BIBLE TSHIKITANYAKA NSƐNƆ Y’ANTO

Kakɔna kakakimanyiya opomi ɔmɔtshi wa mishiki wa rock waki kombidjaka anto lo demba dia nde ntatɛ nanga anto akina ndo nyanga dia mbaakimanyiya? Kakɔna kakakimanyiya pami kɛmɔtshi k’ose Mexique dia ntshika lɔsɛnɔ lande la mindo? Lande na kakatshike ɔkɛnyi ɔmɔtshi wa manamana wa kɛnyɔ ya lowango la dikalo kɛnyɔ shɔ ko ndjotatɛ mbidja welo dia kambɛ Nzambi? Teende kɛnɛ katawɔ.

“Laki ɔsɛndji, lotamanya, ndo kanga djawudi.”​—DENNIS O’BEIRNE

ƆNƆNYI WA LOOTƆ: 1958

WODJA WA LOOTƆ: ANGLETERRE

ƆKƆNDƆ: OPOMI WA MISHIKI WA ROCK LAKI KOMBIDJAKA ANTO LO DEMBA

NSHI YAMI YAKETE: Aseka waa papa waki ase Irlande, ndo lakatɛmɔlaka l’ɔtɛmwɛlɔ w’aseka Mupɛ wa l’Irlande. Mbala efula lakahombaka ntshɔ dimɛ otsha l’ɔtɛmwɛlɔ, kaanga mbakimi konangaka ntshɔ. Koko, laki la nsaki k’efula ka akambo wa lo nyuma. Lakohɔ dia la dikɔlɔ dimɔtshi lam’akamalale lo mbeto, lakakanyiyaka dia kitshimudi ya dɔmbɛlɔ diakɔ. Lakahembolaka dɔmbɛlɔ diakɔ tenyi tenyi ndo lakasalaka la wolo dia nshihodia kitshimudi y’etenyi tshɛ.

Etena kakimi ɔlɔngɔlɔngɔ, lakɔtɔ l’olui wa waa Rasta. Lakayotatɛ ngɛnangɛna awui wa pɔlitikɛ, ɛnyɛlɔ olui wakatonaka ɛlɔmbwɛlɔ k’ase Nazi. Koko lakayongaka mɛtɛ la dionga di’atɔmbɔki diaki la wanɛ wakalangaka mishiki wa rock. Lakanɔka didjoyadjoya, djekoleko marijuana, suke la lushi tshɛ. Laki la wendjudi l’akambo tshɛ, lakanɔka wanu efula, lakadjaka lɔsɛnɔ lami lo waale, ndo dimi kondjakiyanyaka efula dikambo di’anto akina. Dimi kombidjaka anto lo demba, dimi konangaka nsawola l’anto onyake paka lambɛna dia nsawo diakɔ diekɔ la wahɔ efula le mi. Lakatonaka vɔ mindami foto. Etena kakawoyami washo l’ɔkɔngɔ, dimi mɛnaka dia laki ɔsɛndji, lotamanya ndo kanga djawudi. Dimi lakongaka la lokaho paka otsha le angɛnyi ami.

Etena kakimi l’ɛnɔnyi oko 20, lakayoyasha l’awui wa lo Bible. Ɔngɛnyi ami ɔmɔtshi lakasondjaka didjoyadjoya akatatɛ mbadia Bible lo lokanu, ndo takasawola sawo di’otale diendana l’awui w’ɔtɛmwɛlɔ ndo di’ɔkɛndɛ wele la Satana l’awui wasalema l’andja ɔnɛ. Lakasombe Bible ndo lakatatɛ kiada dimi mɛ. Dimi l’ɔngɛnyi ami takadiaka Bible kaamɛ ndo takakɛtshanyaka kɛnɛ kamboteka, oma laasɔ ko sho mbɔsa yɛdikɔ mɔtshi. Takasale ngasɔ l’edja ka ngɔndɔ efula.

