Wetshelo wakondjaso oma le Yeso

Shɛngiya yele la ditongami dia lo nyuma le so

Yeso akasɛnaka l’andja wa lo nyuma kâmɛ la She “ntundu andja watatungama.” (Joani 17:5) Ɔnkɔnɛ, nde mbasungana nkadimola ambola wayela anɛ:

Onde andjelo ndjashaka le so?

▪ Wetshelo wakondjaso oma le Yeso ele, andjelo ndjashaka efula le anto. Nde akate ate: “Ongenongeno ndjalaka lu ashu wa andjelo wa [Nzambi] lu dikambu dia untu otoi lambukadimula utema.”—Luka 15:10.

Yeso akate dia wakasha andjelo ɔkɛndɛ wa nkokɛ ekambi waki Nzambi lo nyuma. Ɔnkɔnɛ, etena kakandahɛmɔla ambeki ande diaha vɔ ntakanya anto akina, nde akate ate: “Nyewo, tanyonyolaki nduku kiendakenda l’atei awo. Dimi lambunyutela nti: L’ulungu, andjelo awo watendaka elundji ka Papa leli l’ulungu nshi tshe.” (Mateu 18:10) Oma l’ɛtɛkɛta ɛsɔ, Yeso konanga mbuta dia ombeki ande tshɛ ayonga l’ondjelo wahomba mbolamaka, koko nde akɛnyaka dia andjelo wakamba kâmɛ la Nzambi ndjashaka efula le ase etshumanelo k’Akristo.

 Ngande wakoka Diabolo tosalɛ kɔlɔ?

▪ Yeso akahɛmɔla ambeki ande dia Satana atohembaka dia nshimba anto dia vɔ mbeya akambo wa mɛtɛ wendana la Nzambi. Nde akate ate: “Lam’uka untu diui dia diulelu, ku ndi hadishihudia, ku kanga kolo atuyakaka, atunyaka kene kakawune l’utema andi.”—Mateu 13:19.

Yeso akatondja yoho mɔtshi yakesa Satana anto sɛkɛ etena kakandoke wɛɛla wa pami kakonɛ eponga l’ekambɔ kande. Pami kɛsɔ ekɔ didjidji dia Yeso ndo eponga wekɔ didjidji dia Akristo wa mɛtɛ wayolɛ kâmɛ la Yeso l’olongo. Koko Yeso akate dia otunyi “akayune ndu wehu wa kangaka l’atei w’epunga.” Kangaka yekɔ didjidji dia Akristo wa kashi. Mateu 13:25, 39 mbutaka dia “utunyi lakalune eli uhimbanyi.” Oko watɔfɔnaka kangaka l’eponga wambokamola nkɛtɛ, mbele ndo wanɛ wayata dia Akristo wa mɛtɛ mbewɔ mbeyaka mbɔsama oko Akristo wa mɛtɛ. Ɛtɛmwɛlɔ wa kashi mbetshaka wetshelo watshutshuya anto dia vɔ ntɔmbɔkwɛ Nzambi. Satana kambaka l’ɔtɛmwɛlɔ wa kashi dia shishɛ anto lɔngɛnyi lɔtɔwɔ la Jehowa.

Akokaso nsala diaha Satana tosalɛ kɔlɔ?

▪ Yeso akate dia Satana ekɔ “umbuledi a kete nye.” (Joani 14:30) Lo dɔmbɛlɔ dimɔtshi diakandalɔmbɛ Nzambi, Yeso akatɛnya woho wakokaso ndjakokɛ oma le Satana. Lo kɛnɛ kendana l’ambeki ande, Yeso akalɔmbɛ She lele l’olongo ate: “Ombawɔ oma lee Nkanga kɔɔlɔ. Vɔ keema ase anja wooho weemi keema ose anja. Caka kele woonge cɛɛ waakiyɛ lo mɛtɛ. Ɔtɛkɛta waakiyɛ mbele kɛnɛ kele mɛtɛ.” (Joani 17:15-17, Dyookaneelo d’yOyooyo) Naka sho monga l’ewo k’oma l’Ɔtɛkɛta wa Nzambi, kete tɔ kayotokokɛ diaha andja walɔmbɔla Satana tɔsɛngiya.

Ngande watɔsɛngiya andjelo ɛlɔ kɛnɛ?

▪ Yeso akate ate: “Osoku mbayuyala l’ekumelu k’andja ane. Andjelo wayuya, wayunya antu wa kolo uma l’atei w’antu w’ololo.” (Mateu 13:49) Tamboshila mbɔtɔ “l’ekumelu k’andja ane” ndo miliyɔ y’anto wekɔ lo sambishama lokumu l’ɔlɔlɔ la Diolelo diaki Nzambi.—Mateu 24:3, 14.

Koko, aha onto tshɛ latatɛ mbeka Ɔtɛkɛta wa Nzambi mbetawɔma oma le nde. Andjelo wekɔ lo nɔmbɔla olimu w’ekambi wa Jehowa ndo anto walanga Nzambi oma k’ɛse otema wekɔ lo ndjakakitola la wanɛ wahalange nkamba la kɛnɛ kekawɔ. Etena kakandatɛkɛtaka dia wanɛ wetawɔma oma le Nzambi, Yeso akate ate: “Wuhu wa lu kete y’ololo, eli wane weli la etema wa mete ndu w’ololo. Lam’ukawo diui, vo watudikimelaka wulu, watotokaka elua la memakana.”—Luka 8:15.

Dia mbeya awui akina, enda tshapita 10 ya dibuku nɛ Bible etshatɔ mɛtɛ?, diakatondjama oma le Ɛmɛnyi wa Jehowa.

[Osato wa lo lɛkɛ 16]

Andjelo kimanyiyaka dia ntshumanya anto wele l’etema w’ɛlɔlɔ l’etshumanelo k’Akristo