Yasukanya la Nzambi

Etena kayonga esombe oko ɛlɔngɔlɔngɔ

AKƆNA l’atei aso akombola etombelo wa kɔlɔ wa lotshundu, mbuta ate demba dia enyanga enyanga, pâ ka lo washo, hayoka dimɛna ndo monga l’ekolo wasaka lokomba? Wɛ koka ndjambola ɔnɛ: ‘Lande na kakatotonge Nzambi l’elongamelo ka sho monga la nshi y’ɔlɔngɔlɔngɔ y’ɔngɛnɔngɛnɔ ko ndjokomɛ paka la nshi y’osombe ya pâ efula?’ Losango l’ɔlɔlɔ ele aha kɛsɔ mbakatokombolɛ Nzambi. Koko, la ngandji tshɛ nde akɔshi yɛdikɔ ya totshungola oma lo lotshundu! Enda ɛtɛkɛta wakate owandji wa nkumbo Jɔbɔ wele lo Jobo 33:24, 25.

Tɔsɛdingole yema kɛnɛ kakakomɛ Jɔbɔ, pami ka kɔlamelo kakokaka Jehowa ngandji. Aha la Jɔbɔ mbeya, Satana akadje olowanyi ande tâmu lo mbuta ɔnɛ nde akakambɛka Nzambi paka l’ɔtɛ w’eyango wa lokaki. Lam’ele Jehowa akɛkɛka otema le Jɔbɔ ndo akeyaka dia nde ekɔ la wolo wa nshimbɛ onto oma lo wâle, nde aketawɔ dia Satana mbohemba. Oma lâsɔ, Satana “akayutsha Jobo atshutshu a wulu umak’esi a dikaka pulu ndu ladiku di’ote.” (Jobo 2:7) Demba diaki Jɔbɔ diakɔtɔ nkuso ndo lokoho lande lakayala la kaya, lakayala odima tshududu ndo nkoho mɔtshi yakatatɛ mambɔwambɔ. (Jobo 7:5; 30:17, 30) Onde wɛ kokaka nkanyiya ɔkɛyi waki la nde? Koko, Jɔbɔ akatshikala la kɔlamelo ndo akate ate: “Edja ndu lam’ayumukitshiya, dimi halunya akambu ami w’usimbwi uma le mi.”—Jobo 27:5.

Koko Jɔbɔ akasale munga ka woke efula. Etena kakandafɔnya ɔnɛ nde ayanga mvɔ, nde akaleke ndjakiyanya paka lo dikambo diande ndamɛ ndo “akayayindja, kunyindja [Nzambi].” (Jobo 32:2) Elihu laki yɛmba awui yaki Nzambi akânya Jɔbɔ. Ndo nto, Elihu ndamɛ akayewoyaka Jɔbɔ losango la dimɛna efula l’oma le Nzambi ɔnɛ: “Utshunguli [Jobo], atukuhulo utsha lo difuku [diombo di’anto tshɛ], dimi lakatani ushinga w’etshungwelu. Ku dimba di’untu ako diayuyala ashashi uku dimba dia dikenda. Ndi ayuyala uku akindi lu nshi yandi y’olongo a pami.” (Jobo 33:24, 25) Ɛtɛkɛta ɛsɔ wakahombe mbisha Jɔbɔ elongamelo k’efula. Takandahombe ntetemala nsowa polo ndo lo nyɔi. Otondonga Jɔbɔ akayatshumuya oma lo munga yande, tshike Nzambi otetawɔ dia tshungo monga la wahɔ le nde ndo lo pâ yande. *

La ndjakitshakitsha tshɛ, Jɔbɔ aketawɔ engwelo ndo akayatshumuya. (Jobo 42:6) Mɛnamaka dia Jehowa aketawɔ dia tshungo monga la wahɔ le Jɔbɔ lo woho wakandetawɔ dia tɔ nkomba munga kande ndo nkimanyiya dia Nzambi mbokaloya kɛnɛ kaki la nde ndo mbofuta. Jehowa “akatshokola Jobo lu nshi yandi ya l’okongo, uleki nshi yandi ya ntundu.” (Jobo 42:12-17) Ohokanyiya woho wakatshungɔ Jɔbɔ lo woho wele l’atei w’ɛtshɔkɔ wakandakondja mbele ndo woho wakashile hemɔ kande ka wɔnɔnyi ndo woho wakayokomaka demba diande “uku dimba dia dikenda.”

Tshungo kakalongamɛka Nzambi oma le Jɔbɔ kaki la nɛmɔ diele l’elelo, nɛ dia onto lele bu kokele mbakakimɔ ndo nde akayovɔka. Tekɔ la tshungo koleki kɛsɔ la fwa. La ngandji tshɛ, Jehowa akatosha Ɔnande Yeso dia ndjokimɔ tshungo lo dikambo diaso. (Mateu 20:28; Joani 3:16) Onto tshɛ lele la mbetawɔ lo tshungo kɛsɔ, ekɔ l’elongamelo ka ndjɔsɛna pondjo pondjo lo nkɛtɛ kayokadimɔ paradiso. L’andja w’oyoyo wayaye ɔsɔ, Nzambi ayotshungola anto wa kɔlamelo oma lo lotshundu. Lande na kahayeke akambo efula lo kɛnɛ kendana la kɛnɛ kahombayɛ nsala dia wɛ ndjɛna etena kayonga esombe l’alemba wa “ashashi uku dimba dia dikenda”?

[Nɔte ka l’ɛse ka dikatshi]