Awui amɔtshi wakatayotaka l’ekomelo vɔ anɛ: Tekɔ lo nsɛna lo nshi y’ekomelo k’andja ɔnɛ; Akristo pombaka nsambisha lokumu l’ɔlɔlɔ la Diolelo dia Nzambi; ndo vɔ hawokoke monga anto wa l’andja ɔnɛ, mbuta ate hawohombe mbɔtɔ l’awui wa pɔlitikɛ; ndo ɔnɛ Bible mbishaka anto alako w’eshika wenana la lɔkɛwɔ. Takashihodia dia Bible mbutaka mɛtɛ ndo ɔtɛmwɛlɔ wa mɛtɛ pombaka monga ɔtɔi. Ko lende ewɔ? Takafɔnya dia ondo ekɔ ɛtɛmwɛlɔ wa weke wasala nsanganya ya weke ndo akambo efula, ndo wɔtɔ l’awui wa politikɛ, koko takɛnyi dia Yeso kosalaka awui asɔ tshɛ. Takashihodia dia Nzambi kokambaka lawɔ, ɔnkɔnɛ, takayɔsa yɛdikɔ ya nsɛdingola ɛtɛmwɛlɔ waki kombeyamaka efula totshitshɛ dia mbeya akambo wakawasalaka.

Takayangaka dia mpomana l’ase ɔtɛmwɛlɔ akɔ ndo takawaokaka ambola efula. Sho takeyaka okadimwelo wa dimbola tshɛ, ndo takendanaka dia kana wayokadimola lo yoho yɔtɔnɛ l’Ɔtɛkɛta wa Nzambi. Oma l’ɔkɔngɔ wa nsanganya shɔ, lakalɔmbaka Nzambi mbala tshɛ ɔnɛ ‘naka anto anɛ mbele l’ɔtɛmwɛlɔ wa mɛtɛ, kete okimanyiya dia dimi ndjosangana la wɔ kaamɛ nto’. Koko l’ɔkɔngɔ wa nsanganya shɔ salema ngɔndɔ efula, dimi kotana ɔtɛmwɛlɔ waki l’akoka wa tosha ekadimwelo lo ambola aso w’oma lo Baible, laasɔ dimi kongana mpomana kaanga l’olui ɔtɔi w’ɛtɛmwɛlɔ nto.

L’ekomelo, dimi l’ɔngɛnyi ami takahomana l’Ɛmɛnyi wa Jehowa. Sho takawaoke ambola akɔ waamɛ oko waki mbekelo kaso, koko vɔ wakatosha ekadimwelo w’oma lo Bible. Kɛnɛ kakawataka kakakɔtɔnɛka la kɛnɛ kakateke. Ndo oma laasɔ takawaoke ambola wakiso tatatane ekadimwelo w’oma lo Bible, ɛnyɛlɔ, kɛnɛ kata Nzambi lo dikambo di’ɔnwɛlɔ wa mfɔka ndo lo dikambo dia didjoyadjoya. Ndo nto, vɔ wakatosha okadimwelo lo nkamba l’Ɔtɛkɛta wa Nzambi. Taketawɔ ntshɔ lo losanganya lɔmɔtsh lo Mbalasa ka Diolelo.

Mbɔtɔ lo losanganya lɔmɔtshi aki dui dia wolo le mi. Dimi kombidjaka anto lo demba diakɔ diakimi kombetawɔ mbekesanɛ l’anto wakeyaka nsɛna l’anto asɔ ndo waki l’ɔlɔtɔ wa dimɛna. Lakɔsaka dia anto amɔtshi l’atei awɔ waki l’eyango wa kɔlɔ, ko dimi kondjolanga nto ntshɔ otsha lo nsanganya. Koko mbala la mbala, lakalɔmbaka Nzambi dia nde mbishami nsaki ka dimi mpomana la wɔ nto, naka mɛtɛ vɔ mbele l’ɔtɛmwɛlɔ wa mɛtɛ, ndo lakoke nsaki k’efula ka mbeka Bible l’Ɛmɛnyi wa Jehowa.

WOHO WAKATSHIKITANYA BIBLE LƆSƐNƆ LAMI: Lakeyaka dia lakahombe ntshika nnɔ didjoyadjoya ndo laki suke dia ditshika lo pondjo. Okakatanu wa wolo aki mfɔka. Tena efula lakahembaka ntshika nnɔ mfɔka, koko dimi kotondoyaka. Etena kakamoke dia anto amɔtshi wakatshike mfɔka lo pondjo, lakalɔmbɛ Jehowa lo dikambo sɔ. L’ɔkɔngɔ wa laasɔ, l’ekimanyelo ka Jehowa, lakayotshika nnɔ mfɔka. Lakeke woho wa mbita mɛtɛ ndo ndjiholɛ Jehowa otema lo dɔmbɛlɔ.

