Etshama oma l’ɔtɛkɛta wa Nzambi

Asangoya Nzambi lo dikambo dia nkɛtɛ?

Sawo nɛ monyiyaka ambola amɔtshi wele ondo wɛ amboyaokaka ndo diɔ mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayɔngɛnangɛna dia nkɛtshanya layɛ ekadimwelo ɛsɔ.

1. Asangoya Nzambi lo dikambo dia nkɛtɛ?

Nkɛtɛ ekɔ edjaselo k’anto. L’ɔkɔngɔ wa nde ntonga andjelo dia vɔ nsɛna l’olongo, Nzambi akatonge onto dia nde ngɛnangɛnaka la nkɛtɛ. (Jobo 38:4, 7) Ɔnkɔnɛ, Jehowa akakitsha pami ka ntondo lo paradiso ka dimɛna efula kakawelɛka ɔnɛ ekambɔ ka Ɛdɛna ndo akawosha nde la tokanula tande takahombe ndjotɔ, elongamelo ka lɔsɛnɔ l’ɔngɛnɔngɛnɔ laha l’ekomelo la nkɛtɛ.—Etatelu 2:15-17; adia Osambu 115:16.

Ekambɔ ka Ɛdɛna kaki paka lo yɛtshi ya tshitshɛ ya nkɛtɛ. Atshukanyi wa ntondo, Adama la Eva wakahombe mbota ana. Oko wakahombe nkumbo k’ana w’anto fulanɛ, vɔ wakahombe nkamba nkɛtɛ ndo kikonya paradiso. (Etatelu 1:28) Nkɛtɛ hayolanyemaki pondjo.—Adia Osambu 104:5.

2. Lande na kele nkɛtɛ kema paradiso ɛlɔ kɛnɛ?

Adama la Eva wakatɔmbɔkwɛ Nzambi, ɔnkɔnɛ nde akawatshanya oma l’ekambɔ ka Ɛdɛna. Paradiso kakashishɔ ndo ndoko onto lakakoke kikaloya nto. Bible mbutaka ɔnɛ: “Kete yambukimwama lu anya w’antu a kolo.”—Jobo 9:24; adia Etatelu 3:23, 24.

Koko, Jehowa kombohɛ sangwelo diande di’oma k’etatelo diendana l’anto, ndo diɔ diayokotshama. (Isaya 45:18) Nde ayosala di’anto nsɛna woho wa lɔsɛnɔ lakandakongɛ.—Adia Osambu 37:11.

3. Ngande wayela Nzambi wɔladi la nkɛtɛ?

Dia anto monga la wɔladi la nkɛtɛ, ntondotondo Nzambi ayonya anto wa kɔlɔ. Lo ta dia Aramangɛdɔna, andjelo waki Nzambi wayolanya atunyi ande tshɛ. Satana ayodjama lo lokanu 1 000, koko wanɛ tshɛ woka Nzambi ngandji wayoka dia ndjɔsɛna la nkɛtɛ, l’andja w’oyoyo.—Adia Enyelo 16:14, 16; 20:1-3; 21:3, 4.

  4. Etena kakɔna kayokomɛ asui?

L’edja k’ɛnɔnyi 1 000, Yeso ayolɛ oma l’olongo lâdiko dia nkɛtɛ ndo ayokikadimola paradiso. Ndo nto, nde ayodimanyiya wanɛ tshɛ woka Nzambi ngandji pɛkato yawɔ. Ɔnkɔnɛ, Yeso ayonya hemɔ, dikɔmɔ ndo nyɔi.—Adia Isaya 11:9; 25:8; 33:24; 35:1.

Etena kakɔna kayonya Nzambi awui wa kɔlɔ la nkɛtɛ? Yeso akasha “djimbitelu” yayɛnya ɔnɛ ekomelo kaya suke. Akambo wa l’andja ɔnɛ wekɔ lo mbidja panda k’anto lo wâle ndo kɛsɔ mɛnyaka di’ɔnɛ tekɔ lo nsɛna lo ‘ekomelo ka dikongɛ nɛ di’akambo.’—Adia Mateu 24:3, 7-14, 21, 22; 2 Timote 3:1-5.

5. Waa na wayodjasɛ lo Paradiso kayaye?

Yeso akadjangɛ ambeki ande dia vɔ mbetɛ anto ambeki ndo mbaetsha mboka yaki Nzambi yoludi la ngandji. (Mateu 28:19, 20) Jehowa ekɔ lo nɔngɔsɔla miliyɔ y’anto ya l’andja w’otondo dia vɔ ndjɔsɛna la nkɛtɛ, l’andja w’oyoyo. (Zefaniya 2:3) Lo Mbalasa ya Diolelo y’Ɛmɛnyi wa Jehowa, anto wekɔ lo mbetshama woho wa monga waomi, waa papa, wadi ndo wamato w’eshika. Ana ndo ambutshi wekɔ lo mbetshama kâmɛ wetshelo w’etatelo wâkimanyiya dia ndjɔsɛna lo nshi yayaye y’amɛna.—Adia Mika 4:1-4.

Naka wɛ ntshɔ lo Mbalasa ka Diolelo k’Ɛmɛnyi wa Jehowa, kete wɛ ayotosangana kâmɛ l’anto woka Nzambi ngandji ndo walanga mbeka woho wa mbɔngɛnyangɛnya.—Adia Heberu 10:24, 25.

Dia mbeya awui akina wendana la daka dia lo Bible diendana la nkɛtɛ, enda tshapita 3 ya dibuku nɛ Bible etshatɔ mɛtɛ?, diakatondjama oma le Ɛmɛnyi wa Jehowa.