Nyetsha ananyu

Lokaki mbakakonya Ngɛhazi l’elanyelo

ONDE wɛ atakombolaka ɛngɔ kɛmɔtshi lo yɛdikɔ y’efula?— a Naka eelo, kete aha wɛmɛ oto. Ko onde wɛ ayosala la wolo dia nkondja kɛnɛ kakombolayɛ lo mbuta kashi?— Ndooko. Onto lasala ngasɔ ekɔ kanga lokaki. Ɛsɔ tende woho wakalanyema pami kɛmɔtshi kelɛwɔ Ngɛhazi oma lo lokaki lande. Nde aki okambi waki Elisha laki ɔprɔfɛta waki Jehowa, Nzambi ka mɛtɛ.

Elisha nde la Ngɛhazi wakasɛnɛ edja efula, suke l’ɛnɔnyi kinunu la ntondo ka Yeso, Ɔnaki Nzambi mbotɔ la nkɛtɛ. Jehowa akakambe la Elisha dia nsala akambo wa diambo efula, mbuta ate dia nsala ahindo! Ɛnyɛlɔ Bible totɛka dikambo dia pami kɛmɔtshi k’ohomba efula kaki owandji w’alembe w’ase Suriya kaki la hemɔ ka kɔlɔ ka sudi. Ndoko onto lakakoke mbɔkɔnɔla, koko Elisha akɔkɔnɔla.

Etena kakakambaka Nzambi la Elisha dia nde nkɔnɔya anto hemɔ, nde konangaka nongola falanga. Onde wɛ mbeyaka lande na?— Nɛ dia Elisha akeyaka dia Jehowa mbakasalaka ahindo asɔ, koko aha oma lo wolo ande. Etena kakakɔnɔ Namana nde akangɛnangɛna dia mbisha Elisha weshasha wa fɛsa, wa paonyi ndo ahɔndɔ w’amɛna. Elisha konanga nongola kânga ɛngɔ ɔtɔi, koko Ngɛhazi akakombola weshasha ɛsɔ efula.

L’ɔkɔngɔ wa Namana ntshɔ, Ngɛhazi akôyele aha la mbutɛ Elisha. Etena kakandatondaka Namana, onde wɛ mbeyaka kɛnɛ kakawotɛ Ngɛhazi?— Nde akawotɛ ate: ‘Elisha kotomi oya le yɛ dia ndjokotɛ ɔnɛ angɛndangɛnda ahende wambokoma. Lâsɔ, nde ekɔ l’ohomba w’ahɔndɔ ahende woho wa nde mbisha apami akɔ.’

 Koko, ɔsɔ aki kashi! Ngɛhazi ndamɛ mbakakolonganya dikambo di’angɛndangɛnda ahende asɔ. Nde akate ngasɔ nɛ dia nde akalangaka nkondja ahɔndɔ wakalange Namana mbisha Elisha. Koko, Namana kombeya ɔnɛ ekɔ kashi. Diakɔ diakandasha Ngɛhazi weshasha l’ɔngɛnɔngɛnɔ tshɛ. Namana akasha Ngɛhazi diangɔ efula oleki ndo nɛ diakandɔlɔmbɛ. Onde wɛ mbeyaka kɛnɛ kakayotombaka oma lâsɔ?—

Etena kakakalola Ngɛhazi, Elisha akawombola ate: ‘Lende akiyɛ?’

Ngɛhazi akôkadimola ate: ‘Ndoko dihole.’ Koko Jehowa akasale dia Elisha mbeya kɛnɛ kakasadi Ngɛhazi. Ɔnkɔnɛ, Elisha akawotɛ ate: ‘Ɔnɛ bu etena ka nongola falanga ndo ahɔndɔ!’

Ngɛhazi akatɔsa falanga l’ahɔndɔ waki komonga wande. Ɔnkɔnɛ, Nzambi akasale dia sudi kaki Namana monga le Ngɛhazi. Oko le yɛ, wetshelo akɔna wakokaso nkondja oma l’ɔkɔndɔ ɔnɛ?— Wetshelo ɔmɔtshi wakondjaso ele hatohombe mbuta kashi.

Lande na kakakolonganya ngɛhazi ɔkɔndɔ wa kashi?— Ele nɛ dia nde aki kanga lokaki. Nde akakombola nkondja diangɔ diaki komonga diande, ɔnkɔnɛ nde akalange dikondja lo mbuta kashi. L’ɔtɛ wa dikambo sɔ, nde akadiɛnɛ la hemɔ ka kɔlɔ efula lo nshi yande ya lumu tshɛ yakatshikala.

Lo mɛtɛ, Ngɛhazi akadiɛnɛ la pâ kekina ka kɔlɔ efula koleki ndo sudi. Onde wɛ mbeyaka pâ kakɔ kɛsɔ?— Nde kombetawɔma nto le Nzambi nɛ dia nde komboka ngandji nto. Tatosalake pondjo dui diakoka tokonya diaha sho mbetawɔma le Nzambi! Koko, tonge la lɔsɛngɔ ndo tonge suke dia kahana l’anto akina diangɔ diele laso.

Adia lo Bible kayɛ

2 Nkumi ya Dikanga 5:5, 20-27

Judɛ 21; Joani 15:10

[Nɔte ka l’ɛse ka dikatshi]