Bible tshikitanyaka nsɛnɔ y’anto

LANDE na kakayokomaka pami kɛmɔtshi kakodiama lo nkumbo kaki l’ohetoheto w’efula l’ɔtɛmwɛlɔ w’aseka Mupɛ ndo laki la diewo di’efula dia ntshutshuya anto dia vɔ nkitanyiya ɛlɛmbɛ Ɔmɛnyi wa Jehowa? Kakɔna kakatshutshuya terɔristɛ kɛmɔtshi dia nde ntshika awui wa ngala ndo ndjoyasha l’awui w’ɔtɛmwɛlɔ? Adia kɛnɛ kayangawɔ totɛ.

“Lakakondja eokelo k’oshika k’akambo w’ɔlɔlɔ la wa kɔlɔ.”—SEBASTIÃO ALVES JUNQUEIRA

ƆNƆNYI WA LÔTƆ: 1946

WODJA WA LÔTƆ: BRÉZIL

ƆKƆNDƆ: SHUSHI

NSHI YAMI YAKETE: Nkumbo kami wakadjasɛka lo ngielongelo yakangana l’osomba wa Piquete kilɔmɛtrɛ 6. Ambutshi ami waki la ekambɔ ka tshitshɛ ndo nkɛtɛ yakangɔnyaka diangɔ diakakotshaka ehomba aso. Kalasa yakamɔtɔka yakikɔ la Piquete, ndo lakasombe dikalo di’omusu dia dimi kɛlakɛlaka tsha l’osomba. Anto wa lo ngelo kaso waki wola, koko osomba waki pudipudi ndo akambo wa ngala komonga efula. Apami efula wa l’osomba wakakambaka lo kɔpanyi kakawasalaka ekoma w’asɔlayi.

Lakadiaka efula ndo lakayalɔngɔsɔla dia tɔtɔ lo kalasa y’asɔlayi ya la Aéronautique yaki suke la ngelo kaso, lɛnɛ akamatolongolaka dipɔlɔmɛ dia monga owandji w’asɔlayi lo 1966. Oma lâsɔ, lakatɔtɔka lo kalasa yekawɔ dia nkoma shushi ndo lakatolongolaka dipɔlɔmɛ lɛkɔ. L’ɔkɔngɔ diko, lakayokomaka owandji w’apulushi. Lo 1976, lakayosalaka ɛgzamɛ w’aseka lɛɛta ndo lakayokondjaka olimu. Tena dimɔtshi, olimu ami wakendanaka ndo la nama ase lokanu. L’etena kɛsɔ Ɛmɛnyi wa Jehowa wakayaka mbala efula ndo wakalɔmbaka lotshungɔ dia nsambisha ase lokanu. Mbala tshɛ vɔ wakasambishaka ndo dimi losango la lo Bible. Lakalɛmiyaka Nzambi efula. Lakâmbe efula dia mbeya ɔnɛ Jehowa mbele lokombo laki Nzambi ndo sho kokaka mbɔtɔ la nde ɔngɛnyi.

Yema yema, lakatahamaka l’olimu ami wa shushi. Lo 1981, lakayosalaka ɛgzamɛ okina nto w’aseka lɛɛta ndo lakayokomaka shushi ya wodja. Oma lâsɔ lo 2005, lakasɔnama dia monga shushi mɔtshi ya lo cour d’appel ka lo tuminadi ta la São Paulo.

WOHO WAKATSHIKITANYA BIBLE LƆSƐNƆ LAMI: Yema tshitshɛ l’ɔkɔngɔ wa dimi nongola dipɔlɔmɛ lo kalasa yakomawɔ shushi lakatatɛ mbadia Bible, ndo dui sɔ diakatshikitanya esadi eto ekanelo kami ka yimba. Laki l’ohetoheto w’efula l’ɔtɛmwɛlɔ w’aseka Mupɛ. Ose nkumbo kami ɔmɔtshi aki ɔlɔmbɛdi ndo okina aki evɛkɛ ndo lakakimanyiyaka ɔlɔmbɛdi etena kakandafukaka misa. La ntondo ka nde mbetsha, lakâdiaka etenyi kɛmɔtshi ka lo buku dia dɔmbɛlɔ. Anto wakodiama lo nkumbo ya l’ɔtɛmwɛlɔ w’aseka Mupɛ komonga la mbekelo ka mbadiaka Bible. Mama akomala efula etena kakandeye ɔnɛ lekɔ lo mbadia Bible. Nde akasale la wolo tshɛ dia kɔmɔlami otema lo mbuta ɔnɛ layoshisha ekanelo  k’ɔlɔlɔ ka yimba. Kânga mbakidiɔ ngasɔ, lakatetemala mbadia ndo dui sɔ komonga wâle.