Otshikitanu okina wakamasale ele lo kɛnɛ kendana l’ɔlɔtɔ ami ndo la yoho yami ya nɔngɔsɔla divo. Lushi la ntondo lakamɔtɔ losanganya lo Mbalasa ka Diolelo, divo diami diaki esakalaka ndo l’alangi wotshikitanyi. Oma laasɔ, lakayodidja dangi di’ɛnɔndɔ. Lakalɔtɛ djinɛ ndo jakɛtɛ ya tshitshɛ yaki la efundelo lɔkɔ. Dimi kɔmɛns ohomba ntshikitana ɔlɔtɔ ami kaanga mbele Ɛmɛnyi wa Jehowa wakakane lami yimba l’ɔkɔmi tshɛ. L’ekomelo, lakayokana yimba la 1 Joani 2:15-17: “Tanyolangake andja ɔnɛ kana diangɔ dia l’andja ɔnɛ. Naka onto ambolanga andja ɔnɛ, kete ngandji ka Shɛso keema le nde.” Lakayoshihodiaka dia lakahombe nsala etshikitanu nɛ dia oma l’ɛnamelo kami lakɛnyaka ngandji k’andja ɔnɛ lo dihole dia mɛnya ngandji ka Nzambi. Kɛsɔ mbakamasale.

L’edjedja ka wonya, lakayoshihodiaka diaha Ɛmɛnyi wa Jehowa ato mbakalangaka dia dimi mbɔtɔ nsanganya. Hɛbɛru 10:24, 25 akamɛnya dia ɔsɔ aki dui dimɔtshi diakalangaka Nzambi dia dimi nsala. Oma laasɔ, lakatatɛ ntshɔ lo nsanganya tshɛ ndo lakatɛ mbeya anto akina, lakɔshi yɛdikɔ ya ndjakimɔ le Jehowa ndo batizama.

WOHO WAKAMAKONDJA WAHƆ: Lakaleke minandema lo woho waketawɔ Jehowa dia sho monga la diɔtɔnganelo dia ma ma la nde. Kɛtshi kande kakankeketsha dia dimi mbookoya ndo ndjela Ɔnande, Yeso Kristo oko ɛnyɛlɔ lo lɔsɛnɔ. (1 Petero 2:21) Lakeke dia etena kakimi lakasale la wolo dia monga la lonto l’Okristo, lakoke monga la lonto lami hita. Lakadje welo dia monɛ ngandji ndo yimba ya nkimanyiya anto akina. Lakahembe monga oko Yeso lo kɛnɛ kendana la salɛ wadɛmi l’ɔna akambo. Ndo lakayakiyanyaka efula l’ɔtɛ w’analengo l’akadiyɛmi wa l’etshumanelo. Ndjela Kristo ambokimanyiya dia monga la losembwe, loyalɛmiya ndo laya l’a koka wa mboka anto akina ngandji.

“Vɔ wakasalɛ akambo la losembwe.”​—GUADALUPE VILLARREAL

ƆNƆNYI WA LOOTƆ: 1964

WODJA WA LOOTƆ: MEXIQUE

ƆKƆNDƆ: LAKAYAKIMƆ L’AWUI WA MINDO

NSHI YAMI YAKETE: Laki ɔmɔtshi l’atei w’ana esambele wakatɔlama otsha la Hermosillo l’osomba wa Sonora la Mexique, ɛtshi ka nkɛtɛ kaki anto wola efula. Papa akavu lam’akimi leke dikɛnda efula, ko mama akakambaka dia nde toodia. Dimi lakongaka mbala tshɛ ekolo hwe nɛ dia sho komongaka la falanga ya nsomba sabata. Lam’akamole yema, lakatatɛ nkamba dia nkimanyiya nkumbo. Oko efula ka nkumbo nkina, sho lawɔ takamɔtanaka dihole ɔtɔi.

