Yasukanya la Nzambi

‘Jehowa le, wɛ mbeyakami’

“NDOKO wotsho wakoka onto mɛmba woleki wɔnɛ wa mbeya ɔnɛ ndoko onto layakiyanya dikambo diande kana lôhokamɛ.” * Onde wɛ kokaka mendana l’ɛtɛkɛta ɛsɔ? Onde wɛ atayaokaka dia ndoko onto layakiyanya lo dikambo diayɛ kana lashihodia woho wayaokayɛ? Naka ngasɔ, kete wɛ mbeyaka nkondja esambelo l’ɛtɛkɛta ɛnɛ: Jehowa ndjakiyanyaka efula dikambo di’atɛmɔdi ande woho ɔnɛ wele nde mbeyaka kɛnɛ kâkomɛ lo lɔsɛnɔ lawɔ la lushi la lushi. Ɛtɛkɛta wa Davidi wele l’Osambu 139 toshikikɛka dia dui sɔ diekɔ mɛtɛ.

Oko wakinde l’eshikikelo ɔnɛ Nzambi ndjashaka le nde, Davidi akate ate: ‘Jehowa le, wɛ akasɛdingola ndo wɛ mbeyakami.’ (Divɛsa 1) Lo divɛsa nɛ, Davidi akakambe l’ɛtɛkɛta w’amɛna. Vɛrbɛ ya lo Hɛbɛru yokadimɔmi ɔnɛ “nsɛdingola” kokaka nembetshiya ntshima etale dia nyanga mbɔkɔ y’akɛsɔ (Jobo 28:3), nkemba nkɛtɛ (Embadi 18:2), kana nsɛdingola akambo lo ndjela ɛlɛmbɛ. (Euhwelu k’Elembe 13:14) Eelo, Jehowa têyaka dimɛna woho ɔnɛ wele nde sɛdingolaka kiambokambo tshɛ ya lo lɔsɛnɔ laso. Lo nkamba la okitɔ “dimi,” Davidi tetshaka dia Nzambi ndjakiyanyaka mɛtɛ dia wahɔ w’ekambi ande. Nde mbasɛdingolaka ndo mbaeyaka vɔ tshɛ onto l’onto.

Davidi akanyomɛnya woho wakɔsɛdingolaka Nzambi lo mbuta ɔnɛ: “We mbeyaka lam’atumudjaseka ndu lam’atumunelaka, we manaka tukanyi tami tshe fundu.” (Divɛsa 2) Lo yoho mɔtshi, Jehowa ‘manaka tokanyi tshɛ fundo’ kânga mbodjashinde l’olongo. Eelo, nde mbeyaka etena kadjasɛso, ondo l’ekomelo ka lushi ndo etena kemɔso la pindju ndo kɛnɛ kasalaso lushi l’otondo. Nde mbeyaka nto tokanyi, nsaki ndo kɛnɛ kalangaso nsala. Onde Davidi akayaoke dia nde aki lo wâle l’ɔtɛ w’ɔnɛ Jehowa akashishimaka kɛnɛ tshɛ kakandasalaka? Ndoko, nɛ dia nde akɔlɔmbɛ dia nde mbɔsɛdingola. (Divɛsa 23, 24) Lande na?

Davidi akeyaka dia Jehowa sɛdingolaka atɛmɔdi Ande l’eyango w’amɛna. Nde akatɛkɛta dia eyango ɛsɔ lo mfunda ɔnɛ: “We mbeyaka lene atumutshokaka ndu lene atumetamaka, we nimbitelaka mbuka yami tshe.” (Divɛsa 3) Lushi tshɛ, Jehowa mɛnaka ‘mboka yaso tshɛ,’ mbuta ate kɔlɔ yaso ndo etsha aso w’ɛlɔlɔ. Onde nde mbidjaka yimba l’akambo wa kɔlɔ kana w’ɛlɔlɔ? Tshɛkɛta ya lo Hɛbɛru yokadimɔmi ɔnɛ “mbɛdika” kokaka nembetshiya “mfufola,” kana “manganya,” oko watofufolaka okambi eponga dia minya mfufudi ko ntshika etondo. Etelo k’ɔnɛ “we manaka tukanyi tami tshe fundu,” ekɔ ekadimwelo ka tshɛkɛta ya lo Hɛbɛru yakoka nembetshiya “ngɛnangɛna.” Etena kasɛdingolande akambo wata atɛmɔdi ande ndo wasalawɔ lushi tshɛ, Jehowa ngɛnangɛnaka akambo w’ɔlɔlɔ wasalawɔ. Lande na? Nɛ dia nde mbɔsaka welo wadjaso dia mbɔngɛnyangɛnya la nɛmɔ di’efula.

Osambu 139 tetshaka dia Jehowa ndjakiyanyaka efula dikambo di’atɛmɔdi ande. Nde mbasɛdingolaka ndo mbaendaka etena kasalawɔ akambo lo lɔsɛnɔ lawɔ la lushi la lushi. Ɔnkɔnɛ, nde mbeyaka ekakatanu walɔshana la wɔ ndo shihodiaka pâ ya lo yimba ndo ya l’etema yakoka ndja oma l’ekakatanu ɛsɔ. Onde wɛ hatshutshuyama dia ntɛmɔla Nzambi kayakiyanya lo dikambo diayɛ? Naka elo, kete wɛ kokaka ndjashikikɛ ɔnɛ: Jehowa ‘hatohɛ olimu ayɛ la ngandji kakayɛnya anto lo lokombo lande.’—Heberu 6:10.

[Nɔte ka l’ɛse ka dikatshi]