Bible tshikitanyaka nsɛnɔ y’anto

Ɛngɔ kakɔna kakayonga la nɛmɔ di’efula le ose Ecosse ndeka olimu ande wa lokumu? Kakɔna kakakimanyiya Ooe Brézil ɔmɔtshi dia nde ntshika lɔsɛnɔ lande la mindo ndo ɔnwɛlɔ wa nnɔ nnɔ dia wolo? Ngande wakatondoya pami kɛmɔtshi k’ose Slovène dia nde ntshika ɔnwɛlɔ wa wanu? Tadia kɛnɛ katawɔ.

“Akɛnamaka oko lɔsɛnɔ lami laki dimɛna.”​—JOHN RICKETTS

ƆNƆNYI WA LOOTƆ: 1958

WODJA WA LOOTƆ: ECOSSE

ƆKƆNDƆ: LAKTONDOYA OLIMU AMI W’OKANDA

NSHI YAMI YAKETE: Laki la lɔsɛnɔ la dimɛna lo nshi yami ya dikɛnda. Papa aki owandji ɔmɔtshi w’asɔlayi lo wodja wa Grande-Bretagne, diakɔ diele nkumbo kaso kakatononɔka efula. Oma lo wodja wa Ecosse, takadjasɛ l’Angleterre, l’Allemagne, la Kenya, la Malaisie, l’Irlande ndo la Chypre. Oma l’ɛnɔnyi enanɛi, lakɔtɔ kalasa yami lo waa ɛtɛrna wa la Ecosse. Ndo lakamane kalasa yami l’inivɛrsite wa Cambridge.

Lam’akimi l’ɛnɔnyi 20, lakatatɛ nkamba lo kɔpanyi ka pitilɔ l’edja k’ɛnɔnyi enanɛi. Ntondontondo l’Amérique latine ndo oma laasɔ l’Afrikɛ ndo l’ekomelo l’owɛstɛ k’Australie. Lakatokenga biro kami k’olimu, koko lakayokisondjaka l’ɔkɔngɔ.

Falanga y’oma lɔkɔ yyakakimanyiya dia dimi mbɔsa pasiɔ lam’akimi l’ɛnɔnyi 40. Lam’ele laki la wenya efula wele aha olimu mbakambami, dimi lakandaka nkɛndɔ. Laketeta l’Autralie w’otondo mbala hiende lo mututu, ndo laketeta l’andja w’otondo. Akɛnamaka oko lɔsɛnɔ lami laki dimɛna.

WOHO WAKATSHIKITANYA BIBLE LƆSƐNƆ LAMI: Kaanga la ntondo ka dimi mbɔsa pasiɔ, lakayangaka toho tɔmɔtshi takokami mbisha Nzambi losaka lo lɔsɛnɔ l’ɔngɛnɔngɛnɔ laki lami. Lakatatɛ mbɔtɔ lo Eglise anglicane wakamodiama lɔkɔ. Koko ɔtɛmwɛlɔ akɔ kombetshaka akambo efula w’oma lo Bible. Oma laasɔ, lakayotatɛ mbeka l’ase mormon, koko lakayɔkɔmɔ nɛ dia vɔ komongaka la mbetawɔ lo Bible ndo vɔ kondekaka nkamba la tɔ.

Lushi lɔmɔtshi, Ɛmɛnyi wa Jehowa wakakɔkɔla lo soko diami. Lakashihodia mbala kakɔ ɔtɔi dia kɛnɛ tshɛ kakawetshaka kakayaka oma lo Bible. Divɛsa dimɔtshi diakawambadiɛ aki 1 Timɔte 2:3, 4. Avɛsa asɔ mɛnyaka dia lolango la Nzambi ele dia “weho w’anto tshɛ shimbamɛ ndo nkondja ewo k’oshika k’akambo wa mɛtɛ.” Lakaambe lo woho wakatɔtɔmiya Ɛmɛnyi wa Jehowa ohomba wa nkondja, aha tsho ewo, koko ewo k’oshika k’oma lo Bible.