Mama kondekaka monga la so kaamɛ lushi l’otondo dia tokokɛ shho ana. Etena kakimi l’ɛnɔnyi 6, ɔna pami ɔmɔtshi laki l’ɛnɔnyi 15 akatatɛ mbeyana la mi la wolo. Nde akatetemala nsala dui sɔ l’etena k’otale. Etombelo ɛmɔtshi waki la dui sɔ ele, kɛsɔ akalanya tokanyi tami lo kɛnɛ kendana l’akambo wa dieyanelo. Lakayaoke dia kotwama oma le apami komonga dui dia kɔlɔ. Etena kakamayange ekimanyelo le adɔkɔtɛlɛ amɔtshi, vɔ wakashikikɛ dia dimi komonga la dikambo ndo di’ɔnɛ laki la shadiya ya ndjaoka woho wakamayaokaka.

Etena kakimi l’ɛnɔnyi 14, lakɔshi yɛdikɔ ya ntatɛ ndɔta oko onto leyana l’anto wele lande demba ɔtɔi. Lakatshikala ngasɔ suke l’ɛnɔnyi 11, ndo lakadjasɛka l’atei w’apami efula l’etena kɛsɔ. L’ekomelo, lakayeka woho wa mbɛla divo ndo lakayonga ɔmbɛdi wa avo. Koko kɛsɔ tshɛ kombishami ɔngɛnɔngɛnɔ. Lakasɛnaka lɔsɛnɔ la paa efula ndo lakayaokaka okalema. Lakeyaka dia kɛnɛ kakamasalaka komonga dimɛna. Lakayambola dimi nte: ‘Onde anto amɔtshi w’ɛlɔlɔ ndo wele l’eyango w’amɛna wekɔ?’

Lakakanyiya enondo ami la womoto. Nde akatatɛ mbeka Bible l’Ɛmɛnyi wa Jehowa ndo l’ekomelo nde akabatizama. Nde akambutɛka kɛnɛ kakandekaka, koko dimi kombidjaka yimba. Lakayotatɛka nkombola woho wa lɔsɛnɔ ndo diwala diaki lande. Lakakoke mɛna woho wele nde l’omɛnde waki la ngandji ka mɛtɛ ndo la dilɛmiɛlɔ lam’asawɔ. Vɔ wakasalanɛka akambo w’ɛlɔlɔ. L’etena kɛmɔshi, Ɔmɛnyi wa Jehowa ɔmɔtshi wa womoto akatatɛ mbeka la mi Bible. L’etatelo, dimi komongaka la wangasanu otsha le nde. Koko oma laasɔ awui wakayotshikitana.

WOHO WAKATSHIKITANYA BIBLE LƆSƐNƆ LAMI: Ɛmɛnyi wakambelɛ otsh alo losanganya lawɔ lɔmɔtshi, ndo dimi lakatshu. Ɔsɔ aki dui di’oyoyo le mi. Anto tshɛ wakambɔlaka, koko Ɛmɛnyi kosala ngasɔ. Vɔ wakambisha mɔyɔ la wangasanu tshɛ, ndo wakambɔsɛ la nɛmɔ di’efula. Ɔsɔ aki dui dia diambo le mi.

Lakaleke mɛna ɔlɔlɔ w’Ɛmɛnyi wa Jehowa etena kakamɔtɔ lo losanganya lɔmɔtshi la woke. Dimi lakɛnyi dia kaanga lo lemba l’anto, anto anɛ wekɔ oko kadiyɛmi, vɔ waki la losembwe ndo waki anto w’eshika. Lakayambola dia kana ɔnɛ mbele olui w’anto w’ɛlɔlɔ ndo wele l’oyango wa dimɛna wakamatayangaka. Ngandji ndo kaamɛ kawɔ kaki dui dia diambo le mi, ndo woho wakawakambaka la Bible dia nkadimola lo ambola tshɛ akamambiya. Lakashihodia dia Bible mbaki lo kiɔkɔ y’akambo w’ɛlɔlɔ wa lo lɔsɛnɔ lawɔ. Ndo dimi lakɛnyi dia lakahombe nsala etshikitanu dia nkoma ɔmɔtshi la l’atei awɔ.

Lo mɛtɛ, lakahombe nsala eshikitanu tshɛ lo tshɛ, nɛ dia lakasɛnaka lɔsɛnɔ l’ana wa wamato. Yoho yami ya ntɛkɛta, ya nkɛndakɛnda, ya ndɔta, ya nɔngɔsɔla, divo, ndo ɔsɔnwɛlɔ w’angɛnyi, tshɛ akahombe tshikitanyema. Angɛnyi ami wakatatɛ sɔkami lo mbuta ɔnɛ: “Lande na kasalayɛ nganɛ? Waki onto l’ɔlɔlɔ. Tekake Bible. Wɛ ekɔ la tshɛ kele layɛ ohomba.” Okakatanu wakaleke tshɛ ele, dia ntshikitanya tokanyi tami ndo ntshika awui ami wa mindo.

