Kakianɛ lambeya Nzambi katɛmɔlami

Kɔndwama oma le Marieta Manuel Bacudio

Osambisha ɔmɔtshi wa l’ɔtɛmwɛlɔ wa waa Pentecôtistes lakataka dia nde ekɔ la wolo wa nkɔnɔya akaye dia ndjotembola. Etena kakandamunanda, lakakɔ hohakayi, “lakavu lo nyuma.” Etena kakamakashimɔ, lakɛnyi dia lambokondja kɛnɛ kakamakombolaka, mbuta ate wolo wa nkɔnɔya. Kakɔna kakayokonyaka lo dikambo sɔ ndo shɛngiya yakɔna yaki la dui sɔ lo lɔsɛnɔ lami? La ntondo ka dimi nyɔkɔndɔlɛ awui asɔ, layanga tanyolembetshisha lɛnɛ akamole.

LAKOTƆ la Ilocos Norte, lo wodja wa Philippines, Ngɔndɔ ka dikumi l’ahende 10, 1968, ɔna l’esambele l’ana dikumi. L’ɛnyɛlɔ ka waa Philippins efula, takodiama l’ɔtɛmwɛlɔ w’aseka Mupɛ. Lakalongola dipɔlɔmɛ lo kalasa ya sekɔndɛrɛ lo 1986, ndo oyango ami aki wa nkoma ɔfɛlɛmɛ. Koko, oyango ɔsɔ kokotshama nɛ dia lakayondamaka la hemɔ ka wolo. Lakafɔnya dia langa mvɔ. L’ɔtɛ wa lonyangu laki la mi, lakasɛngasɛnga Nzambi dia nde kimanyiyami ndo lakolake ɔnɛ naka dimi kɔlɔngana, kete layowokambɛ lɔsɛnɔ lami l’otondo.

Edja efula l’ɔkɔngɔ wa dimi nkɔnɔ, lakohɔ daka diakamalake Nzambi. Ɔnkɔnɛ, lo Ngɔndɔ ka samalo 1991, lakafundja lokombo lo kalasa ka Bible ka waa Pentecôtistes. Wetshelo wa lo kalasa kɛsɔ wakendanaka ndo la nkondja “woshasha wa nyuma k’ekila.” Lakakombola monga la wolo wa nkɔnɔya. Wakatetsha lo kalasa kɛsɔ ɔnɛ sho kokaka nkondja wolo ɔsɔ lo kilaka mbo ya ndɛ ndo lo nɔmbaka. Mbala kɛmɔtshi, lo welo wakamadjaka dia mɛnya ɔnɛ lambokondja “woshasha,” lakahokamɛ lo woshɛshɛ dɔmbɛlɔ diakasalaka osekami ɔmɔtshi la la kalasa la dui dia wolo lo tshuku dimɔtshi lo wonya wa dɔmbɛlɔ. Etena kakinde suke la nshidiya lakamɔ oma lawɔ ndo lakalawɔ esadi eto lɛnɛ akamake adwe. L’ɔkɔngɔ wa lâsɔ, lakawotɛ dui shikaa di’akandalɔmbaka, ndo nde aketawɔ ɔnɛ ndo dimi mbambokondja “woshasha.”

Etena kakamatetemala la wekelo, laki la ambola efula. Ɛnyɛlɔ, Mateo 6:9 tɛkɛtaka dikambo dia “Shɛso” ndo dia “lokombo” lande. Lakoke ambola wele oko wanɛ: “Ele Shɛso kakatɛkɛta Yeso dikambo diande?” ndo “Lokombo lakɔna lahomba kidiama?” Embetsha ami wakambisha ekadimwelo wa lahahɛ waki kɔngɛnyangɛnyami. Vɔ waketshaka wetshelo wa Losato l’osanto ndo wakataka ɔnɛ ɔsɔ ekɔ wetshelo w’ehekesa. Lakɔtɔ l’okandokando. Koko, kânga mbakidiɔ ngasɔ, lakatetemala ndowanyema dia nkoma pastɛrɛ.

Etena kakamɛnana la Ɛmɛnyi wa Jehowa

Wakatetsha lo kalasa ka Bible ɔnɛ Ɛmɛnyi wa Jehowa wekɔ ɔtɛmwɛlɔ wa kashi. Vɔ wekɔ atunyi wa Kristo. Lakatatɛ mpetsha ɔtɛmwɛlɔ w’Ɛmɛnyi wa Jehowa.

