Ambola w’oma le ambadi aso . . .

Lende ele Paradiso katɛkɛtama lo Bible?

▪ Yeso akalake pami kakasenasenaka kakɛnya mbetawɔ le nde la dihonga tshɛ ate: ‘Wɛ ayonga la mi lo Paradiso.’ (Luka 23:43) Lende akahombe pami kɛsɔ monga? Onde Paradiso kakahombe monga l’olongo, la nkɛtɛ kana lo dihole dimɔtshi dia l’atei atei diakonga anto dia ndjolomboshama?

Ambutshi aso wa ntondo wakasɛnɛ lo Paradiso. Bible totɛka ɔnɛ: “[Jehowa Nzambi] akune ekambo lu kete ya Edena, lu leke l’ehutwelu ka unya. Leko kakandakitsha untu lakandatungi. [Jehowa Nzambi] akose untu, akûkitsha lu ekambo ka Edena dia ndi nkikamba la nkilamaka.” (Etatelu 2:8, 15) Etena kakakadimɔma ɛtɛkɛta ɛsɔ lo Grɛkɛ, tshɛkɛta “ekambɔ” yakakadimɔma oma lo tshɛkɛta pa·raʹdei·sos oma lɛnɛ akɔsama tshɛkɛta ya l’Ɔtɛtɛla “Paradiso.”

Ambutshi aso wa ntondo wakahombe nanola elelo wa Paradiso otsha l’andja w’ekambɔ k’Ɛdɛna woho watohamiaka ambutshi luudu lawɔ naka wambota ana efula. Nzambi akawatɛ ate: “Nyuludia kete, nyuyûleli.”—Etatelu 1:28.

Ɔnkɔnɛ, sangwelo di’Otungi aso aki di’anto nsɛna ndo fulanɛ lo Paradiso ka la nkɛtɛ. Vɔ wakahombe nsɛna pondjo pondjo l’ekambɔ k’Ɛdɛna ndo totowonga l’ohomba wa waombo. Nkɛtɛ kotoyala edjaselo ka pondjo k’anto. Kema dui dia diambo dia diangɔ diakatongama l’okama aso wa nkɛtɛ tosha ɔngɛnɔngɛnɔ w’efula wa ngasɔ! Sho takatongama dia nsɛna lo nkɛtɛ ka dimɛna efula.

Onde sangwelo dia Nzambi diambotshikitana? Kema, nɛ dia Jehowa toshikikɛka ɔnɛ: “Osoku mbatuyalaka diui diatutumbaka uma l’unyo ami: dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.” (Isaya 55:11) Ambeta olekanyi ɛnɔnyi 3 000 l’ɔkɔngɔ wa etongelo k’onto, Bible kakate lo kɛnɛ kendana la ɔnɛ “lakatungi kete, ndu lakayitshi” dia “ndi kuyitunga utungatunga, keli akayitungi dia antu mbidjase loko!” (Isaya 45:18) Sangwelo dia Nzambi diatatshikitana. Nkɛtɛ kayoyala nto Paradiso.

Avɛsa efula wa lo Bible tɛkɛtaka lo kɛnɛ kendana la woho wayonga lɔsɛnɔ lo Paradiso ka la nkɛtɛ. Ɛnyɛlɔ, prɔfɛsiya k’Isaya mbutaka ɔnɛ: “Vo wayuhika mvudu, wayudjaseka loko; wayune dikambo di’elua, wayolekaka elua w’uma loko.” (Isaya 65:21) Lende atowohikaka mvudu, atowokambaka dikambɔ ndo atowɔlɛka elowa? Shi lanɛ la nkɛtɛ? Tukedi 2:21 nembetshiyaka hwe ɔnɛ: “Antu w’uluwanyi wayukita kete, antu w’usimbwi wayutshikala loko.”

Yeso nde lawɔ akatɛkɛta lo kɛnɛ kendana la Paradiso ka la nkɛtɛ. Lo mɛtɛ, nde lawɔ akasha anto daka dia Paradiso ka l’olongo, koko yema y’anto tshitshɛ mbahomba ntshɔ lɛkɔ. (Luka 12:32) L’ɔkɔngɔ wa nyɔi kawɔ, vɔ mbolwamaka dia ntshɔ otsha lo Paradiso ka l’olongo dia tolɛ kâmɛ la Kristo lâdiko dia Paradiso ka la nkɛtɛ. (Enyelo 5:10; 14:1-3) Emboledi wa l’olongo ɛsɔ wayosala la wolo dia Paradiso ka la nkɛtɛ nɔmbwama ndo kokamɛ lo ndjela atɔndɔ waki Nzambi.

Yeso akeyaka dia ɔsɔ mbele lolango la Nzambi lo kɛnɛ kendana la nkɛtɛ. Ngasɔ mbediɔ nɛ dia nde aki l’olongo kâmɛ la She l’etena kakandatonge ekambɔ k’Ɛdɛna. Wanɛ tshɛ wele la mbetawɔ le Yeso ɛlɔ kɛnɛ kokaka ndjokondja lɔsɛnɔ la pondjo lo nshi yayaye lo Paradiso ka la nkɛtɛ. (Joani 3:16) Yeso akalake anto wa ngasɔ ɔnɛ: ‘Wɛ ayonga la mi lo Paradiso.’—Luka 23:43.

[Efundelo wɛnya kanga osato wa lo lɛkɛ 15]

© FORGET Patrick/SAGAPHOTO.COM/Alamy