Mukanda w’oma la Madagascar

Wakokɛmaka oko mishiki wa dimɛna efula

DIMI l’omɛmi takatatshɔka otsha lo dihole di’oyoyo diakawatotome oko wa misiɔnɛrɛ, mbuta ate lo disɛnga dia Madagascar. Takalakana l’ase nkumbo kaso, l’angɛnyi aso ndo takasale la wolo dia ndjakeketsha tayaɛkɛ le Jehowa ɔnɛ nde akatɔsɔnɛ dihole dia dimɛna ndo nde ayotokimanyiya dia sho ntondoya.

Hatohɛki pondjo losanganya la ntondo lakatɔtɔ l’etshumanelo k’oyoyo ka lɛnɛ akatatomama. Ɔnangɛso lakalɔmbɔlaka Wekelo wa Tshoto y’Etangelo akalɔmbɔlaka oko onto lahoma mishiki. Lam’ele sho kombokaka ɔtɛkɛta akɔ dimɛna, ɛtɛkɛta wakandatondjaka wakokɛmaka oko mishiki wa dimɛna efula. Akete edja efula dia sho ndjoshihodia kɛnɛ kakawataka.

Mbala ka ntondo kakandoke dimbola diaki komonga l’odingɔ, lakakadimola mbala kakɔ ɔtɔi la dui dia wolo aha la dimi mbeya. Wanɛ wakadjasɛ suke lami wakoke kɛnɛ kakamate, ko lakafɛ anya l’onyɔ ami dia mbikikɛ tɔɔla. Lakoke sɔnyi koko, laki l’ɔngɛnɔngɛnɔ lo woho wakamashihodia dui dimɔtshi diakawate.

Lo dihole dia dimi monga onto lasha anto akina ɛnyɛlɔ k’ɔlɔlɔ l’esambishelo, anto akina mbakakimanyiyaka. Anangɛso l’akadiyɛso wakambutɛka la ngandji tshɛ woho wa nsala mbɔtwɛlɔ y’okɛma l’esambishelo lo mɛnyami kɛnɛ ka ntɛkɛta ndo divɛsa dia mbadia.

Dimi mbohɔka lushi lɔmɔtshi lakiso l’esambishelo, ɔna ɔmɔtshi akatombe ndo akate la dui dia wolo ate: “Vazaha! Vazaha!” Ɔsɔ ekɔ tshɛkɛta yakamba l’ase Madagascar dia mɛnya ɔnɛ onto ɔnɛ ekɔ ɔngɛndangɛnda. Takamɔ oma lawɔ esadi eto talongamɛ ɔnɛ ana akina wayoya dia ndjota vɔ lawɔ ngasɔ. Koko, ɔna pami ɔmɔtshi akahangwɛ ɔna lakawelɛwelɛka. Nde akawotɛ ate: “Nde bu ɔngɛndangɛnda, nde kokaka ntɛkɛta ɔtɛkɛta aso.” Kadiyɛso kakatasambishaka kâmɛ lami akamɔmbɔlɛ kɛnɛ kakawatɛkɛtaka nɛ dia vɔ wakatɛkɛtaka esadi esadi woho wakimi kokoka mboka. Koko, laki l’ɔngɛnɔngɛnɔ lo menda woho wakamatahamaka. L’ekomelo, Madagascar akayongaka oko ngelo kami ka lôtɔ.

Mbala efula yakamayaokaka okalema, lakakeketshamaka oma le ɛlɔngɔlɔngɔ l’esekaseka wakayaka dia ndjomenda ndo wakamɛnyaka ɔnɛ  vɔ mbokakami ngandji kânga mbakimi kokoka ntɛkɛta lawɔ dimɛna. Ɛlɔngɔlɔngɔ l’esekaseka wa l’etshumanelo wekɔ tshondo y’ɔtshɔkɔ w’oma le Jehowa. Kadiyɛso kɛmɔtshi ka dikɛnda kelɛwɔ Hasina akatâkadimulɛka kɛnɛ kakawataka. Etena kakɛnamaka dia ndoko lôka kɛnɛ katami, akɛnamaka dia ndo nde lawɔ kombokaka. Ndo mbala efula nde lawɔ akakimanyiyaka etena kakamalangaka nsawola l’angɛnyi ami wa l’etshumanelo lo mbalembetshiya kɛnɛ kalangami mbatɛ.

