Ambola w’oma le ambadi aso . . .

Onde Nzambi mbetawɔka ɔnwɛlɔ wa mfɔka?

▪ Onto lele l’otema w’ɔlɔlɔ mbeyaka mboka dimbola sɔ, lam’ele ndoko ɔlɛmbɛ lo Bible watɛkɛta di’ɔnwɛlɔ wa mfɔka. Onde dui sɔ mɛnyaka ɔnɛ kanyi yele la Nzambi lo dikambo sɔ yekɔ wolo nshihodia? Ndooko!

Bible mbutaka ɔnɛ: “Afundelo tshɛ wakafundama l’ɛlɔmbwɛlɔ ka nyuma kaki Nzambi.” (2 Timɔte 3:16) Afundelo wekɔ l’atɔndɔ wokɛma hwe ndo ɛtɛkɛta wɛnya woho wakombola Nzambi sho nkokɛ yônge yaso. Ntondotondo, nyɛsɔ tɔsɛdingole kɛnɛ kamboshola anyangiyangi lo kɛnɛ kendana la wâle wele l’ɔnwɛlɔ wa mfɔka lo demba di’onto. Oma lâsɔ, tayɔsɛdingola kɛnɛ kata atɔndɔ wa lo Bible lo dikambo sɔ.

Mfɔka ndanyaka yônge y’onto ndo tɔ kekɔ lo kiɔkɔ ya nyɔi yakoka anto mbewɔ. Lo États-Unis onto 1 l’anto 5 mvɔka l’ɔtɛ w’ɔnwɛlɔ wa mfɔka. Lo ndjela alapɔlɔ ɔmɔtshi w’oma lo dibuku Institut américain pour la prévention de la toxicomanie, lo wodja ɔsɔ, mfɔka ndjakaka anto efula ɔnɔnyi tshɛ oleki “wanu, didjoyadjoya diatona lɛɛta, andjakanyi, anto wayadiaka vɔamɛ, aksida wa mituka ndo hemɔ yele oko Sida.”

Wanɛ wanɔ mfɔka salɛka anto akina kɔlɔ. Ndoko wâle wakoka mbɛdikama la ɔnwɛlɔ wa mfɔka. Monga suke l’edinga wa mfɔka kokaka monga wâle le onto lahanɔ ndo pursa 30 y’anto mongaka lo wâle wa nkondja hemɔ ka kansɛrɛ ndo hemɔ ya l’otema. L’ɛnɔnyi weke ka mbeta, adɔkɔtɛlɛ wakashola wâle okina welɛwɔ ɔnɛ: “Wâle wa sato waya oma l’ɔnwɛlɔ wa mfɔka.” Tshɛkɛta shɔ nembetshiyaka mindo yatshikala l’ahɔndɔ, lo mushwara ndo l’ahole akina wakoma edinga wa mfɔka l’ɔkɔngɔ w’edinga akɔ nshishɔ. Mindo ya lɔlɛngɔ shɔ yekɔ la wâle w’efula, djekoleko l’alemba w’ana wakɛnda ndo yɔ kokaka mfukutanya timba tawɔ.

Mfɔka konyaka onto mfumbe katɔ. Tɔ konyaka wanɛ wayinɔ mfumbe ka mbekelo kalanya demba. Diakɔ diele anyangiyangi mbetawɔka dia ekɔ dui dia wolo le onto laya mfumbe ka mfɔka dia nde ntshika mbekelo kɛsɔ.

Ko ngande wɔtɔnɛ atɔndɔ wa lo Bible l’akambo asɔ? Lembetɛ awui wayela anɛ:

Nzambi nangaka sho nɛmiya lɔsɛnɔ. Lo Ɛlɛmbɛ wakasha Nzambi wodja w’Isariyɛlɛ, nde akɛnya dia wanɛ walanga mbɔngɛnyangɛnya pombaka nɛminya lɔsɛnɔ. (Eohwelo k’Ɛlɛmbɛ 5:17) Ase Isariyɛlɛ wakakaka lokombo l’omamu wa nsambe ndo wa mpele dia mvudu yawɔ. Lande na? Nsambe yaki ebamubamu ndo yakakimanyiyaka dia anto mbidjasɛ. Lokombo lakakokɛka ase nkumbo ndo anto akina diaha vɔ nkɔ oma lo shɔdi ya nsambe ko mpomɔ kana mvɔ. (Eohwelo k’Ɛlɛmbɛ 22:8) Lâdiko dia lâsɔ, ase Isariyɛlɛ wakahombaka ndjashikikɛ dia nyama yakawalongaka hayotosalɛ anto akina kɔlɔ. (Etombelo 21:28, 29) Onto la nnɔ mfɔka mɔnyɔlaka atɔndɔ wasukɛ ɛlɛmbɛ ɛsɔ. Nde ndanyaka yônge yande la lolango la nde hita. Ndo nto, ɔnwɛlɔ ande wa mfɔka ndanyaka yônge y’anto wôdingi.

Nzambi nongamɛka dia sho mbôka nde la wanyaso anto ngandji. Yeso Kristo akate dia ambeki ande pombaka nkitanyiya ɛlɛmbɛ ehende woleki weke. Vɔ pombaka nanga Nzambi l’etema awɔ tshɛ, l’etondo awɔ tshɛ, la timba tawɔ tshɛ ndo nanga anto akina woho wayalangawɔ. (Makɔ 12:28-31) Lam’ele lɔsɛnɔ lekɔ woshasha w’oma le Nzambi, onto la nnɔ mfɔka mɔnyɔlaka woshasha ɔsɔ ndo nde hoke Nzambi ngandji. (Etsha 17:26-28) Mbekelo k’onto ɔsɔ kokaka nsalɛ anto akina kɔlɔ k’efula, ɔnkɔnɛ nde hakoke mbuta ɔnɛ nde mbokaka asekande ngandji.

Nzambi tɔlɔmbaka dia mbewɔ mbekelo ya mindo. Bible mbidjangɛka Akristo dia vɔ ndjaɛdia oma lo “mindo tshɛ ya lo demba ndo ya lo yimba.” (2 Kɔrɛtɔ 7:1) Ɔnwɛlɔ wa mfɔka nanyaka demba di’onto. Wanɛ walanga ntshika ɔnwɛlɔ wa mfɔka dia ngɛnyangɛnya Nzambi mongaka l’okakatanu wa wolo. Koko, oma l’ekimanyielo ka Nzambi vɔ kokaka ntshika mbekelo kalanya demba kɛsɔ.