Dimi fɔnyaka dia nsaki k’efula kaki lami ka mbeya awui kakakimanyiya lo wadielo ami wa Bible. Lakakombola mbeya akambo efula wendana l’ɛlɔmbɛdi ndo kɛnɛ kakawasalaka l’ɔtɛmwɛlɔ. Lakatatɛ nto mbadia awui wendana la tshunda dia teoloji k’etshungwelo, koko dimi koshihodia ndoko dui l’ɔtɛ w’ekanelo ka yimba kakakambe l’afundji adiɔ.

L’etena kakɔ kâmɛ, onganga ami wa wanyu laki ose ɔtɛmwɛlɔ wa Buda akayombishaka dibuku dimɔtshi diakawawosha. Dibuku diakɔ diaki l’ɔtɛ a dui ɔnɛ: L’homme est-il le produit de l’évolution ou de la création ? a Laketawɔ dibuku diakɔ ndo lakakanyiya ɔnɛ ayonga dimɛna dimi diadia kâmɛ la dibuku L’origine des espèces, diaki Charles Darwin. Elembetshiyelo wakawasha lo dibuku L’homme est-il le produit de l’évolution ou de la création ? waki la nkudu k’efula, waki shikaa ndo waketawoyaka. Aha la tâmu lakɛnyi dia wetshelo w’ohilwelo waki kashi.

Wadielo w’ɛtɛ w’awui waki lo dibuku sɔ wendana l’etongelo wakalomialomia nsaki kami. Lakakombola nkondja abuku efula wakatondjama oma le Ɛmɛnyi wa Jehowa. Wakambutɛ dia mekanisiɛ ɔmɔtshi wakakambaka lo kalasa yakawekaka dia nkɛndjakɛndja aviyɔ aki Ɔmɛnyi wa Jehowa. Lakasawola lande ndo nde akambisha abuku amɔtshi wa mbadia. L’etena kɛsɔ, dimi kombetawɔ dia Ɛmɛnyi wa Jehowa mbeka lami Bible. Lakafɔnyaka dia lakakoke mbeka Bible dimɛ.

Etena kakamatatɛ mbadia Bible lakɔshi yɛdikɔ dia lam’ele lambotshuka, ayonga dui dia lomba dia dimi kiadaka kâmɛ l’ase nkumbo kami. Takasalaka wekelo wa lo nkumbo lomingu tshɛ ndo takadiaka Bible kâmɛ. Oko wakiwɔ aseka Mupɛ, ase nkumbo kami wakasawolaka paka akambo wendana la ɛlɔmbɛdi la waa evɛkɛ. Ɔnkɔnɛ, kɛnɛ kakamadia lo Joani 14:6 akakotola yambalo yami: “Yeso akawotɛ [ombeki Tɔmasɛ] ate: ‘Dimi lekɔ mboka, mɛtɛ la lɔsɛnɔ. Ndooko onto laya le Papa paka lo tshimbo yami.’” L’ɔkɔngɔ wa dimi nsɛdingola dui sɔ dimɛna dimɛna, lakashikikɛ dia panda kaso ndjaka oma le Jehowa lo tshimbo ya Yeso. Wakatetsha ntondo ɔnɛ panda kaso ndjaka oma le ɛlɔmbɛdi.

Avɛsa akina ahende wakatshikitanya dionga diami otsha l’ɔtɛmwɛlɔ w’aseka Mupɛ ndo wetshelo awɔ. Divɛsa dimɔtshi ele Tokedi 1:7, diata ɔnɛ: “Woma wa [Jehowa] mbeli etatelu ka yimba. Keli akanga a dinginya watutunaka yimba la wetshelu.” Divɛsa dikina ele Jakɔba 1:5, diata ɔnɛ: “Naka onto ɔmɔtshi l’atei anyu ekɔ l’ohomba wa lomba, nde atetemale nɔmba Nzambi, ko nde ayowoshalɔ, nɛ dia la lokaho tshɛ nde mbishaka anto tshɛ aha la mbahangwɛ.” Laki la nsaki ka wolo ka nkondja ewo la lomba, lakimi kokondja kânga mbakamatshɔka l’ɔtɛmwɛlɔ. Ɔnkɔnɛ, lakatshike dia ntshɔ l’ɔtɛmwɛlɔ.