Dimi l’omɛmi taki l’etshumanelo kakahombe mbatema dia nkenga etshumanelo kekina k’oyoyo. Dui sɔ diakalembetshiyaka dia apandjudi amɔtshi wakahombe mbeka l’ambeki wa Bible wakadjasɛka l’ɛtshi ka nkɛtɛ k’etshumanelo kambowatoma. Kadiyɛso kɛmɔtshi akanɔmbɛ dia dimi ntetemala mbekaka l’ombeki ande ɔmɔtshi. Laki la wɔma ndo lakawotɛ nte dimi bu l’akoka wa mbeka lande koko, nde akakeketsha dia dimi mbeka lande. Nde akashikikɛ ɔnɛ l’ekimanyiyelo ka Jehowa, dimi kokaka nsala dikambo sɔ. La kɛtshi tshɛ ndo l’ɛnamelo k’ɔmɔnɔmɔnɔ kâmɛ l’ɛtɛkɛta wa wɔdu, nde akambutɛ ɔnɛ kem’edja wɛ ayonga l’akoka wa mbetsha anto akina lo yoho yayokɔngɛnyangɛnya. Ɛtɛkɛta ɛsɔ wakakeketsha efula.

Oma k’etena kɛsɔ, ombeki ɔsɔ akatatɛ mpama dimɛna. Lushi lɔmɔtshi, lam’akimi l’andja lakoke nde ambelɛ. Nde l’omɛnde wakatatshɔka dia tofundja diwala diawɔ laka lɛɛta. Omɛnde akatatɛ mbeka Bible nde lawɔ ndo vɔ ahende wakayadjɛ eyango efula wa lo nyuma wakawasalaka la wolo dia nkotsha, mbidja ndo wa batizama. Dui sɔ diakambisha ɔngɛnɔngɛnɔ nɛ dia lakeyaka dia aha sho, koko Jehowa mbakotola anto oya le nde.

Takeke akambo efula lɛnɛ akawatotome. Kânga mbakatatshike angɛnyi ndo ase nkumbo yaso, takayɛnaka oko tamboyotana amɔtshi l’atei awɔ lɛnɛ akawatotome. Mbala efula, sho mbutɛka anangɛso l’akadiyɛso wele laso lanɛ akambo wendana l’ase nkumbo kaso ndo l’angɛnyi aso, ndo vɔ tombolaka akambo wendana lawɔ ndo kɛnɛ kasalawɔ. Tekɔ lo kongɛ l’asolo walomɔlomɔ etena kayotonga kâmɛ l’ase nkumbo kaso ka lo demba wakatatshike ndo l’angɛnyi aso wambotoyokondja lanɛ la Madagascar.

Lekɔ lo ntetemala mboka oko mishiki etena katɛkɛta anto. Koko kakianɛ, lôka kɛnɛ katawɔ. Lekɔ lo nongamɛ l’asolo walomɔlomɔ etena kayomokoka ntɛkɛta dimɛna oko vɔ wele etena katɛkɛta onto mongaka oko lembo mbembande. Yeso akate ate: “Tanyuyakananyaki dia lui, ne dia lui ayuyakananya.” (Mateu 6:34) Ɔnkɔnɛ, tayotetemala la mbeka towuiwui kana tɔtɛkɛta tɔmɔtshi l’edjedja ka wonya. Koko kakianɛ tayotetemala pokɛ lotui, mbidja yimba ndo otema dia sho monga l’akoka wa ntɛkɛta dimɛna oko anangɛso l’akadiyɛso wa lanɛ la Madagascar.

[Osato wa lo lɛkɛ 25]

Kâmɛ la Hasina l’esambishelo