Ɔnɔnyi wa hende lâsɔ ko laya lo kalasa ka hende, lakatshu la ngelo dia tembola ambutshi ami etena kakiso lo dikimɔ. Carmen, enondo ami ɔmɔtshi la womoto akaye dia ndjomenda lam’akandoke ɔnɛ lamboya. L’etena kɛsɔ ko nde ambobatizamaka oko Ɔmɛnyi wa Jehowa, ele okambi wa lo tena tshɛ. Etena kakandahembe mbetshami akambo wendana la Nzambi, lakôkadimola la nkɛlɛ tshɛ nte: “Lamboshilaka mbeya Nzambi kakambɛmi.” L’ɔkɔngɔ wa dimi mbɔtɛnga la dui dia wolo, lakawotshanya  ndo dimi kombetawɔ dia nde ndjosawola la mi nto.

L’ɔkɔngɔ wa dimi nkalola lo kalasa ka Bible, Carmen akatomɛ kɔpi kɛmɔtshi ka biukubuku Doit-on croire à la Trinité ? a Mbala kakɔ ɔtɔi lakayimɔnyamɔnya ndo lakayitshumbe. Lakawomalɛ efula.

Lakakome pastɛrɛ

Etena kakamatatetemalaka mbeka lo kalasa ka Bible, lakasale etshikitanu efula. Laki l’ofunu w’efula djekoleko etena kakayɔtɔka mama nde l’enondo ami la pami l’ɔtɛmwɛlɔ wa waa Pentecôtistes.

Lo Ngɔndɔ ka sato 1994, lakayolongolaka dipɔlɔmɛ lo kalasa ka Bible ka waa Pentecôtistes. Oko wakamaditshi l’etatelo, osambisha ɔmɔtshi akaye dia ndjotembola l’etena kɛsɔ. Sho tshɛ wanɛ wakalongola apɔlɔmɛ takakombola monga kâmɛ la nde nɛ dia taketawɔka ɔnɛ nde ekɔ la losha la kɔnɔya. Takadɛ lande lo lɔyɛnga, tafumbɔfumbɔ ndo tada saka kâmɛ lande nɛ dia wakahomaka ngɔmɔ. Oma lâsɔ, onto tshɛ lakandanandaka akakɔ la nkɛtɛ, ko “mvɔ lo nyuma.” b Etena kakandamunanda, dimi lawɔ lakakɔ hohakayi la nkɛtɛ. Etena kakamakashimɔ, lakandama la wɔma koko laki l’eshikikelo k’ɔnɛ lambokondja wolo wa nkɔnɔya, ɔnkɔnɛ laki l’ɔngɛnɔngɛnɔ.

Yema tshitshɛ oma lâsɔ, lakakambe la wolo ɔsɔ dia nkɔnɔya ɔna womoto ɔmɔtshi laki la demba dja dia wolo. Etena kakamasale dɔmbɛlɔ, ɔna womoto akɔ akatatɛ mpɛnga dimɛna ndo demba dja diakashile mbala kakɔ ɔtɔi. Oma lâsɔ, lakɛnyi dia dimi kokaka nkotsha daka diakamalake Nzambi. Koko, laki l’ohomba wa dui dimɔtshi. L’etei k’otema, laketawɔka dia ekɔ paka Nzambi ɔtɔi, koko dimi kombeyaka mɛtɛ ênde. Ndo laki la tâmu t’efula lo kɛnɛ kendana la wetshelo efula wa kashi wa l’ɔtɛmwɛlɔ.

Awui wakayotshikitanyaka ekanelo kami ka yimba

L’ɔkɔngɔ w’awui asɔ, lohetsho lami otsha le Ɛmɛnyi wa Jehowa lakaleke mfulanɛ. Dihole tshɛ diakamatanaka ekanda w’Ɛmɛnyi wa Jehowa, lakâtshumbaka. Oma lâsɔ, dui dimɔtshi diakimi konongamɛka diakayosalemaka. Laki la lonyangu l’efula dia mbeya ɔnɛ mama hayolanga monga nto l’ɔtɛmwɛlɔ aso wa waa Pentecôtistes. Lâsɔ ko Carmen amboshilaka mbeka la nde Bible. Lakomalɛ enondo ami la womoto efula.

Oma lâsɔ, lakatotanaka Réveillez-vous ! lo luudu laki mama. Lakalange mbotshumba. Koko, lam’ele lakalomɔlomɔka dia mbeya kɛnɛ kakadiaka mama, lakatatɛ mbifola akatshi. Washo ami wakakɔ mbala kakɔ ɔtɔi lo sawo dimɔtshi diakatɛkɛtaka di’onto ɔmɔtshi laki la dietawɔ dia wolo lo kɛnɛ kakawetshaka l’ɔtɛmwɛlɔ. Koko, etena kakandatatɛ mbadia ekanda w’Ɛmɛnyi wa Jehowa kâmɛ la Bible, nde aketawɔ ɔnɛ: Wetshelo wa Losato l’osanto, ifɛrnɔ ndo wetshelo w’ɔnɛ anima havu hawotombi oma l’Afundelo. Dui sɔ diakananda otema ami. Ɔsɔ mbaki awui w’eshika wakamakombolaka nshihodia. Ntatɛ oma k’etena kɛsɔ, lakakongɛka l’asolo walomɔlomɔ etena kakamahombe nshihodia akambo wa mɛtɛ wa lo Bible.