Wekelo wa Bible l’Ɛmɛnyi wa Jehowa wakakimanyiya dia nkondja ewo k’oshika. Ɛnyɛlɔ, lakeke dia Nzambi la Yeso bu anto wa lo Losato l’osanto, wetshelo w’ehekesa, , koko vɔ wekɔ anto ahende wotshikitanyi. (Joani 14:28; 1 Kɔrɛtɔ 11:3) Lakangɛnangɛna efula dia mbeya dui dia wɔdu dia mɛtɛ sɔ. Lakayatshumola woho wakamatetshaka wenya dia nyanga dia nshihodia wetshelo wa kashi wa Losato l’osanto!

Aha la ntshimbatshimba lakatatɛ mbɔtɔ lo nsanganya y’Ɛmɛnyi wa Jehowa. Lakaambe woho waki anto tshɛ la lɔngɛnyi la dimɛna ndo la lɔkɛwɔ la dimɛna efula, vɔ waki oko anto wahasale pɛkato. Ngandji kawɔ ka mɛtɛ mɛtɛ kakambetawoya dia lamboshola ɔtɛmwɛlɔ wa mɛtɛ.​—Joani 13:35.

WAHƆ WAMBOMOKONDJA: L’ɔkɔngɔ wa bkami, lakahomana la Diane womoto a lokombo. Nde akodiama lo nkumbo k’Ɛmɛnyi wa Jehowa, ndo nde aki la waonga w’amɛna efula wakakotola otsha le nde. L’ɔkɔngɔ diko, takayotshukana. Lɔngɛnyi laki Diane ndo osukɔ ande aki mɛtɛ ɔtshɔkɔ w’oma le Jehowa.

Dimi la Diane taki la nsaki k’efula ka monɔ lɛnɛ akiwɔ l’ohomba w’efula w’apandjudi wa lokumu l’ɔlɔlɔ l’oma lo Bible. Lo 2010, takonɔ otsha la Bélize, l’Amérique centrale. Lanɛ tekɔ lo nsambisha anto wele la mposa k’akambo wa mɛtɛ ndo wanɛ woka Nzambi ngandi ndo wele la mposa k’ewo k’oma lo Bible.

Mbeya akambo wa mɛtɛ wendana la Nzambi ndo l’Ɔtɛkɛta ande Bible iambombisha wɔladi wa lo yimba. Oko okambi walo tena tshɛ, lekɔ la diaaso dia mbetsha anto efula Bible. Ndooko ɔlɔlɔ woleki mɛna woho watshikitanya Bible nsɛnɔ y’anto, oko wakidiɔ lo dikambo diami. L’ekomelo, lakayosholaka yoho yoleki dimɛna ya mbisha Nzambi losaka l’ɔtɛ wa yoho ya lɔsɛnɔ yele lami wony’ɔnɛ.

“Vɔ waki otema ɔlɔlɔ oya le mi.”​—MAURÍCIO ARAÚJO

ƆNƆNYI WA LOOTƆ: 1967

WODJA WA LOOTƆ: BRÉSIL

ƆKƆNDƆ: LAKI LA YOHO YA LƆSƐNƆ LA MINDO

NSHI YAMI YAKETE: Lakole l’osomba wa tshitshɛ wa Avaré, la São Paulo. Efula ka wanɛ wadjasɛ l’osomba akɔ wekɔ as’olimu.

Papa akavu etena kaki mama la diemi diami. Lam’akimi leke dikɛnda, lakalɔtaka wa mama naka nde ambotomba. Lakatatɛ nsala akambo oko ana wa wamato ndo anto wakatatɛ mbɔsami oko onto lasala dieyanelo lam’asa pami la pami. Oma laasɔ, lakayotatɛka mbeyana l’apami oko dimi, oyadi akɛnda kana epalanga.

