Eva wakadiɛnɛ l’etombelo wa kɔlɔ w’oma lo pɛkato