 L’ɔkɔngɔ wa dimi mbadia ɔkɔndɔ okina lo Réveillez-vous ! wakatɛkɛtaka di’onto ɔmɔtshi laki ombidjɔki a wanu ndo lakanɔka dinɔɔnɔ dia wolo lakasale etshikitanu wa weke lo lɔsɛnɔ la nde l’ɔtɛ wakandekaka Bible, lakatatɛ mbadia ekanda efula w’Ɛmɛnyi wa Jehowa. Lakakondja kɔpi kɛmɔtshi ka biukubuku Le nom divin qui demeure à jamais. c Lamakamayadia lakeye dia lokombo laki Nzambi ko Jehowa. Lakangɛnangɛna dia mbeka akambo wa mɛtɛ wendana la Nzambi ɔtɔi ka mɛtɛ.—Eohwelo k’Ɛlɛmbɛ 4:39; Jɛrɛmiya 10:10.

Lakatetemala mbadia lo woshɛshɛ ndo lakeke akambo efula wa mɛtɛ wa lo Bible. Ɛnyɛlɔ, lo kalasa ka waa Pentecôtistes, wakatetsha dia Yeso mbele Nzambi, koko lakeke oma lo Bible dia nde ekɔ “Ɔna Nzambi kasɛna.”—Mateo 16:15, 16.

Lakakadimola otema

Etena kakamɛnyi Carmen nto, nde akambe efula etena kakamɔlɔmbɛ kɔpi kɛmɔtshi ka biukubuku Le nom divin qui demeure à jamais, kâmɛ l’ekanda ekina. Laketsha ɛnɔnyi efula lo kalasa ka Bible kɛsɔ, koko vɔ kombetshami akambo wa mɛtɛ nɛ dia wakambetɛ tshungu. Kakianɛ lekɔ l’ɔngɛnɔngɛnɔ w’efula l’ɔtɛ w’akambo wa mɛtɛ wakameke lo Bible. Lamboshihodia dimɛna shɛngiya yele l’ɛtɛkɛta waki Yeso w’ɔnɛ: “Nyayeya akambo wa mɛtɛ, ko akambo wa mɛtɛ wayonyotshungola.” (Joani 8:32) Akambo wa mɛtɛ asɔ wakatatɛ ntshikitanya lɔsɛnɔ lami.

L’etena kɛmɔtshi, lakafɔnyaka ɔnɛ dimi kokaka ntɛmɔla Jehowa Nzambi lo woshɛshɛ ndo ntetemala monga pastɛrɛ. Esadi eto lakashihodia dia takamahombe mbetsha nto wetshelo wa kashi wa l’ɔtɛmwɛlɔ. Koko, laki la wɔma w’efula. Lende ayomokondjaka falanga ya ndjasɛnya naka dimi ntshika olimu wa pastɛrɛ? Ande sɔnyi kayonga l’ase ɔtɛmwɛlɔ naka pastɛrɛ kawɔ kɛmɔtshi monga Ɔmɛnyi wa Jehowa lee! Ɔnkɔnɛ, lakatetemala mbetsha oko pastɛrɛ koko lakewɔka wetshelo wa kashi wa l’ɔtɛmwɛlɔ.

Etena kakamɛnyi Carmen w’enondo ami nto, nde akanɔmbɛ dia dimi mbɔtɔ lo nsanganya y’Ɛmɛnyi wa Jehowa. Lam’ele lakatshɔka l’ɔtɛmwɛlɔ waki l’osomba wa waa mama wa Laoag City, lakayange lo woshɛshɛ Mbalasa ka Diolelo kasangana Ɛmɛnyi wa Jehowa. Lakayaeyanya le Alma Preciosa Villarin, lokombo lande la losakola ko “Precious,” okambi wa lo tena tshɛ wa l’etshumanelo kɛsɔ. Kânga mbakimi la tokanyi ta kɔlɔ lo dikambo di’Ɛmɛnyi wa Jehowa, laketawɔ dia nde mbetshami Bible.

Enondo ami la womoto aki la solo dia lotutsha efula dia mbetshami akambo wa mɛtɛ wa lo Bible. Ndo Precious mbaki la dionga dia ngasɔ. Nde akakimanyiya efula dia dimi nshihodia Bible, kânga etena kakamomalaka layanga  dia mana la nde, tena dimɔtshi, lakatɛkɛtaka la wolo latshininala l’akambo amɔtshi wakawambetsha ntondo. Lakanandema efula l’ɔtɛ wakayashaka Precious nde l’Ɛmɛnyi wa Jehowa ekina le mi, l’okitshakitsha ndo la memakana tshɛ. Kɛsɔ kakatshutshuya dia dimi ntɛmɔla Jehowa.

