Lande na katshika Ɔnɛ latokaka dɔmbɛlɔ asui?

KÂNGA mbalɔmbawɔ, anto amɔtshi mbidjaka tâmu ɔnɛ Nzambi bu. Lande na? Ondo l’ɔtɛ wɛnawɔ asui efula l’andja ɔnɛ. Onde wɛ atayambolaka ɔnɛ lande na katshika Nzambi asui?

Onde mɛtɛ Nzambi akatonge anto dia vɔ monga woho wewɔ ɛlɔ kɛnɛ, mbuta ate kema kokele ndo sowaka? Ayonga tshondo y’okakatanu dia sho nɛmiya nzambi kakombola di’anto sowaka. Ɛnyɛlɔ: Ohɔsa dia wɛ ekɔ lo nshishima mutuka ɔmɔtshi w’oyoyo la diambo tshɛ, ɛnyiyɛ ko dihole dimɔtshi diambolana, onde wɛ ayota ɔnɛ ngango mbakawosale l’izinɛ? Ndooko! Wɛ mbeyaka mbuta dia vɔ wakasalema dimɛna, koko onto kana ɛngɔ kɛmɔtshi mbamboyôlanya.

Woho akɔ wâmɛ mbele, etena kangɛnangɛnaso woho wokongɛmi diangɔ dimɛna ndo oyango adiɔ, ko oma lâsɔ sho ndjɛna akambo wa kɔlɔ wambolanya nkumbo y’ana w’anto, kakɔna kayotota? Bible mbetshaka dia Nzambi akatonge pami la womoto la ntondo kokele koko l’ɔkɔngɔ diko vɔamɛ wakayoyasalɛ kɔlɔ. (Eohwelo k’Ɛlɛmbɛ 32:4, 5) Lokumu l’ɔlɔlɔ ko, Nzambi akalake dia nɔngɔsɔla akambo tshɛ wakalana, mbuta ate nkonya anto w’okitanyiya kokele. Ko lande na kamondokongɛ edja efula nganɛ?

Lande na edja efula nganɛ?

Dimbola sɔ mendanaka la ɔnɛ lahomba nɔmbɔla anto. Jehowa kokongɛ pondjo dia anto ndjalɔmbɔla vɔamɛ. Nde mbakahombe monga Ɔnɔmbɔdi awɔ. Bible mbutaka ɔnɛ: “Lam’atundokendakendaka, ndi ndame heyi nombola ekulu andi.” (Jɛrɛmiya 10:23) Lonyangu ko, pami la womoto la ntondo wakatɔmbɔkwɛ ɛlɔmbwɛlɔ kaki Nzambi. Woho  wakawɔnyɔla ɔlɛmbɛ ande akâkonya dia vɔ monga atshi wa pɛkato. (1 Joani 3:4) Etombelo waki la dui sɔ ele, vɔ wakashisha lɔsɛnɔ la kokele, wakayasalɛ vɔamɛ kɔlɔ ndo wakasalɛ tokanula tawɔ kɔlɔ.

L’edja k’ɛnɔnyi nunu, Jehowa aketawɔ dia anto ndjalɔmbɔla vɔamɛ, ndo ɔkɔndɔ w’ana w’anto wambɛnya dia vɔ bu l’akoka wa ndjalɔmbɔla. Vɔ mɛnyaka dia mandji y’ana w’anto tshɛ mbele lo kiɔkɔ y’asui. Ndoko lowandji ɔtɔi lambonya ata, diakatanelo, akambo wa wɛngiya kana hemɔ.

Ngande wayonya Nzambi akambo wa kɔlɔ?

Bible ndakaka dia kem’edja Nzambi ayanga mbela andja w’oyoyo wa losembwe. (2 Petero 3:13) Paka wanɛ wasɔna la lolango lawɔ dia mbokana ngandji lam’asawɔ, ndo mboka Nzambi ngandji mbayetawɔma dia ndjɔsɛna l’andja ɔsɔ.—Eohwelo k’Ɛlɛmbɛ 30:15, 16, 19, 20.

Bible mbutaka nto dia lo “lushi la kilombo” lamboleka nsukana, Nzambi ayonya asui tshɛ ndo wanɛ wele lo kiɔkɔ yawɔ. (2 Petero 3:7) L’ɔkɔngɔ diko, Yeso Kristo Ɔnɔmbɔdi wakasɔnama oma le Nzambi ayɔlɔmbɔla anto w’okitanyiya. (Danyɛlɛ 7:13, 14) Kakɔna kayoyosala ɛlɔmbwɛlɔ kaki Yeso? Bible mbutaka ɔnɛ: “Keli akanga a memakana wayukita kete, ndu wayongenangena la etshoko efula wa ki.”—Osambo 37:11.

Oko wende Nkumekanga kolɛ l’olongo, Yeso ayonya akambo wa kɔlɔ, mbidja ndo hemɔ, lotshundu ndo nyɔi, mbuta ate akambo wakaye oma lo woho wakatɔmbɔkwɛ anto Jehowa, ‘kiɔkɔ ya lɔsɛnɔ.’ (Osambo 36:9) Yeso ayɔkɔnɔya anto tshɛ wetawɔ ɛlɔmbwɛlɔ  kande ka la ngandji. L’ɛlɔmbwɛlɔ kande, alaka anɛ wa lo Bible wayokotshama:

◼ “Nduku untu ludjashi la Jerusalema ayuta ati: Dimi la kandji! Antu wa leko wayudimanyiama kolo yawo.”—Izaya 33:24.

◼ “[Nzambi] ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto. Akambo wa ntondo wamboshila.”—Ɛnyɛlɔ 21:4.

Shi ekɔ tshondo y’esambelo dia mbeya ɔnɛ kem’edja Nzambi ayanga nkotsha alaka ande dia nkomiya asui tshɛ? L’etena kɛnɛ, sho pombaka monga la wɛkamu le ɔnɛ latokaka alɔmbɛlɔ kânga mbetawɔnde dia ntshika akambo wa kɔlɔ lo tshanda mɔtshi.

Nzambi ekɔ. Nde kokaka kohokamɛ oyadi etena keyɛ la pâ ndo la lonyangu. Nde nomɔlomɔka dia kɛna wɛ angɛnangɛna la lɔsɛnɔ l’etena kayoshila tâmu tayɛ ndo pâ yayɛ tshɛ.