Etshama oma l’Ɔtɛkɛta wa Nzambi

Kakɔna kayosalema lo lushi la kilombo?

Sawo nɛ monyiyaka ambola amɔtshi wele ondo wɛ amboyaokaka ndo diɔ mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayɔngɛnangɛna dia nkɛtshanya layɛ ekadimwelo ɛsɔ.

1. Lushi la kilombo kɛdikɛdi na?

Oko wadiɛnya osato wa lo lonya l’omi, anto efula fɔnyaka ɔnɛ lo lushi la kilombo miliyara y’anto wayemala la ntondo ka kiti kaki Nzambi dia vɔ nomboshama lo ndjela etsha wakawatshaka ntondo, mbuta ate amɔtshi wayolongola difuto dia tɔsɛna l’olongo ndo akina wayɔhɛnyahɛnyamaka lo ifɛrnɔ. Koko, Bible mɛnyaka dia oyango wele la lushi la kilombo ele wa ntshungola anto oma lo wɛngiya. (Osambo 96:13) Nzambi akasɔnɛ Yeso dia monga Shushi yayela losembwe l’andja w’otondo.—Adia Izaya 11:1-5; Etsha 17:31.

2. Ngande wayela Lushi l’Elombwelo losembwe?

Etena kakatɔmbɔkwɛ Adama pami ka ntondo Nzambi l’okonda tshɛ, nde akakonya tokanula tande tshɛ lo lɔhɔmbɔ la pɛkato, asui ndo nyɔi. (Rɔmɔ 5:12) Dia minya wɛngiya ɔsɔ, Yeso ayolola miliyara y’anto wakavu. Dibuku di’Ɛnyɛlɔ mɛnyaka dia dui sɔ diayosalema l’ɛlɔmbwɛlɔ k’ɛnɔnyi kinunu waki Kristo Yeso.—Adia Ɛnyɛlɔ 20:4, 11, 12.

Wanɛ wayolwama wayolomboshama aha lo ndjela kɛnɛ kakawatshaka la ntondo ka vɔ mvɔ, koko lo ndjela kɛnɛ kayowotosala etena kayoshwama awui wele lo “wɛɔmbɔ” wɔtɛkɛtami lo Ɛnyɛlɔ tshapita 20. (Rɔmɔ 6:7) L’atei w’anto wayolwama ndo wayonga la diaaso dia mbeka akambo wendana la Nzambi mbele ndo ‘anto w’ɔlɔlɔ la wa kɔlɔ,’ wakatɛkɛta ɔpɔstɔlɔ Pɔɔlɔ.—Adia Etsha 24:15.

  3. Awui akɔna wayosalema lo lushi la kilombo?

Wanɛ wakavu aha la mbeya Jehowa Nzambi ndo mbokambɛ wayokondja diaaso dia ntshikitanya etsha awɔ ndo nsala akambo w’ɛlɔlɔ. Naka vɔ nsala akambo w’ɔlɔlɔ, kete eolwelo kawɔ kayonga “eolwelo ka lɔsɛnɔ.” Koko, anto amɔtshi wayolwama hawotolanga mbeka akambo wendana la Jehowa. Eolwelo kawɔ kayonga “eolwelo ka kilombo.”—Adia Joani 5:28, 29; Izaya 26:10; 65:20.

L’ekomelo ka ɛnɔnyi kinunu wa lushi la kilombo, Jehowa ayokonya anto wele l’okitanyiya kokele oko wakidiɔ oma l’etatelo. (1 Kɔrɛtɔ 15:24-28) Ande elongamelo ka diambo kele la wanɛ tshɛ wele l’okitanyiya lee! L’ohemba w’ekomelo, Nzambi ayotshungola Satana Diabolo oma lo lokanu lɛnɛ ayondonga l’edja k’ɛnɔnyi kinunu. Satana ayohemba nto dia minganyiya anto oma le Jehowa, koko wanɛ wayotona dia mboyela wayokondja lɔsɛnɔ la pondjo la nkɛtɛ.—Adia Izaya 25:8; Ɛnyɛlɔ 20:7-9.

4. Wahɔ akɔna wayokondja anto lo nshi nkina y’elombwelo?

Bible kambaka la tshɛkɛta “lushi la kilombo” dia nembetshiya awui wayokomiya dikongɛ nɛ di’akambo. Lushi la kilombo lɔsɔ layoya la shashimoya oko wakalɔ Mvula k’elola ka lo nshi ya Nɔa, kakadiake lɔlɔnga la kɔlɔ tshɛ. Diɛsɛ ko, elanyelo ‘k’anto wa kɔlɔ’ kaya nsuke dia mbɛdia nkɛtɛ dikambo dia tshunda di’oyoyo lɛnɛ “ayongaka losembwe.”—Adia 2 Petero 3:6, 7, 13.

Dia mbeya awui akina, enda lɛkɛ 213-215 la dibuku nɛ, Bible etshatɔ mɛtɛ? diakatondjama oma le Ɛmɛnyi wa Jehowa.

[Osato wa lo lɛkɛ 16]

“Kilombo k’ekomelo,” oma le Gustave Doré, 1832-1883

[Efundelo wɛnya kanga]

Asango wakasange Doré