Etshama oma l’ɔtɛkɛta wa Nzambi

Ele Yeso Kristo?

Sawo nɛ diekɔ la ambola wele ondo wɛ amboyambolaka ndo diɔ mɛnyaka lɛnɛ akokayɛ tadia ekadimwelo lo Bible kayɛ. Ɛmɛnyi wa Jehowa wayɔngɛnaɔngɛna dia nkɛtshanya la yɛ ekadimwelo akɔ.

1. Ele Yeso Kristo?

Otshikitanyi l’anto akina, Yeso akasɛnɛ l’olongo oko onto la lo nyuma la ntondo ka nde ndjôtɔ lanɛ la nkɛtɛ. (Joani 8:23) Nde mbaki etongami ka ntondo kaki Nzambi ndo nde akasha lonya l’otongelo wa diangɔ dikina tshɛ. Nde ekɔ tshɔi y’onto yakatongama oma le Jehowa ndamɛ ndo nde mbelamɛ ‘Ɔna ɛtɔi’ laki Nzambi. Yeso aki Yɛmb’awui yaki Nzambi, diakɔ dielamɛnde ɔnɛ “Diui.”—Joani 1:1-3, 14; adia Tukedi 8:22, 23, 30; Kolosai 1:15, 16.

2. Lande na kakaye Yeso lanɛ la nkɛtɛ?

Nzambi akatome Ɔnande la nkɛtɛ lo nsangola lɔsɛnɔ lande l’otema waki osekaseka w’emuma w’ose Juda wakawelɛka Mariya. Diakɔ diele Yeso komonga l’ombutshi wa pami w’onto. (Luka 1:30-35) Yeso akaye la nkɛtɛ dia 1) ndjetsha akambo wa mɛtɛ wendana la Nzambi, 2) ndjosha ɛnyɛlɔ ka salaka lolango la Nzambi ndo 3) ndjokimɔ lɔsɛnɔ lande la kokele oko ‘tshungo.’—Adia Mateu 20:28; Joani 18:37.

3. Lande na keso l’ohomba wa tshungo?

Tshungo ekɔ oshinga wafutama dia ntshungola onto oma lɔhɔmbɔ. Nyɔi ndo lotshundu komonga lo sangwelo di’oma ko etatelo diaki Nzambi diendana l’anto. Ngande weyaso dikambo sɔ? Nzambi akatɛ Adama onto la ntondo ɔnɛ, naka nde nsala kɛnɛ kelɛ Bible ɔnɛ pɛkato, kete nde ayovɔ. Otondonga Adama kosala pɛkato, tshike totondohomba mvɔ pondjo. Kânga mbele Adama komvɔ lushi lakandasale pɛkato ndo mbakandatetemala nsɛna ntambe efula l’ɔkɔngɔ, nde akatatɛ mvɔ oma ko lushi lakandatone nkitanyiya Nzambi. (Etatelu 2:16, 17; 5:5) Adama akasambiya tokanula tande tshɛ pɛkato la etombelo atɔ mbidja ndo nyɔi. Ɔnkɔnɛ, nyɔi “akadiangana” le anto tshɛ wa l’andja oma lo tshimbo y’Adama. Diakɔ dieso l’ohomba wa tshungo.—Adia Romo 5:12; 6:23.

  4. Lande na kakavu Yeso?

Akoka mfuta tshungo dia totshungola oma lo nyɔi? Dilanya dia pɛkato yaso hita ele nyɔi. Onto lele kema kokele hakokaki mfuta tshungo dia pɛkato y’anto akina.—Adia Osambu 49:7-9.

Lam’ele Yeso kompowɔ eongelo kele bu kokele oma le ombutshi ɔmɔtshi wa pami, nde akavu aha dia pɛkato yande hita, koko dia pɛkato y’anto akina. Nzambi akatome Ɔnande dia nde ndjovɔ dikambo diaso dia mɛnya ngandji ka mamba kokande anto. Yeso nde lawɔ akatɛnya ngandji katokande lo nkitanyiya She ndo nkimɔ lɔsɛnɔ lande dikambo dia kɔlɔ yaso.—Adia Joani 3:16; Romo 5:18, 19.

5. Kakɔna kasala Yeso nshi nyɛ?

Lo nkɔnɔya ase hemɔ, mbolola edo ndo lo nkokɛ anto oma lo wâle ɔmɔtshi, Yeso akɛnya kɛnɛ kayondosalɛ anto tshɛ wele l’okitanyiya. (Luka 18:35-42; Joani 5:28, 29) L’ɔkɔngɔ wa nyɔi kaki Yeso, Nzambi akawolola otsha lo lɔsɛnɔ la lo nyuma. (1 Petero 3:18) Oma lâsɔ, Yeso akakonge lo lonya la pami la Nzambi edja ndo etena Jehowa kakawosha wolo wa nde mbolɛ oko Nkumekanga lo nkɛtɛ k’otondo. (Heberu 10:12, 13) Shi nyɛ Yeso ekɔ lo mbolɛ oko Nkumekanga l’olongo ndo ambeki ande wele la nkɛtɛ wekɔ lo nsambisha lokumu l’ɔlɔlɔ la Diolelo l’andja w’otondo.—Adia Danyele 7:13, 14; Mateu 24:14.

Kem’edja, Yeso ayokamba la wolo ande oko Nkumekanga dia nkomiya asui tshɛ ndo wanɛ wele lo kiɔkɔ y’asui akɔ. Miliyɔ y’anto wele la mbetawɔ le Yeso ndo wôkitanyiya wayonga la lɔsɛnɔ l’ɔngɛnɔngɛnɔ lo paradiso ka la nkɛtɛ.—Adia Osambu 37:9-11.

Dia wɛ mbeya akambo efula, enda tshapita 4 ya dibuku nɛ Bible etshatɔ mɛtɛ? diakatondjama oma le Ɛmɛnyi wa Jehowa.

[Osato wa lo lɛkɛ 25]

Miliyɔ y’anto wele la mbetawɔ le Yeso ndo wôkitanyiya wayonga la lɔsɛnɔ l’ɔngɛnɔngɛnɔ lo paradiso ka la nkɛtɛ