Kakɔna kahomba ana mbeka lo dikambo dia Nzambi?

“Efundelu tshe k’uma le [Nzambi] keko ololo mbetsha antu, la mbalaka, la mbaewula, la mbaekiya lu akambu w’ololo.”—2 TIMOTE 3:16.

ANA la dia mbeka awui wa mɛtɛ wendana la Nzambi. Oma lende akokawɔ mbeka awui asɔ? Oma lo Bible, dibuku di’awui w’ɔtɛmwɛlɔ dioleki nɛmiyama l’andja w’otondo.

Bible ekɔ oko mukanda w’oma le Nzambi. Lo mukanda ɔsɔ, Nzambi tɔkɛnɛmɔlɛka lonto lande ndo tɛnyaka atɔndɔ wendana la lɔkɛwɔ wahomba nɔmbɔla anande, ɛlɔngɔlɔngɔ la epalanga. Tende awui amɔ wetsha Bible ndo wetshelo wakoka kânga ana w’akɛnda nkondja.

Kakɔna kalanga Nzambi dia sho mbeya lo dikambo diande?

◼ Kɛnɛ ketsha Bible: “We latuwetaka vati: [Jehowa], weme keli Khum’Ulungu, umbuledi wa kete tshe.”—Osambu 83:18.

Wetshelo: Nzambi kema wolo ɔmɔ wahɛnama, koko nde ekɔ Onto la mɛtɛ lele la lokombo lande hita.

◼ Kɛnɛ ketsha Bible: “[Jehowa atoshishimaka] etema tshe, atulimbitelaka dikanyiakanyia dia tukanyi. Naka we ayûyanga ndi ayuyakimo dia we mbutana.”—1 Ekondo 28:9.

Wetshelo: Jehowa Nzambi ndjakiyanyaka dikambo diaso sho tshɛ ndo di’ana w’akɛnda. (Osambu 10:14; 146:9) Nde kombolaka dia sho mbeka awui wendana la nde.

◼ Kɛnɛ ketsha Bible: “Tusuyaki . . . kuyanga ona etshiki. Naka we ambâsuya, ku vo wambundelela, mete, dimi layuka alelu awo.”—Etumbelu 22:22-24.

Wetshelo: Jehowa pokamɛka ndo alɔmbɛlɔ w’ana w’akɛnda. Sho koka nsawola la Nzambi mbala la mbala ndo mbɔkɛnɛmɔlɛ tokanyi taso t’oma k’ɛse otema.

◼ Kɛnɛ ketsha Bible: “Wakatetemala mpimba [Nzambi], wakadji l’Ekila l’Isariyele tofwefwe.”—Osambu 78:41.

Wetshelo: Ɛtɛkɛta la ditshelo diaso kokaka nyangiya Jehowa, lâsɔ sho la dia kanyiyaka la ntondo ka ntɛkɛta kana ka nsala dui dimɔ.

 Ngande wahombaso salɛ anto wotshikitanyi la so akambo?

◼ Kɛnɛ ketsha Bible: “[Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”—Etsha 10:34, 35.

Wetshelo: Naka Nzambi mbetawɔka anto w’oma lo waoho tshɛ, kete hatohombe monga la shɔnɔdi l’ɔtɛ wa nkoho y’anto kana wotshikitanyiwɔ la so.

◼ Kɛnɛ ketsha Bible: “Nyutayalongosodi dia nyu mbeya lama nkaluya diui le untu tshe lanyumbula, dia elungamelu keli l’etema anyu. Keli nyutshi okone la memakana la woma.”—1 Petero 3:15.

Wetshelo: Etena kakɛtshanyaso awui wendana l’ɔtɛmwɛlɔ, sho la dia nkɛnɛmɔla tokanyi la dietawɔ diaso l’eshikikelo tshɛ aha la nyangiya anto akina. Sho la dia nɛmiya wanɛ wotshikitanyi la so ɔtɛmwɛlɔ.

Ngande wahombaso salɛ ase nkumbo akambo?

◼ Kɛnɛ ketsha Bible: “Ana, nyukitanyia ambutshi anyu lu akambu tshe; dikambu so mbatongenyangenyaka Khumadiondjo.”—Kolosai 3:20.

Wetshelo: Ana wele l’okitanyiya mɛnyaka dia aha paka ambutshi awɔ ato mbokawɔ ngandji, koko vɔ kombolaka ngɛnyangɛnya Nzambi.

◼ Kɛnɛ ketsha Bible: “Nyukikaneli kolo. Nyudimanyanyia kolo yanyu, naka untu eko la ukina dikambu. Uku akanyudimanyia Khumadiondjo kolo, dieli la nyu, ndu nyu dia nyimanyiana kolo.”—Kolosai 3:13.

Wetshelo: Anto akina mbidja ndo ase nkumbo yaso wayotonyangiya tena dimɔ. Ɔnkɔnɛ, naka sho nangaka dia Nzambi todimanyiya kɔlɔ yaso, sho la dia dimanyiya anto akina.—Mateu 6:14, 15.

 Lande na kahombaso monga la losembwe ndo anto w’ɛlɔlɔ?

◼ Kɛnɛ ketsha Bible: “Nyunya kashi, nyutanelaki akambu wa mete, untu la unyandi.”—Efeso 4:25.

Wetshelo: Etena kataso mɛtɛ, sho mbokoyaka Nzambi ndo dui sɔ mbɔngɛnyangɛnyaka. Naka sho monga la mbekelo ka mbutaka kashi, kete tayokoma oko Diabolo otunyi waki Nzambi ɔnɛ lele “shi kashi.”—Joani 8:44; Tito 1:2.

◼ Kɛnɛ ketsha Bible: “Okone nyutsheli antu akambu tshe uku alanganyu vo nyutshela.”—Mateu 7:12.

Wetshelo: Sho la dia mbidjaka yimba lo nsaki, tokanyi ndo l’ehomba w’ase nkumbo yaso ndo w’anto wa lo tshunda. Etena kokanaso “ketshi,” anto akina vɔ lawɔ wayotoka kɛtshi.—1 Petero 3:8; Luka 6:38.

Oko wambodiɛnya bɛnyɛlɔ nɛ, wetshelo watanema lo Bible koka nkimanyiya ana dia vɔ monga la lowando, la dilɛmiyɛlɔ ndo ndjonga epalanga wokana kɛtshi. Ko waa na wahomba mbetsha ana wetshelo ɛsɔ?