Lakɛnyi dia etshikitanu wa weke wakakoke salema diɛsɛ l’ɛtɛkɛta wa lo 1 Kɔrɛtɔ 6:9-11 wakananda otema ami wata ɔnɛ: “Kana onde nyu hanyeye nyate anto wa kɔlɔ hawotokita Diolelo dia Nzambi? Tanyokesamake. Oyadi wanɛ wasala awui wa mindo wa dieyanelo, atɛmɔdi wa dikishi, akanga wa loseka, apami wayakimɔ lo totshelo ta dieyanelo la apami, apami wasala dieyanelo la asekawɔ apami . . . hawotokita Diolelo dia Nzambi. Ngasɔ mbaki amɔtshi wa l’atei anyu. Koko nyu nyakɛdiama.” Jehowa akimanyiya anto dia vɔ nkadimɔ ndo nsala etshikitanu ndo nde akakimanyiya ndo dimi lawɔ. Lakalɔshana la dikambo sɔ l’edja k’ɛnɔnyi efula, koko ɛlɔmbwɛlɔ ndo ngandji k’Ɛmɛnyi kakakimanyiya efula dia dimi ntondoya.

WOHO WAKAMAKONDJA WAHƆ: Ɛlɔ kɛnɛ, lekɔ la lɔsɛnɔ la dimɛna. Lambotshukana, ndo dimi la wadɛmi tekɔ lo mbetsha anaso dia nsɛna lo yoho yɔtɔnɛ l’atɔndɔ wa lo Bible. Lamboshilaka ntshika lɔsɛnɔ lami la ntondo, ndo lekɔ lo ngɛnangɛna la wahɔ efula wa lo nyuma ndo ɛkɛndɛ wele lami. Lekɔ lo nkamba oko ekumanyi l’etshumanelo, ndo lekɔ lo ntetemala nkimanyiya anto akina dia vɔ mbeka akambo wa mɛtɛ w’oma l’Ɔtɛkɛta wa Nzambi. Etshikitanu wambomosala lo lɔsɛnɔ lami ambokimanyiya mama kami dia nde monga l’ɔngɛnɔngɛnɔ ndo dia nde mbetawɔ wekelo wa Bible, ndo nde amboshila batizama oko Okristo. Kosɛmi kɛmɔtshi ka womoto laki la lɔsɛnɔ la mindo nde lawɔ aya Ɔmɛnyi wa Jehowa.

Kaanga anto amɔtshi l’atei wa wanɛ wakambeyaka la yoho ya lɔsɛnɔ laki lami wakambe lo menda woho wayami la yoho ya lɔsɛnɔ la dimɛna. Ndo lakeyaka kɛnɛ kakatshutshuya dia dimi nsala etshikitanu ɛsɔ. Ntondo, dimi lakayangaka ekimanyelo k’oshika, koko lakakondjaka paka alako wa kɔlɔ. Koko l’ɔkɔngɔ diko Jehowa akayokimanyiyaka. Kaanga mbakamayaokaka oko ɛngɔ k’anyanya, nde akambɔsɛ la nɛmɔ ndo akasalɛ akambo la ngandji ndo la solo dia lotutsha. Nzambi kele la lomba, koludi la ngandji ndo woho wakandalange dia dimi monga la lɔsɛnɔ la dimɛna akatshikitanya akambo tshɛ.

“Laki l’ɔkɛyi, lakayaokaka opoko ndo oko lakahombaka ɛngɔ kɛmɔ.”​—KAZUHIRO KUNIMOCHI