L’ekomelo k’ɛnɔnyi wasalema etshikitanu wa lo demba, lakayangaka anto wakakokaka nsala la mi awui wa dieyanelo (apami kana wamato) dihole tshɛ diakamakokaka mbakondja, lo waa barɛ, lo waa boites de nuit, ndo l’ɛtɛmwɛlɔ. Lo nshi ya fɛtɛ yeteta anto lo toshinga (carnaval), lakayalɔtshaka oko womoto ndo lakakɛnyaka lokombe lelɛwɔ samba. Lakeyamaka efula.

L’atei w’angɛnyi ami, mbaki ndo wanɛ wakasalaka awui wa dieyanelo dia lam’aa pami la pami, waa numba, ndo anɔshi wa didjoyadjoya. Lakasɛngiyama oma le angɛnyi ami amɔtshi dia mpemba mfɔka kɛmɔtshi kelɛwɔ crack, ndo kombeta edja lakayokomaka ɔhɔmbɔ atɔ. Lo ntena dimɔtshi takanɔka mfɔka otsho w’otondo. Ndo mbala mɔtsh,i dimi lakamɔka oma la le anto ko toyadjasɛ dimɛ lushi l’otondo dia nɔɔka mfɔka kɛsɔ. Lakɔɔndɛ efula, ko anto wakatatɛ mbuta ɔnɛ lekɔ la Sida.

WOHO WAKATSHIKITANYA BIBLE LƆSƐNƆ LAMI: L’etena kɛsɔ, lakayɛnana l’Ɛmɛnyi wa Jehowa. Vɔ waki mɛtɛ ɔlɔlɔ oya le mi. Divɛsa dimɔtshi l’atei w’avɛsa wakawambadiɛ aki Rɔmɔ 10:13, diata ɔnɛ: “Onto tshɛ lelɛ lokombo la Jehowa ayoshimbamɛ.” Divɛsa sɔ diakamɛnya ohomba wa nkamba la lokombo la Jehowa. Tena efula l’ɔkɔngɔ wa dimi mbetsha otsho w’otondo dia nnɔ mfɔka ka crack, lakadiholaka didishi diami, lakawalɛka l’olongo ndo lakalɔmbaka Jehowa l’asɔyi lo washo dia nde kimanyiyami.

Lo menda okiyanu waki la mama lo dikambo diami lo menda wakamalanya lɔsɛnɔ lami la dinɔnɔ, lakɔshi yɛdikɔ ya ntshika nnɔ didjoyadjoya. Yema tshitshɛ oma laasɔ, laketawɔ mbeka l’Ɛmɛnyi wa Jehowa Bible. Vɔ wakashikikɛ dia wekelo wa Bible wayokeketsha dia dimi nɛnya yɛdikɔ yami ya ntshika nɔ didjoyadjoya, ndo ngasɔ mbakadiasalema!

Lakamatatetemalaka mbeka Bible, lakayoshihodiaka dia lakahombe ntshikitanya yoho yami ya lɔsɛnɔ. Aki mɛtɛ wolo dia ntshika dieyanelo dia lam’asa pami la pami, nɛ dia kɛsɔ kakayokoma yoho ya lɔsɛnɔ lami l’edja k’ɛnɔnyi. Kɛnɛ kakakimayiya ko, lakatshike lɔngɛnyi la kɔlɔ. Lakahembola lɔngɛnyi l’angɛnyi ami w’edjedja ndo lakatshike ntshɔ lo waa barɛ ndo lo waa boites de nuit.

Kaanga mbele komonga dui dia wɔdu dia nsala etshikitanu ɛsɔ, lakakondja ekimanyelo ndo lakeke dia Jehowa ndjakiyanyaka dikambo diami ndo nde shihodiaka ekakatanu ami. (1 Joani 3:19, 20) Oma lo 2002, lakatshike nsala dieyanelo dia lam’asa pami la pami, ndo ɔnɔnyi akɔ mbakamabatizama ndo nkoma Ɔmɛnyi wa Jehowa.