Lo 1980, wadɛmi akatatɛ mbeka Bible la Ɛmɛnyi wa Jehowa. Etena tshɛ kakimi la ngelo, lakadjasɛka dia ndjela wekelo. L’etena kɛmɔtshi, lakayetawɔka dia mbeka Bible. Koko, etena k’otale kakete la ntondo ka sho ndjɔsa yɛdikɔ ya batizama oko Ɛmɛnyi wa Jehowa. Wadɛmi akabatizama lo 1994 ndo dimi lo 1998.

WAHƆ WAMBOMOKONDJA: Anaso anɛi wambokondja wahɔ lo woho wakawodiama dia nsɛna lo yoho yɔtɔnɛ l’atɔndɔ waki Jehowa. (Ɛfɛsɔ 6:4) Lekɔ l’ana w’apami ahende ndo vɔ wekɔ lo nkamba la wolo dia nkotsha ehomba wa lo nyuma w’Ɛmɛnyi wa Jehowa wa lo tshumanelo diawɔ. Ana ami wa wamato ahende wekɔ l’ohetoheto w’efula dia nsambisha anto akina. Wadɛmi mbetshaka wenya efula ngɔndɔ tshɛ dia nkimanyiya anto akina dia vɔ mbeka akambo wa lo Bible ndo lekɔ l’ɔngɛnɔngɛnɔ dia nkamba oko ekumanyi l’etshumanelo kaso.

Etena kakamakome Ɔmɛnyi wa Jehowa, lakakondja eokelo k’oshika k’akambo w’ɔlɔlɔ la wa kɔlɔ. Oko wemi shushi, dimi salaka la wolo dia nkamba la yoho yasambola Jehowa akambo dia dimi lawɔ mpembola enongo lo tuminadi,  mbuta ate dimi mbidjaka yimba l’akambo tshɛ wendana la dui, mongaka l’ekanelo k’ɔlɔlɔ ndo mbokanaka kɛtshi naka kokaka.

Lakalomboshaka dombo diakendanaka l’awui wa ngala, diakatanelo, dieyanelo dia l’ana wakɛnda la wolo ndo l’awui akina efula wa ngala. Kânga mbakidiɔ ngasɔ, lakayaekesanyiya l’akambo asɔ. Etena kendami televiziɔ, dimi nyangaka efula lo mɛna woho wambolana lɔkɛwɔ ndo wambofulanɛ awui wa ngala l’andja ɔnɛ. Lekɔ la lowando efula le Jehowa lo woho wamomoshihodia kɛnɛ kele lo kiɔkɔ y’awui wa ngala wambofulanɛ ndo elongamelo kele laso ka nshi y’ɔngɛnɔngɛnɔ.

“Lokanu kotshikitanyami.”—KEITH WOODS

ƆNƆNYI WA LÔTƆ: 1961

WODJA WA LÔTƆ: IRLANDE DU NORD

ƆKƆNDƆ: TERƆRISTƐ

NSHI YAMI YAKETE: Lakotɔ l’ɔnɔnyi 1961 la Portadown osomba w’ɔngɔnyi wa lo Irlande du Nord. Laki l’ɔtɛmwɛlɔ w’ase Asɔnyi ndo lakodiama lo lokombo la woke lakiso l’asukanyi w’aseka Mupɛ ndo w’ase Asɔnyi. Nkumbo efula ya lɛkɔ yaki ase wola. Vɔ komonga la falanga efula ndo sho tshɛ takakimanyiyanaka lam’asaso.

Dimi komonga l’ofunu l’ɔtɛ wa lɔsɛnɔ laki lami. Lo 1974, lakayasha l’awui wa kɔlɔ waki lo Irlande du Nord lo shi shɔ. Oya l’etena kɛsɔ, akambo wakaleke ndâna lo ngelo kaso. Ɛnyɛlɔ, l’otsho ɔmɔtshi papa kami laki owandji lo tshunda dia Ulster Carpet Factory, aki l’olimu alowanya ɛlɔngɔlɔngɔ ehende w’aseka Mupɛ wakadjasɛka lo soko dikina dia lo lokombo laso. L’otsho akɔ ɔsɔ, onto ɔmɔtshi akokɛ bɔmbɛ lo didishi dia luudu la ndala, lakadjasɛka ana w’apami w’aseka Mupɛ asɔ, ko tɔ kakadiake papa la mama kawɔ ndo kosɛwɔ ka dikɛnda.

