Lande na kahandjɔ awala efula?

“Afarise wakayi le Jesu, wakuhimbi, wakawumbula vati: Aha ekila dia pami nkimo wadendi lu akambu tshe?”—Mateu 19:3.

ANTO amɔtshi wakasɛnaka lo nshi ya Yeso wakawombola dia kana awala kokaka kana pombaka ntshikala edja. Yeso akâkadimola ate: “Nyu nyatali nyati: One lakâtungi l’etatelu, akâtungi umi la wadi? Ndu mbakandati ati: Aha dia dikambu ne mbayutshika untu shi la nyangu, mbayundumamana la wadendi, ku vo ahendi wayuyala untu otoi? Okone vo kema antu ahendi ntu, wambuyala untu otoi. Untu tamamitulaki kene kakamamanya [Nzambi].” a (Mateu 19:4-6) Mbokɛmaka hwe dia Nzambi akakongɛ dia awala ntshikala edja.

Lo wedja efula ɛlɔ kɛnɛ, pursa 40 kana ndekana y’atshukanyi tshɛ ‘kakitɔnaka’ ndo vɔ ndjokomaka lo ndjaka awala awɔ. Onde alako washa Bible lo dikambo dia diwala wambeta loowe? Onde awala wekɔ lo mpandjɔ l’ɔtɛ w’ɔnɛ yoho yakakongɛma diwala oma k’etatelo mbele kɔlɔ?

Tɔshi ɛnyɛlɔ kɛnɛ: Nkumbo hiende wambosomba mutuka wa woho ɔtɔi. Nkumbo ka ntondo nɔngɔsɔlaka mutuka awɔ mbala la mbala dia vɔ ntshikala dimɛna ndo mbɔkɛndjakɛndjaka la yewo tshɛ. Mutaka awɔ hawolana. Koko nkumbo ka hende hawoyatshungolɛ etena ka nɔngɔsɔla mutaka awɔ ndo wekɔ lo mbɔkɛndjakɛndja l’ekudukudu tshɛ. Mutuka awɔ ambolana ndo wambowonya yimba. Onde ɛkɔmɔ kekɔ le mutuka wamboyolana kana le akanga wa mutuka? Lo mɛtɛ, akanga wa mutuka wekɔ l’onongo a woke lo woho wamboyolana mutuka.

Woho akɔ wâmɛ mbele, woho wahandjɔ awala efula ɛlɔ kɛnɛ hɛnya dia woho wakakongɛma diwala oma k’etatelo mbele kɔlɔ. Miliyɔ y’awala wasɛna dimɛna ɛlɔ kɛnɛ mɛnyaka dia diwala diakakongɛma dimɛna oma k’etatelo. Awala asɔ mbishaka atshukanyi, nkumbo ndo atshunda ɔngɛnɔngɛnɔ ndo wɔladi. Koko l’ɛnyɛlɔ ka mutuka, diwala pombaka mbidjamaka yimba efula ndo nɔngɔswamaka mbala la mbala dia diɔ ntshikala edja.

Oyadi diwala diayɛ dieke oyoyo kana diambosala ɛnɔnyi akumi, alako w’oma lo Bible wɛnya woho wa dilɔngɔsɔla ndo dikeketsha wekɔ ohomba efula. L’asawo wayela, tayɛna bɛnyɛlɔ dimɔtshi.

[Nɔte ka l’ɛse ka dikatshi]