ƆNƆNYI WA LOOTƆ: 1951

WODJA WA LOOTƆ: JAPON

ƆKƆNDƆ: KƐNYI WA KƐNYƆ YA LOWANGO LA DIKALO

NSHI YAMI YAKETE: Lakole l’osomba wa tshitshɛ welɛwɔ Shizuoka Prefecture la Japon, lɛnɛ akadjasɛka nkumbo kaso kaki l’anto enanɛi lo vuduvudu ya tshitshɛ. Papa akasondjaka akalo. Lam’akimi dikɛnda, papa akatɔlɛ lɛnɛ akawakɛnyaka tɔkɛnyɔ ta lowango l’akalo ndo nde akakombola dia dimi ngɛnangɛna la kɛnyɔ shɔ. Papa akatatɛ nkombola dia dimi monga ɔkɛnyi wa woke wa kɛnyɔ yakɔ. Lam’akamɔtɔka kalasa nde akatatɛ mbetshami la yambalo tshɛ. Lo kalasa, laki pidi mbala shato lomamatanya lo kɛnyɔ y’ambeki wa wodja w’otondo. Lakakondja diaaso dia ntetemala l’inivɛrsite, koko lakɔshi yɛdikɔ ya ntshɔ mbala kakɔ ɔtɔi lo kalasa ka lowango l’akalo. Lam’akimi l’ɛnɔnyi 19, lakayokoma ose lowango la manamana.

Oma laasɔ, oyango ami wakayonga wa nkoma ondawi wa manamana la Japon. Lakakombola monga la falanga efula nɛ dia kɛsɔ akakoke nkimanyiya dia nkumbo kami monga la lɔsɛnɔ la dimɛna ndo l’ekokelo. Lakayasha efula lo wekelo. Etena tshɛ kakamayaokaka oko ɔnɔmbɔdi amboleka mbidja washo wolo le mi ndo kakimi l’okakatanu wa nkotsha lo kɛnɛ kakawambidjangɛ dia nsala lo kɛnyɔ ya lowango. Lakayaketembolaka lo ndjatɛ dimɛ ɔnɛ, lakotɔ dia ndawɔ la dikalo ndo ndooko onyake dimi pombaka ntetemala! Ndo kɛsɔ mbakamasale. Lakatatɛ nkondja wahɔ oma lo olimu ami wa wolo. L’ɔnɔnyi ami wa ntondo, lakonge pidi l’ekipɛ k’oyoyo k’andawi wa lowango. L’ɔnɔnyi wa hende, lakakotsha kɛnɛ kalɔmbama ndo lakayonga l’akoka wa monga l’ekipɛ k’andawi wa lowango la l’akalo kakaleke tshɛ la Japon. L’ɔkɔngɔ wa tshanda mɔtshi, lakayokoma onto lahende la l’ekipɛ kɛsɔ.

Oko wakamatetemala monga lo dihole dia ntondo di’andawi wa lowango, lakatetemala mbeyama oko onto lakaleke lowango l’ɛtshi ka nkɛtɛ ka Tokai la Japon. Laki onto lakalangaka sɛmanɛ. L’etena kɛsɔ, wakambokaka wɔma efula nɛ dia dimi kombokaka anto kɛtshi lo lowango. Ekondjelo kami kakatafulaka, ndo lakayaokaka dia lakakoke nsomba oseka ɛngɔ tshɛ kaki ohomba le mi. Lakasombe lokombo lɔmɔtshi laki ndo la ludu la diangɔ tshɛ ndo wa mashinyi w’amɛna efula dia dimi ndjaekesanyiyaka la lowango. Lakasombe mutuka wakaleke la fwa falanga yakamasombe lokombo. Dia kokɛ falanga yami lakayidje lo nsomba nkombo ndo munda okanda.

Polo ndo laasɔ, lakayaokaka dia lakahombaka ɔngɛnɔngɛnɔ, lakayaokaka opoko ndo oko lakahombaka ɛngɔ kɛmɔtshi. L’edjedja ka wonya, lakatshuke ndo lakote ana, koko dimi komonga la solo dia lotutsha otsha le nkumbo kami. Lakatshimbaka wɔɔngɔ otsha le wadɛmi l’ana l’akambo wa toshitshɛ. Vɔ wakayangaka nshihodia oma l’elungi kami dia vɔ mbeya kana laki la kɛlɛ.

L’ɔkɔngɔ, wadɛmi akatatɛ mbeka Bible l’Ɛmɛnyi wa Jehowa. Dui sɔ diakela etshikitanu efula. Nde akate dia nde akakombola ntatɛ mbɔtɔ lo nsanganya y’Ɛmɛnyi, ko dimi lakɔsɛ yɛdikɔ dia sho tshɔka kaamɛ nkumbo k’otondo. Dimi koka mbohɔ l’otsho ɔmɔtshi woho wakatatɛ ekumanyi kɛmɔtshi kakatelɛ lakaso mbeka la mi Bible. Kɛnɛ kakameke kaki la shɛngiya ya wolo le mi.

