Etshama oma l’ɔtɛkɛta wa Nzambi

Ele Nzambi?

Sawo nɛ diekɔ la ambola wele ondo wɛ amboyambolaka ndo diɔ mɛnyaka lɛnɛ akokayɛ tadia ekadimwelo lo Bible kayɛ. Ɛmɛnyi wa Jehowa wayɔngɛnaɔngɛna dia nkɛtshanya la yɛ ekadimwelo akɔ.

1. Ele Nzambi?

Nzambi ka mɛtɛ ele Otungi wa diangɔ tshɛ. Bible mbêlɛka ɔnɛ ‘Nkumekanga ka pondjo,’ kɛsɔ nembetshiya dia nde kema l’etatelo ndo hongaki pondjo l’ekomelo. (Enyelo 15:3) Lam’ele Nzambi mbele Kiɔkɔ ya lɔsɛnɔ, sho pombaka mbɔtɛmɔla paka ndamɛ oto.—Adia Enyelo 4:11.

2. Ngande wele Nzambi?

Ndoko onto lakoka mɛna Nzambi nɛ dia nde ekɔ Nyuma, kɛsɔ nembetshiyaka dia nde ekɔ la yoho ya lɔsɛnɔ yoleki ditongami diande dia lo demba la fwa. (Joani 1:18; 4:24) Waonga waki Nzambi mɛnamaka lo diangɔ diakandatonge. Ɛnyɛlɔ, etena kendaso elowa ndo alɛmbɔlɛmbɔ wotshikitanyi, sho mɛnaka ngandji ndo lomba laki Nzambi. Woke woke w’olongo tɛnyaka wolo waki Nzambi.—Adia Romo 1:20.

Sho kokaka mbeka akambo efula wendana la lonto laki Nzambi oma lo Bible. Ɛnyɛlɔ, tɔ totɛka nganɛ wele Nzambi ndo kɛnɛ kende bu, woho wasalɛnde anto akambo ndo kɛnɛ kasalande la ntondo k’akambo wotshikitanyi.—Adia Osambu 103:7-10.

3. Onde Nzambi ekɔ la lokombo?

Yeso akate ate: “Shesu le l’ulungu, lukumbu laye lalemiami.” (Mateu 6:9) Kânga mbele Nzambi ekɔ la nkombo efula yalɔtɛtɛmɔla, nde ekɔ paka la lokombo ɔtɔi. Ɔtɛkɛta tshɛ wekɔ la woho welɛwɔ lokombo lakɔ. L’Ɔtɛtɛla sho lielɛka ɔnɛ: “Jehowa.”—Adia Osambu 83:18, NW.

Lokombo laki Nzambi lakanyema oma lo Bible efula ndo wakalihɛnya la nkombo ya lɔtɛtɛmɔla yele oko Nkumadiɔndjɔ kana Nzambi. Koko etena kakafundama Bible, lokombo laki Nzambi lakatanemaka lɔkɔ mbala oko 7 000. Yeso akeyanya lokombo laki Nzambi lo nkamba la lɔ etena kakandalembetshiyaka anto Ɔtɛkɛta wa Nzambi. Nde akakimanyiya anto dia vɔ mbeya Nzambi.—Adia Joani 17:26.

  4. Onde Jehowa tokanɛka?

Jehowa mɛnyaka woho wayakiyanyande lo dikambo diaso lo mpokamɛ alɔmbɛlɔ aso ndamɛ. (Osambu 65:2) Onde efula k’asui wɛnaso ɛlɔ kɛnɛ mɛnyaka dia Nzambi hatokanɛ? Anto amɔtshi mbutaka dia Nzambi mbatosoya dia mpemba mbetawɔ kaso, koko dikambo sɔ kema mɛtɛ. Bible mbutaka ɔnɛ: ‘Ekɔ etale le Nzambi ka mɛtɛ dia nsala kɔlɔ.’—Jobo 34:10; adia Jakoba 1:13.

Nzambi akatosha lotshungɔ la nsɔna dia nsala kɛnɛ kalangaso. Onde hatɔngɛnangɛna woho weso la lotshungɔ la nsɔna dia kambɛ Nzambi? (Jashua 24:15) Asui wamboleka mfulanɛ nɛ dia anto sɔnaka dia salɛ anto akina kɔlɔ. Jehowa mongaka la lonyangu etena kɛnande awui wele kema la losembwe asɔ.—Adia Etatelu 6:5, 6.

Kem’edja, Jehowa ayokamba la Yeso dia minya asui tshɛ ndo wanɛ wele lo kiɔkɔ y’asui akɔ. Jehowa ekɔ l’ɔkɔkɔ wa shikaa wa ntshika asui lo tshanda mɔtshi. Sawo di’ekomelo diele l’asawo anɛ diayolembetshiya lande na katshika Nzambi asui.—Adia Isaya 11:4.

5. Nzambi alangande sho nsala?

Jehowa akatotonge la dikoka dia mbêya la mbôka ngandji. Nde nangaka dia sho mbeka akambo wa mɛtɛ wendana la nde. (1 Timote 2:4) Naka sho mbeka Bible, kete tayokoka mbɔsa Nzambi oko ɔngɛnyi aso.—Adia Tukedi 2:4, 5.

Lam’ele Jehowa mbatosha lɔsɛnɔ, sho pombaka mbôka ngandji k’efula oleki kɛnɛ kokaso anto akina. Sho kokaka mɛnya Nzambi dia sho mbôkaka ngandji lo sawolaka la nde lo dɔmbɛlɔ ndo lo salaka kɛnɛ katɔlɔmbande. (Tukedi 15:8) Jehowa tɔlɔmbaka dia sho salɛka anto akina akambo la ngandji.—Adia Mako 12:29, 30; 1 Joani 5:3.

Dia wɛ mbeya akambo efula, enda tshapita 1 ya dibuku nɛ Bible etshatɔ mɛtɛ? diakatondjama oma le Ɛmɛnyi wa Jehowa.

[Osato wa lo lɛkɛ 17]

Onde ɔkɔkɔ ɔmɔtshi wa shikaa watshika Nzambi asui lo tshanda mɔtshi?