Yasukanya la Nzambi

Esambelo le wanɛ wele l’etema wambatɛ

OKRISTO ɔmɔtshi wa womoto wakadiɛnɛ l’ɔkɔmwɛlɔ edja efula lo lɔsɛnɔ la nde, akate ate: ‘Jehowa hakokaki pondjo mbokami ngandji.’ Nde akayashikikɛ ɔnɛ Jehowa mangana la nde etale efula. Onde mɛtɛ Jehowa mangana etale la atɛmɔdi ande wambɔkɔmɔ? Okadimwelo washa esambelo, tanemaka l’ɛtɛkɛta wakasambiyama waki Davidi omembi w’esambo oko wofundamidiɔ lo Osambu 34:18.

Davidi akeyaka shɛngiya ya kɔlɔ yakoka monga la lonyangu l’efula le atɛmɔdi waki Jehowa wa kɔlamelo. Etena kakinde ɔlɔngɔlɔngɔ, Davidi akatekekɔka nɛ dia nkumekanga Saulo lakawokaka kandjema akatawoyangaka aha la mpekɔ dia mbodiaka. Davidi akayange eshamelo lo dihole diakandafɔnyaka ɔnɛ Saulo hokoka mboshola, mbuta ate l’osomba wa Ngata waki atunyi ande lo nkɛtɛ y’ase Filistiya. Koko, l’ɔkɔngɔ w’anto wa l’osomba ɔsɔ mbêya, Davidi akahande l’ɔtɛ wakandasale akambo oko kanga dadi. Davidi akatombola Jehowa Ɔnɛ lakôtshungola ndo kɛnɛ kakôkomɛ kɛsɔ mbakayokonyaka dia nde mfunda Osambu 34.

Onde Davidi akafɔnyaka ɔnɛ Nzambi mangana etale la wanɛ wele l’ekiyanu lo woho wɔsawɔ ɔnɛ Nzambi hawadje yimba? Davidi akafunde ate: “[Jehowa] eko lasuki la wane weli la etema wambate. Ndi atushimbelaka waku weli la [yimba ya lonyangu].” (Divɛsa 18) Nyɛsɔ tende woho watosha ɛtɛkɛta ɛsɔ esambelo ndo elongamelo.

“[Jehowa] eko lasuki.” Dibuku dimɔtshi mbutaka dia etelo kɛsɔ ekɔ “yoho mɔtshi ya mbuta ɔnɛ: Nkumadiɔndjɔ mbidjaka ekambi ande yimba, mbaeyaka, ekɔ suke dia mbakimanyiya ndo mbashimbɛ.” Ekɔ tshondo y’ekeketshelo dia mbeya ɔnɛ Jehowa kokɛka ekambi ande. Nde mɛnaka ekakatanu wele la wɔ lo “nshi y’ekumelu” nyɛ ndo nde mbeyaka tokanyi tawɔ t’oma k’ɛse otema.—2 Timote 3:1; Etsha 17:27.

“Wane weli la etema wambate.” L’ahole amɔtshi, wanɛ wele “la etema wambate” nembetshiyaka anto wahawoke ngandji. Koko, nomb’ewo kɛmɔtshi mbutaka dia ɛtɛkɛta waki omembi w’esambo ɛsɔ nembetshiyaka monga la “ɔkɛyi w’efula ndo la lonyangu la wolo.” Eelo, kânga ekambi waki Nzambi wa kɔlamelo kokaka diɛnɛ lo tena dimɔtshi l’ekakatanu wa wolo wakoka mbakɔmɔla.

“Waku weli la [yimba ya lonyangu].” Anto wambɔkɔmɔ kokaka ndjaɔsa oko anto w’anyanya lo washo awɔ vɔamɛ polo ndo lo ndjoshisha elongamelo tshɛ lo tshanda mɔtshi. Dibuku dimɔtshi di’akadimudi wa Bible mbutaka dia etelo kɛsɔ kokaka kadimɔma ɔnɛ “wanɛ wele bu l’elongamelo ka dikambo dimɔtshi.”

Ngande wasalɛ Jehowa “wane weli la etema wambate” ndo “weli la [yimba ya lonyangu]” akambo? Onde nde ndjanganyaka lawɔ lo mbɔsa di’ɔnɛ nde hakoke mbowaoka ngandji ndo mbadja yimba? Ndooko. L’ɛnyɛlɔ k’ombutshi wa ngandji wɛmba ɔnande dia mbosamba oma lo lonyangu, Jehowa ekɔ suke l’ekambi ande wayanga ekimanyiyelo le nde. Nde nomɔlomɔka dia mbasamba ndo nkɔnɔya etema awɔ wambatɛ ndo yimba yawɔ yele la lonyangu. Nde kokaka mbasha lomba ndo ekeketshelo kele lawɔ ohomba dia vɔ ndɔshana l’ohemba tshɛ wakoka mpomana lawɔ.—2 Koreto 4:7; Jakoba 1:5.

Lande na kahayayange dia ndjasukanya la Jehowa? Nzambi kokana kɛtshi kɛsɔ ndakaka ɔnɛ: “Dimi layudjase . . . kame la kanga utema wambate ndu wa ndjakitshakitsha, dia mbulula lumu la kanga ndjakitshakitsha la nkikitsha kanga [yimba ya lonyangu].”—Isaya 57:15.