WOHO WAKATSHIKITANYA BIBLE LƆSƐNƆ LAMI: Hambohɛki pondjo woho wakamanandema la wadielo wa divɛsa di’Ɛfɛsɔ 5:5. Diɔ mbutaka ɔnɛ: “Ndooko onto lasala awui wa mindo wa dieyanelo kana onto lele mindo kana kanga lokaki lele ɔtɛmɔdi wa dikishi layokondja sango lo Diolelo dia Kristo ndo dia Nzambi.” Lakɛnyi dia kɛnyɔ ya ndawɔ lowango la dikalo yaki woho ɔtɔi la nkɛnya tɔkɛnyɔ ta falanga ndo kɛnyɔ yakɔ yakonɛka yimba ya lokaki. Nkum’otema kami komonga la wɔladi. Lakayaoke dia naka dimi nangaka ngɛnyangɛnya Jehowa Nzambi, kete lakahombe ntshika kɛnyɔ ya ndawɔ lowango. Koko le mi ɔsɔ aki yɛdikɔ ya wolo ya mbɔsa.

Laki oma nshidiya ɔnɔnyi wakamaleke nkondja etombelo w’amɛna lo lowandji lami. Lakɛnyi dia wekelo wa Bible wakambisha wɔladi, ki ka lo yimba, oleki la fwa kɛnɛ kaki lami etena kakamalawɔka lowango! Etena kakamatatɛ mbeka Bible, lakalawɔ lowango mbala shato tsho, koko l’otema ami dimi kokombola nto ntetemala ndawɔ lowango. Dimi kombeyaka nto woho wa nkotsha ehomba w’ase nkumbo kami. Lakayaoke oko laya lo shasa, ndo lambokalola ɛkɔngɔkɔngɔ, ndo ase nkumbo kami wakatatɛ mbidjami pandju l’olongo l’ɔtɛ wa dietawɔ diami di’oyoyo. Papa kami aki la yema y’ɔkɔmwɛlɔ. Aha la lolango, lakayotatɛka monga l’ɔkɛyi ndo lakayotata hemɔ ka l’asolo.

Kɛnɛ kakakimanyiya l’ekakatanu ɛsɔ aki wekelo ami wa Bibe ndo otshwelo wa lo nsanganya y’Ɛmɛnyi wa Jehowa. Yema yema, mbetawɔ kami kakayakeketalaka. Lakalɔmbɛ Jehowa dia nde mboka alɔmbɛlɔ ami ndo kimanyiyami dia dimi mɛna lonya lande. Ɔkɛyi ami wakakitakita nto etena kakambutɛ wadɛmi ɔnɛ dia nde monga l’ɔngɛnɔngɛnɔ takandahombe monga paka lo luudu la woke. Yema yema, lakasale ehamelo.

WOHO WAKAMAKONDJA WAHƆ: Lakeke dia ɛtɛkɛta wa Yeso wele lo Mateo 6:33 wɛkɔ mɛtɛ. Nde akate ate: “Diakɔ diele, nyotetemale nyanga ntondo Diolelo la losembwe laki Nzambi, ko nde ayonyokotshɛ diangɔ dikina sɔ tshɛ.” Sho kopomba kanga lushi “diangɔ dikina” diakate Yeso, mbut’ate kɛnɛ kakotsha ehomba aso wa lushi la lushi. Kaanga mbele ekondjelo kami ka nshi nyɛ kekɔ kasato ɔtɔi ka kɛnɛ kakamakondjaka lakamakamalawɔka lowango, dimi la nkumbo kami kopomba kaanga ɛngɔ ɔtɔi l’ɛnɔnyi 20 wetshi.

Polo ndo ɛlɔ kɛnɛ, etena ketshami wenya ami l’olimu wa Nzambi, dimi mongaka l’ɔlɔ ndo l’ɔngɛnɔngɛnɔ wakimi komonga lawɔ ntondo. Nshi yekɔ lo teete esadi eto. Lɔsɛnɔ la nkumbo kami lakaleke ndowana efula. Anami asato tshɛ kaamɛ la wadɛwɔ waya ekambi wa kɔlamelo wa Jehowa.