Akambo wakaleke mfukutana ndo ta diakatatɛ. Aseka Mupɛ wakatshumbe mvudu y’ase Asɔnyi yaki l’ɛtshi kawɔ ka nkɛtɛ, ndo dui sɔ diakakonya di’ase Asɔnyi monɔ oma l’ɛtshi ka nkɛtɛ kɛsɔ. Lokombo laso lakakome dihole diakadjasɛka paka ase Asɔnyi. Kombeta edja oma lâsɔ, wakamunde ndo wakafundɛ lokanu l’ɛnɔnyi esato l’ɔtɛ wakamayashaka l’elimu w’osalelo wa bɔmbɛ.

Etena kakimi lo lokanu, lakatɔtɔka lɔngɛnyi l’ose lokanu ɔmɔtshi lakeyamaka dimɛna l’ɔtɛ wa ngandji k’efula ka wodja kaki lande. Taki oko onto l’ɔnango, ndo l’ɔkɔngɔ diko lakayokimanyiyaka efula lo fɛtɛ kande ka diwala. Lokanu kototshikitanya dimi lande. Etena kakatatshungɔ oma lo lokanu, takakalola l’elimu aso wa pɔlitikɛ ndo takaleke ndjasha efula l’elimu akɔ. L’ɔtɛ wa dikambo sɔ, ɔngɛnyi ami akandama nto lo lokanu. Etena kakinde lekɔ, wakodiake.

Ndo nto, lakayongaka ndo dimi lo wâle ndo lo diaaso dimɔtshi wakande mutuka ami. Koko, awui asɔ tshɛ wakakonya dia dimi ndeka ndjasha tshɛ lo tshunda diakawelɛka ɔnɛ “God and Ulster.”

L’etena kɛsɔ, lakayoshaka lonya l’osalelo wa dɔkima dimɔtshi diakendanaka l’akambo wa  ngala, diakawɛnya lo televiziɔ k’ase britanniques. Dɔkima sɔ diakayombotɛka ekakatanu ekina efula. Ɛnyɛlɔ, l’otsho ɔmɔtshi lakakalola lakami ndo dimi kototanaka wadɛmi. Yema tshitshɛ oma lâsɔ, l’ɔtɛ w’ekongelo kakawɛnya lo televiziɔ, wakayɔpɔtɔlaka ɔnami la pami. Dimi mbohɔka etena kakamendaka lo talatala ndo kakamate nte: “Naka Nzambi ekɔ nde akimanyiya.”

Lushi la samalo lakayele, lakahomana l’osekami lakawelɛka Paul, lakakome Ɔmɛnyi wa Jehowa. Nde akatatɛ nsawola lami akambo wendana la Bible. L’ɔkɔngɔ wa nshi hiende, Paul akatomɛ kɔpi kɛmɔtshi ka Tshoto y’Etangelo. Sawo dimɔtshi dia lo Periodikɛ kɛsɔ diakashile ɛtɛkɛta waki Yeso wele lo Joani 18:36. Nde akate ate: “Diolelo diami bu dia l’andja ɔnɛ. Otondonga Diolelo diami diekɔ dia l’andja ɔnɛ, tshike anto ami wotɔndwɛ ta diaha dimi kimɔma le ase Juda. Koko Diolelo diami keema dia lanɛ la nkɛtɛ.” Ɛtɛkɛta ɛsɔ wakikɔ la shɛngiya ya wolo le mi. Lushi lɔsɔ mbakamatatɛ nsala etshikitanu lo lɔsɛnɔ lami.

WOHO WAKATSHIKITANYA BIBLE LƆSƐNƆ LAMI: Paul akatatɛ mbetshami Bible. L’ɔkɔngɔ diko Bill, Ɔmɛnyi wa Jehowa okina akayotetemalaka mbeka lami. Dimi mbeyaka dia laki ombeki wa wolo efula; laki la ambola efula wa mimbola! Ndo nto, lakelɛ ewandji w’ɛtɛmwɛlɔ efula lakami dia vɔ ndjɛnya ɔnɛ kɛnɛ kakasambishaka Bill kaki kashi. Koko, lakɛnyi akambo wa mɛtɛ wele l’Ɔtɛkɛta waki Nzambi.

