Etshama oma l’ɔtɛkɛta wa Nzambi

Lande na katshika Nzambi akambo wa kɔlɔ ndo asui?

Sawo nɛ monyiyaka ambola amɔtshi wele ondo wɛ amboyaokaka ndo diɔ mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayɔngɛnangɛna dia nkɛtshanya layɛ ekadimwelo ɛsɔ.

1. Ngande wakatatɛ akambo wa kɔlɔ?

Akambo wa kɔlɔ wakatatɛ la nkɛtɛ etena kakate Satana kashi mbala ka ntondo. Satana komonga kanga kɔlɔ etena kakandatongama. Nde aki ondjelo wa kokele koko, nde ‘komemala lo mɛtɛ.’ (Joani 8:44) Nde akayɔkɛnɛmɔlaka nsaki ka tɛmɔma ko tete le Nzambi oto mbahomba tɛmɔma. Satana akakese Eva womoto la ntondo ndo akawetawoya dia nde mbokitanyiya lo dihole dia nkitanyiya Nzambi. Adama akayoyelaka Eva lo pindolɛ Nzambi. Yɛdikɔ yakɔshi Adama yakayelaka asui ndo nyɔi.—Adia Etatelu 3:1-6, 17-19.

Lo ntshutshuya Eva dia nde pindolɛ Nzambi, Satana akatɔmbɔkwɛ lowandji laki Nzambi. Anto efula wakayoyelaka lokolo laki Satana lo ntona ɛlɔmbwɛlɔ kaki Nzambi. Ɔnkɔnɛ, Satana akayokomaka “umbuledi a kete nye.”—Adia Joani 14:30; Enyelo 12:9.

2. Onde etongelo kaki Nzambi komonga kokele?

Anto ndo andjelo wakatonge Nzambi waki kokele ndo l’akoka wa nkitanyiya ɛlɛmbɛ waki Nzambi. (Euhwelu k’Elembe 32:5) Nzambi akatotonge la lotshungɔ la nsɔna dia nsala kɛnɛ kele dimɛna kana kɛnɛ kele kɔlɔ. Lotshungɔ lɔsɔ toshaka diaaso dia sho mɛnya ngandji kawokaso.—Adia Jakoba 1:13-15; 1 Joani 5:3.

3. Lande na katshika Nzambi asui?

Jehowa aketawɔ di’anto tɔmbɔkwɛ lowandji lande lo tshanda mɔtshi. Lande na? Dia nde mɛnya ɔnɛ welo tshɛ wadja ana w’anto dia ndjalɔmbɔla hatonga l’etombelo w’amɛna naka aha l’ekimanyiyelo kande. (Jeremiya 10:23) L’ɔkɔngɔ w’ɛnɔnyi 6 000 wa l’ɔkɔndɔ w’ana w’anto, dikambo sɔ diambokandɔma. Ɛlɔmbwɛlɔ k’ana w’anto kambokita tatala dia nshidiya ata, diakatanelo, akambo wa wɛngiya ndo hemɔ.—Adia Undaki 7:29; 8:9; Romo 9:17.

Lo yoho yotshikitanyi, anto wetawɔ dia nɔmbwama oma le Nzambi kondjaka wahɔ. (Isaya 48:17, 18) Kem’edja, Jehowa ayanga ndanya mandji tshɛ y’ana w’anto. Paka anto wasɔna dia nɔmbwama oma le Nzambi mbayokita nkɛtɛ.—Isaya 2:3, 4; 11:9; adia Danyele 2:44.

  4. Diaaso diakɔna diasha Nzambi anto l’ɔtɛ wa solo diande dia lotutsha?

Satana sɛmaka ɔnɛ anto hawotonga l’okitanyiya le Nzambi. Solo dia lotutsha diaki Nzambi toshaka diaaso sho tshɛ dia mɛnya dia kana tayɔlɔmbwama oma le Nzambi kana oma le anto. Sho mɛnyaka ɔsɔnwɛlɔ aso oma lo yoho yaso ya lɔsɛnɔ.—Adia Jobo 1:8-11; Tukedi 27:11.

5. Ngande wasɔnaso dia Nzambi monga Ɔnɔmbɔdi aso?

Sho sɔnaka dia Nzambi monga Ɔnɔmbɔdi aso etena koyangaso ndo kɔtɛmɔlaso l’ɔtɛmwɛlɔ wa mɛtɛ wohikami l’Ɔtɛkɛta ande Bible. (Joani 4:23) Sho mbewɔka nto dia ndjatambiya l’akambo wa pɔlɔtikɛ ndo w’ata oko wakasale Yeso.—Adia Joani 17:14.

Satana kambaka la wolo ande dia nkeketsha awui wa mindo ndo yoho ya lɔsɛnɔ la kɔlɔ. Etena katonaso totshelo tɔsɔ, angɛnyi aso ndo ewɔtɔ aso ɛmɔtshi mbeyaka tɔ̂nyɔla kana tɔlɔsha. (1 Petero 4:3, 4) Ɔnkɔnɛ, tekɔ la ntondo k’ɔsɔnwɛlɔ ɔmɔtshi. Onde tayeta lo wedi w’anto walanga Nzambi? Onde tayokitanyiya ɛlɛmbɛ ande wa lomba woludi la ngandji? Naka sho nsala ngasɔ, kete tayɛnya dia Satana ekɔ kanga kashi etena kasɛmande ɔnɛ ndoko onto layosala lolango laki Nzambi.—Adia 1 Koreto 6:9, 10; 15:33.

Dia wɛ mbeya awui akina wendana l’ɛkɔkɔ watshika Nzambi asui, enda lo tshapita 11 ya dibuku nɛ, Bible etshatɔ mɛtɛ? diakatondjama oma le Ɛmɛnyi wa Jehowa.

[Osato wa lo lɛkɛ 16]

Adama akasale ɔsɔnwɛlɔ wa kɔlɔ

[Osato wa lo lɛkɛ 17]

Ɛsɔnwɛlɔ aso mɛnyaka dia kana sho mbetawɔka dia Nzambi monga Ɔnɔmbɔdi aso