Etshama oma l’Ɔtɛkɛka wa Nzambi

Ngande wakokayɛ mbeya ɔtɛmwɛlɔ wa mɛtɛ?

Sawo nɛ diekɔ la ambola wakokayɛ ndjaoka ndo mɛnyaka avɛsa wa lo Bible washa ekadimwelo. Ɛmɛnyi wa Jehowa wayonga suke dia nkɛtshanya la yɛ ekadimwelo ɛsɔ.

1. Onde ekɔ paka ɔtɛmwɛlɔ ɔtɔi wa mɛtɛ?

Yeso aketsha ambeki ande dia ekɔ paka ɔtɛmwɛlɔ ɔtɔi wa mɛtɛ. Vɔ wekɔ oko mboka katɔla otsha lo lɔsɛnɔ. Lo kɛnɛ kendana la mboka kɛsɔ, Yeso akate ate: “Antu atoi mbatukienaka.” (Mateu 7:14) Nzambi mbetawɔka paka ɔtɛmwɛlɔ wele wetshelo awɔ tshɛ ntomba oma lo Ɔtɛkɛta ande wa mɛtɛ. Atɛmɔdi wa mɛtɛ tshɛ wekɔ kâmɛ lo mbetawɔ ɔtɔi.—Adia Joani 4:23, 24; 14:6; Efeso 4:4, 5.

2. Lande na kasɛma anto wa l’ɛtɛmwɛlɔ efula ɔnɛ Akristo mbewɔ?

Aprɔfɛta wa kashi wambolanya Lokristo ndo wekɔ lo nkamba la lɔ dia nkotsha wahɔ awɔ hita. Oko wakadite Yeso, vɔ sɛmaka ɔnɛ wekɔ “ekoko” ande ko tete le wekɔ ndjaondo ya ngala. (Mateu 7:13-15, 21, 23) Lokristo la kashi lakayohama djekoleko l’ɔkɔngɔ wa nyɔi k’apɔstɔlɔ wa Yeso.—Adia Etsha 20:29, 30.

3. Akambo akɔna watshikitanya ɔtɛmwɛlɔ wa mɛtɛ la wa kashi?

Atɛmɔdi wa mɛtɛ nɛmiyaka Bible oko Ɔtɛkɛta wa Nzambi. Vɔ salaka la wolo dia nsɛna lo yoho yɔtɔnɛ l’atɔndɔ wa lɔkɔ. Ɔnkɔnɛ, ɔtɛmwɛlɔ wa mɛtɛ ntshikitana l’ɔtɛmwɛlɔ wohikami lo tokanyi t’anto. (Mateu 15:7-9) Atɛmɔdi wa mɛtɛ hawosambisha akambo wotshikitanyi la kɛnɛ kasalawɔ.—Adia Joani 17:17; 2 Timote 3:16, 17.

Anto wa l’ɔtɛmwɛlɔ wa mɛtɛ nɛmiyaka lokombo laki Nzambi, Jehowa. Yeso akeyanya lokombo laki Nzambi. Nde akakimanyiya anto dia vɔ mbeya Nzambi ndo akawaetsha dia vɔ nɔmba dia lokombo laki Nzambi kidiama. (Mateu 6:9) Lo dihole diodjashiyɛ, ɔtɛmwɛlɔ akɔna wakeketsha anto dia nkamba la lokombo laki Nzambi?—Adia Joani 17:26; Romo 10:13, 14.

  4. Ngande wakokayɛ mbeya atɛmɔdi wa mɛtɛ?

Akristo wa mɛtɛ sambishaka akambo wendana la Diolelo diaki Nzambi. Nzambi akatome Yeso dia ndjosambisha akambo wendana la Diolelo. Diolelo diaki Nzambi mbele tshɔi y’elongamelo k’anto tshɛ. Yeso akatetemala nsambisha akambo wendana ladiɔ polo ndo lushi la nyɔi kande. (Luka 4:43; 8:1; 23:42, 43) Nde akatɛ ambeki ande dia vɔ nsambisha akambo wendana la Diolelo diaki Nzambi. Naka onto ɔmɔtshi amboya dia ndjokosambisha akambo wendana la Diolelo diaki Nzambi, l’ɔtɛmwɛlɔ akɔna wakokande monga?—Adia Mateu 10:7; 24:14.

Ambeki wa Yeso kema anto wa l’andja ɔnɛ wa kɔlɔ. Vɔ hawɔtɔ l’akambo wa pɔlɔtikɛ kana l’ewanu wa l’atshunda. (Joani 17:16) Ndo nto, vɔ hawokoya ditshelo ndo waonga wa kɔlɔ w’ase andja ɔnɛ.—Adia Jakoba 1:27; 4:4.

5. Naa djembetelo ya ntondo yeyama Lokristo la mɛtɛ?

Akristo wa mɛtɛ mbeyamaka oma lo ngandji k’oshika kokanawɔ onto la onyande. Vɔ mbekaka oma l’Ɔtɛkɛta wa Nzambi dia nɛmiya anto wa lo waoho tshɛ. Kânga mbele ɛtɛmwɛlɔ wa kashi sukɛka la wolo tshɛ ata wa lo wedja mbala la mbala, atɛmɔdi wa mɛtɛ tonaka dia nsala dikambo sɔ. (Mika 4:1-4) Anto wa l’ɔtɛmwɛlɔ wa mɛtɛ kambaka la wenya ndo l’ekundji awɔ dia nkimanyiya ndo nkeketsha anto akina.—Adia Joani 13:34, 35; 1 Joani 4:20, 21.

Olui akɔna w’anto watondja wetshelo awɔ oma lo Ɔtɛkɛta wa Nzambi, walɛmiya lokombo laki Nzambi ndo wasambisha Diolelo diaki Nzambi oko tshɔi y’elongamelo k’anto tshɛ? Olui akɔna wokana ngandji ndo wahasukɛ ata? Akambo tshɛ mɛnyaka dia ekɔ Ɛmɛnyi wa Jehowa.—1 Joani 3:10-12.

Dia mbeya awui akina wendana l’ɔtɛmwɛlɔ wa mɛtɛ, enda tshapita 15 ya dibuku nɛ, Bible etshatɔ mɛtɛ?, diakatondjama oma le Ɛmɛnyi wa Jehowa.

[Osato wa lo lɛkɛ 16]

“Vo watutaka vati: Shu mbeyaka [Nzambi], keli watuwangunaka lu etsha awo.”—Tito 1:16