Dimi mbohɔka dia lo diaso dimɔtshi, lakatɛ Bill diaha nde ndja la ngelo dia sho ndjeka Bible nɛ dia wakadihe mboka ndo wotoyonda mutuka ande dia mbotshumba. Ɔnkɔnɛ, Bill akaye dia sho ndjeka oko wokondoyaka. Nde akatshike mutuka ande la ngelo ko akaye lo dikalo diande. Waa na wakakoke ndjonda mutuka ande? Lo diaaso dikina, etena kakamekaka Bible la Bill la ngelo, apulushi wakaye wokime bɔngɛ ko wakayominda. Etena kakawatatshɔka lami, Bill akambelɛ la dui dia wolo ndo akambutɛ dia dimi ndjaɛkɛ le Jehowa. Akambo asɔ waki la shɛngiya ya wolo le mi.

Mbala ka ntondo kakamɔtɔ lo losanganya lɔmɔtshi l’Ɛmɛnyi wa Jehowa lo Mbalasa ka Diolelo, lakahombe nyangiya amɔtshi l’atei awɔ. Laki la divo di’etale ndo lakalɔtɛ zama lo toyi, lakalɔtɛ kɔti diakɛnyaka oloyi w’ase pɔlɔtikɛ wakimi. Koko, dimi kokoka mbetawɔ woho wakasalɛ Ɛmɛnyi wa Jehowa akambo. Lakanandema efula l’ɔtɛ wa lɔsɛngɔ lawɔ.

Kânga mbakamekaka Bible lakatetemala mbekesanɛ l’angɛnyi ami w’edjedja. Koko, l’ekomelo akambo wa mɛtɛ wakameke oma lo Bible wakatatɛ munanda otema ami wolo efula. Lakayoshihodiaka dia naka dimi nangaka kambɛ Jehowa, kete dimi pombaka ntshika awui wa pɔlitikɛ ndo mpembola losambi la lɔngɛnyi la kɔlɔ. Ɔsɔ komonga dui dia wɔdu. Koko, etena kakamaleke mbeka akambo efula wa lo Bible ndo kakamakondja wolo oma le Jehowa, lakonge l’akoka wa nsala etshikitanu. Lakahembola divo diami, lakanya zama diaki lo toyi diami ndo lakalɔtɛ dimɛna. Akambo wakamekaka wakakimanyiya nto dia dimi ntatɛ ndowanya dionga diami otsha le anto akina.

WAHƆ WAMBOMOKONDJA: Laki ondjakanyi ndo terɔristɛ. Ewandji wa lo tshunda diakiso wakatshutshuyaka anto la wolo dia nkitanyiya ɛlɛmbɛ wakambeyaka dimɛna. Kakianɛ, akambo wambotshikitana. Ɛnyɛlɔ, mbala ka ntondo kakamɔtɔ lo losanganya la woke la Ɛmɛnyi wa Jehowa lakasalema l’osomba wa Navan, ewandji wakatshutshuyaka anto la wolo dia nkitanyiya ɛlɛmbɛ wakatshu lami wataname oma la Irlande polo la Irlande du Nord. Koko, kakianɛ lotshɔka otsha lo Losanganya aha la vɔ namami. Kakianɛ, lekɔ lo nsambisha nto aha ndoko l’okakatanu kâmɛ la Paul nde la Bill ndo la etshumanelo k’otondo.

Etena kakatshikitana lɔsɛnɔ lami dimɛna, lakakome Ɔmɛnyi wa Jehowa l’etshumanelo kaso. Lakɛnana la kadiyɛso kɛmɔtshi k’Ɔmɛnyi wa Jehowa kelɛwɔ Louise ndo takatshukana. Lâdiko dia lasɔ, dimi la ɔnami la pami takayongaka nto kâmɛ.

Etena kohɔmi akambo wakamasale lo lɔsɛnɔ lami, dimi nyangaka l’ɔtɛ wakamasalɛ anto akina kɔlɔ. Koko, dimi kokaka nshikikɛ dia Bible kimanyiyaka mɛtɛ anto wele oko dimi dia vɔ ntshika lɔsɛnɔ la kɔlɔ ko monga la lɔsɛnɔ lele l’oyango ndo l’elongamelo.

[Nɔte ka l’ɛse ka dikatshi]

[Efundelo wa l’etei w’odingɔ wa lo lɛkɛ 12]

Mama akomala efula etena kakandeye ɔnɛ lekɔ lo mbadia Bible