WAHƆ WAMBOMOKONDJA: Mama akaambe lo menda etshikitanu wakamasale, ko ndo nde akatatɛ mbeka Bible. Lonyangu ko nde akayosala AVC. Koko dui sɔ kokitshakitsha ngandji kakandokaka Jehowa ndo akambo wa mɛtɛ wa lo Bible.

Aya ɛnɔnyi enanɛi wemi l’olimu wa ntena tshɛ, ndo dimi mbetsha ntena diami efula dia mbetsha anto Bible. Ntena efula, dimi pombaka ndɔshana la nsaki ya mindo. Koko lekɔ la dihonga lo mbeya dia lo nsɔna dia ntshika nsaki shɔ dimi koka ngɛnyangɛnya Jehowa.

Ndjasukanya la Jehowa ndo nsɛna lo yoho yɔngɛnyangɛnya ambokimanyiya dia dimi monga la nɛmɔ le anto akina. Ɛlɔ kɛnɛ, lekɔ pami kele l’ɔngɛnɛngɛnɔ.

“Laki ɔnɔshi a woke wa wanu.”​—LUKA ŠUC

ƆNƆNYI WA LOOTƆ: 1975

WODJA WA LOOTƆ: SLOVÉNIE

ƆKƆNDƆ: LAKADJƆKA WANU MBALA LA MBALA

NSHI YAMI YAKETE: Dimi lakotɔ la Ljubljana, lo kapitalɛ ka Slovénie. Lakodiama dimɛna polo lam’akimi l’ɛnɔnyi ɛnɛi. Oma laasɔ, papa akayadiake. L’ɔkɔngɔ wa dui dia kɔlɔ sɔ, mama akakambaka olimu efula dia nde tolesha dimi l’enondo ami.

Lam’akimi lɛnɔnyi 15, lakatshu todjasɛ la tshɛmi ka womoto. Dimi lakangɛnangɛnaka mbidjasɛ lakande nɛ dia angɛnyi ami wakandjasɛka suke la nde. Lakayonga la lotshungɔ l’efula oleki woho wakimi la ngelo. Lam’akamakotsha ɛnɔnyi 16, lakayotatɛ monga kaamɛ l’anto waki la mbekelo ka tshɔka dia tɔnɔ wanu Lushi la samalo la Lushi la lomingu. Lakayodoya divo diami efula, lakatatɛ ndɔta oko ɔtɔmbɔki, ndo oma laasɔ lakatɛ nnɔ mfɔka.

Ndo lakanɔka didjodjoya weho la weho, dimi kotshika nnɔ wanu, nɛ dia dia dui sɔ diakalekaka ngɛnyangɛnyami. Kombeta edja, oma lo dikɔhɔ ɔtɔi lakayotatɛka nnɔ ɔlɔndɔ w’otondo. Lakayongaka la diewo dia mbishɛ wodjɔki ami. Mbala mɔtshi, anto wakakokaka mbishola dia lakanwɛ wanu paka oma lo solo. Kaanga mbakidiɔ ngasɔ, ndooko onto lakakoke mfɔnya dia laki oma la nnɔ elangi efula wa wanu, ndo elangi ɛmɔtshi wa wanu wakawelɛka vodka!

Mbala efula, dimi mbakakimanyiyaka asekami dia vɔ nkalola lawakawɔ l’ɔkɔngɔ wa sho mbetsha otsho w’otondo lo diskɔtɛkɛ, kaanga mbakamanɔka lofulo la wanu lakawanɔka ndodia l’ahende. Lushi lɔmɔtshi, lakoke osekami ɔmɔtshi ata dia dimi lekɔ ɔnɔshi a wanu wa woke, nde akakambe la tshɛkɛta mɔtshi ya lo slovène yɛnya di’onto ekɔ omunga a wanu. Ɛtɛkɛta ɛsɔ wakambisha paa l’asolo.

Lakatatɛ nkana yimba dia mbeya ayomosala la lɔsɛnɔ lami. Lakayaɔsaka oko onto l’anyanya. Aki oko tshɛ kakamasalaka lo lɔsɛnɔ komonga ohomba.