Lo Ngɔndɔ k’esambele 1995, lakashihodia dia naka dimi nangaka ngɛnyangɛnya Nzambi, kete dimi pombaka ntshika olimu wa pastɛrɛ. Lande na? Ɛnyɛlɔ 18:4 ekɔ lo ntɛkɛta dikambo di’ɛtɛmwɛlɔ wa kashi lo didjidji lo mbuta ɔnɛ: “Anto ami, nyotombe oma l’atei atɔ naka hanyolange ndjotambɛ lo pɛkato yatɔ diaha nyu ndjolongola asui atɔ.” Ngande wayomokondjaka falanga ya ndjasɛnya? Lakeke lo ndjela Hɛbɛru 13:5 ɔnɛ naka sho nsala lolango laki Nzambi, nde ndakaka ɔnɛ: “Dimi hakotshikaki ndo hakokalɛki pondjo.”

Kânga mbakandɔsha papa nde l’enondo ami la pami wolo, mingu hiende la ntondo ka dimi batizama, lakonge la dihonga dia ntshɔ la ngelo dia totshumba diangɔ tshɛ diakendanaka l’olimu ami wa pastɛrɛ diaki lami. L’ɔkɔngɔ wa dimi nsala dui sɔ, lakɛnyi dia wolo tshɛ wa lânde wakawambisha ntondo wakamɔ. Lo nshi yakete, etena kakamalalaka, lakokaka dia ɛngɔ kɛmɔtshi kekɔ lo mpinami. Koko, kakianɛ handjoka nto ngasɔ. Ɛngɔ kɛmɔtshi kele oko dɛdi kakamɛnaka lo didishi dia shambrɛ yami hayɛnama nto. Lo wekelo ami wa Bible lakeke dia ɛlɔ kɛnɛ losha lele oko wolo wa nkɔnɔya haloye oma le Nzambi, koko ndjaka oma le nyuma ya kɔlɔ. Ɔnkɔnɛ, lekɔ l’ɔngɛnɔngɛnɔ w’efula dia ntshungɔ oma lo tɔsɛngiya tɔsɔ, oko wakidiɔ lo dikambo di’okambi wa womoto wakatshungola Pɔɔlɔ oma le “ɔdiɛngɛ wakataka akambo wahataye.”—Etsha 16:16-18.

Ande ɔngɛnɔngɛnɔ waki lami dia dimi la mama ndjakimɔ mbala kakɔ ɔtɔi dia batizama oko Ɛmɛnyi wa Jehowa lo Ngɔndɔ ka divwa 1996 lee! L’ɔkɔngɔ wa batismu kami, lakalodia dɛmandɛ dia nkamba olimu wa lo tena tshɛ ndo lekɔ l’ɔngɛnɔngɛnɔ dia nkamba olimu ɔsɔ.

Kakianɛ lambotshukana la Silver. Dimi la nde tekɔ lo nsala la wolo dia mbodia ɔnaso la womoto lo mboka k’akambo wa mɛtɛ wa lo Bible. Nondo diami la akosɛmi wa wamato waya vɔ lawɔ Ɛmɛnyi wa Jehowa. Kânga mbemi la lonyangu l’ɔtɛ wakimi kombeya Nzambi l’edja k’ɛnɔnyi efula, lekɔ l’ɔngɛnɔngɛnɔ w’efula nɛ dia lambeya Nzambi katɛmɔlami.

[Nɔte ya l’ɛse ka dikatshi]

[Efundelo wa l’etei w’odingɔ wa lo lɛkɛ 27]

Lakakambe la wolo ɔsɔ dia nkɔnɔya ɔna womoto ɔmɔtshi laki la demba dja dia wolo

[Efundelo wa l’etei w’odingɔ wa lo lɛkɛ 28]

Akambo wa mɛtɛ asɔ wakatatɛ ntshikitanya lɔsɛnɔ lami

[Efundelo wa l’etei w’odingɔ wa lo lɛkɛ 29]

Lakangɛnangɛna dia mbeka akambo wa mɛtɛ wendana la Nzambi ɔtɔi ka mɛtɛ

[Osato wa lo lɛkɛ 27]

Etena kakamalongola dipɔlɔmɛ dia monga pastɛrɛ

[Osato wa lo lɛkɛ 28]

Precious ambetsha Bible

[Osato wa lo lɛkɛ 29]

Lam’akamabatizama dimi la mama

[Osato wa lo lɛkɛ 29]

Oko okambi wa lo tena tshɛ w’Ɛmɛnyi wa Jehowa

[Osato wa lo lɛkɛ 29]

Dimi l’omɛmi, ɔnaso la womoto ndo ewotɔ ami efula waya l’ɔtɛmwɛlɔ wa mɛtɛ