WOHO WAKATSHIKITANYA BIBLE LƆSƐNƆ LAMI: L’etena kɛsɔ mbakamɛnyi dia osekami ɔmɔtshi la la kalasa ambotshikitana; nde aya la lɔsɛnɔ la dimɛna. Lakalange mbeya awui efula lo kɛnɛ kendana l’otshikitanu ande, lakawelɛ dia sho ndjɔlɛ yangɔ kaamɛ. Etena kakatasawolaka, nde akambutɛ dia nde akatatɛ mbeka l’Ɛmɛnyi wa Jehowa Bible. Nde akambutɛ awui amɔtshi wakandekaka ndo awui akɔ tshɛ waki eyoyo le mi, nɛ dia dimi kombeyaka kaanga dui ɔtɔi diendana l’awui w’ɔtɛmwɛlɔ. Lakatatɛ mbɔtɔ lo nsanganya y’Ɛmɛnyi wa Jehowa ndo mbeka la wɔ Bible.

Wekelo wa Bible wakandihola washo dia dimi mbeya awui efula w’ohomba, awui wakimanyiya onto dia mbɔsa yɛdikɔ mɔtshi. Ɛnyɛlɔ, lakeke dia tekɔ lo nsɛna lo ntena dielɛ Bible ɔnɛ “nshi y’ekomelo.” (2 Timɔte 3:1-5) Lakeke nto dia Nzambi ayonya anto wa kɔlɔ tshɛ oma la nkɛtɛ ndo ɔnɛ anto w’ɛlɔlɔ wayokita nkɛtɛ kayokadimɔ paradiso ndo wayodjasɛka lɔkɔ pondjo pondjo. (Osambo 37:29) Lakonge la nsaki k’efula ka mbɛdia lɔsɛnɔ lami dia dimi ndjokondja lɔsɛnɔ la pondjo kaamɛ l’anto w’ɛlɔlɔ asɔ.

Lakatatɛ mbutɛ angɛnyi ami awui wendana la Bible wakamekaka. Efula ka l’atei awɔ wakamɔnyɔlaka, koko diɔnyɔ diawɔ diakakimanyiya lo woho wakimi kokanyiyaka. Diɔnyɔ diawɔ diakakimanyiya dia dimi mɛna dia vɔ komonga angɛnyi w’ɛlɔlɔ. Lakayotatɛka nshihodia dia ɔnwɛlɔ ami wa wanu wakaye oma lo ɔsɔnwɛlɔ ami w’angɛnyi. Lomingu l’otondo, vɔ wakakongaka wikɛndɛ dia vɔ nnɔ wanu.

Lakahembola lɔngɛnyi laki lam’asami la wɔ ndo lakalihɛnya la lɔngɛnyi la dimɛna la l’Ɛmɛnyi wa Jehowa. Monga ɔngɛnyi awɔ aki mɛtɛ kiɔkɔ y’ekeketshelo k’efula nɛ dia vɔ wekɔ mɛtɛ anto woka Nzambi ngandji ndo wasala la wolo dia nsɛna lo ndjela atɔndɔ ande. Yema yema lakatshike tshelo yami ya monga ɔnɔshi wa wanu wa woke.

WAHƆ WAMBOMOKONDJA: Lekɔ la lowando le Jehowa nɛ dia nde ambokimanyiya dia dimi monga l’ɔngɛnɔngɛnɔ, aha la nnɔ wanu. Handeye kɛnɛ kotokomɛ otomotetemala la yoho yami ya lɔsɛnɔ. Koko lekɔ l’eshikikelo dia lɔsɛnɔ lami laya dimɛna ɛlɔ kɛnɛ.

L’ɛnɔnyi esambele wetshi, lakakondja diɛsɛ dia nkamba lo Bɛtɛlɛ ka la Slovénie. Mbeya Jehowa ndo mbokambɛ ambombisha lɔsɛnɔ lele mɛtɛ l’oyango.